Condergáu a pagar multa'l mozu que denunciare acosu y agresión d'un policia

Según informa Sofitu, muerganismu antirepresivu popular, yá ta asoleyada la sentencia nel casu de l'agresión y amenaces a un mozu independentista por parte d'un policía d'ideoloxía neonazi. "Como yera d'esperar la xusticía española amparóse na condición de funcionariu del ex-brigadas azules (grupusculu neonazi fuboleru) pa da-y la presunción de veracidá "y ye que, como ye vezu, tres sabese denunciáu'l policía, denunció al mozu por ñegase a identificase, "y ante denuncies cruzaes el funcionariu siempre diz la verdá".

Asina, siguiendo la petición del fiscal el mozu independentista, militante de DARRÉU, foi condergáu al pagu d'una multa de 10 díes a 6 euros diarios lo que fai un total de 60 €. SOFITU va facese cargu de la multa "por ser reteníu illegalmente, amenazáu, agredíu nuna mano y vexáu en publicu". El policía foi absueltu, la xueza "fizo oyíos sordos sobre les reclamaciones de la defensa qu'esixía la visualización de los vidios de traficu del Ayuntamientu d'Uviéu asina como'l de la camara de xixilancia d'un bancu arreyáu a los fechos. Estes prebes, vitales, foron desechaes" esplica'l muerganismu antirrepresivu.

SOFITU quier recalcar que "pese al corporativismu esistente na xusticia "a la española" ye importante siguir denunciando los abusos facistes cola fin de que dalgún día siamos quién a sacar de les nueses cais a estos personaxes enemigos de la llibertá del pueblu asturianu y la necesidá de siguir construyendo la nuesa alternativa de llibertá frente al so sistema de represión y muerte".

Dexar de ser tan humildes

Ta viéndose bien claro que´l problema asturianu tien que s´internacionalizar. Asoleyáronse nos últimos díes dalgunos escritos y campañes cibernétiques pa dar a conocer nuesa llaceriosa situación. Asturies ye una nación altamente reprimida, una sociedá neutralizada. El grau de neutralización de les respuestes sociales a la represión y a la ocupación ye tan intensu, que cuasi nun se sienten les voces fuera de dellos ámbitos o del mundu virtual alternativu.



D´una banda, ta la represión llingüística. Sí. Pero d´otra, hai toa una riestra de represiones venceyaes a ella.

Asturies ye una nación milenaria. Na Edá Media fue un Reinu independiente que se conformó como una de les más vieyes naciones d´Europa. Nel solar d´esi vieyu Reinu biltó la llingua asturiana, tamién una de les llingües romances más vieyes d´Europa. Depués, rebaxada so condición a Principáu, dientro la Corona Castellana, la llingua asturiana fue falada con abonda llealtá pol pueblu, inda poles élites, como atestiguen tovía nel sieglu XVIII los casos de Xovellanos y so círculu ilustráu. El desprestixu real del idioma asturianu, bien qu´arrincando dende la mesma dómina de l´anexón castellana (s. XV), entainó cola invención del Estáu Lliberal (1812), puntu d´arrinque de la invención d´España. Un inventu que costó bien de sangre, sudu y llárimes.



A partir del nuestru Ochobre Revolucionariu, y más entá, del Franquismu, al asturianu se-y trató como dialectu “rural ya entrañable”, despotenciándolu de toa posibilidá reivindicativa no identitariu y popular. Clara mentira que güei los historiadores serios entamen a desmontar. L´asturianu fue siempre la llingua del Pueblu, non solo del Pueblu campesín, sinón del obreru y del emplegáu de la ciudá. Anguaño anecien con despotenciar políticamente al asturianu, tratando de vender la idea de que ye llingua per s'inocente que pue algamar una oficialidá de segundu grau (non traumática) ensin componentes identitarios. Ye la idea de los tres partíos mayoritarios españolistes: PSOE, PP. IU. Xugái a ser diferentes, dícennos, pero ensin trespasar unes llendes. Llibrinos, actos simbólicos, versucos en boca de Felipe y de Letizia, homenaxes florales na Xunta y nos Conceyos. Y pocu más. Esa Oficialidá de mentira va ser pa ellos, non pa nós.



Porque la represión llingüística nun ye posible d´estremar de la represión social, económica ya identitaria que sufrimos. Nun hai manera de pasar esi bisturí. Equí , nel estáu d´España, nun se quier, por nada del mundu, una cuarta “nacionalidá fuerte”, nun mos engañemos. Nun se quier abrir esi melón, que yá en Catalunya y Euskal Herria ta la cosa mui ingrienta. Una Oficialidá daveres ye la llave a la conciencia del Pueblu y el reencuentru cola so propia identidá. Y esi reencuentru fáciese cola llingua y cola hexemonía nel so Enseñu. Una Llingua Asturiana, tan humilde y humildada, qu´entrara na Hestoria puesta de Llargo y col compromisu de so propia xente, ye un obleru peligrosu mesmu nel corazón del Reinu Hispanu. Ye asina. La cosa entama por dexar de ser tan humildes. Ye hora de trabayar xuntos los asturianos, y ensin medies tintes.

