PSOE, internacionalismu y cuestión nacional

Tomás Gómez, secretariu xeneral del PSOE en Madrí, sentenciaba fai unes selmanes: “el nacionalismu y el socialismu son incompatibles; somos internacionalistes. Nun queremos fronteres”. Pela so parte, Vicente Álvarez Areces fai unos años dicía “que’l nacionalismu nun diba tener nenguna espresión significativa na política asturiana” argumentando que’l Pueblu Asturianu tenía “una visión amplia del mundu” y que yera un pueblu emigrante pero tamién receptor d’inmigración. Espresiones d’esti tipu en cabezaleros del PSOE hai munches y si entamara a citales toes nun acabaría enxamás esti artículu. Espresiones que contraponen el fechu de ser nacionalista col fechu de ser una persona tolerante colos inmigrantes o solidaria con otres causes nel mundu. Visiones que dicen ser internacionalistes y polo tanto refuguen de nacionalismos. O una cosa u otra, les dos enxamás xuntes.

Pues bien, dende llueu el qu’esto escribe nun-y presta pa nada’l nacionalismu burgués clásicu y si’l nacionalismu tien una definición “neutra” y dafechamente ausente de xacíu popular nun quier saber tampocu nada d’ello. La cuestión ye qu’esto del nacionalismu puede tener mil sensibilidaes dientru qu’ente toes pueden facer una y pueden dar un resultáu que tea alcordies d’una forma íntegra cola izquierda tresformadora, los intereses de la clas obrera o l’internacionalismu más sinceru. Quiciabes estos nun seyan postulaos nacionalistes propiamente dichos, sinon soberanismos revolucionarios o movimientos d’emancipación nacional, surdíos d’amestar el marxismu colos movimientos de lliberación colonial de mediaos del pasáu sieglu XX, anque los irlandeses, por exemplu, llegaron enantes a estes conclusiones, véase James Connolly.

Lo ciertu ye que’l Reinu d’España tien una riestra de condiciones y peculiaridaes propies. El procesu de construcción “nacional” d’España nunca foi sofitáu poles clases populares de los estremaos pueblos que conforme l’Estáu. Fueron les clases acomodaes les qu’empobinaron el procesu, pero la oligarquía españolista, col despotismu que la carauteriza, nin tan siquier quinxo tener el sofitu de los trabayadores nesti procesu de construcción del “Estáu-Nación”. Nun delegó parte d’esa responsabilidá hestórica nes clases populares polo que la conformación d’esa “identidá nacional” enxamás foi completa y fai qu’esa identidá coleutiva de tipu “español” podamos dicir que seya tovía más artificial y forciada de lo que podría ser de partía. Quiciabes esto desplique por que n’otros llugares d’Europa nun hai tantos conflictos nacionales como los qu’hai nel Estáu español. En resume, baxo’l mio puntu de vista, tenemos nel sieglu XVIII y XIX nel Estáu español una conformación del nacionalismu español más reaccionaria, déspota y totalitaria que n’otres rexones d’Europa, anque tamién hai casos piores.

Pues bien, anguaño, toos y toes sabemos lo qu’hai dientru l’Estáu español. En tolos pueblos del mesmu hai, con más o menos fuercia, movimientos que reclamen la soberanía nacional de los sos países, mayores cuotes d’autogobiernu, la creación d’un estáu propiu o l’entamu de procesos de tresformación social tomando como marcu d’actuación una nación ensín estáu. Hai movimientos empobinaos pola burguesía nacional de cada nación pero tamién hai movimientos que ñacen nes clases populares y respuenden dafechamente a los intereses del Pueblu Trabayador. Muncho ta falándose nestos tiempos del conflictu catalán, el cual ye bien paradigmáticu. Per un llau tenemos a CiU y Artur Mas, que gracies a les presiones de la burguesía catalana pa tener más influencia na Unión Europea, de la nueche a la mañana, tornáronse en soberanistes y falen hasta de la independencia. Per otru llau tenemos a les Candidatures d’Unidá Popular y tolo que llamen Esquerra Independentista con una trayeutoria de delles décades puxando pola independencia plena de los países catalanes y con un movimientu políticu de construcción popular d’un contrapoder nada sospechosu de ser claudicante énte’l capitalismu.

