Marzu 2012: Xornaes antiracistes.

Asturies llibre, Poder Popular

¿Qué ye eso d'una Asturies Llibre con Poder Popular? 

Anguañu, el gran capital, la banca, los burócrates, el seutor financieru, les multinacionales y la "mediana" y "gran" patronal desixen al Pueblu Trabayador sacrificios pa finar cola crisis, imponiendo retayos y mensaxes coleutivos d'asimilación por mediu de los sos títeres pseudo-políticos. Asturies, qu'anque la so crisis yá vien de cuantayá, carez una situación inda más crítica qu'enantes, con más de 100.000 paraes/os. Siguimos siendo una colonia, entregada dafechu a Madrí y l'españolismu políticu-económicu. Somos una nación que nun tien dengún tipu de privilexiu respeutu al conxuntu l'Estáu Español, en denguna materia podemos superar esi agraviu comparativu, que va camín de convertise nun elementu estructural más del perfil social asturianu. El modelu llaboral , enerxéticu, llingüísticu, estatutariu o políticu avalen esa teoría de forma irretrucable.

La situación de la nuesa nación ye polo tanto desesperante. El Pueblu Trabayador Asturianu ye agora muncho más probe qu'hai años, pesie a que la situación d'aquelles nun yera bona. El momentu que tamos viviendo, con una crisis capitalista de la que se tan beneficiando los ricos, ta faciendo que'l colapso social agreda a la clas trabayadora, ye dicir, a la cuasi totalidá del Pueblu Asturianu. Los drechos algamos van cayendo y la banca y los grandes contratistes van embargando. El nivel de suicidios y enfermedaes psicolóxiques medra y la conflictividá social y contestataria sigui abondo parada. En resume, tenemos una sociedá construyía que entama a amosar síntomes de desgaste pero qu'entá va tener cuerda, pues el Pueblu Asturianu tien dellos problemes y torgues d'estremáu calter pa escomencipiar una estratexa y una taútica organizativa que faiga al país superar el modelu actual, abrazar la democracia popular y lliberase como suxetu políticu nacional.

L'Asturies llibre de la que tantu faló'l nacionalismu/soberanismu asturianu nestos trenta años d'esistencia carez ca día más xaciu. Pesie a la poca efectividá d'esi movimientu políticu y la poca influencia na sociedá'l discursu de máximos sigui valiendo como proyeutu futuru. Una Asturies llibre sinifica una Asturies independiente daveres. ¿Tien xaciu qu'Asturies algame un status d'independencia? La rempuesta ye que sí. La conceptualización del imperialismu, la interpretación d'estructuración de la sociedá en clases sociales y la propia inercia lleven dando pie a movimientos políticos internacionalistes en tol mundu que se reclamen al empar nacionaliegos, soberanistes, patriotes o independentistes. La soberanía nacional d'un país ye clave pa construyir una braera alternativa al capitalismu nun mundu globalizáu de forma perversa, con un imperiu reinante y con dellos imperios de segundu orde siguiendo la direición del primer. Poro, los y les marxistes revolucionarios d'Asturies, independientemente de la so orientación tienen de decatase de la necesidá de facer medrar la concencia nacional y asumila ellos/es pa facilitar un modelu socialista n'Asturies. Cada nación tien de formar la so barricada al capitalismu y l'imperialismu, superando conflictos etnocentristes y avanzando con trabayu cooperativu y solidariu na construcción d'un mundu meyor, una necesidá pa les mases y por supuestu p'Asturies.

Viendo'l cursu de la hestoria, sobre manera del sieglu XX: ¿Daquién imaxina que'l Vietnan Socialista hubiere apostáu por una República Francesa Socialista n'onde ellos tuvieren cabida?  ¿Por qué entós otru imperiu, nesti casu l'español, tien de remanar anque seya en Réxime Socialista los intereses d'Asturies?. Anque dexe de tener relaciones d'imperiu y comportamientos nesi mesmu sen, ¿pue falase de socialismu y revolución nun contestu que reproduce y continua con una estructural nacional y xeográfica de tipu capitalista ya imperialista?. ¿Por qué n'Asturies, que ye una colonia con toles de la llei, hai persones que son o dicen ser revolucionaries, y al empar defender un marcu español d'actuación y referencia? La comparanza Asturies - Vietnan ye una desaxeración, sí, fueron y son realidaes estremaes, pero hemos de ser conscientes de que nun esiste un solu tipu de modelu imperialista. L'Español ye un imperialismu hestóricu que ñaz yá na xénesis del Reinu de Castiella.

