Los vecinos d'El Puente movilícense poles obres de soterramientu

Esti coleutivu vecinal llangreanu va a concentrase esti miércoles de magar les 12:00. 

 

Los vecinos d'El Puente denunciaron públicamente los problemes dinseguridá ya insalubridá de les obres de soterramientu na so zona. Dende'l coleutivu vecinal manifiesten los continuaos engaños de de les instituciones públiques, con incumplimientos de los plazos prometíos pal desendolcu d'unes obres que, tal como despliquen, tán xenerando numberoses molesties. Poro, anuncien movilizaciones, concentrándose esti miércoles nel pasu a nivel de “Llangréu Centru” a les 12:00 hores.

Conceyu Abiertu por Llangréu sofita la vindicación

Dende la plataforma conceyil llangreana manifestaron que "queremos apoyar a los vecinos d'El Puente y denunciar lo mesmu qu'ellos. La selmana pasada la Conseyera de Fomentu, Belén Fernández, dexó plantáu al Ayuntamientu de Llangréu na reunión informativa sobre'l soterramientu que diben cellebrar dambos axentes, Conseyería y Ayuntamientu. Estes obres, que nun cuenten con un plan de viabilidá seriu y que lleven dando problemes yá 3 años son un arma arroxadiza ente los partíos con representación n'alministración llocal y autonómica pero nunca planteguen seriamente midíes de consensu pa finar coles obres y contentar a los llangreanos y les llangreanes".

Amás, sofiten les movilizaciones vecinales, a lo qu'amesten que "llamamos a la vecindá de Llangréu a participar na movilización qu'entamen esti miércoles 5 de xunu. Los vecinos d'El Puente y toles persones que quieran demosar la so solidaridá y tean fartes d'esta xestión del soterramientu vamos aconceyanos el miércoles nel pasu a nivel de “Llangréu Centru” a les 12:00 hores. Llamamos a participar na concentración de protesta y recordamos a tolos vecinos qu'esta llaceria d'obres afeuta direutamente a 1.500 persones".

N’Ast denuncia la 'constante hipocresía' d’IU nel tema llingüísticu, tres la so propuesta n'Uviéu

Con motivu de la propuesta presentada por Izquierda Unida d'Uviéu, tres el casu de represión llingüística vivida por Iniciativa pol Asturianu nel Rexistru Municipal d'Uviéu, N'AST denuncia la "constante hipocresía nel tema llingüísticu" d'esta formación, a la que-y aconseyen  que dexe "de facer el fatu con propuestes de cara a la galería y qu’apueste nidiamente pola oficialidá del asturianu".

Va unos díes, el grupu d’Izquierda Unida nel Ayuntamientu d’Uviéu presentó una proposición urxente pal so alderique nel Plenu municipal na que pide a los xestores del conceyu carbayón qu’adopten l’usu del asturianu con normalidá, dempués de que’l coleutivu Iniciativa pol Asturianu denunciara que-y prohibieren presentar un documentu nesta llin­gua nel Rexistru municipal.

El voceru de la coalición n’Uviéu, Roberto Sánchez Ramos, desplicó que l’enfotu de la proposición ye “democratizar la vida municipal y garantizar un drechu”. Pa ello, propón que’l Conceyu d’Uviéu se comprometa a tramitar escritos n’asturianu y a formar a los fun­cionarios nel usu del idioma. Amás, dixo que “yá ye hora de que’l nuesu conceyu entienda l’usu del asturianu como daqué normal”.

Por embargu, en N’Ast camienten que "ye precisamente IU quien nun acaba d’entender l’usu del asturianu como daqué normal". La organización remembra que "cuan­do IU tuvo responsabilidaes de gobiernu n’Asturies siempres dexó’l tema llingüísticu apar­cáu, lo mesmo que cuando gobierna nos conceyos, bien en solitario o xunto a otres forma­ciones polítiques, y que, a la hora la verdá, la oficialidá de la llingua asturiana nunca nun formó parte de les sos condiciones a la hora d’afitar pautos de gobiernu".

Poro, dende N’Ast aconseyen-y a IU que dexe "de facer el fatu con propuestes de cara a la galería, coles qu’a naide nun engaña y que namás que se-y ocurren cuando se fae públicu dalgún ataque nidiu a los drechos de los asturianos, casu del d’Iniciativa pol Astu­rianu", coleutivu col que, dende la organización de defensa de la llingua y cultura asturianes, se solidaricen. N'Ast tamién aconseya a la formación política que "nos conceyos nos que tien representación y/o gobierna plantegue l’aprobación d’una Ordenanza Municipal sobre Usu del Asturianu, con un conteníu real, y la defensa de la oficialidá na Xunta Xeneral d’Asturies".
 

Fonte: Infoasturies.net 

Presentación de la esposición "25 años de conciertu en cartelos"

La Xunta pola Defensa de la Llingua presenta esti martes la esposición, que recueye los cartelos de 25 años del Conciertu pola Oficialidá. 

 

Esti martes 4, a les 20h., la Xunta pola Defensa de la Llingua Asturiana estrena, xunto a músicos de los cuasi 70 grupos que pasaron per estos 25 años de Conciertu pola Oficialidá, esta esposición, que según despliquen "quier valir d'homenaxe al so llabor comprometíu". Esti actu, amás de dar entamu a esta esposición, tamién sirvirá como presentación del XXV Conciertu pola Oficialidá, con un conciertu posterior de l'Asturiana Mining Company.

Na amuesa van a amosase materiales rellacionaos coles venticinco ediciones qu'esti añu cumple'l Conciertu pola Oficialidá, una de les cites revindicatives centrales cada añu n'Asturies. L'amuesa tará disponible del 4 al 8 de Xunu na Plaza'l Pescao -llugar de la presentación-, de 11:00 a 14:00 y de 18:00 a 21:00 hores.

Conceyu Abiertu por Llangréu solidarízase colos despedíos na Central Térmica de Lada

Dende Conceyu Abiertu por Llangréu tresmitieron la so solidaridá a los diez trabayadores despedíos na central térmica de Lada. 

 

Dende CA por Llangréu desplicaron que los afeutaos "perderán el so puestu de trabayu depués de llevar desendolcando la so actividá nesta instalación munchos años. Estes persones trabayen cola empresa subcontrata Eulen n'Iberdrola faciendo llabores de caltenimientu na factoría eleutrica llangreana". Según manifiesten, "dende les empreses implicaes paez ser que nun tienen nenguna intención de qu'estes persones sigan faciendo la so llabor y agora, depués de tantos años, quieren echalos a la cai cola escusa de siempres, la crisis y la falta de dineru".

Nesi sentíu, consideren esti casu como "un nuevu ataque a la situación social del nuesu conceyu y a la nuesa xente, echando agora a otres diez persones de golpe a la cai de forma inxusta dafechu". Asina, quieren apurrir "tola nuesa solidaridá a estes persones y llama-yos a la llucha, entendiendo que namás con llucha van poder recuperar los sos emplegos. Per otru llau, queremos denunciar l'actitú d'estes empreses, qu'echen trabayadores a la cai mentantu tienen unos beneficios impresionantes. Asina, pidimos que recapaciten dambes empreses y faigan lo que seya por caltener los puestos de trabayu".

Vía Infoasturies

Tornamos cola nuesa actividá

Depués d'un tiempu ensín actividá nel blogue y de folgar anunciamos que tornamos a l'actividá del blogue Frayando Cadenes. Asina, queremos tornar a dar caña espardiendo noticies, convocatories, testos, opiniones crítiques o imaxes. Esti llargu descansu sirvió pa querer tornar cola actividá'l blogue con más fuercia que nunca.