Vemos polo tanto que hai munches formes d’atalantar el tema de la cuestión nacional, l’autodetermín, el soberanismu, l’independentismu o’l nacionalismu en sí. Pueden ser movimientos que respuendan al interés xeneral de la clas trabayadora o pueden ser procesos y movimientos empobinaos polos mesmos de siempres pa caltener la so dominación socioeconómica nun país o territoriu concretu. Tornando al aniciu del artículu, que quiero centrar nel PSOE, vemos dos declaraciones de dos persones con poder nesi partíu que nun entienden esto. Nun entienden que nel Reinu d’España se puedan dar movimientos nacionalistes de dreches o izquierdes, burgueses o populares. Nun entienden nada que tea que ver con esta cuestión y p’aparar estes posiciones y reforciar la so postura y posición faen usu de frases y retóriques mui tradicionales d’una izquierda que deberíen d’entender, qu’anque tien de ser fiel a los sos principios o presupuestos teóricos de partía, ta en continua tresformación y qu’hai una serie de intereses qu’afeuten a les coses. Poro, falen con mensaxes que pueden paecer mui izquierdistes pero inoren la conceición dialéutica de Karl Marx, nun faen nengún tipu d’analis de clas d’estes cuestión, nel fondu suelten los mesmos mensaxes que la drecha pero con un llinguaxe “purista” d’izquierda. Si ye evidente, tamos falando del PSOE, que-yos vamos pidir nesti sen, val.

Pues bien, Tomás Gómez, pa defender y caltener la unidá d’España facía alusión al internacionalismu. Falabanos de qu’ellos son internacionalistes y socialistes y que polo tanto enxamás podrán defender postulaos nacionalistes, sinon que combatirán a los mesmos.
¿Qu’hai del internacionalismu nel PSOE?. Como dicía, Tomás Gómez ye un abanderáu del internacionalismu, al igual que’l so partíu. Pues mui bien, en bona hora van falar d’internacionalismu. Si tuvieran dignidá yá teníen qu’haber esborriao esa pallabra del so vocabulariu hai cuantayá. Pero toos y toes sabemos qu’aparte de nun tener dignidá nun tienen vergoña. Asina ye, estos moralistes d’izquierda quieren ponese d’internacionalistes pa combatir el “separatismu” dientru’l Reinu d’España. ¿Qué fai’l PSOE pol internacionalismu? Por supuesto que fai una cosa perbien: combatilu coles formes más criminales y represives.

El PSOE de Tomás Gómez, Felipe González, Rubalcaba, Zapatero, Areces y otros tantos corruptos, faigamos alcordanza, foi quien metió a l’Estáu español na organización terrorista más sangrina y espoliadora del mundu: la OTAN. Toos sabemos el nivel de cinismu que tuvo esi procesu dende’l PSOE, que defendió los mesmos postulaos que’l neofranquismu y la estrema drecha pero con cierta hipocresía que muncha xente tragó. El casu ye que’l PSOE foi el principal actor d’esi procesu d’integración del Reinu d’España na OTAN, instrumentu militar y de dominación social del imperialismu y l’orde capitalista a nivel mundial. Como non, nesti casu, supongo que los de Tomás Gómez nun antepusieron los intereses económicos de la rancia burguesía española a los del internacionalismu proletariu. Integrase nesta organización imperialista y militarista ye un fechu non solo internacionalista sinon tamién revolucionario, nel mundu de pantasía nel que vive esta xente.

