Leición d'Engels.

Aplicable a les fuercies d'inseguridá que tan viniendo estos díes a reprimir y perseguir al Pueblu Trabayador Asturianau, nuna situación que ye cuasi d'ocupación militar. ¡Colen d'Asturies policies españoles! ¡Col tolete nun van amedrentar a naide!

Un programa de radio va informar sobre les noticies del movimientu de reivindicación llingüística

Delles emisores van incorporar a la so programación un espaciu que va informar sobre l’actualidá del movimientu de reivindicación llingüística. Iniciativa pol Asturianu promueve esti programa que tamién va poder sentise per Internet.

‘Iniciativa pol Asturianu nes ondes’ ye’l nome que va llevar esti programa mensual d’una hora de duración del que va ser responsable Samuel Gradín, periodista con una esperiencia amplia tres el so pasu per La Voz de Galicia y la RPA. Nél van dase a conocer toles noticies d’actualidá del movimientu de reivindicación llingüística y de les actividaes qu’entame la organización que trabaya na normalización del idioma. Tamién va haber sitiu pa entrevistes, música y una seición p’aprender asturianu.

Les emisores que van sumar esti espaciu a la so programación son, de momento, Radio Sele, Radio Ujo y AllerFM, anque se mantienen negociaciones con otres cadenes radiofóniques pa tratar de llegar a la mayor audiencia posible. Amás, tamién van colgase los programes n’Ivoox pa la so escucha o descarga. Tovía nun se conocen los horarios del primer ‘Iniciativa pol Asturianu nes ondes’, que va incluyir una entrevista a Inaciu Galán, presidente de la organización, que va falar de los seis primeros meses de vida d’Iniciativa pol Asturianu; y otra a Denis Soria, vocal de dominiu llingüísticu, que va tratar sobre les rellaciones entamaes con otros coleutivos de Lleón, Zamora y Miranda do Douro.

FONTE: Asturies.com

Nuevu documentu na biblioteca, nesti casu del MCA

La Biblioteca Dixital  del blogue Frayando Cadenes cunta con otru nuevu documentu, nesti casu, del Movimientu Comunista d'Asturies, concretamente del Comité de Xixón. El documentu ye d'abril de 1977 y ta entituláu "Asturies nagua pola llibertá". El documentu nun tien gran valor hestóricu nin políticu, pero sirve p'asitiar la posición d'esti partíu nel periodu de la "pre-autonomía".

Nesti sen, y al rodiu del MCA, una fuercia política estatalista pero que caltuvo ciertu grau de compromisu cola cuestión nacional, asperamos poder ufrivos nun futuru documentos importantes d'esti coleutivo dixitalizaos. Pel momentu, ehí vos dexamos en formatu PDF esi mensaxe del MCA a la sociedá asturiana y xixoniega respeutu a la autonomía d'Asturies.

Fracasa la reunión con Industria y los sindicatos convoquen una fuelga xeneral nes Cuenques pal 18 de xunu

Nun hubo nengún avance na reunión d’esti miércoles 6 de xunu nel Ministeriu d’Industria pa tentar d’iguar el conflictu que vive la minería. Los responsables ministeriales comunicaren a los sindicatos que namás diba poder participar na reunión un representante de cada central: Víctor Fernández (FITAG-UGT) y Juan Carlos Álvarez Liébana (CC OO). Nes reuniones anteriores de siguimientu del Plan del Carbón pudieren acudir munchos más representantes sindicales y entós los nueve que foren decidieron encadenase na rexa del Ministeriu. A la fin, la Policía identificó a los sindicalistes y cortó les cadenes.

A la reunión col secretariu d’Estáu d’Enerxía, Fernando Martí, sí acudieron los cuatro representantes de Carbounión, la patronal privada del sector, anque tamién ensin resultaos. El Gobiernu de Rajoy sigue diciendo que nun hai un euru más p’ayudar a la minería.

Les uniones comarcales d’UXT y CC OO anunciaron la convocatoria d’una fuelga xeneral pal día 18 de xunu nos valles mineros, igual que fixeron nos conceyos mineros d’Aragón y Llión. De toles maneres, les protestes van siguir. La xornada del miércoles n’Asturies foi de les más conflictives, con sesenta cortes de carreteres que, sumaos a la fuelga indefinida del tresporte, provocaron un problema circulatoriu seriu. Les concentraciones feches esti miércoles tanto en Mieres como nos pozos Candín y Santiago, onde siguen enciarraos los mineros, valieron pa llanzar mensaxes de que la llucha del sector va ser llarga y dura y que va ser menester que los valles mineros y toa Asturies apoyen estes movilizaciones.

FONTE: LES NOTICIES

El gobiernu pravianu del PSOE anuncia la privatización del augua

Pesie a la oposición mayoritaria nel conceyu.

Antonio de Luis Solar, alcalde del PSOE nel conceyu de Pravia, anunció que'l so equipu de gobiernu ta trabayando yá na realización del pliegu de contratación pa la privatización del serviciu d'agües del conceyu, mediante la concesión en concursu públicu durante un periodu de 25 años, nos qu'una empresa privada algamará'l control d'un recursu natural básicu pa la población como ye l'augua potable. A cambiu d'ello, l'Ayuntamientu recibirá un canon económicu.

La midida propuesta pol PSOE cunta cola oposición del restu de coleutivos políticos y sociales, como IU, PP, FAC o la Federación d'Asociaciones de Vecinos de Pravia, fechu que nun impidió al PSOE siguir alantre con una midida puesta en práutica n'otros Ayuntamientos gobernaos pola FSA, onde un pequeñu garrapiellu d'empreses averaes al partíu tienen el control del suministru d'augua.

La Semiente asoleya un comunicáu de sofitu a la llucha obrera n'Asturies

Comunicáu del Centru Social Autoxestionáu.

