35 organizaciones yá sofiten la iniciativa "Democracy for Asturies"

El númberu d'organizaciones y coleutivos, tanto internacionales como del país, que sofiten la iniciativa "Democracy for Asturies" por una democracia plena n'Asturies, sigue medrando día ente día y yá sumen más de 35. Destaquen ente los nuevos sofitos internacionales los d' "Izquierda Castellana" (Izca), la organización gallega "Nós-Unidade Popular" (Nos-Up), la llionesa "Abora" o la cántabra "Regüelta" que se amesten a otres 18 organizaciones irlandeses, catalanes, occitanes, vasques, escoceses, andaluces, canaries o aragoneses.

Les organizaciones y coleutivos asturianos tamién siguen medrando siendo yá 13. Los últimos sofitos asturianos foron los de Fai!, Partíu Carlista d'Asturies, Nora Antifa y de delles organizaciones xuveniles y medios informativos como infoasturies.net o aruelu.com. Les firmes individuales del manifiestu por una democracia plena n'Asturies pasen yá de trescientos y el recién estrenáu sofitu de blogues yá suma los cinco primeros.

Sofitu denuncia un nuevu casu de represión de la policia, esta vez tres les protestes antitaurines en Xixón

Según denuncién testigos presenciales esti domingu 15 d'Agostu, tres la cellebración del actu taurín de Xixón dellos asistentes pro-taurinos al actu acercáronse a unos mozos qu'hores enantes acudieron a la xuntanza antitaurina y que quedaron na cai charrando. Al identificalos entamaron a insultar y amenazar a los mozos que retrucaron con consignes y glayíos énte la pasividá policial. Una moza que s'atopaba nun chigre cercanu y s'averó a ver lo que pasaba foi agredía por un policía con un emburrión ya increpada. Darréu, la policía española identificó y multó a los 6 mozos que foron insultaos y a la moza arriendes d'identificar a mas persones que s'acercarón. Nengún pro-taurín, pese a insultar y amenazar, foi identificáu o multáu.

Pal muerganismu antirepresivu popular Sofitu, denunciantes d'esti nuevu casu represivu, "esto ye una preba mas de la situacíon predemocratica na que nos atopamos los asturianos que, como en tiempos de la dictadura, una elite de burgueses, paletos, torturadores y españolistes aculturizadores col sofitu economicu del ayuntamientu de Xixón y la protección de la policía, tomen les cais del nuesu país pa facer y desfacer a gustu".

El xefe de la Brigada d'Informacíón ye delegáu na Plaza toros

Recordamos qu'el xefe de la brigada d'información de la policía española de Xixón obstenta'l cargu de delegáu na “Plaza de Toros El Bibio” y ayeri arengaba a los sos axentes enantes d'entamar la corrida a quiénes teníen que controlar y a quienes non.

Fonte: Infoasturies.

Democracia p’Asturies convoca una manifestamientu xunitariu’l Día de la Nación Asturiana

La iniciativa Democracia p’Asturies que cuenta col sofitu, fasta la fecha, de más de 30 organizaciones y cientos d‘adhesiones individuales vien de convocar públicamente un manifestamientu pa esti prósimu 8 de setiembre, Día de la Nación Asturiana, baxo’l lema Democracia p’Asturies. Los promotores de la iniciativa consideren “qu’esti ye’l momentu afayaizu pa puxar por convocatories xunitaries lo más amplies posibles pero ensin rebaxar plantegamientos que nos puean llevar a postures seudorexonalistes”. Nesi sen camienten que “ye imprescindible la movilización del 8 de setiembre como Día de la Nación Asturiana, teniendo en cuenta necesariamente, qu’esti tien de ser un dia de reivindicación social y nacional.



Asina mesmo entienden “como positivo que la convocatoria baxo esti lema yá consiguió n’otros momentos movilizaciones xunitaries pa esti día y que l’actual situación d’Asturies requier recuperar esi espaciu xunitariu y esa desixencia democrática.”Poro, la plataforma Democracia p’Asturies invita a toles organizaciones, coleutivos o movimientos sociales y al conxuntu la sociedá asturiana en xeneral, a que faigan suya la convocatoria baxo la desixencia común de democracia p’Asturies y se movilicen baxo esti lema el Día la Nación Asturiana “cola altura mires y xenerosidá necesaria pa superar les llexítimes diferencies esistentes ente les formaciones polítiques que se mueven nel tarrén de la vindicación nacional n’Asturies.”


Fonte: Infoasturies.

Reflexón y acción nel nacionalismu asturianu

Vengo asistiendo como espectador a los debates, espiriques y reflexones que dende hai dalgún tiempu vienen produciéndose nel, vamos llamalo, “magma” nacionalista asturianu. Emplego esti términu polo que tenemos de masa informe, desectructurada, indefinida… que nun acaba de cuayar. Arrecostinamos años y años de derrotes, errores y frustración, pero nos últimos tiempos toi percibiendo un cambiu de ciclu que m’abulta perinteresante; seya polo que seya (madurez o necesidá), el casu ye que tamos delantre un escenariu inéditu na hestoria recién del nuestru movimientu. Quiero agora convertime en partícipe d’esta reflexón xeneral y facelo dende la opinión estrictamente personal, con respetu hacia toles organicaciones y persones (que yá sabemos la sensibilidá que nos gastamos los nacionaliegos asturianos) y col enfotu d’aportar dalgo al debate (quiciabes aciertos, quiciabes menudencies).