Poro, llamamos a tola xente a siguinos un migayín y collaborar no que-y pete unviandonos cosines a frayandocadenes@gmail.com. Esti blogue ta'l serviciu de toos y toes y apuesta pola izquierda soberanista asturiana como movimientu políticu de reconstrución social y nacional n'Asturies. El nuesu apueste, como siempres, nun dexa de ser la independencia del nuesu país y el socialismu como modelu alternativu p'Asturies y los pueblos del mundu.

¡Que siga la llucha! ¡Puxa Asturies llibre y socialista!

¡Abaxu l'imperialismu español y mundial!

Vamos a echar un pigazu.

Anque ya dende hai selmanes nun actualizamos el blogue soberanisya y marxista "Frayando Cadenes", camentamos como afayaizu dexar nidio que'l blogue sigue vivu y que nel futuru va siguir, entendiendo qu'a la izquierda soberanista nel nuesu país y al movimientu revolucionario mundial queden-y entá munches lluches y batalles por ganar.

Asina les coses, si qu'anunciamos que tamos tomando un descansu nel blogue depués d'años d'actividá ensín parar día a día. A lo llargo d'esti tiempu tuvimos una modesta audiencia pero ciertamente fiel y creemos que nun podemos dexala de llau en nengún momentu, buscando qu'esti blogue seya útil a tola xente que lu visita.

Vémonos nun tiempín y tornamos a da-yos caña.

¡Puxa Asturies Socialista y Dixebrá! ¡Puxa la llucha de la clas obrera!

PSOE, internacionalismu y cuestión nacional

Tomás Gómez, secretariu xeneral del PSOE en Madrí, sentenciaba fai unes selmanes: “el nacionalismu y el socialismu son incompatibles; somos internacionalistes. Nun queremos fronteres”. Pela so parte, Vicente Álvarez Areces fai unos años dicía “que’l nacionalismu nun diba tener nenguna espresión significativa na política asturiana” argumentando que’l Pueblu Asturianu tenía “una visión amplia del mundu” y que yera un pueblu emigrante pero tamién receptor d’inmigración. Espresiones d’esti tipu en cabezaleros del PSOE hai munches y si entamara a citales toes nun acabaría enxamás esti artículu. Espresiones que contraponen el fechu de ser nacionalista col fechu de ser una persona tolerante colos inmigrantes o solidaria con otres causes nel mundu. Visiones que dicen ser internacionalistes y polo tanto refuguen de nacionalismos. O una cosa u otra, les dos enxamás xuntes.

Pues bien, dende llueu el qu’esto escribe nun-y presta pa nada’l nacionalismu burgués clásicu y si’l nacionalismu tien una definición “neutra” y dafechamente ausente de xacíu popular nun quier saber tampocu nada d’ello. La cuestión ye qu’esto del nacionalismu puede tener mil sensibilidaes dientru qu’ente toes pueden facer una y pueden dar un resultáu que tea alcordies d’una forma íntegra cola izquierda tresformadora, los intereses de la clas obrera o l’internacionalismu más sinceru. Quiciabes estos nun seyan postulaos nacionalistes propiamente dichos, sinon soberanismos revolucionarios o movimientos d’emancipación nacional, surdíos d’amestar el marxismu colos movimientos de lliberación colonial de mediaos del pasáu sieglu XX, anque los irlandeses, por exemplu, llegaron enantes a estes conclusiones, véase James Connolly.

Lo ciertu ye que’l Reinu d’España tien una riestra de condiciones y peculiaridaes propies. El procesu de construcción “nacional” d’España nunca foi sofitáu poles clases populares de los estremaos pueblos que conforme l’Estáu. Fueron les clases acomodaes les qu’empobinaron el procesu, pero la oligarquía españolista, col despotismu que la carauteriza, nin tan siquier quinxo tener el sofitu de los trabayadores nesti procesu de construcción del “Estáu-Nación”. Nun delegó parte d’esa responsabilidá hestórica nes clases populares polo que la conformación d’esa “identidá nacional” enxamás foi completa y fai qu’esa identidá coleutiva de tipu “español” podamos dicir que seya tovía más artificial y forciada de lo que podría ser de partía. Quiciabes esto desplique por que n’otros llugares d’Europa nun hai tantos conflictos nacionales como los qu’hai nel Estáu español. En resume, baxo’l mio puntu de vista, tenemos nel sieglu XVIII y XIX nel Estáu español una conformación del nacionalismu español más reaccionaria, déspota y totalitaria que n’otres rexones d’Europa, anque tamién hai casos piores.

Pues bien, anguaño, toos y toes sabemos lo qu’hai dientru l’Estáu español. En tolos pueblos del mesmu hai, con más o menos fuercia, movimientos que reclamen la soberanía nacional de los sos países, mayores cuotes d’autogobiernu, la creación d’un estáu propiu o l’entamu de procesos de tresformación social tomando como marcu d’actuación una nación ensín estáu. Hai movimientos empobinaos pola burguesía nacional de cada nación pero tamién hai movimientos que ñacen nes clases populares y respuenden dafechamente a los intereses del Pueblu Trabayador. Muncho ta falándose nestos tiempos del conflictu catalán, el cual ye bien paradigmáticu. Per un llau tenemos a CiU y Artur Mas, que gracies a les presiones de la burguesía catalana pa tener más influencia na Unión Europea, de la nueche a la mañana, tornáronse en soberanistes y falen hasta de la independencia. Per otru llau tenemos a les Candidatures d’Unidá Popular y tolo que llamen Esquerra Independentista con una trayeutoria de delles décades puxando pola independencia plena de los países catalanes y con un movimientu políticu de construcción popular d’un contrapoder nada sospechosu de ser claudicante énte’l capitalismu.

Vemos polo tanto que hai munches formes d’atalantar el tema de la cuestión nacional, l’autodetermín, el soberanismu, l’independentismu o’l nacionalismu en sí. Pueden ser movimientos que respuendan al interés xeneral de la clas trabayadora o pueden ser procesos y movimientos empobinaos polos mesmos de siempres pa caltener la so dominación socioeconómica nun país o territoriu concretu. Tornando al aniciu del artículu, que quiero centrar nel PSOE, vemos dos declaraciones de dos persones con poder nesi partíu que nun entienden esto. Nun entienden que nel Reinu d’España se puedan dar movimientos nacionalistes de dreches o izquierdes, burgueses o populares. Nun entienden nada que tea que ver con esta cuestión y p’aparar estes posiciones y reforciar la so postura y posición faen usu de frases y retóriques mui tradicionales d’una izquierda que deberíen d’entender, qu’anque tien de ser fiel a los sos principios o presupuestos teóricos de partía, ta en continua tresformación y qu’hai una serie de intereses qu’afeuten a les coses. Poro, falen con mensaxes que pueden paecer mui izquierdistes pero inoren la conceición dialéutica de Karl Marx, nun faen nengún tipu d’analis de clas d’estes cuestión, nel fondu suelten los mesmos mensaxes que la drecha pero con un llinguaxe “purista” d’izquierda. Si ye evidente, tamos falando del PSOE, que-yos vamos pidir nesti sen, val.

