James Connolly: Socialismu y Nacionalismu (1897)

Anguañu n'Irlanda trabayen una riestra organismos que busquen caltener el sentimientu nacional nel corazón del pueblu irlandés. Estos organismos, como'l movimientu pola Llingua Irlandesa, les Socidáes Lliteraries o los Comités de Conmemoración, ensín llugar a dulda tan faciendo un trabayu de provechu atemporal pa esti país aidando a salvar de la estinción la preciada hestoria humana y nacional, la llingua y les carauterístiques del nuesu pueblu.

Por embargu, esiste'l peligru de qu'altravíes d'una afinidá escesiva a los sos métodos de propaganda, y polo tanto a una neglixencia sobro los aspeutos más importantes de nuesa sociedá, sólo trunfen unos estudios hestóricos estereotipáos y una adoración del pasáu, o un nacionalismu productu d'una tradición – gloriosa y heroica – pero únicamente una tradición. Güei les tradiciones pueden y davezu faenlo, aportar la bas pa un martiriu gloriosu, pero enxamás podrán ser lo suficientemente fuertes como p'aguantar la tormenta d'una revolución y qu'esta llegue a bon puertu.

Si'l movimientu nacional de los nuesos díes nun se llenda a rememorar vieyes traxedies de la nuesa hestoria, debe amosar capacidá de tar al altor de les esixencies del momentu. Debe amosar al pueblu irlandés que'l nuesu nacionalismu nun ye n'esclusiva una obsesiva idealización del nuesu pasáu, sinón que ye capaz de formular una clara y definitiva rempuesta a los problemes d'anguañu y un modelu políticu y económicu capaz d'axustase a les necesidáes del futuru.
Esti ideal políticu y social, toi convencíu, puede algamase altravíes de la franca aceutación de los aflixíos y serios nacionalistes de la República como'l so oxetivu.

Non una República, como en Francia, onde una monarquía capitalista con un líder escoyíu fai chancia de los albuertos constitucionales d'Inglaterra y que n'abertal alianza col despostismu moscovita fai afalagos de la so apostasía a les tradiciones de la Revolución. Non una República como nos Estáos Xuníos, onde'l poder del dineru afitó una nueva tiranía baxo formes de llibertá; onde, cien años dempués qu'a los pies del caberu casaca encarnada contaminara les cais de Boston, los señores y financieros británicos impunxieron sobro los ciudadanos americanos una sumisión que comparada colos impuestos prerrevolucionarios convierte-yos en simples pequeñeces.

¡Non! La República que quinxera presentar énte los nuesos compatriotes sedrá d'un cálter que'l simple fechu de mentar so nome servirá por siempres como faru pa los oprimíos de cualesquier llugar, siempres calteniendo per delantre la promesa de llibertá y bayura como recompensa a los esfuercios realizaos.

Al llabriegu en réxime d'arrendatariu, bas del terratenientismu per un llau y la competitividá americana pela otra, como si tuviera ente les piedres de moler d'un molín; a los asalariaos nes ciudáes, sofridores de la carga'l capitalista que convierte n'esclavu al trabayaor del campu, que mátense trabayando por un sueldu que malapenes ye suficiente pa caltener xuntos cuerpu y alma; de fechu, pa toos aquellos millones d'esplotáos que la so miseria sofita l'aparentemente espléndidu texíu de la nuesa moderna civilización, la República Irlandesa pronunciaría la pallabra que remembraría un puntu d'alcuentru pal agospiu pal oprimíu, un puntu de partida pal socialista, entusiasta na causa de la llibertá humana.

Esta xunión ente les nueses aspiraciones nacionales coles esperances de los homes y muyeres qu'alzaron l'estandarte de la rebelión n'aquel sistema de capitalismu y señoritismu, del que l'Imperiu Británicu ye'l más resueltu y agresivu defensor, nun debería, so nenguna circunstancia, causar elementos de discordia ente les files de los nacionalistes consecuentes, y serviría pa faenos con fresques reserves de fuercia moral y física abondes pa llevantar la causa d'Irlanda hasta una posición de más autoridá qu'ocupara dende'l día de Benburb.

Puede retrucase que l'ideal d'una República Socialista, implica, como asina ye, una completa revolución política y económica que de manera segura enayenaría a toos nuesos partidarios de clas media y aristocrática, quienes tarreceríen la perda de les sos propiedaes y privilexos.