Artículu de Carlos Xabiel Blanco

Conceyu abierta de la iniciativa internacional " Democracy for Asturies"

El pósimu vienres 23 de xunetu va presentase en Xixón la iniciativa internacional "Democracy for Asturies". Una campaña internacional dende l'espaciu de la izquierda nacionaliega ya independentista y que trata al empar de "denunciar la situación pre-democrática que carez el país asturianu fuera les nueses llendes, y tamién valise d’un sofitu internacional llexitimu que-y de puxu" a les sos tesis. Asina “Democracia p’Asturies” quier ser "el dinamizador que ponga a Asturies énte la comunidá internacional".

La iniciativa internacional “ Democracia p’Asturies” va ufiertar una páxina web y un manifiestu "a toles organizaciones y asociaciones del mundiu" cola fin d’axuntar fuercies pa superar "el marcu políticu actual y algamar plenos drechos soberanos". El manifiestu van poder roblalu les persones y organizaciones que lo deseyen.

Conceyu Abiertu el miércoles 21

Cola fin d'axuntar fuercies y voluntaes ta convocáu un conceyu abiertu de la iniciativa “Democracy for Asturies” pa esti prósimu miércoles 21 de xunetu a les 18:30 nel Llar d'Andecha de Noreña, alq ue tan convidaes asistir toles persones y coleutivos que quieran. La intención ye "promover ñudos de trabayu, sentir toles formes d'afrontar la campaña y que les organizaciones/persones aporten la so visión y el " modus operandi" de facer les coses".

Fonte: Infoasturies.

Darréu denuncia'l bombardéu políticu del mundial de fútbol

"HIPÓCRITES QUE N’OTRES OCASIONES RECLAMABEN NUN MEZCLAR POLÍTICA Y DEPORTE APROVECHEN PA ESPARDER LA SO PROPAGANDA

Dende Darréu queremos asoleyar l’ascu y vergoña a partes iguales que sintimos ente les celebraciones de la victoria del campeonatu mundial de fútbol sofitaes y remanaes polos poderes fácticos del españolismu más ranciu, que torna a enseñar el focicuestos díes dexando nidiu qu’enxamás marchara d’ente nos.

Asina pudimos ver a los medios de desinformación en bloque, partíos políticos del poder y los elementosmás reaccionarios de la sociedá, celebrar con inmensa gayola como durante’l mundial de fútbol emblemes y tou tipu de propaganda de calter facista entemecíasecon normalidá col restu del merchandising y eslóganes españolistes qu’invadieren Asturies repartíos ente multinacionales, petroleres, periódicos llocales d’herencia facista como La Nueva España y bazares asiáticos qu’aprovecharen pafacer l’Agostu. Les editoriales de la prensa escrita, radio, televisión ymedios dixitales qu’abarquen l’abanicu ideolóxicu que va dende la falsaizquierda del P$OE-IU hasta los grupúsculos d’extrema derecha y neonazis,asoleyaren al unísonu y como una sola voz l’arguyu de sentise españoles, fomentando inclusu nes restrasmisiones deportives l’odiu hacia los nacionalistes ya independentistes de les estremaes naciones del estáu español, especialmente Cataluña y País Vascu.

Nun ye normal que dientro d’un estáu que se diz constantemente democráticu, hasta los comentaristes deportivos d’absolutamente tolos medios, incluso los teóricamente próximos a la izquierda como Canal +,insulten y faigan chancia con total impunidá del más del millón y mediu depersones que'l día anterior marcharen peles cais de Barcelona pidiendo la independencia, o del restu de les persones que defendemos proyeutos políticos que nun pasen necesariamente pela so España, contraponiendo frente a estes llexítimes y razonables aspiraciones les celebraciones españolistes donde por ciertu, reinóla irracionalidá na gran mayoría de los casos como demuestren les cróniques que los sos medios faen de les mesmes. Sirva como muestra otra vegada la prensa del réxime n’Asturies: La Nueva España y El Comercio asoleyaren durante díes munches semeyes onde la simboloxía franquista y neonazi yera protagonista de les mesmes y qu’acompangaben les cróniques; porsupuestu naide condergó estes actitudes nostálxiques de la dictadura.

Además pudimos sintir hasta fartar los cancios qu’espardieren ente la xente y quetienen el so orixe ni más nin menos que nos grupúsculos facistes y neonazis quese mueven en dellos ambientes futboleros y qu’algamaron a esparder gracies aesta gran campaña mediática los sos mensaxes d’incitación al odiu escontra’ldiferente y d’esaltáu y peligrosu españolismu.

Dende Darréu, queremos recalcar la evidente multinacionalidá y culturalidá del estáu español, afitamos el nuesu compromisu p’algamar el reconocimientu de les seleiciones deportives asturianes igual que n’otros estaos plurinacionales d’Europa y dicimos bien claru que por muncha invasión propagandística que carezamos, esti pueblu siguirá vivu porque cada día somos más los que nun tragamos coles sos ruedes de molín y trabayamos por llevantar los pegoyos de la nación asturiana, pegoyos qu’ensin dubia dala van llevanos pel camín del socialismu y la soberanía pa la nación asturiana, ensin xovinismu nin enfrentamientu con otres naciones y pueblos hermanos del mundu.