La coyuntura política xeneral pela que trescurre l’actualidá estatal vien marcada por dos tendencies claramente definíes, d’una banda una llamada a la vuelta al centralismu, al Estáu-nación como alministración fundamental, y d’otra la resistencia de los mal llamaos “nacionalismos periféricos” (¿periféricos? ¿de quién?), fundamentalmente’l vascu y el catalán. Nesta situación Asturies, a la que nós entendemos como comunidá nacional, lleva les de perder; l’avalancha centralista y fondamente españolista que nos vien enriba amenaza con llevar per delantre los pocos llogros consiguíos nestos trenta años. Ensin un muriu de contención (no cultural, no llingüísticu, no medioambiental, etc.) corremos un peligru seriu de desapaecer como comunidá humana diferenciada. Y precisamente tenemos de ser los nacionalistes (o aquellos que tenemos una visión d’Asturies como país) los que diseñemos y construyamos esi elementu que nos faiga albidrar un futuru meyor pa la nuestra tierra.

La mocedá del movimientu nacionalista asturianu probablemente fuere la causa de los munchos errores cometíos, la nuestra inesperiencia política y la terminoloxía emplegada podríen ser causa del alloñamientu y incomprensión que la sociedá asturiana nos “regaló” toos estos años. Ye tiempu de principiar a facer política coles blimes que tenemos, apegada a la realidá del país, que nun ye otra qu’una población acomodada y a gustu col estatus que tien, con una personalidá fuerte, sí, pero ensin percibir qu’ésta pue tener fecha de caducidá. Tenemos d’iguar una estratexa en función de la nuestra debilidá como movimientu, dende la insignificancia política y la invisibilidá que carecemos. Mentanto nun nos decatemos d’esto nun hai nada que facer, mentanto sigamos ensin enteranos de que la nuestra capacidá de respuesta nun va más allá d’emitir comunicaos (munches veces con un llinguaxe grandilocuente más averao a la ciencia-ficción qu’a otra cosa) nun vamos dir a nengún llau.

Los últimos acontecimientos nel micromundu nacionalista tán dexando ver la posibilidá d’una pequeña esperanza. Les tres principales organizaciones paez qu’empiecen a salir de la burbuya y enfrentase a la realidá. Andecha Astur (o pa nun ferir a naide, los qu’utilicen estes sigles) lleva años d’esboroñamientu con fechos tan llamentables como’l procesu xudicial pol propiu nome; Unidá Nacionalista Asturiana nun foi quien a xenerar les espectatives esperaes, con errores de bultu como lo de los avales electorales; y el Bloque por Asturies tuvo hasta hai bien poco “desapaecíu en combate” somorguiáu nel gobiernu, con una perda constante de credibilidá. Ésta, nun nos engañemos, ye la realidá. Poro, ye tiempu d’apelar a la responsabilidá y, anque suene pasáu de moda, al patriotismu. Tenemos de ser quien a crear espacios comunes d’acción, vaigamos allanando’l camín: nun-y deamos baces al contrariu, respetémonos, nun gastemos tiempu y esfuerzu en debilitar al que tenemos al llau y encarémonos col d’enfrente. ¿Modelu? Que si’l Bloque Nacionalista Gallegu, que si les Candidatures d’Unidá Popular de Cataluña… el tiempu y el grau de converxencia van dir marcando’l camín, pero echemos a andar. Solucionaos los nuestros problemes internos enanchemos la nuestra posible masa social, faigamos un nacionalismu constructivu qu’atraya a sectores heteroxéneos de la sociedá asturiana (por exemplu a los inmigrantes, falándo-yos de derechos ciudadanos). Convenzamos a los trabayadores de que defender los puestos de trabayu ye lluchar pol futuru de los sos fíos (prexubilaciones=destierru). Dexemos la reivindicación llingüística en manes d’organizaciones cíviques unitaries como la Xunta pola Defensa de la Llingua y apoyemos el so llabor, “lliberándonos” d’esa xera. Yá sabemos que na cai movémonos bien, tamos a gustu, pero agora ye’l tiempu d’entrar nes instituciones y facer ver a la población asturiana qu’hai otra manera d’entender y facer política. Pero seyamos conscientes de que por nós solos nun vamos ser quien a ello.

Esta refundación o rexeneración del nacionalismu asturianu namás pue venir dende la izquierda, y sobremanera nes condiciones actuales, con una crisis fonda del sistema económicu capitalista que, como siempre, tamos pagando les clases populares. Soi de los que piensen que’l nacionalismu asturianu o ye d’izquierdes o nun va ser. Los elementos que formen la nuestra personalidá nacional (económicos, culturales, llingüísticos…) tienen un estigma de clase mui fondu, tanto que ye practicamente imposible separtalos. Y ¿qué queréis que vos diga? el nacionalismu pol nacionalismu, el nacionalismu como ideoloxía, el nacionalismu como fin (y non como mediu)… dame munchu mieu.

Los que yá llevamos tiempu nesta hestoria tenemos de ser lo suficientemente responsables como pa nun tresmiti-yos los nuestros errores, les nuestres zunes, les nuestres animadversiones, a les xeneraciones nueves que s’incorporen al nacionalismu. Nun-yos deamos n’herencia un movimientu abocáu al fracasu. Pol bien d’ellos y del pueblu asturianu.

Xune Elipe.

Concentración antitaurina'l domingu 15 en Xixón

Por mor del refugu por parte de la Delegación del Gobiernu Español n’Asturies de llegalizar la manifestación antitaurina prevista pa esti domingu -alegando que delles cais de la ciudá tán cortaes por obres y que la manifestación causaría "un colapsu na ciudá pudiendo ocasionar una situación de riesgu en casu d’emerxencia- los convocantes de la mesma, vense obligaos a reconvocar la protesta quedando nuna concentración frente a la plaza toros el domingu a les 17:30 hores,

Darréu diz que la meyor manera de finar cola situación de entreguismu y emigración ye la desobediencia civil

La organización xuvenil Darréu vien d'amosar una nota prensa valorando los datos asoleyaos pel Institutu Asturianu d’Estadística asitiando la perdida decuasi 82.000 los mozos y moces qu’Asturies dende 1991. Pa Darréu los datos amuesen ensin dulda "lo que dende la nuesa organización, y tolos coleutivos políticos y sociales non entreguistes llevamos denunciando dende va años. El fenómenu d’emigración forciada sigue medrando y la crisis permanente que vive Asturies nun dexa otra a lxs más xóvenes que colar del so país a la gueta d’una vida con más oportunidaes y menos precariedá".