Pues bien, Tomás Gómez, pa defender y caltener la unidá d’España facía alusión al internacionalismu. Falabanos de qu’ellos son internacionalistes y socialistes y que polo tanto enxamás podrán defender postulaos nacionalistes, sinon que combatirán a los mesmos.
¿Qu’hai del internacionalismu nel PSOE?. Como dicía, Tomás Gómez ye un abanderáu del internacionalismu, al igual que’l so partíu. Pues mui bien, en bona hora van falar d’internacionalismu. Si tuvieran dignidá yá teníen qu’haber esborriao esa pallabra del so vocabulariu hai cuantayá. Pero toos y toes sabemos qu’aparte de nun tener dignidá nun tienen vergoña. Asina ye, estos moralistes d’izquierda quieren ponese d’internacionalistes pa combatir el “separatismu” dientru’l Reinu d’España. ¿Qué fai’l PSOE pol internacionalismu? Por supuesto que fai una cosa perbien: combatilu coles formes más criminales y represives.

El PSOE de Tomás Gómez, Felipe González, Rubalcaba, Zapatero, Areces y otros tantos corruptos, faigamos alcordanza, foi quien metió a l’Estáu español na organización terrorista más sangrina y espoliadora del mundu: la OTAN. Toos sabemos el nivel de cinismu que tuvo esi procesu dende’l PSOE, que defendió los mesmos postulaos que’l neofranquismu y la estrema drecha pero con cierta hipocresía que muncha xente tragó. El casu ye que’l PSOE foi el principal actor d’esi procesu d’integración del Reinu d’España na OTAN, instrumentu militar y de dominación social del imperialismu y l’orde capitalista a nivel mundial. Como non, nesti casu, supongo que los de Tomás Gómez nun antepusieron los intereses económicos de la rancia burguesía española a los del internacionalismu proletariu. Integrase nesta organización imperialista y militarista ye un fechu non solo internacionalista sinon tamién revolucionario, nel mundu de pantasía nel que vive esta xente.

De magar esi ingresu na OTAN hebo decenes de guerres imperialistes nes que, d’una forma u otra, participó la España del PSOE, guerres de rapiña onde lo que facíen y faen ye agredir a gobiernos soberanos y llexítimos y espoliar el másimu númberu de recursos que yeren entregaos a los distintos dueños d’esti Estáu neofranquista. Guerres onde sofitaben gobiernos golpistes y acribillaben a la población civil mentantu criminalizaben nel grupu Vocento o Prisa a otros gobiernos que taben sufriendo estes criminales agresiones. Asina furrula’l capitalismu modernu, l’imperialismu, eso si que lo sabemos si, pero asina furrula’l PSOE modernu tamién. Nun engañen a naide. Irán, Yugoslavia, Siria, Libia... son munchos los países que prebaron con bien de sangre y metralla l’internacionalismu proletariu del PSOE y los sos socios, garantes toos de la democracia, los drechos humanos y la paz mundial, por supuestu. Suponemos tamién que’l fechu de llantar bases norteamericanes en suelu del Estáu español tamién respuende a puxar pol internacionalismu y como non pol socialismu.

Tomás Gómez dicía qu’ellos nun queríen fronteres, bien, agora podemos entender el razonamientu. Nun quieren fronteres y por eso sofiten y son parte activa de les últimes guerres imperialistes. Claro, nun quieren fronteres como’l restu la burguesía. El PSOE nun quier fronteres pa que les grandes empreses españoles tean vía llibre por tolos continentes pa poder esplotar recursos y persones y pa qu’asina’l Bloque Oligárquicu Español vea medrar más y más los sos criminales beneficios. Esta idea nun tien, por supuestu, señores del PSOE, nada que ver colos primeros nacionalismos, reaccionarios y arcaicos, mui arreyaos al colonialismu... Los del PSOE tan avezaos a falar d’internacionalismu pa escuender una visión nacionalista mui cercana a la tradicional del franquismu y la burguesía fala de patriotismu y nación pa tapecer la so natura a acabar coles fronteres económicos y espardir la so dominación perdayuri. Unos y otros se complementen perbien nel so cinismu y unos y otros complementen perbien los sos intereses.

Nun quiero siguir dando exemplos de la praxis internacionalista tan singular que tien el PSOE. Nun fai falta, creo yo, tol mundu, d’una forma u otra va decatándose qu’estos señores del PSOE son los mesmos faches de siempre pero con otru collar. Nun ye ser simplismu o dicir burraes, quiero recordar a la xente que’l PSOE gobernó y gobierna nesti país bien d’años, al igual que gobernó bien d’años nel Estáu Español, demosando únicamente lo qu’acabo de dicir. La hipocresía y el cinismu que carautericen a los y les señorones d’esti partíu.

P’acabar con esto, por supuestu, enxamás veremos nos movimientos sociales a xente d’esi partíu-empresa. Refiérome a les manifestaciones polos presos políticos del Sáhara, a les que son escontra’l xenocidiu a Palestina, a les charres de solidaridá colos sindicalistes represaliaos en Colombia o a campañes internacionales polos drechos humanos. Nunca tan ehí, y miren que son internacionalistes. Nun participen d’esos movimientos sociales yá que ye nestos movimientos sociales onde se puede ver el braeru compromisu internacionalista de muncha xente y claro, ellos nun xueguen a eso. Por supuestu, tampocu van ser recibios nos movimientos sociales a estes altures de la vida, y meyor, claro ta. Eso si, el cinismu nesti sen tampocu desapaez, y anque nunca veamos a esta xentecalla en convocatories de calter internacionalista siempres podrán facer xestos de cara a la galería, como munches vegaes fixeron, por casu, cola tema’l Sáhara. Tamién, munches vegaes, criminalicen y reprimen la rempuesta social nesti sen, una vegada más internacionalismu del bonu.

Polo tanto esi ye’l nivel internacionalista del PSOE: un imperialismu apátrida pero qu’afita la grandeza de la unidá d’España. A esto, munchos llamaron socialfacismu y otros munchos lu llamaron “tar más perdíu qu’un pulpu n’un garaxe pero tener suficientes recursos pa caltenenos como casta parásita, corrupta y drechista nel poder”. Querramos denomalo d’una forma u otra tenemos que desmazcaritar al PSOE en tou momentu, nun baxar los brazos contra esti enemigu, que si m’apuren ye’l primeru, pues sirve de colchón ya instrumentu de contención social a la estrema drecha franquista qu’enxamás abandonó les estructures de poder nel Reinu d’España.

El nuesu país lleva 30 años sufriendo a estos señores d’una forma ininterrumpida, sistemática y xabaz. Llevamos 30 años enviendo como los que tarrecen tanto nacionalismu asturianu y quieren que s’afayen los inmigrantes persiguen a les persones ensín papeles, espulsen a les mesmes y dexen ensín industria nin trabayu a los inmigrantes estremeños que llegaron nel sieglu XX a Asturies, sobre manera a los fios d’estos. Estos son los de la mente abierta, l’internacionalismu contrapuestu al nacionalismu y los socialistes de tola vida. Estos parásitos tienen de salir de la poltrona yá. Tan fundiendo Asturies, ellos y les estructures qu’ellos representen y diseñaron colos asesinos de los sos güelos o padres.

Asina pues, como conclusión dicir qu’estos señores nun son naide pa dicir que non a un procesu d’autodetermín dientru l’Estáu español o fuera. Y lo que nun podemos facer ye pensar que’l PSOE defende la idea d’unidá d’España baxo unos criterios de izquierda. Yo, que personalmente nun atalanto que bona parte de la izquierda tea tan enfotada en siguir el camín de construcción d’una alternativa al capitalismu tomando como marcu d’actuación l’actual Estáu español. Nun voi creer a estos señores del PSOE nes sos argumentaciones, nin tan siquier entiendo como daquién d’izquierda daveres puede asimilar la idega d’España. Hasta ehí bien, pero de xuru que munches persones creen neses argumentaciones qu’empobina’l PSOE anque depués reconozan que dende llueu la so práctica diaria ye incoherente colos sos “principios”. Pero estes persones tienen de quitar la venda los güeyos y aceutar la realidá yá. El PSOE ye un partíu que va a la escontra de tolos intereses del Pueblu Trabayador y les naciones primíes, pensar otra cosa ye nun querer ver la realidá. Tenemos que carauterizar a los señorinos del PSOE como lo que son, los verdugos de la izquierda, los pueblos y los drechos sociales y nacionales de la clas obrera.