OFICIALIDÁ SELEICIONES DEPORTIVES ASTURIANES

¡ PUXA ASTURIES LLIBRE Y SOCIALISTA !"

Asoleyau na páxina web de Darréu.

Xuiciu n'Avilés a los dos sindicalistes de la CSI

El prósimu miércoles 21 de xunetu, a les 09:30 h, nos xulgaos d’Avilés, va tener llugar el xuiciu escontra los dos sindicalistes de la Corriente Sindical d’Izquierda, acusaos d’ocupar la primer planta de la Casa Sindical avilesina que la Patronal (FADE) tien concedía comu oficines, pero qu’enxamás utilizó y que lleva abandonada más de 10 años, col so consiguiente deterioru.

La CSI quier reivindicar l’usu d’esti espaciu pa la "braera defensa de los nuesos drechos comu trabayadores y pa la so reutilización notres actividaes, nuna ciudá na que les asociaciones atópense con torgues abondes pal desendolcu los sos llabores".

El pasáu 6 de xunu, los dos sindicalistes declararen delantre la xueza d’istruición, refugando de la so propuesta d’aceutar una falta y una multa que la xueza-yos ufiertaba pa rematar col procedimientu rápidu entamáu tres la denuncia de la FADE, avisada por dalgún de los inquilinos actuales de la Casa Sindical d’Avilés.

Énte la negativa de los imputaos frente a esta "xenerosa ufierta", la fiscalía va realizar un pidimientu de conderga de mil euros de multa por un delitu de "usurpación con violencia". Too ello magar que l’atestáu policial confirmaba que los llocales taben abandonaos.

Asina les coses, la CSI convoca una concentración de sofitu a estos dos sindicalistes, que va tener llugar el prósimu miércoles 21 de xunetu, a les 09:15 h, delantre los xulgaos d’Avilés.

Con too ello, la CSI va siguir denunciando la usurpación, pela parte la Patronal, de los llocales que tendríen d’usase pa defender los drechos de la clas trabayadora.

Infoasturies.

El Bloque dexó la coalición Izquierda Xunida

IX cada día más sola. Agora finose pal revisionismu español el cuantu "l'asturianismu"

IU acusa a BA de romper la coalición por "intereses ellectorales"

Izquierda Unida da por rotu l'alcuerdu que caltenía col Bloque por Asturies (BA) "en toa Asturies". IU acusa a BA d'abandonar de forma unillateral la coalición que calteníen por "intereses electorales y de partíu" cola fin de promover en solitariu un "proyeutu débil, minoritariu y escluyente". El secretariu d'Organización d'IU n'Asturies, Ángel González, manifestólo dempués del cocneyu que caltuvo güei la Comisión de Siguimientu de la coalición IU-BA-Los Verdes.

El diputáu del BA na Xunta, Roberto Colunga, yá solicitare la so adscripción al Grupu Mistu, colo qu'IU queda con trés diputaos. Primero los caros del BA nel gobiernu del 'Principado' presentaron la so dimisión. Ángel González señaló que nel conceyu constatóse "la ruptura unillateral" del alcuerdu por parte del Bloque y namás sirvió pa "recibir formalmente la comunicación" de la decisión. Según elli, a partir d'agora ábrese "una etapa nueva" pa IU-Los Verdes..

La ruptura ye en tol país y pa IU el BA optó por impulsar otru proyeutu políticu col que demuestra qu'antepón los soss propios intereses "al interés xeneral de los asturianos". IU diz que la ruptura "nun tendrá nengún efeutu" ya que los tres diputaos son suficientes pa caltener la mayoría parllamentaria xunta'l PSOE.

González asegura qu' IU-Verdes va siguir trabayando por un "proyeutu fuerte, ampliu ya integrador de tola izquierda tresformadora y ecoloxista n'Asturies", mientres que'l Bloque decidió apostar por "proyeutu débil, minoritariu y escluyente".

Fonte: Infoasturies.

Sonios de la cai I

Darréu y Nora Antifa, entamen nel Llar d'Andecha de Noreña'l primer "Soníos de la Cai" esti sábadu 17 de xunetu a les 18 hores col hip hop de Wanye Argastur, que presenta'l so primer trabayu, Gori Aka el Titan y MNR Crew y el debú d'IRA HXC, banda nueva de hardcore n'asturianu.

Estxs son los que nun amesten politica+fúbol.

¿ Y a estos quien los detién? ¿ Y quien mete-yos la llei antiterrorista por quemar coches ?



Graves enfrentamientos ente siguidores d'España y policía na celebración de la victoria de la seleición española nel Mundial de Suráfrica na plaza d'España de Barcelona. Hubo ventiún deteníos por desordes públicos y setenta cuatro mancaos, de los cuales nueve son mozos y trés policíes llocales, y ventidós tuvieron qu'ingresar nel hospital según datos oficiales. Tolos incontrolaos proferieron berros contra Cataluña y la policía, a quién llanzaron oxetos.