Son cuestiones que nun tan mui analizaes, en concretu l'anterior referencia clara a esi ciertu xacobinismu de parte de la izquierda marxista n'Asturies. Hai que superar esi desafortunáu analis y problema del movimientu popular asturianu. La hestoria da munches lleiciones y sacamos en claro que puxar por una Asturies llibre, o ye lo mesmu, puxar polos pueblos, va de la man de la lliberación social. Los imperios son contrarrevolucionarios, l'Estáu Español ye un Estáu marcadamente contrarrevolucionariu y la idea d'España ye fondamente facista, y tien el son fundamentu principal nesti tipu d'idees reacionaries. Por contra, Asturies ye un pueblu esplotáu, espoliáu y colonizáu y tien que tener na so soberanía como pueblu el so balón d'osixenu pa construyir nel so ámbetu una sociedá más xusta, llibre y humana: nós decidimos, y nós decidimos refugar la esplotación del home pol home.

El poder popular garantiza qu'Asturies tea nes manes de les/os propies/os asturianes/os. La economía nacionalizada, ensín inxerencies imperialistes foriates (recordemos que ye evidente que les grandes empreses internacionales son una estructura del imperiu más) fai qu'una nación puea desenrrollase con paz y estabilidá suficiente como pa superar l'actual mentalidá d'individualismu y competitividá. Nun hai de descuidar nesti sen el papel d'una educación popular completa, íntegra, crítica y autocrítica, que faigan de la reflexión y l'auto-reflexión pegoyos cimeros de la so praxis. La participación del conxuntu del Pueblu Trabayador Asturianu na actividá política y la toma de decisiones qu'afeuten al so país fadría qu'aumentara l'auto-estima d'esi pueblu, la sensibilidá nacional y la presión escontra les desviaciones egoistes y los comportamientos poco éticos. Pero nun podemos dexalo solo ehí. Tamién medraría'l bientar en tolos niveles de toles persones qu'integren esi pueblu.

A colación colo comentáu sobre'l Poder Popular, hai de dicir que lo anteriormente espuesto ye fondamente utópicu nesti momentu, pero ye una construción costosa pero posible, ensín dulda. Ta nidio que nuna situación d'independencia nacional sedría too perguapu, pero nesi procesu de construción nacional y de camín al autodetermín tamién caltenemos que ye básicu aplicar Poder Popular. Como llabor formativu y como práutica eficaz, en beneficiu del país. Las esperiencies de conceyos abiertos, asamblees populares y democracia participativa son un exemplu más tanxible dende la nuesa posición nel mundu pa entender l'Asturies de Poder Popular que queremos.

Como se diz dende'l soberanismu revolucionariu en tolos requexos del mundu, la emancipación nacional y social son les dos cares d'una mesma moneda.Ye dicir, la independencia y el socialismu tienen de caminar xuntos. En contra posición, España y el capitalismu tamién van de man, pero nesti casu pa imponer, imponer, imponer, reprimir y tornar a imponer. Nun podemos escaecer ésto enxamás, la radicalidá ye pernecesaria dende les nueses postures, lo que nun tien que confundise enxamás col estremismu radicaloide.

En resume, l'Asturies llibre, esi país que romperá con España tien qu'optar pol Poder Popular. Per otru llau, el Poder Popular tien de decantase por una Asturies llibre y fuxir del centralismu españolista fasta finar cola so propia esistencia, pues dalgún día los pueblos que tamos baxo esti mesmu yugu sedremos llibres y soberanos. Nun habrá otru día nin otru camín de cara a la llibertá y la soberanía. Con España nun hai llibertá de verdá y col capitalismu nun hai soberanía, nin xusticia, nin democracia.

Semar sestaferies pa recoyer la collecha.

Recuperar na cai lo que nos roben nos despachos

Fuelga Xeneral: Llamamientu de la CSI a la fuelga xeneral

La Corriente Sindical d’Izquierda quier facer un llamamientu a les y los trabayadores y al conxuntu’l Pueblu Asturianu, a la fuelga xeneral y a tornar esti 29 de marzu nel primer día d’una movilización continua, permanente y ensin contemplaciones.

En la CSI nun vamos aceutar denguna negociación sobro esta Reforma Llaboral y desiximos la so retirada darréu, asina comu del Acuerdu pol Emplegu y la Negociación Coleutiva, apautáu anteriormente por CCOO, UXT y la Patronal. Esti sindicatu nun va, nin siquier, a entrar a valorar denguna triba de negociación y alvierte a les cúpules sindicales de CCOO y UXT, del grave enfrentamientu, col conxuntu la clas obrera, al que van vese embocaos, en casu de querer llevar alantre tala negociación. La CSI va facer cuanto pueda por qu’esta fuelga nun seya esclusivamente un paru llaboral de 24 hores.