¿Qué quier dicir esti retruque? ¡Que tenemos qu'aselar a les clases privilexaes n'Irlanda! Pero la única manera de desarmar la hostilidá ye asegurándo-yos que n'una Irlanda llibre los sos “privilexos” nun se van ver afectáos. Esto ye, garantizar que cuando Irlanda sía llibre de la dominación foriata, los soldáos irlandeses van protexer los fraudulentos beneficios del señoritu capitalista de les “delgáes manes de los probes” ensín reconcomios y la mesma eficacia que los emisarios d'Inglaterra a día de güei. Baxo otra condición nun se van xunir les clases a nós. ¿Cree daquién que les mases van lluchar por esos ideales?

Cuando se fala de lliberar Irlanda, ¿falamos n'esclusiva de los elementos químicos que componen la tierra d'Irlanda? ¿O falamos del pueblu irlandés? Si ye ésti'l casu, ¿de qué se supón que se-yos va lliberar? ¿Del dominiu d'Inglaterra? Pero tolos sistemes d'alministración política o la maquinaria gubernamental son namái espeyu de les formes económiques sobre les que se sofiten. La llei inglesa n'Irlanda nun ye amuesa del fechu de que los conquistadores ingleses forxaron nel pasáu un sistema de propiedá fundáu nel espoliu, el fraude y l'asesinatu; lo que fai que l'exerciciu actual de los drechos sobre la propiedá entamáu nesa dómina implique una continua práutica d'espoliu y fraude llegalizáu. La llei inglesa preséntase como la forma de gobiernu más válida altravíes de la cual l'espoliu ye protexíu, y l'exércitu inglés ye la ferramienta más flexible cola qu'executar l'asesinatu llegal cuandos los mieos de les clases pudientes asina lu reclamen.

El socialista, que destruyiría dafechu la totalidá del sistema d'una civilización absolutamente materialista, que como la llingua inglesa adoptemos como propiu, ye, repito, en demasía, mayor a les lleis y tutela ingleses que'l pensador superficial qu'imaxina que ye posible conciliar la llibertá irlandesa con eses dañibles y desastroses formes de sometimientu económicu basáu na tiranía terrateniente, el fraude capitalista y la corrupta usura; frutes podres de la conquista normanda, la incrédula trinidá de los que Strongbow y Diarmuid MacMurchadha (lladrón normandu y traidor irlandés) fueron apropiáos precursores y apóstoles.

Si mañana echáis al exércitu inglés ya izáis la bandera verde sobre'l Castiellu de Dublín, nun siendo qu'entaméis la organización d'una república socialista tolos vuesos esfuercios sedríen en devanéu. Inglaterra inda vos apoderará. Fadralo altravíes de los sos capitalistes, de los sos terratenientes, altravíes de tol conxuntu d'instituciones comerciales ya individuales qu'enllantó nesti país y que tán regáes coles llárimes de les nueses madres y el sangre de los nuesos mártires.Inglaterra va apoderavos hasta llevavos a la ruina, inclusive mentantu los vuesos llabios ufierten un homenaxe hipócrita al santurariu d'esa Llibertá que la so causa traicionastis.

Nacionalismu ensín socialismu – ensín una reorganización de la sociedá so una bas d'una forma más amplia y desenvuelta d'esa propiedá común que foi la bas de la estructura social de l'Antigua Erin – nun ye más que cobardía nacional.

Sedría l'equivalente a una declaración escontra los nuesos opresores, qu'hasta agora llograren contaminar en nós los sos malváos conceutos de xusticia y moralidá, de que nós los decidimos finalmente aceutar a la nuesa manera. Nun precisamos un exércitu ayenu pa forciar eses idees sobre nós nunca más.

Como socialista, toi preparáu pa faer tou lo qu'un home ye capaz de faer pa que la patria de nueso algame'l so llexítimu drechu: la independencia; pero si entrúgaseme si modificaría una coma na coma na reclamación de xusticia social p'asina apaciguar a les clases privilexáes, entós teo de refugar esti drechu. Tal aición nun sedría nin digna nin realiza. Recordemos qu'el que camina de llau del Diañu enxamás algama'l cielu. Proclamemos n'abertal el nuesu creu, la llóxica de los acontecimientos ta de la nuesa parte.