Los primeros incidentes y cargues entamaron a la una de la madrugada na plaza España, cuando los axentes de la Guardia Urbano ficieron desagospiala. Repitieronse dos hores dempués na rambla Canaletes, con un grupu más amenorgáu de forofos, y na plaza Artós la policía y los mozos tamién tuvieron qu'intervenir.

Los Bomberos de la Generalitat fixeron ochenta y seis servicios nel Principáu p'apagar quema urbano, sobremanera pola crema de contenedores de basura y tamién dalgún vehículu, ente les diez de la nueche y les seis de la madrugada pasada.

Más de 1.000.000 de persones glayen pola independencia de Catalunya

Too’l Paséu de Gracia y Gran Vía quedaron colapsaos pola manifestación en favor de los drechos de Catalunya. La manifestación entamó con una gran senyera de más de 250 metros y una pancarta col llema "Som una nació, nosaltres decidím" y un millón y mediu de manifestantes según la entidá organizadora Omnium Cultural qu’agrupa a 1.500 entidaes catalanes. La conseña más glayada foi "Independencia".

La sentencia del Tribunal Constitucional contra l’Estatut catalán pieslla’l procesu autonómicu poro la inmensa mayoría de los catalanes representaos güei na multitudinaria manifestación de Barcelona.

Na cabecera de la manifestación dempués de la senyera tuvieron los presidentes y ex-presidentes de la Generalitat y del Parlamentu; José Montilla, Ernest Benach, Pasqual Maragall, Jordi Pujol, Joan Rigol i Heribert Barrera. Dempués ciudadanos anonimos representando a tolos Països Catalans, onde taben ente otros la Obra Cultural Balear, Acció Cultural del País Valencià o la Casal Català Jaume I de Perpinyà.

La manifestación ensin precedentes en Catalunya tuvo un componente nidiamente independentista. Unes hores enantes asoleyó la sentencia del Estatut del TC onde nos 883 páxines fala de que la única nación ye España, perdá de competencies del a Generalitat n’aspeutos como la división territorial, la recaudación d’impuestos, la llexislación sobro caxes d’aforros, la convocatoria de referéndums y el poder xudicial.

A la so vez, más de 10.000 persones movilizabense ayeri en Donosti puxando pol drechu d'autodetermín del Pueblu Vascu. Dambes manifestaciones cuasi-simultanees querien combayar xuntes, axuntando fuercia ente les dos naciones.

Fonte: Aruelu.

Andecha solidarízase cola ciudadana detenía por dar un 'tradicional mazcatu' a Areces

Andecha Astur solidarízase cola manifestante que foi detenida nel recibimientu popular al "Tren Negro" y a Tini Areces esti vienres en Xixón y a la que se-y acusa de "atentáu contra l'autoridá". La organización nacionaliega felicítala "por poder espresar de forma tan nida la indignación y el despreciu de la sociedá asturiana haza Tini Areces y les polítiques del PSOE n’Asturies" y considera "inaceutable" que s’intente "criminalizar" la so actuación, "enartada nes protestes y reivindicaciones sociollaborales qeu vienen dándose n’Asturies, catalogándola comu «agresión», cuandu foi cenciellamente’l tradicional mazcatu".

Esta solidaridá pa cola manifestante que foi detenía y llueu lliberada por mor de la presión popular énte la comisaria "estiéndese" al conxutu de "represaliaos" por facer pública la "indignación y despreciu de la sociedá asturiana haza Tini Areces y les polítiques del PSOE p’Asturies" diz Andecha en nota prensa. La sociedá asturiana, y sobro too la mocedá asturiana, abocada al paru y la emigración poles polítiques de presonaxes comu Alvarez Areces, sumisu representante de Madrid en Asturies, vese representada fielmente pol xestu d'esta asturiana".

Nesi sen, Andecha Astur considera "inaceutable que s’intente criminalizar la so actuación definiéndola comu «agresión», cuandu nun hai más que ver les imaxes pa decatase de que cenciellamente foi un mazcatu (colleja), un xestu tradicional y popular que por supuestu ta mui lloñe de lo que puea considerase una agresión". La organización d'izquierda nacionaliega fai un llamáu a la sociedá asturiana pa que siga "espresando’l sentir colleutivu y -siempres dientru los ámbetos democráticos- ponga n’evidencia la criminal situación que carecemos n’Asturies y la responsabilidá del PSOE y los sos secuaces na mesma, de tala miente que nun quede impune la so actuación y tean de continuar recurriendo a un auténticu exérciu policial ca vuelta que quien salir a la cai".

Per otru llau, Andecha Astur omite calificar el comportamientu de Tini Areces y la so «guardia pretoriana» na represión de la democrática espresión de refuga haza’l mesmu y les sos polítiques, atalantando que les "imaxes de los fechos son abondo nidies por sigo mesmes, destancando quiciavis l’absoluta falta de dinidá del Presidente a la hora de siñalar y dirixir la represión. Patética espresión de lo que foi la so política en toos estos años al frente de la sucursal del «Principado»".

Fonte: Infoasturies.