Polo tanto, la siguiente vegada qu’un españolista del PSOE retruque qu’ellos nun quieren reconocer el drechu d’autodetermín nin la dixebra de cachinos de la so amada España yá saben que decir vustedes. Recuerden a esa persona, señor/a X, el papel sociata pa col internacionalismu y les grandes aportaciones d’esi partíu a la llucha de clases moderna, la lliberación de los oprimíos y la soberanía y democracia popular de los pueblos. A ver que-yos dicen entós, a lo meyor pierden los papeles y entamen a canciar el Que viva España de Manolo Escobar, que ye lo que-yos pega más, tan pocu nacionalistes qu’ellos son... A lo meyor tamién, por que toos deberiemos faer crítica o autocrítica, cambien d’opinión, anque difícil. Y más viendo qu’esti artículu podría tar dedicáu a los d’Izquierda Unida, cuyo españolismu nun ye mui distintu y que lleven bien d’años mirando haza otru llau énte tolos crímenes y atropellos del PSOE, cuando non siendo cómplices.

N’Asturies, como dicen los cubanos, tan sospechosos de dir a la escontra’l socialismu y l’internacionalismu: PATRIA O MUERTE.

Artículu de Xosé A. González. Espublizáu en www.glayiu.org

Arturu Xosé Bermeyu, reellexíu secretariu xeneral d'Andecha Astur

El Conceyu Xeneral de la formación escoyó los 8 miembros de la Xunta Executiva y los 15 de la Xunta Xeneral.
El Conceyu Xeneral Estraordinariu, que se cellebró’l sábadu nos llocales d’Andecha Astur en Xixón tenía por oxetu escoyer los cargos de representatividá de la organización, siendo re-escoyíu por unanimidá Arturu Xosé Bermeyu comu secretariu xeneral al empar que s’escoyía una Xunta Executiva d’ochu miembros y otros 15 representantes pa la Xunta Xeneral.
Na so intervención dempués del nomamientu Bermeyu espresó'l so enfotu y compromisu pa con Andecha Astur "una organización que si enantes yera importante agora ye imprescindible", asumió comu propies les iniciatives que se plantegaren nel Conceyu Xeneral y anunció novedaes a curtiu plazu que tendrán por oxetu afondar na capacidá d'organización y rempuesta social del nacionalismu d'izquierda asturianu.
Asina mesmo, nel Conceyu Xeneral reiteróse la voluntá d'Andecha Astur de siguir puxando pola xunidá d'aicion, y por Conceyu Abiertu comu alternativa xunitaria dende la base y alcordóse la convocatoria, en fecha por determinar, d'un Conceyu Nacional Ordinariu p'afitar estatutos y marcar una llinia política que s'afaye a la rialidá de l'Asturies d'anguañu.
Fonte: www.queyeho.com

Conceyu Abiertu por Llangréu y Mieres sofiten les reivindicaciones de los trabayadores de Duro Felguera

Dende les formaciones vecinales d'izquierda soberanista Conceyu Abiertu por Llangréu y Conceyu Abiertu por Mieres queremos tresmitir la nuesa solidaridá a los trabayadores de Felguera Melt (Llangréu) y Felguera Rail (Mieres), dambes instalaciones del grupu Duro Felguera. Estos trabayadores entamaron esti llunes 21 de xineru una llucha en protesta pol ERE d'amenorgamientu de xornada llaboral plantegáu pola empresa a 116 trabayadores nes factoríes de los nuesos conceyos. Dende los nuesos conceyos abiertos sofitamos esta llucha y creemos que ye l'únicu camín a siguir. Nesti sen, llamamos a la vecindá del Conceyu de Mieres y el Conceyu de Llangréu a sofitar esta llucha, que ye la de toes y toos contra la precarización y l'esmantelamientu del pocu texíu productivu que queda en les cuenques.

Dende Conceyu Abiertu nun podemos atalantar la postura de la empresa, que desprecia'l futuru d'estes factories y l'emplegu dignu depués de llevar aprovechándose de la fuercia de trabayu de les cuenques mineres más de 150 años. Poro, camentamos que la direción de Duro Felguera desprecia'l futuru de los nuesos conceyos. Nesti sen, nun podemos escaecer que Duro Felguera tien unos beneficios añales de 100 millones d'euros y al empar lleva bien de tiempu tratando de zarrar les factories qu'entá tien en les cuenques mineres. Tampocu podemos escaecer que Duro Felguera ta aprovechando la reforma llaboral y ta recurriendo a les arques públiques pa facer un ERE como esti.

En conclusión, dende Conceyu Abiertu por Llangréu y Conceyu Abiertu por Mieres llamamos a la única y la solidaridá na llucha pol caltenimientu del emplegu dignu nos nuesos conceyos. Tamién calificamos de déspota y totalmente falta de valores y sensibilidá social l'actitú de la direición d'esta empresa pa cola xente de Llangréu y Mieres. Siguimos viendo como la crisis socioeconómica del capitalismu tien como única víctima a la clas trabayadora y los abusos de la patronal siguen medrando.

¡Nin ERES, nin esmantelamientu!

¡Llangréu y Mieres pa vivir y trabayar!

Fonte. www.conceyuabiertu.org

Conceyu Abiertu convoca Coordinadora Nacional pal 19 de Xineru

Conceyu Abiertu, dientru de la so dinámica de puxar pola participación popular, invita a tola ciudadanía a participar na Coordinadora Nacional convocada pal 19 de Xineru na sala d’aconceyamientos del antiguu depósitu d’agües de Noreña (Cai El Reloj) , de magar les 18:30 en primer convocatoria, y 19:00 en segunda.

 

La Coordinadora Nacional ye l’órganu asambleariu nel que participen tolos conceyos que conformen el proyeutu, asina como toles persones que quieran participar a títulu individual pal alderique y la toma de decisiones sobre diverses custiones. Nesta ocasión, los puntos a tratar sedrán los siguientes:

 

1-Llectura del acta de la Coordinadora Nacional

2-Información de la campaña escontra la resquiebra hidráulica o fracking

3-Alderique sobre la puesta en marcha de dinámiques en defensa de los conceyos asturianos

4-Información por conceyos

5-Puesta en marcha d'estayes y anovación de la Xunta Executiva de Conceyu Abiertu

6-Ayalguería

7-Dellos (Asuntos a proponer, u otres custiones que nun tean nos puntos anteriores)

Poro, convidamos a toles persones interesaes a asistir.

 

Fonte: www.conceyuabiertu.org

 

 

Conceyu Abiertu por Uviéu refuga l’envís l’Ayuntamientu de reponer la estatua de Teijeiro

En feches recientes el conceyu d’Uviéu retiró la estatua del Teniente Coronel Teijeiro, asitiada na “Plaza de la Liberación”, pa la so llimpieza, esclariando dende l’Ayuntamientu que van a reponela al so sitiu “lo enantes posible”.

 

Hai que recordar que Jesús Teijeiro foi’l militar golpista que tuvo al frente de la columna franquista encargada d’invadir Asturies dende tierres gallegues durante la Guerra Civil, dexando consigo un regueru de muertes, destrucción y sufrimientu, asina como la imposición d’un réxime facista carecíu durante más de cuarenta años.