El CSA La Semiente vien d'asoleyar un comunicáu aprobáu n'asamblea, nel qu'amosen "apoyu a la llucha de tolos colectivos en conflictu pola defensa de los sos drechos y condiciones llaborales, faciendo especial mención a la minería y el tresporte, que n’estos díes caltienen una fuelga indefinía". De la mesma mena, denuncien "l’actitú del gobiernu de negase a una negociación seria y sin torgues p’algamar la solución d’estos conflictos, obligando a los colectivos afectaos a llegar a estes midíes estremes".

Tamién critiquen "la criminalización y represión de la llucha obrera, manifestando'l nuestru apoyu a dichos colectivos en conflictu pa que defiendan les sos reivindicaciones llevando a cabu les acciones que crean necesaries, colos métodos que consideren oportunos".

Nel so testu tamién señalen "al sistema lliberal-capitalista como responsable de la conflictividá social que tamos viviendo, y desiximos de los poderes públicos un cambiu d’actitú pa coles xustes protestes obreres y ciudadanes frente al retrocesu económicu y social al que nos vemos abocaos por culpa de tal sistema", al tiempu que desixen "a restauración inmediata del fluxu de fondos públicos destinaos a sanidá, educación y servicios sociales, asina como de los fondos destinaos al desarrollu de comarques económicamente deprimíes, como ye’l casu de los Fondos Mineros, aporfiando con especial enfotu en que dichos fondos se xestionen con tresparencia y xusticia pa evitar la corrupción y el despilfarru a los que, por desgracia, tamos tan avezaos".

Pa finar, animen a la xente "a salir a la cai pa defender lo que ye suyo, cola conciencia clara de que’l problema d’un colectivu ye’l problema de toa la ciudadanía, y que solamente con unidá y apoyu mutuu podremos evitar los abusos d’esti sistema perversu".

FONTE: Infoasturies

Los profesores interinos entamarán fuelga indefinida dende'l llunes

Nuevu coleutivu obreru asturianu en fuelga indefinida.
L'Asamblea de Profesores d'Interinos d'Asturies alcordó nuna asamblea cellebrada nel uvieín IES Doctor Fleming l'entamu d'una fuelga xeneral de calter indefiníu dende'l prósimu llunes 11 de xunu, como rempuesta a los previsibles despidos de cientos o incluso miles de profesores interinos de cara al cursu 2012/2013 tres l'anunciu de l'aumentu de xornada pal restu de profesores.

Poro, l'Asamblea d'Interinos, compuesta por unes 2.500 persones, anunció que nes prósimes feches radicalizará dafechu les sos movilizaciones, porque nel mes de setiembre sedrá mui tarde. Ye por ello que xugarán les sos cartes a lo llargo de les prósimes selmanes, y la convocatoria de fuelga indefinida ye'l primer pasu.

FONTE: Infoasturies

Los mineros intensifiquen la so llucha na cai

Más de venti carreteres cortaes na xornada de güei.
El coleutivu de mineros y mineres afrontaron la enésima xornada de fuelga indefinida, tornando a cortar les carreteres tres concentrar ayeri les sos aicione n'el puertu d'El Musel. Asina, más de venti carreteres, incluyíes les principales víes de comunicación, tantu dientru d'Asturies como col esterior, foron cortaes güei a lo llargo de la mañana en zones el centru, l'occidente y l'oriente d'Asturies, siendo destacables les aiciones n'A-66, l'AS-111, la N-630, N-625, l'A-8 en Villaviciosa o les AS-15 y AS-215 en Tinéu, amás del corte fechu polos mineros lleoneses na Madalena, y el corte d'una vía de FEVE na llinia Xixón-Llaviana.

Nun hebo grandes incidentes nin deteníos, nuna xornada carauterizada pola llucha ensin grandes confrontaciones coles fuercies policiales, más alló de les avezaes nesti tiù de movilizaciones, que dexó un día más la so marca en tol territoriu asturianu, xunto a les aiciones de los tresportistes, que dexen un panorama de combatividá y llucha del que yá dieron cuenta importantes medios de comunicación d'estaos como Reinu Xuníu o Estaos Xuníos, demientres que nos medios estatales la tónica xeneral ye de silenciu.

Sindicalistes s'encadenen en Madrí.

Un total de diez sindicalistes entamaron güei pela tarde un encadenamientu na puerta del Ministeriu d'Industria, como forma de protesta ente la "intransixencia del gobiernu" nel desendolcu del aconceyamientu previstu pa les 17:00 con motivu de la Comisión de Seguimientu del Carbón, a la que finalmente sólo acudió la patronal.

Amás d'ello, como ye lóxico, los sindicalistes, ente los que s'atopen los cabezaleros del SOMA y CC.OO, protesten polos recortes de fondos estatales que suponen el zarru programáu de la minería, y amosen la so intención de tar ellí "hasta que'l gobiernu quiera tornar a negociar".

En cuantes a los mineros acampaos n'Uviéu, siguen cola so aición de protesta delantre de la Delegación de Gobiernu, lo mesmo que los diez mineros enzarraos nos pozos Candín y Santiagu.

Conceyu Abiertu espublizó les bases pal so I Conceyu Nacional

Procesu abiertu a tol pueblu asturianu.
Tres l'anunciu de la cellebración del I Conceyu Nacional el prósimu día 30 de Xunu nel salón d'actos de la casa la cultura d'El Berrón de magar les 10 de la mañana, la organización política Conceyu Abiertu vien d'espublizar les normes y bases polítiques y organizatives rellatives al Congresu Nacional, onde cualquier ciudadanu y ciudadana puede participar de mena llibre y abierta.