El Bloque abandona'l Gobiernu y plantega aconceyase con IU

Yá lo alvirtieren y güei fixéronlo oficial: Bloque por Asturies abandona'l Principáu depués de qu'ayeri saliera alantre nel Parllamentu, colos votos de PSOE ya IX, la Llei d'Axuste.

Según indicó l'hasta agora direutor de l'Axencia Asturiana de Cooperación, Rafael Palacios, en próximos díes van analizar colos sos socios de coalición, IU, la nueva situación, que "evidentemente va tener consecuencies". Asina, la nueva situación podría suponer el final de la coalición con IU y con Los Verdes. Sicasí, Palacios afirmó que l'únicu diputáu que tienen los nacionalistes na Xunta, Roberto Colunga, nun va arrenunciar al so escañu.

En rueda de prensa Palacioa anunció que'l próximu llunes tantu él como'l direutor de l'Axencia de Discapacidá, Javier Antuña, van presentar la dimisión énte la conseyera Noemí Martín, a la qu'estimó'l trabayu desenvueltu hasta agora.

"Estimamos el trabayu desenvueltu tantu pola conseyera como por tou l'equipu de la conseyería. Foi un trabayu escelente nun gobiernu pésimu", dixo Palacios, qu'indicó que la votación d'ayeri foi "la gota qu'apinó'l vasu". "Yá dixéramos que nun díbamos nin sofitar nin participar na aplicación d'esta llei inxusta", dixo.

Asina, indicó que cola llei aprobada ayeri, el Gobiernu del Principáu pretende "imponer un retayu de los sueldos públicos muncho más allá de lo que ye d'obligáu cumplimientu". Aportunó en que se trata d'una midida que supon un retrocesu de la inversión social, un retayu salarial a los emplegaos públicos y un golpe a los sectores más vulnerables de la población".

Palacios valoró'l votu en contra del diputáu de BA, Roberto Colunga, "magar qu'hasta l'últimu momentu trataron de consiguir que camudáramos d'opinión" y afirmó que'l mesmu nun va arrenunciar al so escañu.

Fonte: Asturies.com

Una persona detenía y delles mancaes na concentración contra la cris pa recibir al `Tren Negro'

La protesta plantó cara y desbordó a la policía

La concentración que'l Conceyu de Trabayadores escontra la Cris convocó esta tarde pa recibir al "Tren Negro", que llegaba a Xixón con autoridaes (ente elles el presidente del 'Principado' Tini Areces) y participantes pa dar aniciu a la 'Semana Negra' de Xixón, tuvo como rempuesta una carga policial xabaz que prevocó la detención d'una presona y feríes y contusiones en numberoses de les presones que participaren na concentración.


Na concentración, amás del Conceyu de Trabayadores, participaben dellos coleutivos de trabayadores d'empreses en cris, comu Chupa-chups o Venturo XXI. Tres la carga policial y la concentración de trabayadores enfrentóse a la policía, que se vio desbordada poles numberoses presones concentraes. De fechu, la presión de los y les manifestantes fizo que la policía tuviere que dexar en llibertá a otres presones que s'atopaben "reteníes".

El propiu Tini Areces foi'l qu'ordenó la detención de la presona qu'agora s'atopa en comisaría, acusándola d'una agresión qu'enxamás esistió. La concentración atópase delantre comisaría desixiendo la llibertá de la presona detenía, que yá tien l'asistencia d'una abogada.

Infoasturies.

Pasión borreguil

Cuando'l fúbol conviertese en política y cortines de fumu pal imperiu...

1000 euros por denunciar la usurpación del patrimoniu sindical

N'emprestando declaración ante la jueza d'instrucción, los afiliaos del nuesu sindicatu conocieron el pidimientu que va realizar la fiscalía nel xuiciu que se va cellebrar el próximu día 21 de xunetu.

D.A. y M.N. refugaron la propuesta d'aceptar una falta y una multa pa terminar col procedimientu rápidu empecipiáu tres la denucia de la FADE, sollertada por dalgún de los actuales inquilinos de la Casa Sindical d'Avilés. Ante la negativa de los imputaos frente a esta "xenerosa ufierta", la fiscalía va realizar un pidimientu de condena de mil euros de multa por un delitu de "usurpación con violencia". Tou ello a pesar de que l'atestáu policial confirmaba que los llocales taben abandonaos.

La CSI va siguir denunciando la usurpación, per parte de la patronal FADE, de los locales que tendríen d'utilizase pa defender los derechos de clase trabayadora.

La seleición española nun nós representa. Seleición asturiana yá!

NUEVA INICIATIVA POLES SELEICIONES NACIONALES ASTURIANES NEL FACEBOOK



Entamó nel Facebook una iniciativa cola creación d’un grupu col enfotu en puxar por una seleición asturiana ya que consideren que la seleición española de fútbol nun-yos representa. Son munchos los asturianos que consideren qu’Asturies tien de tener seleiciones nacionales propies nel ambitu deportivu.

Trés la "españolización" del deporte rei, el fútbol, los autores sorrayen que ye un grupu "Pa toes y tos esos a los que nun-yos representa la seleicíon española de futbol y que nagüamos por una seleción que por fin represente Asturies".