22M: Fuelga na Enseñanza Pública.

La XDLA tacha d'«involucionista» la eliminación del topónimu tradicional

La Xunta pola Defensa de la Llingua (XDLA) sacó un comunicáu onde refuga la eliminación del topónimu Xixón del logotipu nuevu del Festival Internacional de Cine y tacha esta midida de «rancia y involucionista» pa cola toponimia asturiana. Diz la organización en defensa de los derechos llingüísticos que «la imposición d'esti diseñu, obra del valencianu Javier Mariscal, carga directamente contra la denominación del certame, onde taba yá plenamente normalizada la presencia del asturianu al traviés del usu del topónimu tradicional, que ye oficial dende setiembre del 2006».

Na XDLA sorpriende qu'esti tipu d'acciones lleguen dende la Conceyalía de Cultura de Xixón porque los sos responsables son, precisamente, los encargaos de visibilizar la toponimia tradicional. Amás, nel comunicáu señalen que, hasta'l momentu d'ocupar cargos públicos, delles persones d'esti departamentu –como'l propiu conceyal, Carlos Rubiera, o'l director de la Fundación Municipal de Cultura, Xosé Nel Riesgo– «desempeñaron un papel activu y destacáu nel procesu de dignificación de la nuestra cultura».

Otru fechu que llama l'atención a la organización en defensa de la llingua ye que la Conceyalía de Cultura de Xixón anunciara, cuando'l cambiu de dirección del certame cinematográficu, que se-y diba dar a ésti un calter «más asturianu y popular», dalgo que la XDLA «nun entiende» cómo pue ser posible si, nesta edición, el logotipu del festival desanicia la forma tradicional.

Por too ello, la Xunta pola Defensa de la Llingua esixe al Festival Internacional de Cine de Xixón que restituya, «de manera inmediata», la denominación «de siempre» y reclamen a los responsables de cultura del Conceyu xixonés que, «por coherencia cola so trayectoria asturianista», se pronuncien al respective.
Fonte: Les Noticies

Asturies, llaboratoriu de prebes pal xacobinismu español

La existencia d’Asturies, como entidá política propia, ta güei más cercana a la so desapaición. El nuesu país, el que, como diz Faustino Zapico ”entraba pela puerta grande na era contemporánea” cola declaración de soberanía de la Xunta Xeneral el 25 de mayu de 1808 ve amenazada, otra vegada, la so integridá.

L’andanada mediática, con vocación de convertise en realidá o non, per parte del ministeriu de facienda del estáu español onde s’amenaza explícitamente cola “intervención” de la economía asturiana amparándose nel contestu políticu ye un fechu gravísimu que, de concretase, sedría merecedor de ser consideráu como un güelpe d’estáu que nun vendría más qu’a demostrar lo feble y tramposo del modelu “autonómicu” español.

Esti movimientu, inéditu na historia recién tres de la “transición democrática”, nun ye casual. Dánse toles condiciones n’Asturies y fuera del nuesu país pa que’l xacobinismu ideolóxicu (y económicu) español dea’l pasu pa la suspensión del autogobiernu de cartón-piedra que nos vienen regalando dende’l primeru de xunu de 1979 la clas política embaxadora del gobiernu español n’Uviéu.

El contestu económicu y políticu européu, onde los estaos miembru nun faen otro que plegase y aplicar con gustu los mandaos de la maquinaria del capital, abre una puerte al tardofranquismu pa entrar a degüellu y anular les instituciones polítiques propies de les naciones que conformen anguaño l’estáu español, entamando pola que ta nuna situación más precaria: Asturies.

El nuestru país axunta toles carauterístiques precises pa ser un llaboratoriu de prebes bien afayadizu nel qu’abordar esa recentralización brutal del estáu. A la composición caótica de la Xunta Xeneral, tres de dos eleiciones nacionales nes que la única opción que sal reforciada y llexitimada ye la de l’abstención y, con ella, el desprestixu de l’aición política, hai qu’amestar la non presencia de partíos nin un movimientu social non sucursalistes pa con Madrid nin pa colos retayos de los nuesos derechos. Si, amás, la llave de la “gobernabilidá” -si puen llamar gobernabilidá a lo que vienen faciendo n’Asturies trés décades- ta en manes d’un partíu que tien como oxetivu final la devolución de toles competencies a Madrid y el desaniciu de los conceyos, la fórmula queda resuelta.