Nes normes queden afitaos importantes aspeutos como los plazos pa presentar enmiendes, asina como les condiciones necesaries pa qu'estes puedan ser aldericaes nel I Congresu Nacional. En cuantes a les bases organizatives, estes toquen estayes como la cadarma organizativa, la estaya económica o aspeutos como la imaxe o la estratexa.

Pa consultar les "Normes de Participación", CALCA EQUÍ.

Pa consultar les "Bases Organizatives", CALCA EQUÍ.

Pa consultar les "Bases Polítiques", CALCA EQUÍ.

FONTE: Infoasturies

Entrevista a Antonio Torres, secretariu xeneral del partíu Andalucia Comunista

Dende'l blogue asturianu Frayando Cadenes falemos con Antonio Torres, secretariu xeneral del partíu Andalucía Comunista, partíu que tien yá dos años d'andadura. Depués d'esos dos años y d'esclariar posiciones y afitar una bas social y organizativa fuerta miren dende Andalucía Comunista anguañu al so inminente Primer Congresu. Quisimos falar col so secretariu xeneral, Antonio Torres, alredor d'aspeutos referíos al partíu, a Andalucia o a la situación global que tamos sufriendo a consecuencia de la barbarie capitalista.

- En primer llugar, ¿Qué ye Andalucía Comunista y por qué'l so nacimientu?

Andalucía Comunista ye un partíu comunista marxista-leninista andaluz. Dende'l nuesu puntu de vista, un partíu comunista nuna nación primida como l'andaluza hai de tener como primer oxetivu, esto ye, como oxetivu estratéxicu fundamental pa construyir el socialismu y el comunismu, la llucha pola lliberación nacional, pol autodetermín y la soberanía nacional.
El por qué de la nacencia d'Andalucía Comunista desplícase pola ausencia d'un partíu comunista qu'asitiara la llucha pola soberanía nacional andaluza nel so llugar. O bien atopábamos con partíos comunistes entamaos a nivel estatal qu'o negaben la esistencia del fechu nacional andaluz o lu minimizaben, o bien con partíos o organizaciones qu'asitiándose inclusive na esquierda revolucionaria defensora de los derechos nacionales d'Andalucía teníen múltiples referencies ideolóxiques. Pero non sólo eso, Andalucía Comunista nació cola vocación de ser un partíu de cuadros comunistes que participen viviegamente nel movimientu obrero y popular, nes sos distintes espresiones organizatives construyendo na midía lo posible poder obreru y popular, dándo-y un sentíu dialéuticu al centralismu democráticu, ameyorando formes y estilos de trabayu, cincando enforma na formación ideolóxica de cuadros comunistes, etc. A última hora, queríamos superar munchos clixés y estereotipos que tienen prindaos a munchos partíos comunistes y que se suelen traducir na práutica n'esviaciones drechiegues o izquierdistes, sigún les circunstancies, ya igualmente, intentar imprimir nueves formes y estilos de trabayu serios y sistemáticos nel senu del movimientu obrero y popular andaluz y nel conxuntu de la esquierda política soberanista andaluza.
- Cómo se pue apreciar, tais entamando'l vuesu primer Congresu. ¿Qu'asperáis d'esti congresu y con qué espeutatives llegáis?

Del nuesu prósimu Congresu asperamos dar un pequeñu saltu nel sen organizativu, somos modestos y nun mos carauterizamos por vender fumu a la clas obrera, pero esi saltu por pequeñu que sía va ser bien significativu y va dar los sos frutos más ceo que tardi consolidando y estructurando al partíu. Hai de tener en cuenta que tenemos 2 años escasos d'esistencia como partíu, por agora nun podemos aspirar a reblincones; per otru llau, nesti Congresu vamos llanzar definitivamente'l nuesu programa políticu, agora mesmu trabayamos en borradores que los distintos órganos del partíu van aldericando nos sos ámbitos al empar que tratamos de recoyer aportaciones y suxerencies d'organizaciones y persones ayenes al partíu. Tamién vamos aldericar la nuesa llínia política cientrada nes alliances que tamos calteniendo coles mires de construyir un bloque soberanista d'izquierdes.

Nun creemos qu'el MLNA tea nuna fase embrionaria, a lo menos non nel so conxuntu. El MLNA entendíu d'una manera amplia ta formáu en dellos casos por organizaciones que cunten con años de llucha y esperiencia a los sos llombos en distintos ámbitos, con una madurez política y organizativa nada refalgable. Más bien, pensamos qu'el MLNA tuvo un desendolcu bien desigual y desterciáu que fai que sía percibíu como feble o escasamente enllantáu. Por casu, nel senu del MLNA pueden encuadrase esperiencies esitoses y madures como les del SAT (Sindicatu Andaluz de Trabayadores) o, nel terrén xuvenil, Jaleo!!! o JIRA, sicasí, nel terrén de la defensa de la nuesa cultura y señes d'identidá hai muncha dispersión, igualmente, tamién n'otros ámbitos como na defensa del mediu ambiente, la solidaridá internacionalista, el movimientu vecinal, etc., hai un escasu desendolcu habiendo tamién munches diferencies según les llocalidaes o comarques. El retu d'afitar un ampliu y sólidu movimientu popular andaluz de lliberación antóxase difícil pero a les clares necesariu pa construyir el poder obrero y popular soberanu andaluz.

- ¿En qué xeres ta involucráu'l vuesu Partíu anguañu?