Dende los años 80, esplica Darréu, coleutivos políticos, "sobremanera del ámbetu soberanista, lleven denunciando esta murnia realidá énte la sociedá asturiano, munches vegaes acusaos de catastrofistes. Güei vemos que los catastrofistes teníen y tenemos razón".

La organización independentista responsabiliza "a los gobiernos centraliegos de PSOE y PP, colos sos cómplices" de ser culpables d’esta situación "llaceriosa" . "Nun podemos escaecer que la estratexa pela so parte ye nidiamente consciente ya intencionada, cola fin de desactivar a la mocedá, principal fuercia de tresformación social y conderga al país a una situación de inmovilismu ensin precedentes" alvierte Darréu que camienta que "los políticos asturianos tienen de tar pa defender los intereses d’Asturies, non pa vender cuasi de baldre la nuesa fuercia de trabayu, sobremanera la meyor formada".

Darréu entiende qu’esta situación yera "predecible", yá que "un país qu’arrecostina una crisis social y económica nun pue optar a otra cosa qu’a la precariedá y la emigración". Pa la organización moza, Asturies nun pue protexese por si mesma "mentantu tea nesti procesu de desindustrialización y privatización, el mesmu que ta enllenando de dineru a la oligarquía y los políticos que malgobiernen el país". Poro, Darréu camienta que la meyor manera de finar cola situación "d’entreguismu y emigración que carecemos" ye la "desobediencia civil" contra "l’Estáu Español y los políticos que lu representen n’Asturies".

Dende la organización de mocedá independentista revolucionario, llamen a los y les xóvenes a "combatir" esti procesu, amosar el so refugu "al sistema lliberal qu’afuega esti pueblu" y a "organizase pa entamar un procesu d’activación social, en clave soberanista y socialista que fine con estos atropellos a la mocedá asturiano".

"Namái faciéndonos respetar como xóvenes conscientes y activos, podremos finar con esta situación de destierru y venta d’Asturies al capitalismu en crisis", finen.

Fonte: Infoasturies.

Esparder l’alternativa

Según el caberu barómetru autonómicu, el 30,7% del pueblu asturianu ta a la escontra del modelu autonómicu y ye favoratible a un sistema centralizáu,el triple que va ocho años y la cifra cimera dientro del estáu.Ye un datu importante y que paez tar en continuu crecimientu,polo qu’amás d’esmolecer ye dalgo colo que reflexonar.

Lo primero que camiento ye que nun me surpriende,ya que ye bien sabío que n’Asturies hai un descontentu xeneral pa col modelu autonómicu impuestu na dómina post-franquista-como reflexu d’esi descontentu tenemos el 39% d’abstención nes caberes eleiciones autonómiques-.El modelu autonómicu aportó a Asturies acompañáu d’un estatutu probetayu,discriminación y represión llinguística,cultural ya ideolóxica;desendolque de midíes neolliberales,col consiguiente esfarrape industrial,económicu y social;construcción d’un réxime afitáu nel caciquismu,el clientelismu,l’amiguismu y el sucursalismu;somorguiamientu de los intereses d’Asturies baxo los intereses del estáu-o de la XE- en temes como financiación,politiques agraries,infraestructures…En resume,non sólo nun iguó los problemes d’Asturies,sinón qu’amás empeorolos en munchos aspeutos,polo que’l descontentu,amás de lóxicu,ye comprensible.

Sicasí,la refuga al modelu autonómicu d’anguaño nun ye dalgo esclusivo d’Asturies,pero n’otros llugares dase’l fenómenu opuestu.Asina,n’otres comunidaes el xiru dase haza espresiones anticentralistes,ye dicir,gueten la igua a los sos problemes nuna mayor descentralización o na independencia dafechu del estáu.

Entós, ¿por qué n’Asturies la reaición ye’l crecimientu del centralismu?

En primer llugar,paezme nidio que los axentes uniformizadores del estáu ,xunta los gobiernos autonómicos calteníos pol tríu PSOE-PP-IX,ficieron un bon llabor ideolóxicu y propagandísticu no cincante al caltenimientu de la xunidá del estáu.Poro,el modelu autonómicu ye refugáu,pero la población gueta les alternatives dientro de la cadarma del estáu español,refugando –o más bien nin plantegándose- igües o alternatives más alló de la muria que supó l’estáu.

En segundu llugar,esi llabor pro-xunidá estatal ye tan efeutivu en parte porque’l pueblu asturianu nun escuchó alternatives,ye dicir,na mayoría de los casos nun se planteguen alternatives independentistes pol so desconocimientu o porque nadie-yos faló de los sos beneficios, más que por tar a la escontra d’elles.Polo tanto,hai un furacu que tenemos qu’enllenar pa que l’altavoz de l’alternativa que ye l’independentismu asturianu llegue a la xente,desplicando qué ye la independencia,por qué la queremos,cómo algamala,cuándo,etc,ensin dar por sentao que’l pueblu asturianu conoz la rempuesta porque,lloñe del movimientu independentista,el desconocimientu ye absolutu.

Ye necesariu un trabayu ideolóxicu constante como arma que sustituya’l pilancu que supón el vacíu que sofrimos y vamos siguir sofriendo nos “mass-media”,y como ferramienta que seya quién a facer que’l mensax aporte a la sociedá,que llueu podrá aceptalu o non,pero conoceralu.

El modelu autonómicu en sí mesmu,ye un modelu que teóricamente pue ser válidu como fueya de ruta o camín haza la soberanía d’Asturies,algamando progresivamente competencies,soberanía económica y política…Ye dicir,como un procesu de descentralización progresiva y de “preparación” de les distinte estayes del país pa la dixebra.