Los cientos de miles de paraes y paraos d’Asturies, los cientos de miles de trabayadores na precariedá, los cientos de miles de trabayadores de la economía sumerxía y los cientos de miles de presones estafaes por este sistema capitalista, tienen de ser los y les protagonistes d’esti día de llucha.

Pa la CSI, seis millones de paraos y paraes son doce millones de brazos cruzaos, qu’esti 29 de marzu tienen d’arremangase, xunta’l restu trabayadores, pa entamar a ganar na cai tolo que nos roben nos despachos. ¡ENSIN CONTEMPLACIONES!.

Gotor gana les eleiciones y repite como rector de la Universidá

Vicente Gotor consiguió, con un 66,52 por cientu de los votos, ganar les eleiciones a rector de la Universidá d’Uviéu. Derrotó a Paz Andrés, al igual que nel 2008, anque con un porcentaxe de votos trés puntos mayor.

El caderalgu de Química Orgánica y Inorgánica de la Universidá d'Uviéu sumó un total de 3.720 votos (66,52 por cientu) por 2.332 (33,62 por cientu) de la so rival. Hai cuatro años, na segunda vuelta de la votación, Gotor sumaba un 63,25 por cientu del total, mentes qu’Andrés algamaba un 36,75 por cientu.

Tres conocer los resultaos, el rector pa los cuatro años próximos agradeció los apoyos eleutorales colos que meyora en más de tres puntos los conseguíos nel 2008 y púnxose como oxetivu alcanzar la "escelencia" na institución académica asturiana. "Tán mal nun lo fiximos", dixo conteníu en declaraciones a los medios en referencia a los resultaos de les urnes, pa depués apuntar que yá tenía la so vida "preparada p’ayudar a la universidad" na so etapa académica última.

Gotor agradeció’l llabor del so equipu rectoral y eloxó una campaña "llimpia" cola otra candidata. Tamién, tres facer referencia a les dificultaes añadíes que va sufrir pola crisis económica, reiteró la so intención de contar con tol personal, priorizando la docencia y la investigación. Pa ello, comprometióse a dar oportunidaes a quienes tean acreditaos pa poder remocicar la plantiya. "Necesitamos savia nueva de calidá", calcó.

Pela so parte, Andrés señaló “que debo terminar equí, güei, esta faceta de la mio vida universitaria". La caderalga de Derechu Internacional Públicu y Rellaciones Internacionales de la Universidá d’Uviéu reseñó que la comunidá universitaria "tomó la so decisión" y que lo que-y correspuende a ella ye "asumila". "Felicito al rector eleutu y deseo-y aciertos pol bien de la Universidá", dixo. La candidata tamién aprovechó p’agradecer el sofitu col que contó, tanto ente los eleutores como ente los compañeros y destacó qu’espera qu’alguien garre’l relevu dientro cuatro años “porque sigo pensando qu’Asturies merez una Universidá meyor”.

Fonte: Asturies.com

N’Ast protesta pola retirada del sofitu del Ayuntamientu de Xixón a la promoción editorial

Piden que se caltenga'l sofitu pa la edición n'asturianu.
Dende l'asociación cultural N'Ast vienen d'asoleyar un comunicáu nel que manifiesten la so "protesta énte la esapaición de la política de promoción editorial del Ayuntamientu de Xixón. El sofitu económicu del Gobiernu municipal a la edición cultural pasó d’implicar más dos millones d’euros ente los años 2010 y 2011 a nun acutar nin un euru nel presupuestu municipal d’anguañu, precisamente nunos intres especialmente difíciles pal seutor editorial asturianu".

Dende l'asociación consideren que "la desapaición d’esta llínea d’actuación supon non solamente un dañu al espardimientu de la cultura sinón tamién a la mesma economía asturiana yá que nun escaezamos que les industries culturales son una fonte de riqueza que enxamás se potenció correchamente".

Poro, N'ast solicita como mínimu "que se caltenga’l sofitu pa la edición en llingua asturiana, dao la conocía situación de amenorgamientu que carez la nuesa llingua nacional por mor de la falta de respetu a los drechos democráticos de los asturianos en materia llingüística ".

Asturies, un país d'Europa.

...Falar d’autodetermín ye falar d’un derechu reconocíu internacionalmente y que permite qu’una comunidá d’habitantes tenga llexitimidá pa decidir el so propiu futuru colectivu y siguir el camín que-y pete como pueblu tal y como espeya la declaración d’Alxer del añu 1976. El nuesu país, una de les primeres naciones-estáu modernes d’Europa, ye güei, según l’estatutu de ruina autonomía, una “comunidá hestórica”, frente a Galicia o Euskadi denominaes “nacionalidaes hestóriques” o Catalunya que yá ye una “nación” con toles de la llei.