El silenciu cómpliz de la FSA, el brazu más nacionalista español y acomplexáu del PSOE, pa col estáu d’escepción políticu nel que quieren dexar a Asturies ye’l mesmu que’l que los de Rubalcaba prautiquen cuando nun cuestionen nin una migayina les agresiones que cada vienres exerce’l conseyu de ministros de Rajoy. A la fin, si tuvieren gobernando diben facer poco más que lo mesmo. Y ye que, dempués de trés décades de sumisión a Madrid y al neolliberalismu asesín, ¿qué vamos esperar d’ellos a estes altures?.

Capítulu aparte merez el partíu ultra “UPyD”, que tres del “replay” de les eleiciones entraba na Xunta Xeneral, una formación que diz surdir pa romper el bipartidismu y lo qu’insiste en proponer n’Asturies ye un gobiernu de concentración PP-PSOE, llogru que Rosa Díez, en boca del so muñecu de ventrilocuista Nacho Prendes, de xuru vendería como “gesta nacional” per tol imperiu hispánicu.

Desgraciadamente, Asturies, la xente asturiano, ta indefenso énte estos ataques, por muncho que la retórica del partíu de la mano derecha -en tolos sentíos- d’Aznar s’antroxe d’asturianu, una definición que concasa perbién cola definición que Nuberu roblaba pa, precisamente, dexar claro qué nun ye ser asturianu. Tampoco ufre nenguna alternativa la coalición de los que regalen los votos al PSOE pa, yá si eso dempués, discutir -nin siquiera lleguen a negociar- mínimamente’l programa a desendolcar.

Na nuesa nación ta cociéndose’l nuevu modelu d’estáu, nel que namás onde hai movimientos que planten cara a la homoxeinización política, cultural y económica del capitalismu d’estáu español van tar en condiciones de contestar y evitar. Somos el campu de maniobres de la reorganización de la “unidad de destino en lo universal” del reinu español y lo pior ye que muncha xente n’Asturies tovía aplaudirán esta galmiada p’atrás guiao pola desilusión endémica na que la política asturiana nos dexa tres de la llegada del “autonomismu”.
Hai que facer un llamáu a la sociedá asturiana pa entamar a organizar la insubmisión dafechu a los mercaos, al FMI y al BCE, a la dictadura del eurodólar y a la ruina económica que nos siguen imponiendo dende Madrid y Bruxeles col so imperialismu económicu y cultural. Hai que facelo bien aína y afuxendo del populismu vaciu de conteníu políticu. Dar una salida asturiana a la estafa del capitalismu.

Nel nuesu cuentu de “Pedro y el llobu” l’amenaza del llobu siempre foi verdá: lo único que camuda ye qu’agora tán muncho más cerca. Los precedentes tán ehí, el modelu de rempuesta históricu del pueblu asturianu tamién. A ver si somos a ponenos d’alcuerdo pa plantar cara

ARTÍCULU DEL BLOGUE LLAR--> 867 KM

L'estáu español estudia la intervención de la Comunidá Autónoma Asturiana

El Ministeriu de Facienda plantega intervenir el gobiernu asturianu.

El Ministeriu de Facienda del gobiernu español encargó a l'Abogacía del Estáu y la Intervención Xeneral l'estudiu de la posibilidá d'intervenir les cuentes del gobiernu asturianu, argumentando la decisión baxo parámetros políticos, pola "inestabilidá y parálisis política" que vive Asturies. Poro, la decisión nun ye motivada por criterios económicos, onde Asturies nun ta ente les Comunidaes Autónomes con pior situación.

Asina, camienten que nun sedría posible aprobar el "Plan d'Estabilidá" del gobiernu estatal baxo l'actual situación, y por ello planteguen finar cola yá débil autonomía del gobiernu asturianu somorguiándolu direutamente a les decisiones del gobiernu estatal. La decisión supondría la primer aición d'esi calter dende la creación de les autonomíes, poniendo'l primer lladrillu pa finar con esti modelu d'estáu nel territoriu asturianu.