La realidá ye que nun ye más qu’una teoría,como amosa’l casu del conflictu estatutariu catalán.L’estáu acepta’l modelu autonómicu hasta un límite,que ye l’amenaza del frayamientu del estáu,y eso sólo en casos esceicionales como pue ser el catalán o el vascu.Polo tanto,na práutica l’estáu de les autonomíes ta liquidáu como proyeutu válidu de futuru pa les distintes naciones del estáu.

El desconocimientu d’otres alternatives lleva al puxu del centralismu,y ehi ta la hestoria p'amosar les sos consecuencies.

Adrían Calvillo.

Asturies tien 81.708 mozos y moces menos qu'en 1991

Asturies perdió cuasique 82.000 mozos y moces (81.708) nos 19 años últimos, según les estimaciones del estudiu 'Juventud en Asturias', fechu poll Institutu Asturianu d'Estadística. Según los datos asoleyaos, la mocedá d'ente 15 y 29 años representaba'l 22% de la población del país en 1991, asitiándose anguañu nun 15%, siete puntos menos. Los datos del estudiu van espublizase nun dípticu que se va repartir el día 12 d'agostu cola prensa diario.

El descensu de la natalidá, la crisis permanente y el fenómenu de la emigración de la mocedá fain facilmente esplicables estes cifres de perda de mocedá. El datu asoleya ún de los problemes más importantes.

No que cinca a la situación llaboral de la mocedá los datos nun son nada bonos. Asina, el 33% de la población ocupao ye menor de 35 años, y la tasa de paru de los menores de 25 ye del 35,4%. La tasa d'actividá ye del 44,8% y la tasa d'emplegu ye de 29%. D'otra miente, cuasique'l 50% de la mocedá d'ente 25 y 29 años tienen un trabayu que nun tien rellación colos sos estudios, el d'un 35% sí lo tién.

Fonte:Infoasturies.net

Folixa solidaria de Sofitu

La represión politica ye l'aición de contener, detener o castigar actuaciones publiques dende'l poder por parte de les autoridaes publiques ñegando o torgando l'exerciciu de de los derechos y llibertaes. La fuerza del exemplu del que sufre esa violencia fai que, por medrana, el restu la sociedá se reprima a sigo mesma nel exerciciu de la llibertá, que queda asina anulada pa toos, sacante pa'l poder y p'aquellos nos que nel so beneficiu se realiza la represión.


N'Asturies nos ultimos meses podemos cuntar:
-Xuiciu escontra un policía español por agresión a un mozu independentista.
-Multes a solidarios por acudir a la carcele de Villabona a un actu solidariu colos presos politicos
-Xuiciu escontra un policía nazional español por amenaces y agresión a un mozu militante de Darréu
-Multa a una moza independentista por cantar "muncha policía, poca diversión" en Xixón.
-Multa a un mozu por portar la AS na matricula del so coche por contra de la impuesta E
-Acusación a un mozu de "ciberterrorismu"
-Detención illegal d'una independentista nun actu d'UPyD

Pero la represión puede combatise con solidaridá. A vegaes acudiendo a xuntances o manifestaciones y otres aídando al pagu de los gastos pa que nun cuerran a cuenta del reprimíu. Asina tamos lluchando escontra la represión de los que, como tu, facemos lo posible por tener una Asturies mas xusta y llibre.

Por ello dende SOFITU entamamos un nuevu actu solidariu-festivu que nesta ocasión consisti nuna folixa nel CSA SESTAFERIA de Xixón con bebora, pinchos, musica y bon ambiente'l prosimu Vienres 13 d'Agostu de magar les 19 hores cola fin de siguir recaldando perres pal pagu de multes, gastos de xuiciu, abogaos y tolo que conlleva la represión.
Ven a pasalo bién y combatir la represión,
Puxa Asturies llibre!!!
Puxa la llucha!!

Flamenquismu y POP comercial español nel "Día d’Asturies" institucional

Isabel Pantoja, Rosa, Daniel Diges, Tamara, Soraya, Chenoa, Sergio Dalma, Innocence, Mirko y Mencandance conformen les principales actuaciones de los actos del Día d’Asturies, qu’ente’l 4 y l’8 de setiembre van cellebrase en Ribeseya, y que van concluyir con una gala televisada pola TPA na que van actuar los artistes mentaos. Los actos conmemorativos del Día d’Asturies fueron presentaos ayeri nel pabellón del Principáu na Feria d’Amueses, pol presidente, Vicente Álvarez Areces; l’alcalde de Ribesella, Ramón Canal; la conseyera de cultura, Merced Álvarez y el direutor de la RTPA, José Ramón Pérez Ornia.

Tantu Areces como Canal destacaron el potencial económicu pa la contorna de la cellebración del Día d’Asturies anguaño en Ribesella. El mandatariu encuadró los actos del Día d’Asturies dientru del plan del Gobiernu pa "convirtir a Asturies nún polu artísticu y musical", coles correspondientes repercusiones en materia d’atraición turística y de promoción económica.

Areces amosó’l so enfotu en que se superen los 500.000 visitantes nos cinco díes de cellebraciones "si la climatoloxía yenos favorable". Señaló qu’en Ribesella podrán vese artistes "de primera llinia" como Sergio Dalma (va actuar el domingu día 5) o Chenoa (el martes día 7) y destacó la retresmisión al traviés de la TPA de la gala del día 8, que tamién se podrá siguir en toa España al traviés de les respeutives televisiones autonómiques, arrexuntaes na FORTA (Federación de Muerganismos de Radio y Televisión Autonómicos). Nesti sentíu, el direutor de la RTPA, José Ramón Pérez Ornia, señaló qu’ "a esi mediu millón de persones que dicía’l presidente que puen visitar Ribesella y festexar el Día d’Asturies, hai de sumar los espeutadores que lu van ver al traviés de televisión. Cada día n’Asturies hai un promediu de 300.000 asturianos que coneuten cola primer cadena y 100.000 cola segunda, na que redifundimos una hora más sero tola programación; esto ye, práuticamente, otru mediu millón d’asturianos van ver el Día d’Asturies en televisión".

