Con motivu de la cellebración del I Conceyu Nacional de Conceyu Abiertu
el prósimu sábadu 30 de xunu nel Salón d'Actos de la Casa la Cultura d'El Berrón
de magar les 10 de la mañana, dende InfoAsturies.net falamos con Mariu Arbesú,
integrante de Conceyu Abiertu por Noreña y ún de los promotores de la
organización a nivel nacional dende'l so surdimientu va aprosimadamente añu y
mediu.
-Falten unos díes pa que Conceyu Abiertu cellebre'l so primer Conceyu
Nacional ¿Qué espectatives hai pa esta convocatoria?
Les espectatives de participación son bones partiendo de la rialidá de qu’el
movimientu soberanista d’izquierdes n’Asturies ta mui tocáu y hai que facer un
llabor de recomposición difícil y que pasa ente otres coses por conceyos como’l
que cellebramos el día 30 de xunu. Vese qu’hai voluntá d’encadarmar espacios
organizativos nuevos, dixebraos a los convencionales ya que sean ilusionantes y
Conceyu Abiertu reúne estes carauterístiques. Escontra los ataques que recibe
Asturies, Conceyu Abiertu propón democracia plena, poder popular y xusticia
social asina que les posibilidaes de trabayu nesos frentes al travies de la
xunidá popular son enormes y la xente que promueve Conceyu Abiertu sábelo, poro
tan enfotándose nello.
- ¿De qué necesidaes surde esti I Conceyu Nacional?
Conceyu Abiertu echó a andar atopándose darréu con unes
elleiciones municipales y práuticamente ensín tiempu p’afitar unes bases
organizatives que mos permitieren siguir medrando organizativamente como
movimientu y crear los cauces de participación que requier una experiencia como
lo que tamos intentando poner en marcha. Esti Conceyu Nacional arrespuende
cenciellamente a la necesidá que tien el nuesu movimientu de medrar
organizativamente, cierto ye que de pasu aprofitamos p’ampliar les bases
polítiques puesto qu’hasta agora sólo disponiemos del manifiestu fundacional
pero lo realmente importante insisto en que ye la cuestión organizativa.
N’Asturies hai que reorganizase y lluchar dende la unidá popular. Conceyu
Abiertu ye una ferramienta válida pa ello.
- El pasáu domingu pasó'l periodu de presentación
d'enmiendes. ¿Cuál ye'l gráu de satisfación nesti sen? ¿Foi un procesu mui
participativu?
El gráu de participación ye mui altu, la xente ta ilusionao y quier formar
parte del procesu pa da-y forma y afondar nel afitamientu de Conceyu Abiertu.
Asina ye que xurde l’alderique y aparecen dixebraes postures en coses
importantes como’l componente ideolóxicu, la táutica electoral o no tocante a
dellos aspeutos organizativos. Lo prestoso ye que no básico del proyeutu hai
alcuerdu y que seya cual seya’l resultáu vamos salir reforzaos y caminando
xuntos na mesma direición.
- Hasta'l momentu,
Conceyu Abiertu afitó la so cadarma en 10 municipios del país. ¿Aspera que
depués d'esti primer Conceyu Nacional la estructura de conceyos abiertos
medre?
Ensin dubia, l’oxetivu ye ampliar
nos prósimos años la presencia nos conceyos del país y toi convencíu de que de
magar el día 30 esta cadarma va dir ampliándose pero nun sólo eso sinon tamién
tenemos que dir reforzando la organización n’aquellos conceyos que yá esisten.
Hai que ser práuticos y dir a algamar una bas real y fuxir de lo virtual. Yo
personalmente prefiero ser que paecer y si somos 5 conceyos pues que seyamos 5
conceyos de verdá. Seya la que seya la cadarma que tengamos confío en que seya
sólida y real. Por ciertu, nel planu electoral sólo eso ye lo que da votos y
bonos resultaos.
- Depués de la
cellebración del aconceyamientu del prósimu sábadu 30 n'El Berrón, ¿entama una
nueva forma de ver y facer el soberanismu asturianu d'izquierda?
Depués del conceyu del sábadu entama un nueu ciclu en Conceyu Abiertu y
afondaremos en nueves formes de ver y de construyir el soberanismu d’izquierda
pero eses nueves formes yá se vienen planteando y practicando dende primero. El
nacionalismu d’izquierda n’Asturies ye lo suficientemente ampliu y plural como
pa que nós nun mos podamos permitir falar en nome d’él como si fueremos la única
referencia esistente, toos sabemos qu’hai diferentes espacios hestoricamente
conformaos y que la tendencia tien que ser dir confluyendo n’espacios nuevos.
Asperemos que Conceyu Abiertu ayude a superar en gran parte la dixebra y ye
cierto qu’ún de los papeles que tien que xugar Conceyu Abiertu ye’l d’intentar
que sirva como espaciu de confluencia.
- ¿Cómo ta siendo la
esperiencia en Noreña, onde Conceyu Abiertu por Noreña tien yá un
conceyal?
La esperiecia ta siendo perpositiva, con munchos aciertos pero tamién erros
como ye normal. Tamos aprendiendo muncho y el nivel d’implicación y de confianza
del pueblu nel proyeutu agora mesmo ye enorme. Dende qu’entamemos el conceyu
d’Andecha Astur en Noreña hasta güei con Conceyu Abiertu por Noreña el
crecimientu ye exponencial añu tres añu. Toi percontentu colos resultaos
algamaos y col grupu de trabayu que tenemos. Parezme que ta siendo una autentica
experiencia d’unidá popular y dende la base, dende los conceyos. Tal y como
queremos que seya Conceyu Abiertu. Parezme que ye una mui bona referencia pa
treslladar a otros conceyos d’Asturies. Imaxínome un conceyu de Conceyu Abiertu
como el de Noreña en cada pueblu d’Asturies y esti país sería otru mui
diferente. Pensar eso siempres me da ánimu y camiento que si ye posible en
Noreña, porqué nun pué ser posible nel restu d’Asturies.
Entrevista n'Infoasturies