Teniendo en cuenta dicha trayeutoria, consideramos inalmisible la esistencia d’estatues pa personaxes d’esi calter nel nuesu conceyu, y desiximos al Ayuntamientu que, d’una vegada por toes, dexe de ser responsable direutu del caltenimientu de símboloxía franquista nes nueses casi, y del incumplimientu de la Llei de la Memoria Hestórica.

 

Ye una ofensa pal conxuntu de los y les ciudadanes d’Uviéu, l’actitú favoratible de los nuesos representantes políticos pa con personaxes como Teijeiro, que representen tolo contrario a los valores de democracia y xusticia social que dende esta formación consideramos imprescindibles p’algamar un futuru afayaízu pal nuesu conceyu. Poro, creyemos imprescindible que se retire dafechu esta estatua.

 

Fonte: www.conceyuabiertu.org

 

El franquismu nunca colo...

Conceyu Abiertu por Noreña escontra'l fracking-resquiebra hidráulica

Darréu llama a la mocedá a iguar ella mesma la toponimia si nun hai solución política

El Ministeriu de Fomentu ayeri tresmitió al Pueblu Asturianu la so negativa a usar la toponimia oficial, que ta n'asturianu, pa la rotulación de los nomes de los llugares nes víes de circulación que-y atañen n'Asturies. Poro, espeyen la so intención de siguir imponiendo topónimos artificiales y castellanizaos nel nuesu país.

Énte esta situación dende la mocedá d'izquierda soberanista Darréu llamamos a la mocedá asturiano a rebelase. Nun queda otra que garrar la iniciativa popular escontra esta corripia de déspotas y criminales, los cuales faen lo que-yos peta y desprecien vides, drechos y cultures col únicu fin d'esborriar del mapa tolo que salga del status quo españolista y capitalista.

Asina, valoramos como una fuerte agresión esti determín del Ministeriu de Fomentu y llamamos a los mozos y les moces d'esti país a iguar ellos mesmos la toponimia y poner nes víes de circulación los nomes de los nuesos conceyos o pueblos como son y siempre fueron. Si nun van atender a razones tendremos qu'iguar la situación pela nuesa propia cuenta. Asina pues, encamentamos a los xóvenes el optar pola desobediencia civil y pola iniciativa ya iguar de forma direuta, si nun van poner igua dende Madrí, remocicando l'actual toponimia que sal na cartelería y camudándola poles formes naturales n'asturianu.

¡N'ASTURIES N'ASTURIANU!

¡TOLOS CARTELOS VAMOS IGUALOS!

¡LLINGUA NACIONAL, LLINGUA OFICIAL!

FONTE: Darréu

Tres mozos de Figaréu imputaos agora pol 14P

Reciben citaciones xudiciales por mirar cómo la Guardia Civil retiraba una barricada.

 

Durante la fuelga xeneral del pasáu 14P la Guardia Civil identificó en Figaréu a tres mozos que miraben cómo los axentes retiraben una barricada incendiaria nesa población. Seis selmanes más tarde vino la sorpresa pa los rapazos cuando agora reciben una notificación xudicial pola que se-yos abre un espediente nel que podríen condenalos a una multa d’ente 300 y 30.000€. Conceyu Abiertu por Mieres denuncia estos fechos y amuesa’l so sofitu a los imputaos.
 

Demientres la xornada de fuelga xeneral del pasáu 14 de payares, tres mozos fueron identificaos en Figaréu mentantu miraben como la Guardia Civil trataba d’acabar con una barricada qu’un grupu de piquetes plantó nesta llocalidá del conceyu. Nesi intre, la Guardia Civil identificó a estos xóvenes, los cuales nun taben faciendo absolutamente nada. Esi día nel Conceyu de Mieres yá hebo munches otres identificaciones y un deteníu. Pues bien, estos tres mozos acaben de recibir una notificación de multa d’ente 300 y 30.000 euros. El so delitu foi tar na cai observando lo que pasaba.

 La organización soberanista Conceyu Abiertu por Mieres quiso "amosar el nuesu sofitu a estos mozos y pidir a la vecindá del nuesu conceyu la so solidaridá pa con ellos. Consideramos propiu d’un sistema antidemocráticu, autoritariu, reaccionariu y déspota esti tipu de midíes de calter represivu". Les motivaciones recibir anguaño l’avisu de multa tán bien nidies pa CA: "l’únicu fin ye amedrentar a la xente y aparar la rempuesta social a los recortes, les imposiciones y l’agresiva fola neolliberal que l’Estáu español ta llevando alantre. Dende Conceyu Abiertu por Mieres acusamos a la Guardia Civil d’abuso de poder y creemos que cola represión nun pueden facer nada. Entendemos que’l Pueblu Trabayador Asturianu y de Mieres ta esconsonando cada día más y cuando un pueblu llucha pola xusticia y la dignidá nun hai represión qu’apare a la xente".

FONTE: Glayiu.org

Que los árboles nun te torguen ver la viesca

Asina reza un dichu que nos sollerta de la necesidá de nun perdenos nos detalles en desterciu del oxetivu. Tamién esiste otra versión: "Al neciu cuando-y señalen la lluna mira’l deu" que vien dicir básicamente lo mesmo. Y nun ye que nun tea acordies con esti dichu, que lo toi, sinón que toi en contra de "escaeceme" de los árboles pa ver el monte.Y esplico.
A la de falar de crear "daqué" n’Asturies capaz de llevar el ritmu, si decidimos a llantar cara en tolos terrenes de xuegu, siempres surde la gran dulda de si dientro del aparatu d’IU hai sitiu pa desenvolver les polítiques que se reclamen dende los mmss.
De mano hai que plantegase y recordar el pasáu d’esta formación política surdida del PCE, xuntu con AP, l’antepasáu del PP, que fueron los máximos opositores a l’autonomía d’Asturies, a la que consideraben una rexón más de la gran España o Castiella o Lug sabe qué, y nun se-y puede considerar más qu’un coautor del Estáu lliberal que güei nos azota con otra de les sos crisis. Pero nun voi centrar, nin tanto, en fai 30 años.
Hai namás unos pocos años IU aceptaba entrar nel gobiernu d’Asturies faciendo de muleta al PSOE en xurando y prometiendo la oficialidá de la llingua asturiana, y fizolo ensin ella. ¿La resultancia? Cárcele pa Candido y Morala amás de la mayor fola de represión dende la dictadura na que la policía, lliteralmente, esperábanos nes puertes de les nueses cases p’acosanos, fomentaba la política de la subvención apostando pol capitalismu "bonu", miraben pa otru llau cuando Areces llamaba lleendes urbanes a los mozos o se destruyía la nuesa mariña en planes urbanísticos d’ayuntamientos alloriaos y entraba nel conseyu de Cajastur mientres yera destruyíu dende adientro.
Igual nun lo vemos porque Évole nun lo denuncia en Salvados, pero negar la so responsabilidá ye negar la mayor ya inda nun-yos escuché pidir perdón sinón un "Aceptábemos unes coses pa salvar otres" que nun se alloña enforma del discursu "Ye lo qu’hai que faer" que tanto se critica a Rajoy. Y esto nun lo digo yo, dizlo el mesmu Julio Anguita nuna entrevista
<http://cordopolis.es/julio-anguita-...>

"¿Cuál foi’l fallu de la esquierda? Qu’entró nes instituciones y consideró que son respetables. Les instituciones nun son n’absolutu respetables. Eso ye mentira. Tán al serviciu del poder económicu"

A última hora, IU apurriría un gran pesu sociolóxicu pero sería, a la llarga, un gran llastre que se alloña del allugamientu estratéxicu lóxicu "Nun esperar que l’enemigu nun nos ataque sinón construyir daqué que nun sía atacable." y evidentemente IU ye, por si, bien atacable, como sufrieron los compañeros del SAT cuando-yos recordaben, en toles entrevistes, que la so federación diera’l gobiernu d’Andalucía al PSOE, al PSOE de les prexubilaciones y que llevaba 30 años ensin solucionar el problema de la tierra n’Andalucía.