La mocedá d’izquierda alternativa y asturianista que representamos nun puede nin ha d’escaecer enxamás esti derechu, que tien de tar presente nes reivindicaciones polítiques a defender nos años vinientes. Asturies, como pueblu, tien de facer el so propiu camín, ensin mimetismos nin imitaciones con otros movimientos nacionalistes, pero deprendiendo de los aciertos y errores de caún d’ellos a lo llargo de la so llucha.

La independencia, como conceptu políticu ye la máxima espresión del derechu d’autodetermín d’un pueblu, constituyéndose n’estáu soberanu, con plena autonomía y ensin intervencionismu políticu y económicu dende acullá de les llendes alministratives establecíes...

EL SOYÁU ALTERNATIVU, Mayu de 2006, Documentu 1. Espublización de MIAS.

Rempuesta de N'Ast a les declaraciones d'Ignacio Prendes d'UPyD

El sucursalismu españolista torna a recurrir a falacies pa llexitimar les sos posiciones antiasturianes.

El candidatu a la presidencia del Gobiernu autonómicu, Ignacio Prendes, rializó unes declaraciones en La Nueva España que merecen una reseña pela nuesa parte. El dirixente d’UPyD afirma que "Nosotros no somos partidarios de la oficialidad del asturiano", lo cual yá sabíemos. Y ye qu’amás nun podíamos esperar otra posición dende una formación política qu’articula tol so discursu en redol a la esaltación del nacionalismu estatalista y de la tecnocracia, asina como a una pretendida superación de les ideoloxíes y de les clases sociales.

De siguío xustifícase argumentando qu’en Asturies nun esiste "una situación de bilingüismo real". Lo que nun esiste n’Asturies ye una situación de billingüismu equilibráu social ya istitucionalmente, dándose una permanente presión estructural sobro la población asturfalante pa que vaiga adoptando ca vuelta más la llingua española na so vida cotidiana. Pero claro pal nacionalismu españolista xabaz que representa Ignacio Prendes la única posición posible énte’l conflictu llingüísticu asturianu ye la mesma negación del Otru y el falseamientu de la rialidá sociolóxica del País. Si esapaez la comunidá asturfalante, esapaez la situación antidemocrática de negación sistemática de derechos civiles. Esa ye la so solución pa UPyD.

Dempués por embargu declara que "la llingua asturiana es un patrimonio cultural, que sentimos como propio y que hay que cuidar y proteger". Ye dicir, tres realizar un plantegamientu abiertamente agresivu haza los asturfalantes de siguío pretende esponer una postura más amable pa cola la llingua en sigo mesma pero d’una mena mui asemeyada a la del PSOE, ello ye, amenorgándola siempres a la categoría de reliquia cultural desprovista de cualisquier tipu de dinamismu social.

A lo cabero señala que "en España ya hay demasiadas barreras y no estamos dispuestos a levantar ni una sola más". Asina con tal de torgar l’avanzar na reconocencia de la pluralidá llingüística del Estáu español ta más que dispuestu a siguir calteniendo les rellaciones de desigualdá y opresión sociollingüística qu’esisten nel País Asturianu, les cuales impliquen pa los asturianos una barrera nel exerciciu d’unos drechos humanos fundamentales: los drechos llingüísticos.

Iniciativa pol Asturianu internacionalízase

L’asociación en defensa de la llingua asturiana, fundada hai trés meses fai pública la so páxina de Rellaciones Internacionales en Facebook. Amás, en dellos díes espérase poner a furrular la seición equivalente en Twitter.L’asociación en defensa de la llingua asturiana Iniciativa pol Asturianu vien de facer pública la so páxina internacional en Facebook baxo’l nome “Initiative for Asturian – International”. L’envís d’esta iniciativa ye’l d’emplegar les redes sociales pa da-y un puxu a la internacionalización de la llingua asturiana y la so problemática y, d’esti móu, dar a conocer la so situación, esparder el so conocimientu y enfotar a tola xente, incluyío la xente foriato, a sumase al movimientu de reivindicación llingüística. Dende la so apaición na rede, l’asociación vien espublizando toles sos noticies y aiciones en trés llingües (asturianu, castellán ya inglés).