Bonu, les xeres fundamentales del partíu ciéntrense na participación nes organizaciones del movimientu obrero y popular andaluz, trabayando pol so afitamientu y coordinación, superando visiones curtioplacistes y parciales. Andalucía Comunista piensa que les organizaciones del movimientu obrero y popular andaluz han de ser el xerme del nuevu poder soberanu, esto ye, del Estáu socialista andaluz. Igualmente, nun dexamos les xeres internes como ye la organización del nuesu primer Congresu, enantes mentáu, la estensión territorial, o les nueses Escueles de Formación. Y como non, el nuesu trabayu na Mesa Andaluza de la Izquierda Soberanista (MAIS), xunto otros partíos y organizaciones, pa consolidar un referente políticu xunitariu soberanista d'izquierdes.

- ¿Cómo entendéis la cuestión nacional andaluza? ¿Cómo la entendéis nel restu del Estáu Español?

Entendemos la cuestión nacional andaluza dende'l materialismu dialécticu y el materialismu hestóricu, ¿qué quier esto dicir? Que desterramos toa visión idealista y fuera del desenvolvimientu históricu y de la llucha de clases de la nación andaluza. La conformanza d'Andalucía como nación ye frutu d'un desendolcu hestóricu peculiar, esi mesmu desenrrollu ye'l que configuró a Andalucía como una nación primía, dependiente, sodesenrrollada y espoliada, especialmente col desendolcamientu de la manera de producción capitalista nel Estáu español y col papel asignáu a Andalucía nesi desenrrollu, anque tamién habría de remontase al procesu de conquista de los reinos cristianos peninsulares, encabezaos per Castiella, d'A'l Andalus. Como comunistes, atopamos con esa realidá que nun podemos resalvar, esto ye, cola esistencia d'una nación primía no económico, políticu y cultural, con tou lo qu'ello porta na so globalidá: un marcu específicu de la llucha de clases. Poro, consideramos que la revolución socialista equí y agora implica la lliberación nacional. Ensin lliberación nacional nun puede haber revolución socialista. Al empar, consideramos que la nación andaluza nun ye una astracción, esisten distintes clases sociales, en concretu, n'Andalucía esiste una clara mayoría social primía, lo que venimos denominando como pueblu trabayador andaluz, conformáu fundamentalmente pola clas obrera y por otros seutores sociales trabayadores primíos, colo cual, en realidá, si dexamos d'astracciones, lliberar a Andalucía significa lliberar a esa mayoría social de la opresión y la esplotación que sufre.

En cuantu al Estáu español, como desplicamos enantes, la cuestión nacional surde principalmente col desendolcu del capitalismu, anque tamién cabría remontase a momentos anteriores pa una meyor y mayor comprensión. El desendolcamientu del capitalismu traxo consigo una repartía territorial del trabayu dando llugar a l'acentuación de distintes realidaes sociales (nacionales), tamién dio llugar a la formación de burguesíes nacionales y a una poderosa oligarquía española conformada pola alianza de la gran burguesía terrateniente andaluza y sectores o fracciones de les burguesíes industriales y comerciales vasques y catalanes, fundamentalmente.

- Ta siendo noticia la represión que ta sufriendo'l sindicalismu de clas andaluz. ¿Tenéis dalgún referente sindical fixu?

Por supuestu, tenemos un referente sindical claru: el Sindicatu Andaluz de Trabayadores (SAT), pesie les sos faltes y deficiencies en distintos aspeutos, nós trabayamos y vamos siguir trabayando nel SAT. Militantes del partíu nel so momentu s'implicaron n'Asamblea Constituyente del SAT en setiembre de 2007 y n'actualidá hai militantes del partíu exerciendo distintos cargos de cierta relevancia nel SAT.

Tocantes a la represión de la que ye víctima'l sindicalismu andaluz de clas representáu pol SAT, pensamos que ye una consecuencia lóxica de, per un llau, un sindicalismu que nun se viende y qu'entiende que la llucha ye l'únicu camín consecuente pa defender los derechos de los trabayadores, y por otru, de la natura esencialmente represiva y antidemocrática del Estáu español nacíu de la muerte de Franco y de la Constitución de 1978

- Falando de sindicalismu, dalgunas organizaciones comunistes consideren qu'entá ye importante trabayar dende la bas de los sindicatos capitalistes para tresformarlos, siguiendo una másima del camarada Lenin.¿ Creeis que nel Estáu Español acabó'l tiempu de esa estratexa y se ha d'optar pol sindicalismu combativu, de clas y nacional?

Creemos que nesti sentíu nun esiste tal másima de Lenin tal que dicís, siquier como másima de “obligáu cumplimientu”. Desplicar esto puede llevanos abondu tiempu y espaciu, pero pa resumir habría de ver si podemos asimilar esos sindicatos reformistes de los que falaba Lenin na Europa occidental de la primer década del sieglu XX colo que güei son nel Estáu español CCOO y UXT, esa ye la cuestión que bien pocos s'aparen a analizar prefiriendo esa vagancia mental propia de dogmáticos o d'oportunisttes que nada tien de leninista, d'asimilar situaciones y circunstancies como si nada. Nel momentu qu'un sindicatu dexa de ser de clase, combativu y nun tien en cuenta les distintes realidaes nacionales dexa de ser una ferramienta válido, ye más, dexa de tener xacíu como organización pa la defensa de los intereses de los trabayadores pa convertise n'otra cosa, por casu, nuna institución del Estáu. El sindicalismu tien les sos llimitaciones, la primera d'elles ye la de tar bien mediatizáu pola llucha por intereses económicos inmediatos, somos conscientes de que nun-y podemos pidir a un sindicatu, por mui sociopolíticu que sía, qu'exerza de partíu políticu revolucionariu, pero una cosa ye eso y otra bien distinta ye yá nun cumplir esos mínimos de defensa intransixente de los intereses de los y les trabayadores, como asocede con CCOO y UXT.

- ¿Participáis na llucha pola III República Española? ¿Consideráis qu'un proyecto español, del tipu que sía, puede tener garantíes revolucionaries y que dean a los pueblos el so drechu a decidir?