L’alcalde de Ribeseya amosose, pela so parte "encantáu" de que’l Gobiernu escoyera anguañu a Ribesella pa cellebrar el Día d’Asturies. Ramón Canal tamién aprovechó la comparecencia pública pa espresar les sos condolencies a la familia del nuevu fináu demientres los festexos del descensu del Sella.

Por últimu, l’agrupación política Bloque por Asturies (BA) calificó d’escandaloses les actuaciones programaes pa esti Día, calificándolu como "burlla cruel" a la ciudadanía asturiana, pues criticó qu’al tiempu que se menoscaben polítiques sociales, retáyense sueldos y emplegos y esaníciense aídes a families con fíos discapacitaos, el Gobiernu nacional contrata a artistes foriatos "esbardiando’l dineru n’actuaciones que nada nuevo apurren a los turistes y braniantes que s’averen a la nuesa tierra a conocer el nuesu arte, cultura ya identidá", estrozando asina "la oportunidá d’atrayer a turistes y braniantes, de proyeutar Ribeseya y Asturies, cola programación d’actuaciones que podríen vese en cualesquier otra parte, ensin entender que’l que visita la nuesa comunidá busca conocer propuestes nueves que nun atoparíen n’otres partes del Estáu (español)".

Calificaron igualmente de "paletismu" esta política cultural na que "se vuelve a perder la oportunidá de potenciar y dar conocer l’arte y la cultura asturiana, y de sofitar nesta dura dómina de crisis a artistes y grupos asturianos".

Fonte: Aruelu.

Ecoloxistes n'Acción va recurrir los cielos abiertos de L.laciana y Babia

Ecoloxistes n'Acción anunció ayeri (pol día 5) al traviés d'un comunicáu que va recurrir el Plan Rexonal d'Esplotaciones a cielu abiertu en L.laciana y Babia una vegada que remate'l trámite pa la so aprobación, al considerar la so «absoluta falta de xustificación y arbitrariedá».

La organización afirma que la finalidá d'esti plan rexonal nun ye regular les esplotaciones a cielu abiertu respetando'l mediu ambiente, como se llee na so esposición de motivos, sinón «sortear les obligaciones llegales impuestes na Directiva Hábitats p'aquellos proyectos nos que s'amenacia la integridá del llugar onde s'alluguen».

El territoriu al qu'afecta ta protexíu, según la directiva citada, como llugar d'interés comuñal (LLIC) y zona d'especial protección pa les aves (Zepa) y ye hábitat esencial pal Osu Pardu y pal Faisán Montés. Respectu al osu pardu, trátase d'una especie d'interés comuñal, catalogada en peligru d'estinción y l'allugamientu previstu pa delles de les esplotaciones mineres inclúyense dientro del ámbitu creáu pa la recuperación de la especie. Pela so parte, el faisán, tamién en peligru d'estinción, atópase na mesma situación que l'osu.

Nesti sentíu la nota de prensa apunta que «cabe recordar el recursu interpuestu poles Comunidaes Europees contra'l Reinu d'España por porcaz vulneración del derechu comuñal de cielos abiertos de L.laciana». Nésti alvertíase de les condiciones que se debíen cumplir pa que los proyectos fueren aprobaos.

Dende Ecoloxistes n'Acción, señalen que los esfuerzos y les técniques de planificación de les alministraciones públiques tendríen de dirixise a poner los medios que dexen una reconversión de les cuenques mineres, ensin alteriar a los dos especies protexíes. Amás señalen que «la minería interior en Babia y L.laciana ye casi inesistente» y apunten que «el plan rexonal consagra de manera inaceptable esta situación. Recordamos amás que les esplotaciones a cielu abiertu xeneren un empléu bien llindáu a pesar de les fuertes subvenciones que reciben».

Fonte: Glayiu

Más de venti organizaciones sofiten una democracia plena n'Asturies

Ventitres organizaciones y coleutivos yá sofiten la iniciativa Democracy for Asturies. InfoAsturies.net y la so redaición anuncien el sofitu a la campaña internacional.

Delles organizaciones vasques, aragoneses, catalanes, valencianes, ocitanes, canaries, andaluces, escoceses ya irlandeses, amás d'asturianes, roblaron el manifiestu pola consecución d'una democracia plena n'Asturies. La previsión ye que la llista d'organizaciones siga medrando y que lleguen sofitos dende más paises. La campaña internacional "Democracy for Asturies", que se presentó'l pasáu 23 de xunetu en Xixón, nacía col enfotu d'internacionalizar el conflictu y dar a conocer la situación d'Asturies y parez que lo ta consiguiendo.

Nun se recuerda nada paecío nos poco más de trenta años d'historia del nacionalismu asturianu: una ventena d'organizaciones de fuera del país solidarizándose énte la situación predemocrática que carez Asturies y polos derechos sociales y nacionales del Pueblu Asturianu. La campaña internacional "Democracy for Asturies", que se presentó'l pasáu 23 de xunetu en Xixón, nacía col enfotu d'internacionalizar el conflictu y dar a conocer la situación d'Asturies y parez que lo ta consiguiendo.

Na páxina de Democracy for Asturies úfrese'l manifiestu en dellos idiomes amás del asturianu (castellán, catalán, gallegu, gaélicu irlandés, inglés y euskera), asoléyense los sofitos atropaos y pue roblase online el manifiestu, dalgo que ya ficieron más de doscientes persones dende Asturies y otros territorios europeos y americanos.

Ente los sofitos individuales asturianos al manifiestu destaquen, eten otros, los de David Álvarez Fernández de la executiva de la Corriente Sindical d'Izquierda, Antón Fuertes emigráu en Madrid y Direutor d'Estudios y Formación de la Confederación General de la pyme del Estáu Español, David M. Rivas Infante, Doutor n'Economía na Universidá Autónoma de Madrid o Carlos Xabel Blanco Martín, Doutoir en Filosofia y profesor.