Agora, con esti pasu, inténtase facer que l’asturianu y la so problemática seyan más accesibles y que cualaquier persona, seya d’onde seya, pueda involucrase, como yá asocediere nel pasáu con della xente foriato de renome, como ye’l caso del premiu Nobel irlandés Seamus Heaney, quien tien espresada la so simpatía haza la llingua y el so pruyimientu pola oficialidá.
A lo cabero, l’asociación, al traviés de la so Vocalía de Rellaciones Internacionales, convida a tola xente a sumase al proyeutu y a facer llegar esta iniciativa a tol mundu, seyan asturianos o non.

FONTE: Asturnews

Abusos del Marqués de la Romana

“…falaremos del xeneral de la Romana, al que los soldaos españoles solíen llamar el «marqués de les Romeríes», poles sos perpetues marches y contramarches. (Enxamás nun entablaba combate sinón cuando daba la casualidá de qu’elli taba ausente). Esi xeneral, al ser aventáu de Galicia por Soult, entró n’Asturies en calidá de delegáu de la… Xunta Central. El so primer actu consistió n’enemistase cola Xunta provincial d’Uviéu por mor de les sos midíes, enérxiques y revolucionaries, que provocaron l’odiu de les clases privilexaes. Llevó les coses hasta l’estremu de disolver la Xunta y sustituyir a los sos miembros poles sos propies criatures. Informáu’l xeneral Ney d’estes disavenencies surdíes nuna provincia qu’ufriera una resistencia xeneral y unánime a los franceses, llanzó de secute les sos tropes contra Asturies, aventó d’ellí al «marqués de les Romeríes», entró n’Uviéu y lu saqueó per trés díes. Cuando los franceses evacuaron Galicia a fines de 1809, el nuesu marqués y delegáu de la Xunta Central entró n’A Coruña, concentró nes sos manes tola autoridá, suprimió les xuntes de distritu que se multiplicaren cola insurreición y les reemplazó por gobernadores militares; amenazó a los miembros de diches xuntes con persiguilos, y persiguió efeutivamente a los patriotes, manifestando estraordinaria benevolencia para con tolos qu’abrazaren la causa del invasor y procediendo en tolos demás aspeutos como un babayu nocivu, incapaz y caprichosu. Y ¿cuáles fueren los erros de les xuntes provinciales y de distritu de Galicia? Eses xuntes ordenaren un reclutamientu xeneral ensin esceiciones pa clases nin persones, impunxeren tributos a los capitalistes y propietarios, amenorgaren los sueldos de los funcionarios públicos, ordenaren a les congregaciones relixoses que punxeren a la so disposición los ingresos guardaos nes sos arques; nuna pallabra, adoptare midíes revolucionaries. De magar l’arrivada del gloriosu «marqués de les Romeríes», Asturies y Galicia, les dos provincies que más se distinguieron pola so unánime resistencia a los franceses, poníense al marxe de la guerra de la Independencia cada vez que nun se víen amenazaes por un peligru inmediatu d’invasión.

Karl Marx.
New York Daily Tribune,
27 d’ochobre de 1854″

Asoleyáu na páxina del Ateneu Cultural Xuan María Acebal.

Concentración de CSI n'Avilés escontra la reforma llaboral.

"A Laponia, vamos mandar al Gobiernu, a la Patronal y a la so Reforma Llaboral”.
Con esti llema, la Corriente Sindical d’Izquierda va entamar una concentración escontra la Reforma Llaboral, el prósimu vienres, 16 de marzu, a les 19:00 h., n’El Parche (pza. l’Ayuntamientu) d’Avilés.
Pa la CSI, esta Reforma Llaboral llegaliza’l despidu llibre y gratuítu, impón condiciones llaborales propies de la Edá Media, torna a la mocedá en man d’obra esclava y, a la fin, ta fecha al dictáu d’una Patronal cavernícola, dimpuesta a saquear fasta’l caberu euro que-yos queda nel bolsu a los y les trabayadores.

Esti sindicatu nun va, nin siquier, a entrar a valorar denguna triba de negociación y alvierte a les cúpules sindicales de CCOO y UXT, del grave enfrentamientu col conxuntu la clas obrera al que van vese embocaos, en casu de querer llevar alantre tala negociación.

Pa la CSI, a los y les trabayadores namás nos queda una igua: ganar na cai lo que nos quiten nos despachos.

Paraos y paraes del Nalón recuperen l'Adepavan

Siguen los movimientos vindicativos de los paraos y paraes d'Asturies.
Un grupu d'unes 30 persones pertenecientes al coleutivu de persones en situación de desemplegu, integrantes de l'aniciativa "Los llunes al sol", cola que dende va tiempu los paraos y paraes de la zona'l Nalón vienen concentrándose delantre la Casa Conceyu de Sama, anunciaron la recuperación de l'Adepavan, Asamblea de Defensa de los Paraos del Valle'l Nalón.