Non, nun participamos na llucha pola III República española, consideramos, con toos los nuesos respetos por quienes lluchen por esa III República española, qu'esa llucha por sigo mesma nun ye garantía de nada. Vamos ver, como marxistes-leninistes tratamos de rellacionar dialécticamente dos cuestiones: una, el drechu a l'autodetermín y soberanía de los pueblos primíos, y la otra, la unión llibre y voluntaria de los pueblos, por tanto, de lo que se trata ye d'aplicar esos principios. Nun se trata tantu d'un proyectu español como de daqué muncho más importante y que tresciende a esi proyectu, pensamos que si de verdá s'apliquen estos principios el proyectu español dexa de tener sentíu. Asocede tamién que determinaos partíos comunistes tán encegolaos col marcu estatal español ensín contemplar namái, forciando la esistencia sí o sí d'un proyectu español. Nun negamos qu'esiste un Estáu español con tou lo qu'eso significa no político o xurídicu, tamién somos internacionalistes y tamos dimpuestos a estrechar relaciones con partíos y organizaciones revolucionaries del Estáu español, sían d'ámbitu estatal o nacionales, pero eso nun quier dicir que teamos por un proyeutu español, sinón pola xunidá llibre y voluntaria de los pueblos, sían del Estáu español o non.
- Nuna entrevista que realizamos al blogue "Universo Andalucista" fai ya un tiempu, nos apuntaben una realidá nel soberanismu andaluz d'izquierda, el problema de la multitú de siegles. ¿Compartís qu'hai una gran "sopa de lletres" nel soberanismu andaluz? Nesi casu, dende una óptica marxista-leninista ¿Qué solución proponéis pa salvar esa situación y crear un referente coherente pero tamién masivu?

Sobre la “sopa de lletres”, puede contemplase como un tarrecible problema o como lo que realmente ye: la espresión de distintes concepciones polítiques ya ideolóxiques. Eses diferencies nun tienen que ser en principiu un problema y tienen de ser contemplaes con naturalidá. Si tenemos esta visión natural, esi tarrecible problema atopa solución: la creación de preseos políticos xunitarios, ensín que naide arrenuncie a les sos posiciones ideolóxiques nin siquier a la so organización. Ello ye qu'esi preséu xunitariu ta conformándose yá cola Mesa Andaluza de la Izquierda Soberanista (MAIS) de la que formamos parte. Nós enxamás vamos arrenunciar a tar organizaos como partíu comunista andaluz, naide puede pidinos esi tipu d'arrenuncios, pero al empar, tenemos el deber y la responsabilidá histórica de crear esi bloque o frente políticu pola lliberación nacional y social d'Andalucía, actuando con respetu, llealtá y compromisu. Falar de revolución ye falar d'aliances, asina foi y asina paez que va siguir siendo.

- Pasando a un nivel más internacional. ¿Creeis que nesta'l capitalismu pue cayer? ¿Considerais que tamos más cerca del socialismu güei qu'hai 10-8 años?

El capitalismu ta cayéndose dende va munchos años poles sos propies contradicciones internes. Lloñe de les desplicaciones de la burguesía o d'esa pequeñaburguesía socialdemócrata o keynesiana tan de moda que nos unvíen a términos como “crisis financiera”, esta ye una crisis del propiu furrulamientu de la manera de produición capitalista que nos lleva a la cayía tendencial de la tasa de ganancia, desplicada maxistralmente por Marx, y ta rellacionada cola crisis de los años 70 de sieglu pasáu, siendo hasta ciertu puntu y a les traces un allargamientu de la mesma. La burguesía y la socialdemocracia preséntennos les consecuencies como causes confundiendo a la clas obrera y al pueblu. Les teoríes del derrumbe del capitalismu siempres fixeron correr ríos de tinta dende antiguu: Bernstein, Tugan-Baranowsky, Bauer, Kautsky, Lenin, Rosa Luxemburgu, Grossman, etc., enfrentándose de frenti'l marxismu como teoría pa la revolución col revisionismu y el reformismu. La cuestión foi asitiada nos sos xustos términos nel so momentu: al capitalismu hai que faelo cayer, esi ye l'inquiz de la cuestión, lo que nos lleva a la cuestión de la organización y a la llucha que tien de desendolcar la clas obrera y los seutores populares primíos y les sos xeres polítiques.

Ver les coses en términos de si agora tamos más o menos cerca del socialismu que fai 8 o 10 años paeznos pocu seriu. Pa nós facer esi tipu de plantegamientos ye hasta ciertu puntu asitianos fuera de la realidá. El fechu de pensar que porque esiste una puxanza de les protestes o una mayor conflictividá social yá tamos asitiando más cerca del socialismu ye puru idealismu, ye más, nin siquier la esistencia de Cuba o Corea socialistes o d'esperiencies de países con réximes antiimperialistes y progresistes fáennos automáticamente tar más cerca del socialismu, a pesar del valor de toes eses esperiencies y de la nuesa defensa de les mesmes. Del socialismu y del comunismu vamos tar más cerca si somos capaces de dir creando'l poder obreru y popular que destruya'l poder de la burguesía na fase imperialista, nesi sen, esisten munches diferencies y matices según los países. Malcolm X dicía que'l poder solo recula ante'l poder, pa construyir el socialismu tenemos d'acabar, en primer términu, col poder político de la burguesía y eso solo podremos facelo con poder, yá que como dicía Lenin, salvo'l poder tou ye ilusión y ye ciertu, amás construyir el nuevu poder obreru y popular nun ye xera fácil y ye entá más complicáu que derrocar el poder político de la burguesía. Per otru llau, somos comunistes, el socialismu nun ye nengún ideal nin nengún paraísu nin nenguna meta en sí mesma, carauterizamos el socialismu como la primer fase na construcción d'una manera de produición, especialmente d'unes relaciones sociales de producción, distintes y superiores al capitalismu, esto ye, el comunismu. Nel socialismu hai llucha de clases, nun lo escaezamos nunca, y esa llucha puede ser feroz, yá que siempres esiste la posibilidá de “dar marcha tras”, los exemplos de la URSS, les democracies populares del Este européu o China tienen de sirvinos de daqué.