Infoasturies.net

Entrevista al Blogue "Universo Andalucista"

Universo Andalucista ye un blogue andaluz que trabaya pola recuperación nacional y social de la so patria, Andalucia, faciendo un perimportante llabor a nivel hestóricu ya investigador. Esti blogue, que nos últimos cuatro años recibió 85.000 visites contién una bona montonera d'archivos hestóricos, políticos y/o culturales al rodiu del andalucismu y la esquierda. Dende'l Blogue Frayando Cadenes vimos conveniente averanos un pocu a la bloguesfera d'Andalucia y pudimos contautar colos collacios d'esti blogue, los que retrucaron a una completa entrevista que reproducimos darréu. Dende equí saludamos al compañeru encargáu d'Universo Andalucista y da-y puxu pa siguir col proyeutu y encamentamos a tolos nuesos lleutores a entrar nesti blogue p'asina tener una meyor conocencia sobre'l fechu nacional n'Andalucia y la situación alló.

ENTREVISTA A UNIVERSO ANDALUCISTA 

- De primeres, ¿Cuándo ñaz el blogue Universu Andalucista y con qué finalidá? ¿Camudaron dende entós los oxetivos y finalidaes del mesmu?

Universu Andalucista naz n'avientu de 2007, alredor del día 4, día que'l nacionalismu andaluz reivindica como día nacional, por conmemorase coles mesmes l'entamu de la revolución cantonalista de 1868 y la cellebración de les mayores movilizaciones a favor de l'autonomía en 1977.

Los sos fines siguen siendo los mesmos dende entós, el de divulgación del ideariu andalucista y el d'altavoz pa diverses actividaes, pero tamién d'investigación y afondamientu en dellos aspeutos del denomináu Andalucismu Hestóricu, esto ye, el movimientu andalucista dende entamos del sieglu XX hasta'l franquismu.

- ¿El blogue tien un principios ideolóxicos bien llendaos y afitaos o ye un blogue andalucista y progresista más bien abiertu a tou tipu de corrientes?

Los principios que definen a UA, lo que se suel denominar como "llínia editorial", son los de la defensa d'Andalucía y el Pueblu Trabayador Andaluz, claramente enmarcaos nel nacionalismu d'esquierdes, siguiendo la másima de "Independencia y Socialismu", anque esto nun quita pa que seya abiertu a otres sensibilidaes y corrientes dientru de la esquierda andaluza o l'andalucismu d'esquierdes. La función principal d'esti blogue, que yá se marcó de primeres y que creo que se ta modestamente consiguiendo, ye la d'exercer de ponte ente toos estos enclinos, de fechu güei ta enllazáu en páxines d'organizaciones bien estremaes, dende les puramente rexonalistes hasta les más radicalmente independentistes.

- ¿Sentísvos sofitaos nel vuesu llabor pol restu de compañeros nacionalistes andaluces? ¿Recibís ayudes de coleutivos sociales o políticos?

UA ye un blogue personal, nunca tuvo aspiración de representar a naide nin a nenguna organización, d'ehí que siempres intentó coneutar colos sos llectores y llectores, que braeramente solieron respuennder en distintes midíes cola unvíu de material, yá seya hestóricu o de la más inmediata actualidá. D'otra manera, con ver qu'UA ye enllazáu, como diximos enantes, yá ye pa dase por contentu, pues ye señal de que ye lleíu. Ello ye que nos últimos cuatro años recibió más de 85.000 visites, que pa ser un blogue tan modestu creo que nun ta nada mal.

-¿Tenéis pensáu dende Universu Andalucista tener otres dinámiques amás de caltener el blogue, cómo por casu realizar trabayu de propaganda na cai?

Pel momento non, cuido qu'UA nun tien más aspiraciones. Va un tiempu ye ciertu que s'imprimió un mecheru en collaboración con otru blogue andalucista, y dacuando propúnxose-y editar dalgún tipu de publicidá, como pegadieyes o camisetes, pero creo qu'esi nun ye l'oxetivu, lo que ye güei, d'UA, pues quiciabes sedría una forma d'ampliar entá más la sopa de lletres" qu'esiste güei nel andalucismu.

