Les muyeres, protagonistes nuna nueva xornada de llucha en defensa de la minería

Concentraciones y cortes de carretera protagonizaos poles muyeres.

El seutor mineru desendolcó un día más la so combatividá nel territoriu asturianu, siendo d'especial importancia l'aición femenina nes distintes aiciones desendolcaes nel día de güei. Asina, un grupu de muyeres cortaron la N-630 a l'altura de Ciñera mediante una sentada vindicativa y de sofitu pa cola "Marcha prieta" que s'atopa rumbu a la capital del reinu español.

D'otru lláu, el parllamentu asturianu vivió una concentración de muyeres coincidiendo cola cellebración d'un Plenu pa desixir una igua a un conflictu que camina haza'l so primer mes de xornaes de fuelga indefinía. Ye de destacar los abucheos xeneralizaos pa colos llíderes políticos asturianos n'especial haza la presidenta del PP n'Asturies, Mercedes Fernández, pola so sumisión dafechu a los dictaos del órganu central del so partíu a nivel estatal. Dientru'l Plenu les muyeres foron espulsaes poles sos consignes vindicatives amosaes a lo llargo del actu.

Sicasí, les aiciones nun quedaron ehí, y ye que la mañana tuvo enllena un día más de cortes de carreteres en Muros, Villaviciosa, l'AS-15, y al otru lláu del cordal en llocalidaes como la yá enantes nomada, Ciñera. A too ello, los mineros enzarraos amesten un día más de fazaña, demientres que la "Marcha prieta" sigui rumbu a Madrí ente un conflictu que tovía ta lloñe d'una igua pola negativa gubernamente al diálogu.

DARRÉU quier amosar la so solidaridá pa con toles persones represaliaes esti 27 de xunu n'Asturies

La Organización de Mocedá Independentista Revolucionario – Darréu – quier treslladar la so esmolición pola brutalidá represiva que na xornada del miércoles 27 de xunu viviose n'Asturies. Na mañana d'esti día fueron prindaes 23 persones en total n'Asturies a manes de la Policía Nacional Española. 20 d'estos deteníos protestaben n'Uviéu escontra un deshauciu a una familia. Estes persones solidaries qu'aconceyaren énte la casa d'esta familia trataron de torgar la espulsión de la mesma de la so casa y tan acusaes d'obstrucción de la xusticia. Dos d'elles amás tan tamién acusaes d'atentáu, desordenes y desobedencia grave a l'autoridá. Demientres estes detenciones asocedieronse violentes cargues policiales, con numberosos mancaos de gran consideración. Nel mesmu día, otres 3 persones, vecinos d'Ayer y Uviéu fueron deteníes baxo l'acusación de desórdenes públicos y de delitu escontra la seguridá vial por mor d'una barricada nel tunel del Padrún.
Dende Darréu queremos tresmitir la nuesa sincera solidaridá a los deteníos y deteníes y alertar a la mocedá asturiano de la grave situación de persecución política y brutalidá policial que tamos viviendo nel país anguaño. La ocupación policial y militar d'Asturies nun ye nenguna casualidá, sinon que respuende a la necesidá d'asegurar per parte l'Estáu Español la seguridá de los sos monopolios y el so capital n'Asturies. Dende la izquierda soberanista xuvenil tamién queremos llamar a la mocedá a la solidaridá activa a los mozos y moces del país pa con toles persones perseguíes y represaliaes demientres estes últimes selmanes n'Asturies.

La escalada represiva tien l'únicu finxu de meter mieu y amedrentar cola violencia gubernamental a la sociedá asturiano, una sociedá que nes caberes selmanes ta entamando un camín de llucha social polos sos drechos y pol futuru llaboral del país. Esta escalada represiva ye responsabilidá de Gabino de Lorenzo, delegáu de gobiernu n'Asturies. Dende Darréu atalantamos qu'esti comportamientu facista del españolismu neolliberal nun va amedrentar a la mocedá asturiano y al conxuntu del Pueblu Trabayador Asturianu. Tamién dende la organización de mocedá Darréu desiximos la dimisión de Gabino de Lorenzo como delegáu de gobiernu y pidimos a les fuercies represives del Estáu Español que colen d'Asturies pa que'l Pueblu Trabayador Asturianu pueda vivir tranquilu y en paz.