De magar esi ingresu na OTAN hebo decenes de guerres imperialistes nes que, d’una forma u otra, participó la España del PSOE, guerres de rapiña onde lo que facíen y faen ye agredir a gobiernos soberanos y llexítimos y espoliar el másimu númberu de recursos que yeren entregaos a los distintos dueños d’esti Estáu neofranquista. Guerres onde sofitaben gobiernos golpistes y acribillaben a la población civil mentantu criminalizaben nel grupu Vocento o Prisa a otros gobiernos que taben sufriendo estes criminales agresiones. Asina furrula’l capitalismu modernu, l’imperialismu, eso si que lo sabemos si, pero asina furrula’l PSOE modernu tamién. Nun engañen a naide. Irán, Yugoslavia, Siria, Libia... son munchos los países que prebaron con bien de sangre y metralla l’internacionalismu proletariu del PSOE y los sos socios, garantes toos de la democracia, los drechos humanos y la paz mundial, por supuestu. Suponemos tamién que’l fechu de llantar bases norteamericanes en suelu del Estáu español tamién respuende a puxar pol internacionalismu y como non pol socialismu.

Tomás Gómez dicía qu’ellos nun queríen fronteres, bien, agora podemos entender el razonamientu. Nun quieren fronteres y por eso sofiten y son parte activa de les últimes guerres imperialistes. Claro, nun quieren fronteres como’l restu la burguesía. El PSOE nun quier fronteres pa que les grandes empreses españoles tean vía llibre por tolos continentes pa poder esplotar recursos y persones y pa qu’asina’l Bloque Oligárquicu Español vea medrar más y más los sos criminales beneficios. Esta idea nun tien, por supuestu, señores del PSOE, nada que ver colos primeros nacionalismos, reaccionarios y arcaicos, mui arreyaos al colonialismu... Los del PSOE tan avezaos a falar d’internacionalismu pa escuender una visión nacionalista mui cercana a la tradicional del franquismu y la burguesía fala de patriotismu y nación pa tapecer la so natura a acabar coles fronteres económicos y espardir la so dominación perdayuri. Unos y otros se complementen perbien nel so cinismu y unos y otros complementen perbien los sos intereses.

Nun quiero siguir dando exemplos de la praxis internacionalista tan singular que tien el PSOE. Nun fai falta, creo yo, tol mundu, d’una forma u otra va decatándose qu’estos señores del PSOE son los mesmos faches de siempre pero con otru collar. Nun ye ser simplismu o dicir burraes, quiero recordar a la xente que’l PSOE gobernó y gobierna nesti país bien d’años, al igual que gobernó bien d’años nel Estáu Español, demosando únicamente lo qu’acabo de dicir. La hipocresía y el cinismu que carautericen a los y les señorones d’esti partíu.

P’acabar con esto, por supuestu, enxamás veremos nos movimientos sociales a xente d’esi partíu-empresa. Refiérome a les manifestaciones polos presos políticos del Sáhara, a les que son escontra’l xenocidiu a Palestina, a les charres de solidaridá colos sindicalistes represaliaos en Colombia o a campañes internacionales polos drechos humanos. Nunca tan ehí, y miren que son internacionalistes. Nun participen d’esos movimientos sociales yá que ye nestos movimientos sociales onde se puede ver el braeru compromisu internacionalista de muncha xente y claro, ellos nun xueguen a eso. Por supuestu, tampocu van ser recibios nos movimientos sociales a estes altures de la vida, y meyor, claro ta. Eso si, el cinismu nesti sen tampocu desapaez, y anque nunca veamos a esta xentecalla en convocatories de calter internacionalista siempres podrán facer xestos de cara a la galería, como munches vegaes fixeron, por casu, cola tema’l Sáhara. Tamién, munches vegaes, criminalicen y reprimen la rempuesta social nesti sen, una vegada más internacionalismu del bonu.