- De forma resumía, ¿cual ye l'actual panorama sociu-políticu na vuesa nación? ¿Cuálos son los grandes problema d'Andalucia?
Ye un pocu difícil respuender de forma curtia a esta cuestión, pero faciendo un esfuerciu, y anque pueda sonar demasiao decimonónicu, atalanto que'l mayor problema d'Andalucía sigue siendo'l caciquismu, sobremanera'l caciquismu políticu, esi contra'l que yá lluchó va un sieglu Blas Infante, Padre de la Patria Andaluza.

Desplico. Anque la fachada d'Andalucía pueda asemeyase a la imaxe qu'ufierta la propaganda oficialista, d'una Andalucía moderna, tecnolóxica, entornada al esterior, etc, gatuñando un pocu reparamos que lo único que fixeron los 30 años de gobiernu monolíticu del PSOE ye sustituyir los antiguos caciques polos sos propios emisarios, que supieron caltener y esviar les redes clientelares nel so propiu beneficiu, y estos de la mesma caltuviéronse firmes a la voz de los sos xefes de Madrid, solamente espoleando una supuesta defensa d'Andalucía cuando ellí gobernaba'l PP... pero dambos son les dos cares de la mesma moneda como bien sabemos yá n'Andalucía y n'Asturies, polo que l'alternanza n'Andalucía, si diérase, col PP, nun fadría más que siguir esa mesma sienda. Y contra esto namái queda, como tamién sabéis n'Asturies, la vía revolucionaria.

Respeutu de la primer entruga, soi bien críticu cola actual situación política. Refiérome al actual pautu de gobiernu PSOE-IULVCA, creo que namái va sirvir pa eternizar eses redes clientelares y corruptes, y por que IX tráguese tolos escándalos del PSOE que van siguir desatapándose, lo que va dar más nales entá a la derecha (lléase PP y UPyD). Esa ye la mayor llástima que tengo güei, la de qu'al PSOE tea dándose-y más caña dende la derecha que dende la esquierda, yá sía andalucista o non.

- ¿Creéis qué dientru del andalucismu o nacionalismu político andaluz hai munches sigles y pocu trabayu y nivel militante?

Como dixi enantes, nel nacionalismu andaluz hubo siempres una “sopa de lletres"que nun taba bien claro a quién y a cuantos representaba. Pero tamién reconozo que sí hubo y hai enforma trabayu militante, voluntariu y desinteresáu. Lo qu'asocede ye que non siempres se supo nin coorninar, nin coneutar de la mesma col pueblu andaluz, qu'en munches ocasiones tienlo visto como daqué foriatu (como la escesiva identificación demientres una dómina col movimientu vascu) o desfasáu (cuando s'apela al pasáu andalusí como si fuera daqué atemporal).

- ¿Cuálos consideráis que fueron los mayores llogros del andalucismu hasta agora?

Difícil. La hestoria nun ye llineal, y les meyores sociales nun son pa siempres, como nestos momentos de crisis xeneralizada tamos comprobando. Por poner dellos exemplos de conquistes del Andalucismu, vamos dicir un esternu y otru internu. Un llogru esternu, por casu, fueron ensin dulda les movilizaciones en tolos ámbitos pola autonomía pol artículu 151 l'añu 1977 y tou lo qu'ello traxo hasta l'aprobación del primer Estatutu d'Autonomía, qu'encimentó la conciencia andaluza de ser un pueblu estremáu culturalmente, colonizáu políticamente y esplotáu económicamente (sobre esta cuestión lo meyor ye averase a cualesquier de los trabayos del antropólogu Isidoro Moreno Navarro). Y un llogru internu, el demosase a sigo mesmu, que ye una ideoloxía dinámica, que s'afai a un ampliu marcu ideolóxicu-políticu, y que nun tien fecha de caducidá, mentantu la situación d'Andalucía siga siendo de dependencia y sodesenrrollu.

- ¿Cómo veis la reivindicación nacional y social dientro del Estáu Español? ¿Creéis qu'hai motivos pa la esperanza o sois más bien pesimistes? ¿Crees que s'averen cambeos y tresformamientos sociales a nivel global?