Amás, la iniciativa Democracy for Asturies tamién furrula na rede social Facebook con más de 1.600 collacios, collacies, organizaciones y coleutivos de tol mundu.

InfoAsturies sofita la iniciativa "Democracy for Asturies"

InfoAsturies.net y la so Redaición quieren amosar públicamente'l so sofitu a la iniciativa internacional Democracy for Asturies asumiendo'l manifiestu pola consecución d'una democracia plena n'Asturies y xuniendose asina a les organizaciones, coleutivos y persones que yá lo ficieron.

InfoAsturies.net y la so Redaición consideren que los medios de comunicación asturianos tienen que tener un papel relevante nel avance de la sociedá nel procesu de democratización d'Asturies y na denuncia de la situación predemocrática que carecemos.

Fonte: Infoasturies.net

Pasos alantre pola xunidá d'aición

Entiende que coincide básicamente coles qu’Andecha Astur vien presentando nos años caberos, y que respuende a la Xunidá d’Aición que vien reclamando.

Andecha Astur ve con bonos güeyos la propuesta del Bloque por Asturies de convocar un 8 Setiembre xunitariu "pesia lo irregular que resulta la so rialización al traviés de los medios de comunicación". Nun principiu, "ensin tener más información que la conocía al traviés de talos medios", Andecha Astur asumiría la convocatoria d’un Díi de la Nación Asturiana xunitariu, entendiendo que básicamente coincide coles propuestes que vien presentando dende va dellos años "comu consecuencia del firme comencimientu de que la situación d’Asturies precisa de la responsabilidá y xenerosidá de tolos axentes políticos y sociales asturianos p’aportar a puntos d’alcuerdu y trabayar conxuntamente polos llexítimos drechos ya intereses del Pueblu Asturianu".

Andecha valora "perpositivamente" que’l Bloque asuma de forma pública’l conceutu de Xunidá d'Aición que dende Andecha Astur se vien plantegando, y espera qu’esti Díi de la Nación Asturiana "costituya un puntu d’inflexón que permita al conxuntu de les formaciones polítiques asturianes ensin escluxones entrar nuna dinámica d’alcuerdos lo más amplios posibles".

Nel comunicáu de prensa la organización d'izquierda nacionaliega desplica que responsables políticos d'Andecha van ponese en contautu col Bloque por Asturies pa que concreten formalmente la so propuesta, "esclariar y negociar dellos matices que consideramos importantes, y entamar coles midíes afayaíces pa facer rialidá esti Díi de la Nación Asturiana xunitariu comu un primer pasu na necesaria dinámica de Xunidá d’Aición de les formaciones polítiques asturianes".

Fonte: Infoasturies.

Delegaciones d'Andecha Astur, Darréu y Fai! visiten los Països Catalans

Cróniques de les delegaciones, asoleyaes na páxina de Fai y Darréu.

Crónica Fai!

Fai! participó nel Rebrot 2010, entamáu por Maulets, la mocedá revolucionario independentista de los Païssos Catalans

La organización d'esquierda soberanista acudió a les actividaes entamaes pola esquierda independentista de los Païssos Catalans en Berga nel yá míticu alcuentru del Rebrot, nel que la formación política, el debate y la folixa autoxestionao son protagonistes. Fai! quixo asina sofitar a la esquierda independentista catalana, al tiempu d'esparder les problemátiques nacionales acuyá de les nueses llendes.
La delegación de Fai! intercambió opiniones y formes de llucha ente militantes de Maulets, CAJEI, SEPC, CUP y con militantes d'otres naciones, como Andalucía o Occitània nun momentu d'importancia cimera pal procesu independentista y revolucionariu de la Terra.

Fai! quier aprovechar pa felicitar a la organización pol bon facer demientres la cellebración del festival y pol ciñu y bon tratu recibíos, como amuesa d'un internacionalismu sinceru y enforma respetuosu qu'esperamos valga pa treslladar y esparder al máximu les dinámiques y reivindicaciones que per parte de la esquierda soberanista asturiana se tan desendolcando y defendiendo.

¡Puxa la Terra lliure! ¡Puxa Asturies dixebrada!

¡Independència i socialisme! ¡Independencia y socialismu!


Crónica de Darréu:


Una delegación compuesta por miembros de Darréu y Andecha Astur, viaxó a los Països Catalans p’asistir a los diferentes convites a actos, pa seguir afondando nes bones rellaciones internacionales con diferentes coleutivos y muerganizaciones coles que mantién contautu, y tamién pa presentar y espardir la campaña “Democracy for Asturies”, campaña que Darréu y Andecha Astur sofiten y roblen. Nos primeros díes, la delegación asturiana, aconceyó colos compañeros de CAJEI en Barcelona, pa depués facelo en Sitges con representantes d’Endavant y les CUP.

Dempués vendría’l Rebrot’10, l'alcuentru de los xóvenes de los Països Catalans. Como ye vezu, la mocedá independentista asturiana asistió al convite los compañeros de Maulets, qu’entamen l’eventu nel pueblu de Berga. Ellí amás de con Maulets, la delegación de Darréu pudo seguir afondando nes bones rellaciones internacionales y compartir les lluches y rialidaes de los diferentes pueblos, colos compañeros de les otres delegaciones comu: CAJEI (Països Catalans), SEPC (Països Catalans), Jaleo (Andalucía), Libertat! (Occitania), Vía democrática (Marruecos) y tamién colos compañeros asturianos de Fai!. Durante l’aconceyamientu de les delegaciones internacionales, roblose una carta col “posicionamientu internacionalista ente la llucha de la mocedá contra’l capitalismu y les sos agresiones”.