Los autores del grupu consideren que falen de futbol porque tien máxima difusión, "pero falamos tamién de cualquier seleición deportiva", sorrayen.

El grupu de Facebook nomase "La seleción española nun me representa nel mundial. SELECIÓN ASTURIANA YA!" y ya tien media centena d’amigos. P’apuntase pues facelu al traviés d’esti enllaz

Fonte: Aruelu.com

Darréu colos imputaos de la Corriente Sindical d’Izquierda

La Mocedá Independentista Revolucionario, Darréu, vien d'amosar la so solidaridá pa colos militantes de la Corriente Sindical d’Izquierda qu’esti xueves pasáu "fueron prindaos ya imputaos por cuenta d’intentar lliberar un espaciu". Los fechos asocedieron na tardi’l xueves cuando dellos militantes de la CSI ocuparen na Casa Sindical d’Avilés la sé de la patronal FADE. Dende Darréu llamentamos lo asocedío "pues amuesa una vegada más que la maquinaria represiva del Estáu sigue furrulando y obedeciendo ciegamente a les órdenes del capital".

A la par, la organización moza quier da-y tola so solidaridá a los imputaos y "tol sofitu a los compañeros y compañeres del Sindicatu de Clas pa siguir organizándose". Darréu camienta que l’aición del xueves ye una "gran iniciativa" y val pa "espeyar la braera cara d’un sistema onde los supuestos 'sindicatos' comparten llar social cola patronal qu’amarra a la clas trabayadora". Poro, pa la organización xuvenil independentista "ye d’aplaudir" l’aición desendolcada, que dexa ver "les contradicciones del sistema y l’entreguismu del sindicalismu mariellu, por supuestu, fondamente integráu nesti sistema".

Darréu desixe que nun haya represalies a los sindicalistes y que seyan retiraes les causes de les que se-yos acusa, que son "usuparción de llocal y daños". Darréu tamién quier facer un llamáu a la mocedá pa movilizase y dir a la concentración convocada esti prósimu martes día 6 a les 9:45 h nel xulgáu d’instrucción d’Avilés.

Más Democracia a la española esta vegada n'Euskal Herria

La perredumbre obedeciendo la voz del so amu.

¡Puxa'l Pueblu Trabayador!

Fai! diz que la llibertá sexual fai a una sociedá más llibre

Fai! diz que la llucha pola llibertá sexual ye prioritaria y recuerda qu’anque’l coleutivu gai tenga los mesmu derechos llegales, tovía queda homofobia na sociedá.

La organización soberanista acudió a la movilización entamada por XEGA’l 28 de xunu pa remembrar los fechos d'hai 40 años cuando nel pub Stonewall de Nueva York la policía fixo una redada d'acosu al coleutivu gai, que retrucó a la represión con una revuelta en llucha pola llibertá sexual.

Fai! entiende que la llucha pol reconocimientu de la llibertá afectivo-sexual ye prioritaria pa construyir una sociedá realmente llibre y nueva na que nun heba nengún tipu de torga nin discriminación, “pa ello fáise precisu'l sofitu activu al movimientu LGTB y la implicación na so llucha que tamién ye la nuesa”.

Sicasí, dende la organización afirmen que, la situación pal coleutivu tien lluces y solombres. Ente les lluces señalen l'aprobación del matrimoniu ente persones del mesmu sexu. Ente les solombres recuerden la discriminación, ridiculización y fobies “que siguen apaeciendo en munchos nichos sociales y nes que la escuela y los medios de comunicación tienen muncho que dicir”. “Aisllar esos focos d'homofobia ye prioridá anguaño pa dir valtando prexuicios qu'aseguren un futuru a curtiu plazu de non discriminación y plenos drechos”, afirmen.

Dende Fai! tamién quier dar la norabona a Xente Gai Astur y al restu de les entidaes organizadores del día del Arguyu en Madrid por nun convidar a la participación d'instituciones como l'Ayuntamientu de Tel Aviv, “que nun conderguen la masacre xenocida en Palestina del sionismu israelín”. Al empar, feliciten a XEGA pola so postura de nun collaborar cola Comunidad Judía de Asturias "que tampoco nun conderga l'esterminiu palestín”.

Fonte: Asturies.com

Probitú democrática ya internacionalización del conflictu

Afayámonos nuna situación de país bien murnia. Los drechos nacionales y sociales d’esti pueblu milenariu son nulos y nun tan garantizaos en denguna fueya impresa. Lo único impreso garantiza precisamente la falta de drechos que l’Estáu Español nos da. Ufiértanos una llista amplia de pilancos llegales a la hora de desendolcanos con un mínimu non yá de soberanía, sinon d’autonomía. Les lletres, como digo, namás garanticen la falta de democracia n’Asturies, yá seyan impreses na Constitución Española o nel Estatutu d’Autonomía pal “Principado” d’Asturies. Les lletres dan frases, y estes mesmes frases asoleyen drechos democráticos, pero, evidentemente, ayenos a les necesidaes de los asturianos y asturianes. Ayenos y separtaos dafechu d’esos intereses del nuesu pueblu. Unes lleis y garantíes plantegaes únicamente dende’l centralismu españolista y que nunca sintieron les vindicaciones populares del país asturianu. Esta llei impuesta nin respeta a Asturies como nación, nin nos normaliza , nin nos respeta como asturfalantes, ente otres coses. Esta llei ampara a la maquinaria represiva p’actuar como-y pete.

