Conceyu Abiertu por Villaviciosa presentará una instancia contra’l “Fracking” nel Ayuntamientu

Conceyu Abiertu por Villaviciosa, como consecuencia de la so oposición a la práutica del “fracking” o resquiebra hidráulica nel nuesu conceyu, va a presentar na Casa Conceyu una instancia solicitando al Alcalde que lleve al prósimu plenu una declaración contra esa práutica, d’alcuerdu a lo dimpuestu nes Lleis 30/1992 de Réxime Xurídicu de les Alministraciones Públiques y del Procedimientu Alministrativu Común y 7/1985 Reguladora de les Bases del Réxime Llocal.

Nesi sen, dende Conceyu Abiertu por Villaviciosa buscamos un posicionamientu común de toles fuercies polítiques con representación nel nuesu conceyu, que permita formar non sólo una oposición ciudadana ante esta práutica, sinon tamién una oposición institucional dende’l nuesu Ayuntamientu p’aparar la posible aplicación d’esti métodu d’estraición nel nuesu territoriu.

 

Dende Conceyu Abiertu por Villaviciosa consideramos imprescindible que tolos partíos, axentes sociales, instituciones, etc. en rellación col nuesu conceyu amosen a les clares la so posición respeuto a esti tema, y por supuestu, consideramos qu’esa posición nun puede ser otra que la defensa del nuesu mediu natural, escontra los perxuicios que provoca’l “fracking”.

 

Creyemos qu’esta téunica, amás de perxuiciosa, nun va a traer riqueza de nengún tipu a Villaviciosa, nin económica nin llaboral, polo que los argumentos a favor d’esta práutica son bien custionables, ya insistimos en que’l nuesu conceyu tien que dir a la gueta de fórmules caltenibles y realmente efectives pa la xeneración d’actividá económica.