- Pa zarrar, ¿que perceición teneis de la nuesa nación, Asturies,y de la so situación política, socioeconómica y nacional? ¿Conoceis les lluches llevaes a cabu por movimientos políticos y sociales nel nuesu país? ¿Teneis algún tipu de relación con dalguna organización soberanista y revolucionaria asturiana?

Vemos Asturies como un país fuertemente cutíu pola crisis del capitalismu, especialmente nos seutores claves de la so economía, ensin poder políticu pa facer frenti a les agresiones del capital. Reconocemos la esistencia d'unes clares señes d'identidá asturianes que lóxicamente respetamos y que merecen una consecuente defensa. Per otru llau, el movimientu comunista nel Estáu español non puede entendese ensin Asturies, ensin la so combativa clas obrera, sobremanera los mineros, y ensín comunistes asturianos de la talla de Juan Ambou, por poner un exemplu. N'Asturies, reparamos esperiencies sindicales bien interesantes y cercanes como ye'l casu de la CSI, militantes del nuesu partíu nel so momentu formaron parte d'esi movimientu de solidaridá que se desendolcó col procesamientu de los sindicalistes Cándido y Morala. Anguaño, nun tenemos relaciones con organizaciones polítiques asturianes, ensin dulda una falta que tenemos de cubrir.

-Namái davos el nuesu más fondu agradecimientu por concedenos esta entrevista y dende Asturies davos munchu aliendu y enfotu a la vuestra llucha.

Bien de gracies pola vuesa entrevista y recibíi un fuerte abrazu comunista dende Andalucía.

#PecheOurense

Exemplu de llucha de la mocedá pol socialismu y la lliberación nacional dende Galicia.

ALSA criminaliza a los fuelguistes del tresporte pola quema d 'un autobús

Entamen les criminalizaciones pola fuelga nel tresporte.
Un autobús de la empresa ALSA apaeció quemáu xunto al domiciliu del so conductor nel conceyu de Valdés, señalando rápidamente la compañía como causa la fuelga nel tresporte que previsiblemente -salvo alcuerdu d'última hora nes caberes negociaciones- entamará na medianueche. Demientres tantu, les causes reales del fechu son desconocíes, polo que tamos ante'l primer casu de criminalización de la patronal na so guerra sucio escontra'l movimientu fuelguista.

Según informaciones asoleyaes na prensa, l'incendiu tuvo'l so orixe na parte central del autobús, causada por un oxetu incendiariu, descartando nun entamu causes rellaciones con averíes mecániques. Sicasí, ente'l desconocimientu de les causes reales del sucesu, ALSA llanza unes irresponsables declaraciones que yá foron refugaes por fontes sindicales.

Dende'l lláu obreru señalen, amás, qu'esiste un fondu maltar ente la plantilla poles sos condiciones llaborales, situación que nun quita pa que se desvinculen dafechu pa con esti incidente englobáu nes hores previes al entamu de la fuelga indefinida nel seutor del tresporte per carretera.

FONTE: Infoasturies

CSI diz "non al pieslle de talleres" en Duro Felguera

Según un comunicáu de CSI nel taller de Barros.
La seición de la Corriente Sindical d'Izquierda nel taller de Barros, perteneciente a la compañía Duro Felguera, vien d'asoleyar un comunicáu alrodiu de "les prevocaciones feches per parte del presidente del grupu en relación al pieslle d'instalaciones y amenorgamientos de plantiya". Asina, les pallabres en custión foron les que darréu apurre CSI Barros:

“La esistencia de 5 centros de fabricación nun radiu de 25 Km, con costos de caltenimientu, ensin demanda de productos, con muncha dificultá de competir, desixe un axuste que tamos llevando a cabu dende va tiempu, pa centranos namás en productos que tengan un claru futuru” .

Poro, pa la Corriente "lo único que se ta faciendo dende va tiempu polos talleres ye dexalos morrer, despidir cada vez más xente, nun se contrata nun s'invierte y lleven años diciendo que quieren cerrar". Ante ello, camienten que "En vista la que nos vien enriba y con una situación de tranquilidá ensin igual, con un comité d'empresa (CCOO y UXT) totalmente vertical, remanador y opacu cola información, que negocia a espaldes de los trabayadores, dixebra la plantiya, plantega “soluciones” como negociar el despidu y funciona como una marioneta nes manes de la empresa"

Ye por ello que "pidimos la xunidá de les plantiyes de toles filiales nuna sola pa faer frente a esti conflictu; solo tando xuntos podemos parar a estos caciques esplotadores que lo único que pretenden ye colonizar el mundu, dexando Asturies na miseria pa namá enllenar más les sos arques ensin fondu".

Dos documentos más na Biblioteca al rodiu del CNA.

La Biblioteca Dixital tien güei dos documentos más perinteresantes pa los visitantes d'esti blogue, dambos al rodiu del Conceyu Nacionalista Astur, organización primera del nacionalismu asturianu y socialista revolucionario. Per un llau ufrimos na Biblioteca un documentu propiu del CNA que data d'agostu de 1979, onde la organización política empobinase al Pueblu Trabayador de Mieres, a consecuencia de la situación de conflictividá que vivía'l Conceyu de Mieres y tol país cola "reconversión" y la "pre-autonomía".