FONTE: www.darreu.org

Ente toos, tan matando Asturies.

Esti ye'l golpe definitivu compañeres/os.

¿Qué vamos facer?

23 persones deteníes n'Asturies esta mañana en protestes sociales

Amás de les 20 detenciones n'Uviéu acusaes d'obstrucción a la xusticia, por torgar la execución d'una orde xudicial pa echar una familia de casa, tando dos d'estes persones acusaes d'atentáu, desordenes y desovediencia grave a l'autoridá; la Guardia Civil detuvo n'alborada a trés mineros, vecinos d'Ayer y d'Uviéu, como supuestos autores d'un delitu de desórdenes públicos y otru contra la Seguridá Vial, por una barricada nel interior del túnel del Padrún.

Delantre de la comisaría d'Uviéu desendólcase una concetración solidaria coles persones deteníes, depués de la protesta caltenía en Caxastur y na Plaza La Escandalera darréu del violentu desaloxu en Ciudá Naranco.

Puxando por Asturies (1977), del PCTA, na Biblioteca Dixital.

La Biblioteca Dixital amesta un nuevu documentu hestóricu en PDF a la so coleición. Nesti casu, apurrimos el documentu Puxando por Asturies (1977), documentu del Partíu Comunista de los Trabayadores d'Asturies, nome que recibió la federación asturiana del PTE-ORT.

Nel documentu, escritu nun asturianu con munchos erros, consecuencia del momentu hestóricu, ensín unes normes y una gramática afitada, el PCTA reflexona al rodiu del autonomismu, l'autodetermín y l'autogobiernu d'Asturies. L'analis del PCTA ye daqué ambiguu y en nengún momentu fala n'abertal de independencia total d'Asturies como país pero si que tien gran valir pa ver la postura d'esti partíu na dómina pre-autonómica.

Nel documentu tien abondo interés l'analis de clas que fai del rexonalismu asturianu y la categorización que faen dende'l PCTA de la burguesía asturiana, falando d'ellí como un seutor social d'Asturies compliz del monopolismu centraliegu español y polo tanto ayenu a les llibertaes y les particularidaes del país de nueso.

Zarraes tres playes de Carreño por un vertíu de fuel oil

La ría d'Aboño sufrió un vertíu esta mañana por un escape de fuel oil proveniente de la central térmica d'HidroCantábrico, n'Aboño (Carreño).

La mancha de combustible estendióse pel llitoral del conceyu obligando a activar el Plan Territorial de Continxencia por Contaminación Marítima Accidental y a zarrar les playes de Peña María, Xivares y Carranques.

Dalgunes de les manches de fuel taríen avanzando en direición norte pudiendo contaminar tamién playes de Perlora o les de la Palmera y la Pregona, en Candás.

FONTE: Infoasturies

Manifestación mañana n'Uviéu.

Compromisu por Asturies, nome de la federación de partíos impulsada por Bloque por Asturies y UNA

Los asistentes al Conceyu Fundacional del procesu Compromisu decidieron nomar Compromisu por Asturies a la federación de partíos que pretende axuntar a tol asturianismu. Yolanda Huergo salió escoyida vocera de la formación.

Los otros nomes que se votaron foron Algamar, Alternativa Asturiana, Iniciativa Asturiana y Más Asturies. Mentes, la Executiva de Compromisu por Asturies, que salió escoyida con un votu en contra, ta formada por Lluis Miguel (secretariu), Iris Díaz Trancho (vicesecretaria), Daniel Arias (ayalgueru), Carlos Suari (responsable de comunicación), Nuria Rodríguez (responsable de movimientos sociales y muyer) y Agripino Pérez (responsable de política municipal). Hai que destacar qu’esta executiva foi la única que se presentó a la eleición.