Esos testos que tenemos, repito, namás afiten el sometimientu d’un pueblu a los intereses del réxime del Reinu d’España, testos redactaos col espíritu del tardo-franquismu más ranciu. Namás afiten represión y la ñegativa del Estáu a que les asturianes y asturianos seyan quien a algamar dalgo de puxu y tener drechu a decidir por sí mesmxs. Esti drechu a opinar y tomar partida ñeguenlu nel país títeres y poltroneros asitiaos col interés de la oligarquía imperante a cumplir la función yá programada. Hailos de tolos collores y de toles tribes, pero toxs salvaguarden l’espíritu del “ too queda atáu y bien atáu” de Franco y escúdense nunes cartes de drechos totalmente deficitaries de cara a la participación de la ciudadanía na vida política diaria.

Per otru llau tenemos númberos. Númberos que falen de cuasi 100.000 paraxs, ERE’s y múltiples cierres d’empreses, munches estandartes de la supuesta reactivación llaboral n’Asturies dempués de la reconversión. Cifres que falen d’emigración forciada, sobremanera ente la mocedá y tantos por cientu falando d’una altísima tasa de probitú nesti supuestu primer mundu. Y nun ye solo eso, los númberos dan pa más. Dan pa ver como eses y esos caciques de poltrona persiguen con multes millonaries a les organizaciones y ciudadanxs que quieren otra cosa. Multes a esos y eses que denuncien la situación que carez el país, escudándose nuevamente na so llei, qu’a la fin nun val pa más que perpetuar l’orde vixente , enxamás p’avanzar nes necesidaes qu’a los pueblos correspuenden.

Asina, merez la pena cavilar sobre’l tema y ser conscientes de lo pocu qu’insistimos a la hora d’enfrentanos énte la constitucionalidá del Estáu y l’Estatutu vergoñosu y antipopular que tenemos, totalmente alloñau de les demandes de los y les asturianes. Munches vegaes enfotámonos n’aldericar sobre qué facer nel campu xuegu. Dexamos tiempu en como combinar a lxs xugadores pa xugar el partíu de la democracia española y la constitución monárquica. Y pue tar bien, pero a lo meyor hai qu’entamar por camudar la competición, por camudar les regles del xuegu más al nuesu favor, yá que denguna garantizanos nin tan siquier finar los partíos.

En resumen, que nun danse condiciones democrátiques nesti país pa entamar a facer frenti col mesmu métodu al poder. Quiciabes tenemos que tornar al entamu. Quiciabes deberiemos facer qu’esos drechos que se supón que garanticenmos un mínimu de llibertá seyan más alcordies a los pruyimientos y les vindicaciones qu’el Pueblu Asturianu reclama. En poques pallabres, igual ye hora de reclamar una democratización de la sociedá asturiano. Igual ye hora d’axuntar voluntades ente tol movimiento de reconstrucción nacional y social cola fin d’algamar un discursu únicu, ensín atayos, y ensín dexar de llau nunca les necesidaes primaries de la xente, pero cola fin d’algamar un marcu políticu dignu. Un marcu políticu onde toxs podamos participar n’igualdá de condiciones y oportunidaes.

Pa enfrentamos a esta xera tenemos que visibilizar la problemática y el conflictu qu’hai nesta nación. Tenemos que visibilizalu dientru d’Asturies, amosando les carencies evidentes que sofrimos día a día. Falando cola sociedá cara a cara, falando colxs nuesxs allegaxs. Nun avergoñanos de lo que somos y de lo que tratamos d’espeyar. Esto paez perfácil y cenciello pero toos y toes deberíemos danos cuenta de qu’estes conversaciones dexámoles pal nuesu círculu ideolóxicu y pocu más. Hai que finar con esto y guetar la nuesa normalización propia si queremos algamar dalgunes condiciones cíviques y democrátiques.

Pero, si vamos a dómines inda más escures de la nuesa hestoria podemos ver qu’esta visibilización del conflictu nun tien porque zarrase a les nueses llendes. Y refiérome a dómines más escures pa señalar el contestu hestóricu de los años 60 y entamos de los 70. Daquella, yera una rialidá qu’en tolos pueblos d’Europa y n’otros continentes clamábase pola fin de la Dictadura Franquista y la democratización del Estáu. El papel que tuvieron los movimientos populares fuera del tarrén estatal contra’l franquismu foi clave p’algamar migayines d’aire frescu y “bondaes” del réximen.

