"Xornales y pensiones dignos. En defensa de slos servicios públicos".
Con salida na Estación del Norte d'Uviéu a les 6 de la tarde, los sindicatos asturianos que representen nos sos ámbitos a miles d'emplegaos públicos del ámbitu de l'alministración, de la sanidá, de la xusticia y de la educación, van cellebrar el próximu miércoles a les 6 de la tarde una manifestación pa espresar la so más atayante refugu a les midíes d'axuste que'l gobiernu pretende aprobar.
"Estes midíes pretenden culpar a los emplegaos públicos y a los pensionistes de la situación económica y faer que sían ellos los paganos d'una crisis na que nun tienen nenguna responsabilidá" denuncien na convocatoria.
Pa los sindicatos, "Los retayos en materia de servicios públicos que s'anuncien y que n'Asturies yá tamos careciendo son la otra cara de la moneda d'una política errática que se somete a los dictaos d'organismos internacionales empeñaos en desfamar los servicios públicos y en favorecer la externalización y privatización d'esos mesmos servicios.
Los sindicatos fain un llamamientu a tol personal emplegáu públicu y a tolos pensionistes la so esixencia de retirada d'eses midíes que van suponer un "empeoramientu de les condiciones llaborales y una amenorga brutal de l'atención a la ciudadanía de la que los servicios públicos son garantes".
Esta ye la primer respuesta urxente de calter xunitariu que s'adopta n'Asturies pero non la postrera. Los sindicatos comproméntense a siguir convocando movilizaciones "tantu sectoriales como xenerales hasta que'l gobiernu retire unes midíes que perxudiquen gravemente al conxuntu de la sociedá y amuesen un peligrosu camín d'esmantelamientu del llamáu estáu del bienestar".
Fonte: Infoasturies.