L'Adepavan foi una hestórica asociación qu'agrupaba a persones ensin trabayu de les cuenques, y que xugó un papel d'importancia na estaya vindicativa durante dellos años. Agora, según despliquen dende los nuevos miembros, "nes Cuenques nun fuimos nin p'atrás nin p'alantre; tamos na mesma situación que n'anterior etapa de l'Asamblea". Poro, anuncien que presentarán prósimamente un calendariu de movilizaciones pa combatir la emigración forciada de la mocedá, l'alta tasa de desemplegu y la falta d'espeutatives de futuru por mor del declive económicu.

Fonte: Infoasturies

Andecha Astur esparde la so campaña elleutoral peles cais del país

La formación política asturiana desendolca la so campaña.
La organización nacionaliega d'izquierdes Andecha Astur entamó, al igual que'l restu de fuercies polítiques participantes nos comicios elleutorales del 25 de Marzu, la so campaña elleutoral a nivel de cai, mediante'l repartu per distintos puntos del territoriu asturianu del so material propagandísticu asoleyáu con motivu del procesu elleutoral asturianu, y qu'hasta'l momentu ye de gran visibilidá en puntos importantes del país como les cais más céntriques de la capital asturiana.

Baxo'l llema "L'Asturies que nun se rinde", dende la formación nacionaliega afiten q'una vegada más el so enfotu ye trabayar la cai pa facer llegar el so mensaxe políticu, ideolóxicu y social al pueblu trabayador asturianu, a les clases populares a les que dirixe'l discursu y les propuestes que dende Andecha Astur proponen pal procesu que desembocará na IX llexislatura na Xunta Xeneral.

Amás de too ello, ye de destacar l'actividá de la formación política nes distintes redes sociales nes que ta presente, y qu'una vegada más xugarán un papel perimportante pa les opciones que nun cunten con espaciu nos medios de comunicación de mases a la hora de dase a conocer ente'l pueblu.

FONTE: INFOASTURIES.NET

La hipocresía de los collacios/es d'UPyD y PP en Madrí.

Asturies y la so cultura se carautericen pola so situación de precariedá. El nuesu país carez una crisis en tolos xacios, con una situación pre-democrática que lleva al país a una yá fonda crisis social. Ciertamente, dicen qu'en política tou val, y los partíos en campaña suelen facer coses abondo cómiques. Esti ye un casu d'esos, el de Foro Asturias (FAC = Francisco Álvarez Cascos) que con tal d'arrampular votucos antróxase de lo que-y peta. Agora quieren embullar al nacionalismu políticu y cultural cuando na so llexislatura nun fixeron más que retayar a tolo que golía asturianu y como nesti casu, solo Vallaure amosó dalgún xestu que precisamente en xestu quedó. Dende esti blogue y dende la más absoluta humildá pero tamién convencios de lo que decimos y de la so veracidá llamamos al asturianismu a NUN CAYER NESTOS CUENTOS Y CALTENER LA DIGNIDÁ, YÁ QU'ESTO NUN YE MÁS QU'UNA FORMA DE TRATAR D'EMBULLAR A LOS ASTURFALANTES Y OTRES PERSONES SENSIBILIZAES PA COLA CULTURA'L PAÍS Y LOS DRECHOS LLINGÜÍSTICOS. ASTURIANA/U: NUN VOTES ESPAÑOLISMU, VOTA NACIONALISMU D'IZQUIERDA. Noticia que fala d'esta comedia n'Asturies.com:

Foro mantuvo un grupu de trabayu con sectores del asturianismu

Foro Asturias mantuvo esti llunes en Xixón un grupu de trabayu con sectores del asturianismu pa informar de les llinies de la so política llingüística. La formación apuesta por una presencia tresversal del idioma en toles árees del Gobiernu.

L’aconceyamientu, al qu’acudieron unes 40 persones del asturianismu cultural, contó con una representación importante del partíu llideráu por Francisco Álvarez-Cascos, cola presencia del senador Isidro Martínez Oblanca; el conseyeru de Cultura y Deporte, Emilio Marcos Vallaure; la conseyera d’Educación y Universidaes, Ana Isabel Álvarez González; el direutor xeneral de Política Llingüística, Alfredo Ignacio Álvarez Menéndez; y el conceyal por Noreña, Inaciu Iglesias Fernández. L’oxetivu del alcuentru, según esplicaron, yera informar de les llinies de la so política llingüística y entamar un grupu de trabayu pa establecer un Plan 2012-2016 p’avanzar na normalización de la llingua asturiana. Nesi sen, dende Foro señalaron que la idea de poner en marcha esti proyeutu taba meditada dende hai tiempu y que la convocatoria de les eleiciones anticipaes trestocó los planes iniciales.