A última hora, IU apurriría un gran pesu sociolóxicu pero sería, a la llarga, un gran llastre que se alloña del allugamientu estratéxicu lóxicu "Nun esperar que l’enemigu nun nos ataque sinón construyir daqué que nun sía atacable." y evidentemente IU ye, por si, bien atacable, como sufrieron los compañeros del SAT cuando-yos recordaben que la so federación diera’l gobiernu d’Andalucía al PSOE

Tamién debemos replanteanos si IU, como dicen, camudó.
La so entrega al PSOE del gobiernu asturianu paez indicar lo contrario amás d’unes cuantes noticies que-yos azotaron nos pocos conceyos que dirixen:

• En Mieres gasten dineru público pa sofitar a una participante d’un programa televisivu y vuelven cobrar el IBI a los mozos que merquen vivienda, una llei qu’ellos propunxeron na oposición.
• En L.lena despiden a una trabayadora por quedar embarazada y porque tenía un contratu de tres años, y ye qu’al paecer les muyeres tienen de quedar embarazaes cuando nun tienen contratu, que ye lo suyo.

Tampoco en Madrid tan llibres de pecáu aceptando’l vetu d’UPyD a Amaiur por pidimientu del PSOE...
Nun hai qu’escaecer, como denuncia’l compañeru Xose n’otru artículu
<http://www.glayiu.org/fusion-de-con...>
, qu’el so brazu sindical, CCOO, pide la fusión de conceyos, abrazando’l discursu de la estrema derecha de que la culpa de la crisis tienla conceyos como Llaviana o Llangréu.
Y yá nun ye solo la mentira económica de qu’un conceyu mayor daría meyor serviciu, los uvieínos tenemos unes faroles coyonudes pero non plan d’empléu, sinón que se alloña de cualesquier espíritu de lo que se ta pidiendo nes cais: "Más democracia" y la prueba de qu’estos nun s’enteraron de nada nos últimos años: Ante una crisis na que’l poder concéntrase en cada vez menos manes ellos proponen menos manes... Vamos, qu’anque medios allegaos redacten noticies grandones del sofitu de "líderes" del 15M al so partíu la cosa camudó poco.
En cuanto al futuru, los sos oxetivos, son bien tibios, cuando non frios. Nun se siquier si s’atreveríen a pidir al PSOE una consulta pola República a cambéu del gobiernu o si va ser abondu con felicitar al Rei pol so cumpleaños recordando-y qu’ellos son repúblicanos.
Nun se a vós pero a min danme la sensación de que nun tienen nengún oxetivu. Esto ye, el PP quier vender tolo público y asonsañar el modelu EEXX. El PSOE, sicasí, prestai más crear empreses privaes con perres públiques pa colocase. Pero IU? De verdá, que quieren? Que la cosa camude por arte de barrabiellu? De verdá que cuando Lenin falaba del izquierdismu debía pensar nellos.
En definitiva: si los mmss d’Asturies queremos camudar les coses, pero camudales de verdá, si decidimos a dexar de ser ferramientes de resistencia pa ser d’ataque
<http://empotronau.blogspot.de/2012/...>
, tenemos que partir de la premisa de la victoria, non de les medies tintes, que para eso quedamos en casa y votamos cada 4 años, o non, que pal casu ye lo mesmo.
Hai que considerar los beneficios de les nueses acciones, arrincar un cachín de tierra más a esos famosos "mercaos", y que sía esto lo que nos motive, non el llograr una manifestación mayor o menor o llograr un diputáu o un lo que sía.
Hai que saber que ye la nuesa fuerza lo que nos detien y les nueses acciones son lo que-yos detienen a ellos. Podemos faer lo que suañemos, ellos namás lo que-yos dexamos. Tenemos de afaenos na nuesa inadaptación, ye mentira qu’hai que moderase pa llegar alto, abrazando les nueses contradicciones anteponiendo la ciencia a la utopía. Sabemos que claudicar ye la muerte. Nun esiste victoria en ceder pa tocar el poder. Tenemos de odiar tanto como amamos pero ensin cayer en manipulaciones de sentimientos, emociones o razones. Usemos el corazón pero caltengamos la mente fría.
*Unes hores depués d’acabar esti artículu Gaspar Llamazares ufre al PSOE facer un "frente d’izquierda". Siento que perdí el mio tiempu desenmazcarando a IU cuando ellos solinos lo faen tan bien...

Artículu de Nacho Muñiz en Glayiu.org

Reforma educativa y llingua asturiana: l'asaltu final.

Ente les munches crítiques que puén facese del anteproyectu de la nueva Llei Orgánica pa la Meyora de la Calidá Educativa (LOMCE), que d’equí a poco vamos desplicar nun artículu más estensu, hai un aspectu, el de la cuestión llingüística, que tien especial importancia p’Asturies.
Por desgracia, paez que’l debate de la LOMCE, con toles gravísimes agresiones que contién pa la escuela pública, la propia calidá de la enseñanza y la dignidá de los sos trabayadores, ta centrándose na cuestión de cómo queda la llingua catalana nel nuevu diseñu llegal. Como yá ye persabío, el gobiernu catalán refuga dafechu la LOMCE nesi aspectu (nos otros non, porque coinciden básicamente cola so visión privatizadora y reaccionaria) y amenaza cola insubmisión, yá que supondría un torpedu a la llinia de flotación del procesu d’inmersión llingüística que vive esta comunidá dende hai trenta años. Pasa igual na Comunidá Autónoma Vasca y, con menos contundencia pero tamién con resquemor, nes demás comunidaes con llingua cooficial: Galicia, Navarra, País Valencianu y Baleares, que tamién ven peligrar la so política d’inmersión llingüística. Pero n’Asturies, onde la política llingüística en cuenta d’inmersión pasa namás per chiscar un poco, les consecuencies del diseñu llegal que mos vien serín directamente catastrófiques.
L’actual anteproyectu (versión del 3 d’avientu de 2012, con añadíos del día 4), afitaría tanto na escuela primaria como na ESO y el Bachilleratu trés tipos de materies: “troncales”, “específiques” y “d’especialidá”. Les “troncales”, con unos conteníos diseñaos n’esclusiva pol gobiernu central (Ciencies Naturales, Ciencies Sociales, Matemátiques, Llingua Castellana y Primera Llingua Estranxera) tienen qu’ocupar como mínimo un 50% de les hores llectives totales (na práctica munches más). Les “específiques” serín dos, obligatories de garrar: Educación Física y Relixón (o la so alternativa, agora llamada “Valores Culturales y Sociales” en Primaria y “Valores Éticos” na ESO). Tamién entrarín nesti bloque otru grupu d’asignatures, nel casu de Primaria dos pa escoyer una (Educación Artística y 2ª Llingua Estranxera), y nel casu de la ESO (de 1º a 3º), elexirín ente una y tres d’ente seis (Cultura Clásica, Educación Plástica y Visual, Música, Tecnoloxía, 2ª Llingua Estranxera o Iniciación a l’Actividá Emprendedora y Empresarial). Quedarín depués les asignatures del tercer bloque, les “d’especialidá”, que serín, nel casu de les comunidaes con otra llingua cooficial, esa mesma llingua y, como muncho, otra más diseñada pola conseyería d’Educación correspondiente. En 4º de la ESO, anque la configuración prevista del cursu ye más enguedeyada, siguen los tres bloques. En Bachilleratu, tamién.
¿Ú’l güecu pal asturianu? Lo lóxico sería suponer que nesi tercer grupu, pero como la llingua tien de ser voluntaria y hai qu’ufrila a escoyer ente otra, y nesi tercer grupu nun taría, por ser namás una, entós habría que metela nel grupu segundu, el de les específiques, pero resulta qu’esi grupu ta zarráu: son les asignatures que pon l’anteproyectu, nin más nin menos ¿Ú’l güecu entós pal asturianu, repetimos? En nengún sitiu. El güecu ye ceru. Y equí nun val poner como escudu la Llei d’Usu, porque una llei orgánica d’ámbitu estatal ye de rangu superior al d’una de rangu autonómicu.
Conclusión: l’únicu marcu posible pa que la llingua asturiana y el gallegoasturianu sigan tando presentes nel sistema educativu ye la oficialidá de les mesmes, pa poder agospiase al “bloque segundu” de materies. La precariedá llegal que vien padeciendo la llingua asturiana per más trenta años d’autonomía podría acabase, bien perriba bien perbaxo: o la reconocencia definitiva como llingua oficial d’Asturies, con toles consecuencies qu’eso implica pal sistema educativu, o la so anulación definitiva nel mesmu.
Ye la hora de la unidá. Esta ye una más de les munches razones poles qu’hai que baltar esta llei indigna, pero tien una importancia simbólica que va acuyá de la propia comunidá educativa. El llamáu a la movilización tresciende asina a esta y tien de llegar a la sociedá asturiana entera. Hai que salir a la cai, con más fuercia que nunca, a dar la cara, anque namás seya por dignidá individual y colectiva