L’asistencia al Conceyu Fundacional de Compromisu por Asturies nun tuvo al final l’asistencia esperada, yá que s’acreditaron alredor de 100 persones cuando’l censu taba formáu por más de 200. Esta organización nació sobre les bases bases de la defensa del país, la xusticia social y l’ecoloxismu.

FONTE: Asturies.com

N’Ast entama una campaña pola reunificación territorial d’Asturies

A lo llargo de los sieglos por mor de les lluches de poder ente los distintos grupos oligárquicos asina como de les polítiques de control social de los Estaos munches fronteres alministratives tuvieron una gran inestabilidá, por embargu les comunidaes nacionales a pesar de tar políticamente fragmentaes caltuvieron gran parte de l...a so unidá cultural y de la so identidá común.

Nel casu asturianu’l territoriu del País hestóricamente tamién foi reorganizáu por poderes esternos, siendo los sos conceyos distribuyíos ente trés de les provincies del Estáu español: Oviedo, León y Santander. Na actual dómina la integración de conceyos asturianos nes alministraciones autonómiques de Valladolid y Santander vien significando una especial agudización nesos conceyos del procesu xeneral d’aculturación, desestructuración social y despoblación.
 
Polo tanto dende N’Ast, como organización integrante del Movimientu de Lliberación Nacional Asturianu, estremamos ente dos realidaes territoriales distintes, l’alministrativo-xurídica de la vixente “Comunidad Autónoma del Principado de Asturias”, y la hestórico-cultural del País, plantegando que’l desaniciu global del colonialismu pasa inevitablemente pola superación del actual marcu autonómicu y la incorporación a una futura estatalidá asturiana de tolos conceyos asturianos que tando asitiaos alministrativamente fuera de la “Comunidad Autónoma del Principado de Asturias” desendolcaron y/o desendolquen una demanda ciudadana a favor de la reunificación territorial. Y como demócrates evidentemente entendemos que cualisquier procesu d’integración político-territorial tien que ser ratificáu nun plebiscitu polos habitantes de los conceyos afectaos.


Fonte: www.n-ast.org

Suatea denuncia que, de momentu, en 68 centros públicos yá va haber 744 puestos de trabayu menos

El sindicatu Suatea salió al pasu de les declaraciones de dellos directores d’institutos d’Uviéu en La Nueva España, onde quitaben importancia a los recortes en personal pal cursu que vien. Suatea llamentar «la llixereza y la imprudencia d’eses declaraciones nun momentu crucial pa la determinación de los axustes na educación pública d’Asturies». El sindicatu asturianu esplica que «desgraciadamente, eses valoraciones nun se correspuenden cola realidá». Ye abondo con facer les cuentes: multiplicar los 5.000 docentes de secundaria poles dos hores lectives más qu’ordena’l plan d’axuste y dividir ente venti. Salen quinientos profesores menos. «Y falamos namás de la enseñanza secundaria», aclarien.

Suatea informa de les alegaciones efectuaes, de momentu, por 68 centros de Primaria y de Secundaria y los datos muestren que’l recorte de personal pal cursu escolar que vien sumen 744 puestos de trabayu. Hai que reparar en que n’Asturies hai cuasi 400 centros públicos.

Otra manera, la movilización del profesoráu sigue. La última acción foi’l grupu de profesores que se ciarraron nel institutu Juan José Calvo Miguel, de Sotrondio, una iniciativa que tamién se siguió nel institutu de Tinéu. El llunes 25 de xunu, nel Institutu Doctor Fleming d’Uviéu –onde siguen ciarraos los interinos–, éstos tán convocaos a un conceyu porque nesi día sal la llista definitiva de los funcionarios sobrantes d’horariu.