L’intención de Foro en matería llingüística ye apostar por una presencia tresversal del idioma en toles árees del Gobiernu y non arrequexalu a una estaya determinada, como pasaba nes llexislatures anteriores. D’igual forma, considera perimportante la introducción del idioma nel currículu d’Infantil (de 3 a 6 años), el reconocimientu de la especialidá docente de Llingua Asturiana y l’agame d’una mayor presencia del asturianu nos medios de comunicación. Otra manera, Álvarez Menéndez confirmó nel alcuentru la intención de Foro de siguir trabayando na recuperación toponímica y anunció la espublización nos díes próximos d’un nomenclátor con tolos topónimos oficiales del país –que va poder descargase na rede– pa que sía utilizáu en toles estayes de l’Alministración y por tola ciudadanía en xeneral.

El públicu presente, que llanzó delles entrugues a los responsables de Foro, fixo énfasis na so preocupación polos recortes al asturianu y a l’Academia de la Llingua Asturiana. L’argumentu utilizáu pa xustificalos foi que toles estayes sufrieron recortes a esceición d’Educación, Sanidá y Bienestar social, árees que’l Gobiernu consideró intocables, y que finalmente la prórroga presupuestaria obligó a tomar midíes más drástiques. Por último, Foro quixo refrendar la so apuesta pol asturianu y gallego-asturianu, que consideren una parte fundamental del patrimoniu asturianu; un exerciciu de llibertá pa los ciudadanos y una obligación pal Gobiernu.

Na semeya, Martínez Oblanca, Álvarez González, Marcos Vallaure, Álvarez Menéndez y Iglesias Fernández.

Fonte: Asturies.com

Asturies, dizlo tol mundu

Los retayos económicos duplicarán la cayida de la economía y l'emplegu n'Asturies

Según un estudiu de Funcas.

La Fundación de les Caxes d'Aforros vien de facer un nuevu estudiu pa l'actualización de les previsiones asoleyaes pol organismu a finales de 2011 respeuto a les previsiones económiques globales d'Asturies pal añu 2012. Según los datos d'esi primer estudiu, la mengua del Productu Interior Brutu asturianu taba estimáu nel 0,7%, demientres que la cayida nel mercáu llaboral prevista yera del 0,5%.

Coles nueves cifres, la mengua nel PIB qu'estima Funcas ye del 1,8%, más del doble que va pocos meses, demientres que la cayida nel mercáu llaboral algamará un retrocesu d'un puntu, esautamente'l doble de lo previsto. D'esta mena, la causa principal son los retayos, en primer términu del gobiernu estatal, cifráu en más de 1.000 millones d'euros, y en segundu términu del gobiernu asturianu, que según lo desplicao polos téunicos de Funcas, si'l gobiernu estatal obliga a cumplir el techu de déficit del 1,5% deberá menguar el so gastu n'alrodiu de 500 millones d'euros.

Fonte: Infoasturies.net

URXENTE: Concentración. Mañana, miércoles 14. 11 h. Xulgaos de lo penal de Natahoyo. Xixón

Xuicio penal contra militante de la CSI por denunciar la precariedá nel Bar Business

Mañana, miércoles 14 de marzu va cellebrase una concentración a les 11 h nos xulgaos de lo penal de Xixón pa denunciar la clara vulneración de derechos sofrida por Marcu A., delegáu de la CSI.
Axentes de la Guardia Civil apurriero...n-y esta mañana una comunicación na que se-y informaba, con menos de 24 h d'antelación, de la cellebración d'un xuiciu penal, nel que los propietarios del Chigre Business denuncien llevantos y bilordiu. Con caracter d'urxencia, l'abogada de la CSI solicitó un aplazamientu. Sosprendentemente esti pidimientu foi refugada pol xulgáu a pesar de la manifiesta imposibilidá de preparar la defensa del nuesu compañeru. 

La CSI vien realizando concentraciones ante'l Chigre Business pa denunciar los despidos de dos trabayadores y el sistemáticu incumplimientu del conveniu de la hostelería. D'ende derívase l'intentu de los empresarios de revertir l'acusación y pasar de denunciaos a denunciantes.
Nun podemos tolerar que l'exerciciu de les llibertaes básiques se convierta en delitu penal. Mientres la patronal asturiana despide y precariza a cientos de persones diariamente, nun podemos aceptar que quienes pasen polos xulgaos sían quienes denuncien solidariamente el empeoramientu de les nueses condiciones de vida.