Per otru llau, ufrimos otru documentu, nesti casu, la entrevista entitulada "Recuerdos d'ayeri y güei", que foi fecha a Gerardo Sánchez, vieyu militante del CNA represaliáu pol Estáu Español. Esta entrevista data de marzu del añu 2001 y foi espublizada nel periódicu alternativu asturianu GÜEI, yá desaniciáu dende hai bien d'años.

Los dos documentos tienen formatu PDF y una maquetación simplaya pero ordenada. Nesti sen, la dixitalización primera de dambos documentos foi obra del blogue "El Cielu por Asaltu". Dientru pocu más documentos y obres dixitalizaes na biblioteca.

Contra la nueva fusión/privatización de Caxastur

Ante l'anunciu de la fusión ente Liberbank, Ibercaja y Caxa3, la Seicción Sindical de la CSI en Caxastur manifiesta lo que vien darréu:

Los procesos de fusiones con vistes a la privatización de les Caxes, afalaos tantu pol anterior gobiernu como pol actual, nin resolvieron nin van resolver los graves problemes del sector, aniciaos pola xestión d'unos equipos directivos que, engaramaos sobre la burbuya inmobiliaria, dexáronse'l luxu de xugar a ser banqueros col dineru de toos y cuntando coles complicidaes polítiques, mediátiques y sindicales conocíes de sobra, mientres el Bancu d'España miraba pa otru llau.

Estes fusiones realizaes a toa priesa y pilotaes por unos directivu que'l so únicu interés ye caltener la so cuota de poder y blindase nos nuevos cargos de dirección pa siguir percibiendo escandalosos salarios, llueñe d'iguar la situación de les Caxes, van dar como resultáu una serie d'entidaes llastraes dende'l so orixe por una acumuladura de problemes derivaos de la burbuya inmobiliaria y que van necesitar, tarde o temprano, la intervención del Estáu, sía por aciu inyecciones de dineru público, sía por medio midíes fiscales que dexen saniar les cuentes de resultaos asumiendo'l valor real de los activos inmobiliarios.

Nel casu concretu de Caxastur, nin la compra de CCM que dio empiezu a les privatizaciones de caxes, nin la fallida fusión cola CAM, nin la fusión con Caxa Cantabria y Caxa Estremadura, al traviés del bancu priváu Liberbank, supunxeron nada positivu pa la nuesa entidá nin p'Asturies nin pa los asturianos. En toos estos procesos, al igual que nel actual procesu de fusión con Ibercaxa y Caxa3, namás primó l'interés de los sos directivos, ensin que la situación de Caxastur, nin la de los sos veceros, nin tanto la de los sos trabayadores fuera materia d'interés en toos estos alcuerdos de fusión.

Dende la Seición Sindical de CSI en Caxastur consideramos que, ante l'angustiosa situación de millones de families, qu'amás de perder l'empléu tán en trance de perder les sos viviendes por non poder faer frente al pagu de les hipoteques, los ciudadanos nun podemos dexar que se nos quite d'unes entidaes financieres de calter social como son les Caxes qu'anguaño son más necesaries que nunca, y menos entá podemos dexar que s'inyecten cantidaes obscenes de dineru de toos pa poner a disposición de la gran banca y de los especuladores la riqueza colectiva que representaben les nueses Caxes. Si precisen dineru público (o exenciones fiscales), los bancos privaos resultantes de les fusiones de les Caxes tienen de ser nacionalizados, creando una Banca Pública non privatizable que, nestos momentos tan difíciles, sofite la economía productiva y non la especulación, qu'apurra soluciones a la crisis y que se ponga al serviciu de toos y non al d'una pequena minoría.

¡Contra la Fusión/Privatización de Cajastur. Pola nacionalización de les Caxes! ¡Por una Banca Pública non privatizable al serviciu de los ciudadanos!

El Conceyu de Carreño declara persona non grata al arzobispu pol so apoyu al obispu d'Alcalá de Henares

Un moción presentada por UNA-Bloque en Carreño pa declarar a Jesús Sanz persona non grata nel conceyu salió alantre col apoyu del PSOE, IX, PCPE y UICA. La razón, la so defensa al obispu d’Alcalá poles sos declaraciones sobre los gais.

El Plenu municipal aprobó esta moción ensin el beneplácitu del PP, Foro Asturias Ciudadano y Carreño Unido. Asina, el Conceyu de Carreño declaró al arzobispu d’Uviéu persona non grata y vetáronlu nos actos oficiales que se celebren nel municipiu. Según esplica Unidá Nacionalista Asturiana (UNA)-Bloque por Asturies, la razón de la presentación de la moción vien de la defensa que fixo a Juan Antonio Reig Pla poles sos declaraciones homófobes nun sermón televisáu por TVE en Selmana Santa. Sanz señaló que Reig dixo “lo que cualquiera de los obispos podemos y debemos dicir en virtú de lo que creemos" y que’l so compañeru yera oxetu d’una ofensiva de los lobbies gais.

“UNA-Bloque Por Asturies considera que les manifestaciones feches por estos representantes de la xerarquía católica entren dientro d’una campaña d’acosu y d’estigmatización de les persones que tienen una opción sexual non heterosexual”, apunta el conceyal nacionalista Roberto Holgado. “Creemos que la xerarquía católica actúa como inquisidores guardianes d’ una moralidá regresiva y intolerante”, continúa l’edil, qu’esplica que llevó al Plenu esta moción porque “ye deber d’esti Ayuntamientu salvaguardar la llibertá y la dignidá de les persones del nuesu conceyu que tienen una identidá de xéneru y opción sexual diferente a la heterosexual”.