Fonte: Les Noticies

16 mineros deteníos n'Asturies dende qu'empicipiaron les protestes, en llibertá con cargos o a la espera de xuiciu

Col mineru deteníu en Grau, yá son 18 los prindaos n'Asturies por diferentes cuerpos policiales españoles dende l'aniciu les movilizaciones mineres.

Amás de los dos mineros deteníos y absueltos nun xuiciu rápidu depués de la denomanda "Batalla de Santa Cristina de L.lena", hai cinco trabayadores en llibertá con cargos, polos enfrentamientos asocedíos en La Ribera, y 10 a la espera de xuiciu polos enfrentamientos en La Vega d'Anzu (Grau). El mineru deteníu d'ayeri, acusáu de llanzar voladores a un helicóperu, suma'l sestu trabayador que s'atopa en llibertá con cargos, a los que habría qu'amestar el mineru asturianu deteníu en Madrid. Estes cifres améstense a les detenciones que tamién se vienen produciendo nes protestes mineres na provincia de Llión.

Fonte: Infoasturies

I Conceyu Nacional de Conceyu Abiertu

Iniciatives populares pa San Xuan.

Tanto'l Centru Social Autoxestionáu "La Semiente" como l'Asociación Cultural "N'Ast" entamen coincidiendo cola festividá de San Xuan delles actividaes al rodiu d'esta festividá tan típica nos países con raigañu atlánticu como'l de nuesu. Equí dambos cartelos:

Darréu quier denunciar la ocupación de fuercies represives del estáu de les cuenques mineres

La Organización de Mocedá Independentista Revolucionario Darréu quier denunciar l'agresiva ocupación policial y militar que tan sufriendo les cuenques mineres nes caberes selmanes, llegando al so puntu cimeru na xornada d'ayeri, coincidente cola fuelga xeneral y na xornada de güei 19 de xunu, día depués de la convocatoria, con maniobres del Exércitu Español na Cuenca del Nalón, cerca del Pozu Candín. La escalada represiva y de control social cada vegada ta siendo más desproporcionada en les cuenques y nel conxuntu d'Asturies.

Dende Darréu caltenemos qu'esti comportamientu policial y militar nun tien más enfotu que tratar de meter mieu a la ciudadanía asturiana y a la mocedá, y crear situaciones de violencia p'asina poder criminalizar les lluches populares nesti país al travíes de los medios de comunicación del poder vixente neolliberal. Estes fuercies, cola aición represiva que lleven desendolcando dellos díes yá cada vuelta más queden n'evidencia como lo que son: fuercies d'ocupación españoles, al serviciu del capitalismu más sangrín y xabaz.

Esti proceder ye bien murnio y amuesa una vegada más la natura neofranquista del Estáu Español, onde hai perres pa banqueros, corruptos y el financiamientu masivu de la represión pero la mocedá ta condergada a la ruina, la desesperanza y la falta de futuru dafechu. Demientres quieren desmantelar los nuesos seutores económicos y privaticen la educación ainda más cola escusa de la “gran crisis económica” xueguen a la represión policial y militar a gran escala pa con un pueblu que desendolca una llucha xusta.

Dende Darréu animamos a la mocedá a espeyar el so descontentu con esti proceder represivu de les fuercies militares y policiales españoles. Tamién queremos tresmitir tola nuesa solidaridá, otra vuelta más, pa tolos trabayadores del país que nestos momentos siguen en griesca pola viabilidá del so puestu de trabayu y del texíu industrial asturianu.

¡FUERA LES FUERCIES REPRESIVES D'OCUPACIÓN!

¡PUXA LA LLUCHA OBRERA Y POPULAR D'ASTURIES!

¡PUXA ASTURIES LLIBRE!