La delegación asturiana, pa finar el tour pelos Països Catalans participó en dalgunos actos de l’Acampada Jove, entamaos poles JERC, onde robló la declaración de Montblanc y coincidió coles delegaciones de Gazteherria (SEGI, Ikasle Abertzaleak y Gazte Abertzaleak), Ógra Shin Féinn, Young organization of Scottish National Party ya Iratzarre. Ellí la delegación de Darréu desplicó la campaña “Democracy for Asturies/ Democracia p’Asturies” y repartió’l manifiestu de la mesma, entre los compañeros d’internacional.



Posicionamiento internacionalista ante la lucha juvenil contra el capitalismo y sus agresiones

La mocedá indepdeneitsta y socialista comprometémonos a:

- Lluchar contra les contradicciones de precariedá de la mocedá, consecuencia de les polítiques neolliberales.

- Solidarizanos y difundir la situación de les naciones ensin estáu que tán ocupaes y dominaes actualmente por estaos capitalistes y sexistes, y defender el territoriu que nos pertenez.

- Reivindicar xoven como una condición política oprimida y discriminada pol paternalismu de la sociedá capitalista.

- Aumentar el nivel de combatividá y llucha como consecuencia de les constantes agresiones.

- Denunciar y subvertir la familia nuclear y relixosa heterosexual.

- Denunciar la represión que sufrimos los y les xóvenes socialmente revolucionaries y profundamente d'izquierdes, asina como reivindicar la falta de llibertá d'espresión y crítica.

- Atacar cualaquier actitú facista y denunciar la situación que sufren los y les inmigrantes de parte de la sociedá racista.

- Establecer llínies de trabayu conxuntes col oxetivu de facer intercambios de lluches pa demostrar la solidaridá de la unidá d'aición xuvenil a nivel internacional.

- Asumir la necesidá d'un análisis y discursu políticu socialista, antipatriarcal y independentista na organización xuvenil.



Declaració de Montblanc

Anguaño, la Mocedá Independentista de los Països Catalans alcuéntrase ante'l retu de lliderar la llucha independentista hacia'l so oxetivu, la consolidación d'unos Països Catalans socialmente xustos y políticamente llibres.

Nesti sen les diferentes organizaciones que firmamos la “Declaració de Montblanc“ espresamos lo siguiente:

1 - Amosar tol nuestru apoyu a la Mocedá Independentista que ta protagonizando l'actual movimientu independentista de los Països Catalans.

2 - Espresar la nuestra solidaridá con tol procesu de consultes independentistes que se lleva realizando a lo llargo del últimu añu.

3 - Espresamos el nuestru apoyu a la Iniciativa Popular que se llevará a cabo nos prósimos meses nel Principal de Catalunya pa realizar una consulta popular.

4 - Condenamos la impunidá con que actuó l'Estáu Español en contra de la voluntá popular del pueblu de Cataluña, invalidando l'Estatutu de Autonomía de Cataluña.

5 - Esiximos al Estáu Español y Francés que garren el compromisu hacia la resolución del conflictu políticu que viven los “Països Catalans”, al traviés de víes democrátiques, reconociendo l'exerciciu del derechu d'Autodetermín de los Pueblos.

6 - Reafirmamos el nuestru compromisu, apoyu y solidaridá ente les diferentes naciones ensin estáu que quieren exercer el so derechu al autodetermín.

Asoleyaren nel diariu oficialista La Voz de Asturias una encuesta entrugando por si los asturianos y asturianes prohibiriemos les corrides de gües. De momentu va ganando'l si a la prohibición. Sedría interesante que tou patriota, o mesmamente toa persona con dos deos de frenti votara contra la " fiesta nacional" n'Asturies.

http://www.lavozdeasturias.es/encuestas/default.asp



¡ VALIÓ DE TORTURA ANIMAL !

¡ NIN IMPOSICIÓN, NIN HUMILDACIÓN !

ABSUELTOS DEL DELITU D'USURPACIÓN LOS DOS SINDICALISTES DE CSI-AVILÉS

Con respeutu a la sentencia del xuiciu escontra los dos sindicalistes de la Corriente Sindical d’Izquierda d’Avilés, acusaos del delitu d’usurpación y daños pola ocupación del llocal que tien la patronal asturiana (FADE) na Casa Sindical avilesina, esti sindicatu quier asoleyar lo que vien darréu:

1-Que los dos sindicalistes fueron absueltos del delitu d’usurpación.

2- Que, por otru llau, fueron condergaos, por una falta de daños, a una multa de 90€ caún y al pagu de 40€ de reparación d’una cerradura.

3-Que la CSI ta estudiando la posibilidá de presentar un recursu, pola mor de qu’esti sindicatu alcuentra series contradiciones na sentencia xudicial y nun-y abulta probada la responsabilidá de los dos sindicalistes na falta de daños pola que se-yos conderga.

4-Que pa la CSI, lo braeramente importante ye que,demientres el xuiciu, quedó demostrao bien a les clares, gracies al atestáu presentáu pola propia policía, que’l llocal atopábase desocupáu dafechu y n’estáu d’abandonu (llegando, inclusu, a utilizase comu almacén d’una empresa de costruición). Asina, la FADE ta incumpliendo la llexislación vixente na tema’l padrimoniu sindical acumuláu y tien de ser sancionada, como ordena la normativa, cola retirada de la concesión de la so sede na Casa Sindical.

5-Que la CSI va siguir alantre denunciando la braera usurpación y ocupación illegal de los llocales sindicales pela parte de la FADE, y que va entamar, paralelamente, nueves víes de movilización y negociación empobinaes a recuperar estos llocales pa la defensa de los drechos de la clas trabayadora. A la fin, la CSI va siguir alantre fasta facer realidá’l so lema: “Fuera la Patronal de la Casa Sindical”.

CSI AVILÉS.

Vídeu de la presentación de la campaña " Democracy for Asturies".

Vídeu de la presentación oficial de la campaña internacional, cellebrada'l pasáu vienres 23 énte la Ca´ Conceyu de Xixón.