¡Difunde!

Esti sábadu folixa antifacista ya irlandesa.

El coleutivu anticapitalista, antifacista y antiracista Uviéu Antifa entama una folixa pa conmemorar San Patriciu esti sábadu 17 nel C.S.O.A. La Madreña

Los candidatos a rector comprométense al usu del asturianu nel logu de la Universidá d’Uviéu

Vicente Gotor y Paz Andrés, candidatos al rectoráu de la Universidá d’Uviéu, comprometiéronse col Conceyu Universitariu pol Asturianu (CUPA) al usu del idioma nel logu de la institución. Asina, ésti va ser billingüe.
Según anunció’l coleutivu, tres un aconceyamientu con caún de los dos candidatos, éstos firmaron un documentu qu’establez un programa d’actuaciones en política llingüística pa desendolcar nos años vinientes. Ente los puntos firmaos destaca’l compromisu “de diseñar y oficializar” nun plazu d’un añu y mediu “un logotipu billingüe (asturianu/castellán) de la Universidá d’Uviéu / Universidad de Oviedo, nel que dambos nomes apaezan siempres y ensin diferencies gráfiques ente les dos llingües”. Amás, nun plazu de seis meses, Gotor y Andrés van impulsar y aprobar un reglamentu de rotulación pa que tolos cartelos que sían anovaos tean nos dos idiomes, y “van reclamar con firmeza” énte’l Gobiernu asturianu y l’estatal “el reconocimientu de les categoríes profesionales de los maestros y profesores d’asturianu, que colos títulos oficiales salen formaos de la Universidá d’Uviéu”.

D’igual forma, nun plazu d’un añu, van reforciase les competencies de la Comisión de Normalización Llingüística, encargandó-y la redaición d’un Plan de Normalización Llingüística pal periodu del mandatu rectoral coles midíes que se consideren necesaries pa completar el procesu de normalización na institución. Por último, los candidatos comprométense a siguir impulsando la presencia del asturianu nes cuestiones yá llevaes alantre nel mandatu anterior. “El CUPA celebra’l consensu xeneráu alredor de les polítiques llingüístiques na Universidá d’Uviéu depués de los pasos daos alantres nestos años, anque recuerda qu’entá queden munches coses por facer pa garantizar la igualdá de dambes llingües na institución”, espliquen nun comunicáu, nel que tamién feliciten a Gotor y Andrés pol usu del asturianu na campaña eleutoral pese a qu’ésti ye tovía pequeñu.

Fonte: Asturies.com

La Xunta pola Defensa de la Llingua ufierta un cursu avanzáu d´asturianu

La Xunta pola Defensa de la Llingua Asturiana organiza un cursu d’afondamientu llingüísticu pa persones adultes de 40 hores de duración, nel que los los alumnos van poder afondar nel bon usu del idioma tanto a nivel escritu como oral, asina como nes relaciones ente llingua y sociedá.

Les clases van escomenzar el martes 27 de marzu, nel local de la organización: Conceyu Abiertu, na cai La Gascona 12, baxu A, d’Uviéu, y n’horariu de 19’00 a 21’00 hores, los martes y xueves (horariu provisional hasta concretar y consensuar cola xente matriculao).

El preciu de la matrícula completa ye de 30 euros y pa inscribise nun ye necesaria nenguna titulación o profesión concreta. Sicasí, encamiéntase a les persones que se vayan matricular, que tengan una conocencia básica de la espresión escrita y oral del idioma.

Toles persones interesaes pueden apuntase llamando al 985 22 95 53 o al 679 65 09 98, o bien mandando un mail a la direición: info@exunta.org

Amás, la Conseyería d’Educación y Universidaes acreditó’l mes de febreru pasáu a la Xunta pola Defensa de la Llingua Asturiana como entidá organizadora d’actividaes de formación permanente del profesoráu. Agora tamos a la espera de qu’esti cursu se reconoza de formal oficial y pueda proporcionar creitos homologaos de formación al profesoráu de Primaria y Secundaria a quién lu curse con aprovechamientu.

Fonte: aruelu.com

Asturies: el país nel que paez que nun pasa'l tiempu.

Videu del cantar Tamos Fartos del grupu de folk asturianu Lliberdón. El tema pertenez al tercer discu del grupu, espublizáu en 1997, y que s'entituló de la mesma manera qu'esti cantar. Nél podemos ver al grupu en directo o nel estudiu de grabación mecío con imáxenes d'una manifestación pola oficialidá de la llingua asturiana de 1996 nes cais d'Uviéu.

Autor: Colectivu Bebes Furiosos