Comunicáu de Darréu nel día d'ayeri: www.darreu.org

Concentración n'Avilés contra'l paru, los retayos sociales y la represión

Vienres 22 de xunu a les 19:30 hores

“Avilés escontra la cris” convoca una concentración el prósimu vienres 22 de xunu, a les 19:30 h. n’El Parche (Pza. l’Ayuntamientu). Los entamadores del actu de protesta consideren "Avilés y Asturies nun pueden permitise nin una sola persona más ensin trabayu". Avilés escontra la cris quier denunciar la privatización y los retayos en Sanidá, Educación y Servicios Sociales. El colectivu avilesín sorraya tamién ye un actu "pola fuelga xeneral n'Asturies".

Con estos retayos el colectivu allerta que "vamos dexar la nuesa salú en manes de negociantes y mercaderes", namás van tener salú "aquellos que tean perres pa pagalo" o que "quieren tornanos a les dómines nes que namás que los más pudientes teníen acesu a la educación". Amás, consideren que que les presones con necesidá d’atenciones sociales, "van quedar abandonaes a lo so suerte".

"Avilés escontra la crisis" considera qu'hai que denunciar na cai que se tean gastando "les perres públiques pa financiar los negocios y los pufos de banqueros, empresarios y especuladores", que la Reforma Llaboral desanicia "tolos drechos llaborales y condérganos a la precariedá llaboral" y que'l Gobiernu "lo únicu que se-y ocurre ye retrucar a les demandes ciudadanes con una escalada descomanada de la represión, propia d’un Estáu totalitariu".

Nueva xornada de llucha minera tres la fuelga xeneral nes cuenques

Nueva xornada de fuelga minera en toa Asturies.
Los mineros y mineres d'Asturies tornaron güei a les cais tres la esitosa xornada de fuelga xeneral nes cuenques mineres, asina como la xornada de llucha pal restu d'Asturies na que se rexistraron delles aiciones como pintaes, cortes de carreteres ya incluso ataques a un garrapiellu d'entidaes bancaries. Na xorrnada de güei, la llucha tuvo diversificada n'aiciones de distintu calter.

Los cortes de carretera tuvieron presentes un día más en puntos importantes de la xeografía asturiana, con aiciones tanto pela mañana como pela tarde en puntos como l'Autovía Minera o l'AS-355. Amás d'ello, como dende va tres selmanes, siete mineros siguen enzarraos nos pozos asturianos, a los que s'amesta l'enzarru ayeri de mineros nel Ayuntamientu de Cangas.

Güei tamién foron protagonistes cientos de muyeres de mineros, que llevaron la protesta al Senáu madrilanu con concentraciones nos sos esteriores y protestes nel interior, polo que foron desaloxaes.

D'otru lláu, la Federación Mundial de Sindicatos d'Industria amosó'l sofitu a la llucha minera desendolcada nes comarques mineres del estáu, qu'amestarán un nuevu frente de llucha cola "Marcha del carbón" que'l 10 de Xunetu saldrá dende Mieres rumbu a Madrí, 20 años depués de la primer aición d'esti calter.

Fonte: infoasturies

Tres fontes y tres partes integrantes del marxismu, de Lenin, na biblioteca.

La obra de Vladimir Ilich Ulianov, Lenin, Tres fontes y tres partes integrantes del marxismu yá ta disponible n'asturianu y en formartu PDF na Biblioteca Dixital del Blogue Frayando Cadenes.

Nesti documentu, Lenin fai un analis del heriede de Marx a la hestoria de la filosofía, la pólítica y la economía. El cabezaleru revolucionariu bolchevique espeya perbien nesti instructivu testu tres de los grandes pegoyos del pensamientu de Karl Marx, el materialismu hestóricu, la teoría de la plusvalía capitalista y la doctrina de la llucha de clases. Estes aportaciones tomen relación col contestu y el tiempu de Marx, fontes que tomó'l gran pensador alemán, aniciador del socialismu científicu.