Fonte: Asturies.com

Comunicáu de Compromisu por Avilés en relación al pagu del IBI pola Ilesia

Compromisu por Avilés apúrrenos un comunicáu que-vos ufiertamos darréu

El vienres pasáu, el plenu del ayuntamientu d’Avilés, al traviés d’una moción presentada por IU y refrendada pol PSOE, aprobó instar al gobiernu de Rajoy a remocicar la “Llei de Mecenazgu de 2002” pola que la Ilesia ta exenta de pagar l’IBI (Impuestu de Bienes Inmuebles) por según qué tipu d’inmuebles.
Dende Compromisu por Avilés nun se puede interpretar esti movimientu d’otra manera que nun seya de cara a la galería, recordándo-y al plenu del ayuntamientu que como entidá recaudadora del IBI, mentada llei exime a ciertos inmuebles relixosos pero a otros non.
Asina Compromisu por Avilés cree precisu y necesariu que se faiga una actualización del padrón de los bienes inmuebles rústicos y urbanos que tán censaos y rexistraos a nome de la ilesia católica n’Avilés, col envís de saber cuálos queden eximíos pola “Llei de Mecenazgu y Concordatu” y por cuálos ha de pagar l’impuestu municipal como se vien faciendo n’otres ciudades del estáu.

FONTE: Aruelu

"Pozo Amago" despide a la totalidá de la so plantilla

44 trabayadores al paru.
La empresa d'amdamiaxes "Pozo Amago", d'orixe avilesín, alcordó colos representantes de los trabayadores el desendolcu d'un Espediente de Regulación d'Emplegu d'Estinción pol que los 44 trabayadores que componen la plantilla de la empresa quedarán desvinculaos d'ésta, tres adeudar a la plantilla ente 2 y 4 nómines, asina como retrasos nos pagos dende va dalgo más d'un añu.

Poro, los trabayadores decidieron aceutar la midida debío a qu'asina podrán reclamar el pagu de los salarios pendientes, nun allargando asina una situación que yá ye difícil pa munchos y munches trabayadores, que lleven meses ensin recibir ingresos pol so trabayu. D'otru lláu, too paez indicar que "Pozo amago" finará asina dafechu cola so actividá.

"Nora Antifa Attack" nel CSOA La Madreña

El prósimu sábadu 2 de Xunu.
La organización antifacista Nora Antifa entamará esti sábadu un nuevu conciertu antirrepresivu en beneficiu de les lluches antifacistes desendolcaes n'Asturies, y que como suel ser vezu son respondíes con casos de represión del estáu. Asina, el llugar escoyíu pal actu ye'l Centru Social Ocupáu Autoxestionáu La Madreña, asitiáu na Cai Xeneral Elorza d'Uviéu.

De magar les 18 hores de la tarde actuará'l grupu lleonés Street Poison xunto a los asturianos Ozono, I.R.A., Alcotan y Adizión Etilika, qu'amosarán la so música nel CSOA al preciu de 4 euros de sofitu, amás del anunciu dende la organización de qu'habrá precios populares.

FONTE: Infoasturies

LA CSI LLAMA A LA MOVILIZACIÓN XENERAL

La Corriente Sindical d’Izquierda quier facer un llamamientu a la movilización xeneral de tolos y toles trabayadores d’Asturies, en sofitu a la fuelga indefinía convocada na minería y en solidaridá colos trabayadores enzarraos n’estremaos pozos y mines.

Pa la CSI, estes movilizaciones son necesaries dafechu pa defender, non sólo la economía de miles de families asturianes, sinon el futuru de les comarques mineres y el del conxuntu la economía asturiana.

Asinamesmo, la CSI espera que los dirixentes de los sindicatos SOMA-UXT Y CCOO, ten al altor de los trabayadores de la minería, defendiendo los drechos reales d’estos trabayadores y abandonando vieyes postures carauterizaes por negociaciones que, nel pasáu, namás supunxeron pieslles de pozos, perda de puestos de trabayu y especulación, cuandu non corruición, na xestión de los fondos mineros.

La CSI va facer cuantu tea nes sos manes pa que les estremaes lluches y fuelgues que tan dándose n’Asturies, comu esta fuelga de la minería, la d’Educación, l’anunciada fuelga indefinía de tresporte y otres que yá tan entamándose, finen xunciéndose nuna única llucha que, amás de les reivindicaciones seutoriales, incorpore nueves movilizaciones xunitaries pa defender los drechos obreros y torgar el futuru de miseria y probitú que los estremaos gobiernos tan planificándonos.

Una Asturies en quiebra y con 100.000 desemplegaos y desemplegaes, nun pue permitise nin un paráu o parada más nin un retayu económicu más. Pa la CSI, estos 100.000 paraos y paraes tienen d’incorporase a esta llucha, xunta’l restu loos y les trabayadores, pa entamar a ganar na cai lo que nos roben nos despachos.

Por otru llau, la CSI quier denunciar la escalada de represión que ta dándose n’Asturies, onde les fuercies de represión del Estáu español tan intentando reprimir les reivindicaciones d’unos y unes trabayadores que salen a la cai en defensa del so trabayu y de la so forma de ganase la vida.

Asinamesmo, la CSI quier denunciar la persecución que carecen los sos afiliaos nes mines de Cangas del Narcea, que costantemente son perseguíos e identificaos pola Guardia Civil, llegando a la situación de tar a puntu de causar un grave acidente, al cruciar los sos coches delantre los vehículos de los sindicalistes, col riesgu de cayer per un barrancu prósimu.

Nesi sen, y comu decíemos el pasáu 1 mayu: nun vamos dexanos llevar pol pesimismu, nun vamos cayer na desesperanza y, sobretou, vamos dexar bien nidio que nun tenemos llerza, que nun nos dan llerza, que somos el pueblo, qu’hai muncha fuercia nel brazu d’esti pueblu y que vamos remanar esta fuercia pa defender Asturies y a la clas obrera.