Polo tanto esi ye’l nivel internacionalista del PSOE: un imperialismu apátrida pero qu’afita la grandeza de la unidá d’España. A esto, munchos llamaron socialfacismu y otros munchos lu llamaron “tar más perdíu qu’un pulpu n’un garaxe pero tener suficientes recursos pa caltenenos como casta parásita, corrupta y drechista nel poder”. Querramos denomalo d’una forma u otra tenemos que desmazcaritar al PSOE en tou momentu, nun baxar los brazos contra esti enemigu, que si m’apuren ye’l primeru, pues sirve de colchón ya instrumentu de contención social a la estrema drecha franquista qu’enxamás abandonó les estructures de poder nel Reinu d’España.

El nuesu país lleva 30 años sufriendo a estos señores d’una forma ininterrumpida, sistemática y xabaz. Llevamos 30 años enviendo como los que tarrecen tanto nacionalismu asturianu y quieren que s’afayen los inmigrantes persiguen a les persones ensín papeles, espulsen a les mesmes y dexen ensín industria nin trabayu a los inmigrantes estremeños que llegaron nel sieglu XX a Asturies, sobre manera a los fios d’estos. Estos son los de la mente abierta, l’internacionalismu contrapuestu al nacionalismu y los socialistes de tola vida. Estos parásitos tienen de salir de la poltrona yá. Tan fundiendo Asturies, ellos y les estructures qu’ellos representen y diseñaron colos asesinos de los sos güelos o padres.

Asina pues, como conclusión dicir qu’estos señores nun son naide pa dicir que non a un procesu d’autodetermín dientru l’Estáu español o fuera. Y lo que nun podemos facer ye pensar que’l PSOE defende la idea d’unidá d’España baxo unos criterios de izquierda. Yo, que personalmente nun atalanto que bona parte de la izquierda tea tan enfotada en siguir el camín de construcción d’una alternativa al capitalismu tomando como marcu d’actuación l’actual Estáu español. Nun voi creer a estos señores del PSOE nes sos argumentaciones, nin tan siquier entiendo como daquién d’izquierda daveres puede asimilar la idega d’España. Hasta ehí bien, pero de xuru que munches persones creen neses argumentaciones qu’empobina’l PSOE anque depués reconozan que dende llueu la so práctica diaria ye incoherente colos sos “principios”. Pero estes persones tienen de quitar la venda los güeyos y aceutar la realidá yá. El PSOE ye un partíu que va a la escontra de tolos intereses del Pueblu Trabayador y les naciones primíes, pensar otra cosa ye nun querer ver la realidá. Tenemos que carauterizar a los señorinos del PSOE como lo que son, los verdugos de la izquierda, los pueblos y los drechos sociales y nacionales de la clas obrera.

Polo tanto, la siguiente vegada qu’un españolista del PSOE retruque qu’ellos nun quieren reconocer el drechu d’autodetermín nin la dixebra de cachinos de la so amada España yá saben que decir vustedes. Recuerden a esa persona, señor/a X, el papel sociata pa col internacionalismu y les grandes aportaciones d’esi partíu a la llucha de clases moderna, la lliberación de los oprimíos y la soberanía y democracia popular de los pueblos. A ver que-yos dicen entós, a lo meyor pierden los papeles y entamen a canciar el Que viva España de Manolo Escobar, que ye lo que-yos pega más, tan pocu nacionalistes qu’ellos son... A lo meyor tamién, por que toos deberiemos faer crítica o autocrítica, cambien d’opinión, anque difícil. Y más viendo qu’esti artículu podría tar dedicáu a los d’Izquierda Unida, cuyo españolismu nun ye mui distintu y que lleven bien d’años mirando haza otru llau énte tolos crímenes y atropellos del PSOE, cuando non siendo cómplices.

N’Asturies, como dicen los cubanos, tan sospechosos de dir a la escontra’l socialismu y l’internacionalismu: PATRIA O MUERTE.

Artículu de Xosé A. González. Espublizáu en www.glayiu.org