Asina, esti testu ye perinteresante tanto p'afondar nel conocimientu del marxismu como p'averase al mesmu.

L'únicu terrorista, l'Estáu Español.

Depués del ésitu de la xornada de movilización y fuelga xeneral d'ayeri en les cuenques mineres del país, güei un ciudadanu asturianu facía esta semeya del Exércitu Español de maniobres pola Cuenca del Nalón. Al paecer la semeya ta fecha nel alredor del Pozu Candín, llugar onde dellos mineros siguen enzarraos y onde ayeri recibieron la visita d'una marcha de centenares de paraes y paraos del Valle del Nalón.

Nun hai marxe pa especulaciones o casualidaes, esta aición militar ye una provocación y un intentu por parte del neolliberalismu españolista de meter el mieu nel cuerpu a los asturianos y asturianes. la violencia del Estáu Español tien munches cares, dende la del decretazu y la imposición hasta la del tolete y la metralleta, y si les coses siguen asina y cuanto más concencia coleutiva esconsone nel pueblu asturianu más vamos tener qu'alfrentanos cola violencia física.

50.000 persones manifiéstense en Llangréu en defensa de la minería

Cuatro mineros enzarraos na Casa Conceyu de Cangas del Narcea

Una manifestación multitudinaria en defensa de la minería remató la xornada de fuelga xeneral nes cuenques mineres d'esti llunes y que tuvo un siguimientu tamién masivu. Asina, unes 50.000 persones tomaron les cais de Llangréu y marcharon dende La Felguera hasta Sama. Nestos díes de tanta criminalización de les sos protestes, los mineros diéronse un 'bañu de mases' y amosaron el sofitu popular que tienen les sos movilizaciones. La manifestación remató colos himnos Santa Bárbara y Asturies patria querida, l'alcordanza de los mineros enzarraos nos pozos y llamando a manifestase'l miércoles n'Uviéu, contra la reforma llaboral y los recortes sociales. En Cangas del Narcea, cuatro mineros enzarráronse nel Salón de Plenos en señal de protesta, con intención de resistir ellí hasta que se solucione'l conflictu.

Estrayíu d'infoasturies.net

Homenaxe a los asturianos que defenderon Bilbao en 1937

"Nel nuesu pueblu, nin podemos nin debemos escaecer esta delda de sangre colos meyores fíos del Pueblu Asturianu"

Una plataforma popular, Larrabetzu 1937-2012, que promueve la conmemoración del 75 cabudañu de los combates del Cinturón de Fierru de Bilbao fexo, na llocalidá de Larrabetzu, un actu d'alcordanza na fosa común de Blunburu, onde tan enterraos combatientes asturianos que dieren la vida en defensa la llibertá y contra'l facismu en xunu de 1937. L'actu cuntó cola presencia txistularis, una ufrienda de flores silvestres y la colocación de les banderes nacionales vasca y asturiana. Nel actu sorrayóse que, "Nel nuesu pueblu, nin podemos nin debemos escaecer esta delda de sangre colos meyores fíos del Pueblu Asturianu". La formación política asturiana Andecha Astur púnxose en contactu colos organizadores del actu d'alcordanza p'agradeceyos la cellebración del actu.

P'Andecha fechos comu esti, son "una demostración d'auténtica solidaridá ya internacionalismu" y ponen n'evidencia "tantu al "Principado" comu istitución, comu al PSOE-IU a la hora de reivindicar la memoria hestórica asturiana". La organización d'izquierda nacionaliega camienta qu'estos partíos siguen "enfotaos en tapecer una herencia que mos honra comu asturianos y que los pon n'evidencia comu cómplices que son de l'actual situación de falta de llibertaes democrátiques que se vive n'Asturies".

La televisión vasca cubrió l'actu d'alcordanza colos milicianos asturianos en Larrabetzu, vidiu que se reproduz darréu:

FONTE: infoasturies