Agora, solo hai que treslladase al momento actual y visibilizar fuera’l país que n’Asturies hai un movimientu políticu esistente que tamién quier ser tratáu col respetu y les mesmes oportunidaes qu’una democracia normalizada ufiertaría. Tenemos qu’intentar cuntar col mundiu nesta dura xera que tenemos delantre, y eso solo pue aportar recibiendo la solidaridá d’otros espacios políticos foriatos. Internacionalizando la situación pre-democrática qu’arrecostina Asturies dende fai décades. Ye’l momentu de da-y puxu a les relaciones internacionales y medrar nestes. Ye’l momentu que nun teamos solos na difícil tarea de normalización demócratica porque globalizando’l nuesu conflicto y recibiendo fuercies d’otros compañeros y compañeres en llucha sedremos más fuertes y tendremos abondo llográu. Ye’l momento d’axuntar fuercies dientru d’Asturies pa enfotase en pedir rescate a nivel internacional.

*Xosé A. González. Estudiante y militante de Darréu – Mocedá Independentista Revolucionario.

Tres denuncies por tortures y maltratu policial en 2009 n'Asturies.

Asturies rexistró en 2009 trés denuncies por tortures y maltratu policial, trés denuncies de trés persones, una a la Guardia Civil y dos a policíes llocales. Nesi añu, nel Estáu español cuntabilizáronse 624 persones que denunciaron tortures y maltratu en situaciones de privación de llibertá o detenciones por parte de les 'Fuercies de Seguridá del Estáu', funcionarios de prisiones o otros encargaos de custodia. Los datos tan recoyíos nel informe sobre "La Tortura nel Estáu español" del añu pasáu de la Coordinadora pa la Prevención y Denuncia de la Tortura.

El 'Cuerpo Nacional de Policía' acumula 197 denuncies, los Mossos catalanes, 190; les policíes llocales, 64; los 'funcionarios de prisiones', 65; la Ertzaintza vasca, 46, y la Guardia Civil, 43. Cerca de la mitá de les denuncies (48,3%) foron presentaes por persones que participaron en movilizaciones sociales, les interpuestes por persones inmigrantes supusieron el 16,5%; les interpuestes por persones preses, el 11,1, y por deteníos en réxime d'incomunicación, el 7,2 %. Los centros de menores acumularon 12 denuncies, el 1,9%. L'informe tamién recueye les muertes de persones cuando s'alcontraben baxo custodia. En 2009 fueron 41 persones, la mayoría de las cuales -el 68%- nes cárceles.

Dende la Coordinadora señálase qu'anque los casos contrastaos se caltienen añalmente alredor de los 600-700 casos nel Estáu español hai una tendencia de aumentu de la "violencia institucional" que nun se ve espeyada nes estadístiques pol miéu a denunciar. Tamién amuesa la so oposición a que les funciones del 'Mecanismo Nacional de Prevención de la Tortura' seyan encomendaes al 'Defensor del Pueblo' y reitera la petición de s'ellimine la detención incomunicada y el réxime d'aisllamientu penitenciariu.La Coordinadora para la Prevención y Denuncia de la Tortura formenla alrededor de mediu centenar d'organizaciones d'estremaos paises y territorios del Estáu ente les que nun hai denguna asturiana.

Confómenla: Acció dels Cristians per l'Abolició de la Tortura (ACAT), Alerta Solidària, Asociación APOYO, Asociación EXIL, Associació Catalana per la Defensa del Drets Humans, Associaçaõ Contra a Exclusão pelo Desenvolvimento, Asociación Contra la Tortura, Asociación para la Defensa de los Derechos de la Infancia, Asociación Libre de Abogados, Associació Memòria Contra la Tortura, Asociación Pro Derechos Humanos de Andalucía, Asociación de Solidaridad y Apoyo a los Presos de Aragón (ASAPA), Behatokia (Observatorio Vasco de Derechos Humanos - Euskal Herriko Giza Eskubideen), Centro de Asesoría y Estudios Sociales (CAES), Centro de Documentación Contra la Tortura, Comissió de Defensa de Drets Humans del Col.legi d'Advocats Barcelona, Comisión de Derechos Humanos del Colegio de Abogados de Baleares, Comité Anti-Sida de Lugo, Concepción Arenal, Coordinadora Antirrepressiva de Gràcia, Coordinadora Contra la Marginación de Cornellá, Coordinadora de Barrios de Madrid, Coordinadora Estatal de Solidaridad con las Personas Presas, Esculca (Observatório para a defensa dos direitos e liberdades), Eskubideak (Euskal Abokatuen Elkartea), Etxerat (Euskal Errepresaliatu Politikoen Elkartea), Federacion de Asociacions de Loita contra a Droga, Federación Enlace, Fundación Érguete, Grupo 17 de Marzo, Sociedad Andaluza de Juristas para la defensa de los DDHH individuales y Colectivos, Gurasoak, Institut Drets Humans de Catalunya, Justicia i Pau, Movemento polos Dereitos Civis, Observatori del Sistema Penal i els Drets Humans de la UB, PreSOS Extremadura, PreSOS Galiza, Rescat, SalHaketa (Bizkaia), SalHaketa (Araba), Santurtziko Torturaren Kontrako Taldea, Sos Racisme Catalunya, Subcomisión Penitenciaria del CGAE yTorturaren Aurkako Taldea