Faustino Zapico

Espublizáu en Glayiu.org

SOLIDARIDÁ

IAS refuga la LOMCE y llama a defender la llingua asturiana.

Izquierda Asturiana fai un llamáu a tola comunidá educativa y al conxuntu de la sociedá asturiana a movilizase en defensa de la presencia del asturianu na enseñanza.

L'actual anteproyectu de llei d'educación (LOMCE) dexa fuera la posibilidá de que l'asturianu tea presente como materia a impartir.

La condición de llingua non oficial del asturianu va facer imposible, col nuevu marcu, la so inclusión nel currículum.

Una vez más pagamos les consecuencies de que'l asturianu nun seya oficial.

Esti pue ser l'asaltu final a un idioma milenariu que muerre adulces ente la desidia y la hipocresía de la clase política asturiana.

Vamos entamar aiciones lo más unitaries posibles pa valtar esta agresión.

FONTE: Perfil de facebook d'IAS.

Fusión de conceyos: l'ataque definitivu

Dende qu’españó esta crisis capitalista nel Estáu español y s’agravó ainda más con ésta la crisis permanente que vive’l nuesu país, Asturies, llevamos bien de tiempu sintiendo falar a políticos, sindicalistes y tamién ciudadanos de la posibilidá de fusionar conceyos, desaniciar mancomunidaes o unificar servicios públicos. Hai una idea xeneral de desllocalizar y globalizar les coses en pro d’un supuestu aforru y d’una supuesta eficiencia potencial.

El maltar surdío dende’l Pueblu colo que llamen dende los mass-media como “clas política”, los reiteraos llamaos a l’austeridá y la inoperancia de dalgunos servicios son el caldu de cultivu d’esti tipu de posicionamientos. ¿Pero estes iniciatives s’afiten no anteriormente comentáu o hai dalgo más allá? ¿Hai cuestiones ideolóxiques detrás?

Asturies cunta n’actualidá con 78 conceyos y 18 mancomunidaes estructuraes. Los 78 conceyos nun se tienen por qué correspuender a la realidá nacional asturiana, partiendo de la bas de qu’hai conceyos que tan fuera de l’alministración asturiana onde hai un fondu sentimientu de pertenencia al nuesu país y per otru llau hai una serie d’ámbitos territoriales que quieren conformar un conceyu propiu, como ye’l casu hestóricu de Llugones. Ciertamente, la estensión xeográfica y demográfica de los conceyos asturianos ye bien peculiar, yá que se trata d’unos conceyos pergrandes en cuantes a estes dos variables si facemos una comparanza seria y posada colos municipios del restu l’Estáu español.
Como dicía, determinaos ámbitos sociopolíticos, comunicativos y sindicales empobinaron dende hai unos años a nivel estatal y nacional midíes nesti sen, pel momentu ensín muncha práutica. Un sector radical son los defensores de desaniciar les Comunidaes Autónomes y recentralizar l’Estáu español de forma pura y dura, tornando al centralismu del franquismu. Esi tipu de plantegamientos nun hai que descuidalos pol so peligru, pero entá tienen pocu sofitu de la xente y tan, pel momentu, lloñe de ser más que la ilusión de cuatro tardo-franquistes. Toi falando de grupos mediáticos como Intereconomía y otros canales o medios d’ultradrecha. Pero tamién tenemos a los y les señores d’UPyD, con plantegamientos iguales, anque munches vegaes na canalización del so discursu nun falen d’esta idea n’abertal.

Per otru llau, y equí ta’l principal peligru anguañu, tan los partidarios de fusionar conceyos y crear nes autonomíes macro-municipios partiendo d’esi amiestu de conceyos. Esta opción cada día ta más en boca y son munchos los ámbitos que reclamen actuaciones nesti sen, les más de les vegaes, renegando de qu’estes fusiones vayan acompañaes de idees de recentralización del Reinu d’España. El supuestu parasitismu, la duplicidá de servicios públicos o’l númberu de trabayadores municipales de cada conceyu son los principales argumentos. Pero nun hai más ciegu que’l que nun quier ver y hai que falar d’otres coses a colación d’estes propuestes.

Nesti sen, otra vuelta sal el nome d’UPyD. Esti partíu reaccionario punxo como condición pa ser llave de gobiernu, depués d’algamar un diputáu na Xunta Xeneral, gracies a La Nueva España, la fusión de conceyos. Finalmente’l PSOE fixo qu’estos sofitaren igual a Javier Fernández arrenunciando al tema de la fusión de conceyos, pero l’alderique yá ta xeneráu na sociedá asturiano y UpyD nun escuende les sos intenciones de llevar alantre esta idea cueste lo que cueste. Amás el PSOE ya Izquierda Unida, que son los partíos que xunto UpyD remanen anguaño Asturies, nun creo que seyan grandes defensores de los conceyos asturianos, yá que lleven tola vida amosando colos fechos un xacobinismu, centralismu ya inclusive españolismu como pocos.

Y miren que casualidá. Nes anteriores selmanes, les xuntes comarcales d’UXT y CCOO nel Valle’l Nalón, sindicatos averaos a PSOE ya IU respeutivamente, insisten en fusionar los conceyos d’esti valle asturianu no que sedría un solo Ayuntamientu. Hai una insistencia absoluta dende estes centrales sindicales nel Valle’l Nalón en fusionar tolos municipios d’esta cuenca minera. Nun voi insistir muncho en dicir qu’estos sindicatos, anque se supón que tienen sensibilidá en cuestiones identitaries y determináu federalismu, son igual de centraliegos que partíos como’l PSOE o IU. Esti posicionamientu coincide con otros que federaciones o xuntes comarcales d’estos sindicatos burocratizaos fixeron n’otres partes del Estáu Español.