"Democracy for Asturies" quier dar a conocer fuera d'Asturies la "situación sociopolítica y de conflictu permanente na que vivimos"

Primeros sofitos internacionales dende Occitania, Escocia, Irlanda, Euskal Herria o Andalucía.

Presentóse en Xixón la iniciativa "Democracy for Asturies". Ayeri de tarde, na Plaza Mayor de Xixón, empicipió la campaña cola so presentación pública a cargu de Paloma García, Mario Arbesú y Xose A. González. “Llego’l momentu de dar a conocer fuera d’Asturies la nuesa realidá y de la xunida del nacionalismu d’esquierdes al rodiu de proyeutos como ‘Democracy for Asturies’”, indicó Arbesú na presentación.

“La campaña quier dar a conocer fuera d’Asturies la situación sociopolítica y de conflictu permanente na que vivimos” señaló Mariu Arbesú. Paloma García, desplicó que l’oxetivu ye ameyorar la situación que como pueblu carecemos. García definió la iniciativa como un apueste ambiciosu poles relaciones polítiques globales y la solidaridá internacional p’ayudar a construyir una democracia dafechu n’Asturies.

Na presentación que los derechos sociles y colectivos tán maxicaos, "nin se reconoz el derechu a falar la nuesa llingua, nin podemos decidir el marcu políticu o socioeconómicu nel que queremos desendolcarnos".

El manifiestu "Democracy for Asturies" puen roblalu toles organizaciones polítiques y persones, asturianes o non, que tean d’alcuerdu col mesmu. La páxina web de la iniciativa internacional va tar abiertu nun tardando y dende ella va poder lleese'l manifiestu en idiomes estemaos, va poder firmase y va poder facese un siguimientu de la campaña. Amás, "Democracy for Asturies" yá tien un perfil na rede social facebook con más de mediu millar de sofitos de tol mundu.

Los primeros sofitos.

Los sofitos internacionales a la campaña que pide democracia p'Asturies yá entamen a llegar. Les primeres organizaciones en dar el so sofitu a la campaña foron les mocedades del Shinn Fein d'Irlanda, la Young Organotation of the Scotthish National Party d'Escocia, Jaleo d’Andalucia, les catalanes Endavant y Maulets o la organización estudiantil vasca Ikasle Abertzaleak. Amás, de sofitos individuales dende delles naciones ensin estáu de tol continente.

Fonte:infoasturies.net

BPA tresllada la so propuesta pa un"8 setiembre xunitariu"

El Bloque por Asturies fai un llamáu públicu pa que´l 8-S seya un día de movilización ciudadana y xunitaria pol futuru d´Asturies. Poro, yá entamó a treslladar la so propuesta.

Tal como adelantaba’l voceru nacional de la formación, Rafa Palacios, al traviés del videochat d’Asturies.com, el Bloque vien de facer un llamáu a la movilización social, sindical y política de la izquierda, l´asturianismu y l´ecoloxismu, “pa qu´esti 8 de setiembre entamemos a construir nuevos espacios de participación social, pa defender los nuestros drechos, la sanidá y la educación públiques, la nuestra tierra, pa reivindicar el drechu a vivir y trabayar n´Asturies, pa expresar el nuestru compromisu solidariu ya internacionalista, por tresformar la rialidá, pol drechu a vivir en paz con xusticia social”.

La formación nacionalista quier qu’asina’l Día d´Asturies seya de movilización y llucha, “un día d´unidá d´acción de la sociedá asturiana pol nuestru futuru”.

El Bloque llama a una movilización xunitaria como respuesta a la “triste rialidá que mos quieren imponer dende los Gobiernos d´España y Asturies”. Una triste rialidá que, indiquen, pon en pelligru un futuru dignu y que condena a la exclusión, al paru y a la emigración.

“Ye imprescindible una respuesta democrática que contraponga´l silenciu y la resignación, la esperanza d´un futuru meyor y la fuerza de la unidá pa facelo rialidá”, apunten.

La organización nacionalista entamó güei a treslladar esta propuesta a los movimientos sociales, a les fuerces sindicales y polítiques, pa que´l próximu 8 de setiembre, “dende´l respetu a la pluralidá y la diversidá, convoquemos a les ciudadanes y ciudadanos a una movilización xunitaria y ensin sigles pol futuru d´Asturies”.

Fonte: Asturies.com

Condergáu a pagar multa'l mozu que denunciare acosu y agresión d'un policia

Según informa Sofitu, muerganismu antirepresivu popular, yá ta asoleyada la sentencia nel casu de l'agresión y amenaces a un mozu independentista por parte d'un policía d'ideoloxía neonazi. "Como yera d'esperar la xusticía española amparóse na condición de funcionariu del ex-brigadas azules (grupusculu neonazi fuboleru) pa da-y la presunción de veracidá "y ye que, como ye vezu, tres sabese denunciáu'l policía, denunció al mozu por ñegase a identificase, "y ante denuncies cruzaes el funcionariu siempre diz la verdá".

Asina, siguiendo la petición del fiscal el mozu independentista, militante de DARRÉU, foi condergáu al pagu d'una multa de 10 díes a 6 euros diarios lo que fai un total de 60 €. SOFITU va facese cargu de la multa "por ser reteníu illegalmente, amenazáu, agredíu nuna mano y vexáu en publicu". El policía foi absueltu, la xueza "fizo oyíos sordos sobre les reclamaciones de la defensa qu'esixía la visualización de los vidios de traficu del Ayuntamientu d'Uviéu asina como'l de la camara de xixilancia d'un bancu arreyáu a los fechos. Estes prebes, vitales, foron desechaes" esplica'l muerganismu antirrepresivu.

SOFITU quier recalcar que "pese al corporativismu esistente na xusticia "a la española" ye importante siguir denunciando los abusos facistes cola fin de que dalgún día siamos quién a sacar de les nueses cais a estos personaxes enemigos de la llibertá del pueblu asturianu y la necesidá de siguir construyendo la nuesa alternativa de llibertá frente al so sistema de represión y muerte".