Hai que dicir que toes estes intenciones vienen empobinaes por distintes sensibilidaes, eso si, siempre dientru d’esi statu quo español y neolliberal o claudicante col neolliberalismu. Pa rematar, l’Estáu Español plantegó entamar una reforma de les alministraciones llocales. Fai unos meses dende Madrí Rajoy y la so banda de criminales tresmitieron a la opinión pública la intención de desaniciar les mancomunidaes y too ello depués d’esborriar del mapa el 30% del númberu de conceyalíes nos municipios del Estáu. Agora se supón que los conceyos podrán decidir, ver veremos, el númberu de puestos de conceyales. Esti ye’l panorama que tenemos. Con esto quieren que combayemos.
Son idees mui complementaries toes estes qu’acabo d’esponer y que tienen enfotos comunes: alloñar la política y la “democracia” de les mases, recentralizar l’estáu y caltener l’orde vixente con un retrocesu democráticu ensín precedentes. Entren agora nesti asuntu intereses políticos, económicos, ideolóxicos y corporativos. La cosa mete mieu al pánicu, sí.

Énte esti panorama ¿qué podemos dicir?. En primer llugar, atalanto qu’hai muncha xente de la izquierda alternativa n’Asturies a favor de fusionar conceyos. La rede clientelar de la FSA fai que muncha xente, quemada con esi partíu-empresa, pueda sofitar determinos que-yos quiten privilexos, en principiu, a los señores de Javierín Fernández. Pero lo ciertu ye que’l PSOE nun pierde un res. ¿Qué puede perder la FSA-PSOE en la Cuenca’l Nalón si fusionen los cinco conceyos? Imaxinen, tendríemos un partíu, un sindicatu dominante y un alcalde sofitando los mesmos intereses. Quiciabes los alcaldes que vayan a perder el so puestu nun tean muncha gana de que-yos quiten esi puestu, si, pero’l PSOE de Javier Fernández y la Federación Socialista Asturiana tan a favor dexuru. Nun-yos esmolez un res qu’esta idea vaya medrando, tien de presta-yos pola vida afitar ainda más el so poder nun ñeru propiu, como ye’l Valle’l Nalón.

Tenemos qu’esterrar la posibilidá de puxar poles fusiones de conceyos d’Asturies na izquierda d’esti país. Nun vamos ganar naide que tea nel espectru políticu alternativu y coherente. Esto namás que va alloñar la institución municipales de los intereses del pueblu y va a afitar ainda más el bipartidismu (PSOE-PP) y les sos marques blanques (FORO-IU).

Nesti sen, hemos de tener nidio que la fusión de conceyos, cuando sal de partíos de calter ultradrechista, como UpyD, y sal de partíos y sindicatos que lleven remanando la vida social de los asturianos depués de décades de llexitimación del orde burgués y español vixente, nun puede traer nada bono pa les clases populares, como tolo que tan avezaos a facer. Nun podemos esperar a que los intereses de los mesmos de siempre nun tean detrás d’esto, nun podemos baxar la guardia por qu’hai evidencies, munches evidencies.

Hemos puxar, güei más que nunca, polos nuesos conceyos asturianos. Los conceyos asturianos son parte de la nuesa identidá. Conformen la nuesa identidá como vecinos y vecines de los nuesos pueblos y afiten na xente un sentimientu identitariu de pertenencia mui sanu y prestosu, sacantes llocalismos cada vegada más esborriaos del mapa. Pero nun queda ehí namás el tema. Los conceyos asturianos son la estructura que vertebra la nuesa nación dende hai munchos años, son los pegoyos sobre los que s’afita’l país asturiano, cola so pluralidá y la so cadarma organizativa propia. Desaniciar agora los conceyos sedría como facer por desaniciar bona parte de la nuesa cultura tradicional o desaniciar l’idioma d’Asturies. Arrenunciar a los conceyos ye arrenunciar a una parte clave de la nuesa identidá como pueblu estremáu nel mundu. Munchos y munches, nun tendrán gran sensibilidá colo que toi acabante d’esponer y nun se si-yos importará muncho. Son llibres de tener la so visión, pero si arrenuncien d’ello tarán asimilando al empar el nacionalismu más reacionariu, esencialista, arcaicu y chovinista: l’español.

Per otru llau, como yá dexe ver enantes, arrenunciar a los nuesos conceyos ye tragar ainda más nel procesu de esmantelamientu de drechos fundamentales que tamos viviendo. El conceyu ye la institución política que más cerca tien el vecín d’un conceyu, xunto la colación o parroquia. Pues bien, faciendo conceyos o municipios monstruosos, como se vien plantegando, namás que va servir pa alloñar al ciudadanu más de la política, yá seya esta municipal, nacional, estatal o internacional.
Facer conceyos más grandes, tanto no demográficu como no xeográficu, nun val pa otra cosa qu’alloñar la Casa Conceyu de la xente, ye pura llóxica. Pensemos en cualesquier problema vecinal que demanden resolver los vecinos nun gran conceyu, onde l’alcalde nun se sabe nin onde vive o nun conceyu pequeñu, onde tol mundu conoz a la persona que lleva l’alcaldía y puede presionar meyor a esa persona.

Esta ofensiva ye un recorte en toa regla a la democracia, la llibertá y los drechos de les clases populares. Unes clases populares mui quemaes y que, o bien yá pasen de siguir la política, suponiendo esto un golpe definitivu, o bien escueyen alternatives polítiques populares y braeramente tresformadores. Claro, la fusión valdría p’alloñar a los partíos y organizaciones polítiques asturianes y de clase de la institución conceyil. Sedría mui dificil, cola fusión y la supresión de conceyalíes, qu’opciones alternatives a los de siempre algamaran daqué nos conceyos. Sedría una muria mui alta la qu’afitaríen a la unidá popular y a la democracia participativa y popular nos nuesos conceyos. Ye un golpe mui duru a alternatives nueves y que quieran facer les coses dende la base y d’otra manera distinta a la partitocracia del espectáculo.

Nun seyamos inocentes. El retrocesu “democráticu” que tamos viviendo nun ye un mensaxe panfletariu que dalgunes persones empleguen pa mancar al PP o los de la FSA. Ye una realidá qu’amás ta mui viva y va siguir alantre. Namás hai de salir un pocu a la cai. Y tampocu seyamos inocentes aislando esta propuesta de fusionar conceyos d’esti retrocesu de los drechos y llibertaes algamaos pol Pueblu Trabayador con muncho sangre y sacrificiu. Nun ye casualidá que surda agora, nesta dómina de conflictividá y progresiva radicalización del orde vixente, onde’l populismu y el pseudo-facismu tornen pela puerte grande. Asimilar propuestes d’esta natura ye perder lo pocu que tenemos, tornar a tiempos mui escuros y alloñar pa siempre una salida coleutiva, digna y tresformadora a esti orde de les coses.

Pola nuesa identidá como vecinos y como país tenemos que defender los conceyos. Polos nuesos drechos fundamentales y pola posibilidá d’algamar escenarios que posibiliten una tresformación social y nacional de verdá hai que defender los conceyos. Pola viabilidá socioeconómica tenemos que puxar polos conceyos d’esti país. Pol progresu social, la democracia popular y participativa y el futuru d’Asturies hai que defender con muncho enfotu y fuercia el conceyu asturianu. Hai soluciones muncho más afayaices pa los intereses de les y los trabayadores asturianos qu’esta midía. Ye l’ataque definitivu: recuperemos la dignidá, puxemos polos conceyos, faigamos conceyu, faigamos país y construyamos clase.

Xose A. González

Espublizáu en www.glayiu.org