Ye obviu que'l conceutu d'Estáu-Nación nun furrula pa España, nunca funcionó. Esta ye la gran diferencia del nacionalismu andaluz con otros como'l vascu o'l catalán, por poner namái dos exemplos, y ye que, sol puntu de vista de la mayor parte de los y les nacionalistes andaluces, el problema Andalucía-España nun ye un problema ente dos naciones, yá que direutamente nun reconocemos a España como una nación, porque nunca lo foi. España nun ye más qu'un centralismu artificial sobre unos territorios que nada tienen que ver ente sigo. Como amuesa si non, la politización del deporte polo xeneral y del fútbol en particular, p'apelar a una supuesta identidá y unidá nacional que nun puede argumentase d'otra manera ensin cayer nel más retrógradu franquismu.

Por tou ello, y anque la situación actual ye de francu retrocesu na esquierda y nel nacionalismu (a nivel andaluz pero tamién a nivel estatal), creo que'l tiempu va danos la razón y nun va haber más remediu que reconocer el derechu d'autodeterminación a les distintes nacionalidaes que componen güei l'estáu, igual que nel so día hubo que faese coles autonomíes, que no fondero tán diseñaes como un anticipu pa la federación d'estaos.

-¿Cuál consideráis que ye l'alternativa al capitalismu en crisis?

Non hai la minor dulda: el Socialismu. Un Socialismu dende embaxo, bien trabayáu, confederal, solidariu, nuevu, pero teniendo en cuenta tola trayeutoria que tuvieron hasta güei tantu'l movimientu obreru como los distintos Movimientos de Lliberación Nacional, colos sos aciertos y los sos erros. Llatinoamérica entera, dende Cuba a Arxentina, convirtióse nuna cantera de la qu'aprender a manes enllenes.

Nun hai más, a lo último, la socialdemocracia nun demosó más que ye la cara amable del capitalismu, únicu responsable de la debacle en que s'atopa güei el mundu.

- N'Asturies, munchos coleutivos soberanistes y nacionalistes son bien críticos con que se cellebre la Feria d'Abril nos nuesos conceyos con dineru público, pos consideren que tiende a aculturizar al nuesu pueblu demientres la cultura propia del país ye caldía más marxinada. Poro, dende'l respetu a la identidá andaluza, tiéndese a pidir la so abolición na nuesa nación ¿Entendéis esa postura? ¿Creéis que la cultura andaluza foi emplegada pol españolismu dominante como ferramienta d'uniformismu cultural?

Personalmente, siéntolo enforma pero nun toi al tantu d'esta cuestión. Supongo que pa esti discutiniu va depender del puntu de vista y del usu políticu que se-y dea a estes cellebraciones, pos pueden tar enfocaes dende la diversidá cultural o pueden ser una arma de manipulación del centralismu.

Si son entamaes poles comunidaes d'andaluces emigraos, como se fai en Catalunya o Euskal Herria, nun entendería la crítica, compartía o non la cellebración (de toes formes, recordemos que la feria d'abril ye sevillana, non d'Andalucía polo xeneral, pos cada llocalidá tien les sos propies feches pa les sos propies fiestes, como en cualesquier sitiu).

El problema puede surdir, y creo qu'asina lo entiendo de la vuesa entruga, cuando s'utiliza -como cuasi siempres- lo andaluz como bastión del españolismu (asina s'intentó nel so día cola Feria d'Abril de Barcelona) y como arma escontra los nacionalismos qu'España define como "periféricos". Por tanto, más qu'escontra de la fiesta en sí, hai de tar escontra d'esti tracamundiu de lo andaluz, al igual que n'Andalucía tamos escontra del tracamundiu de nueses mesmes fiestes y nueses mesmes señes d'identidá. Hai qu'entender que la Feria d'Abril, los traxes de flamenca, el finu o los caballistes, al igual que los nazarenos de Selmana Santa, el flamencu, la copla, o otres tantes coses que s'amuesen como traces d'españolidá, nun son españoles, sinón andaluces.

- Como se ve la realidá asturiana dende Andalucia ¿Conoceis les lluches sociales y polítiques que se tán dando y les sos organizaciones ?

Realmente la realidá asturiana, como la percibís vosotros/es, nun nos llega sacantes que se busque específicamente vía internet. Esto nun ye nenguna novedá... ¿qué ye, qu'esiste, a pie de cai, otra cosa que nun seya lo que sal pola tele"?

De toes formes, personalmente, intento tar al tantu de cómo van les coses nel restu l'estáu, y nel restu de naciones en llucha cercanes, y dalgunes de les vueses campañes sí que siguí un pocu, como la de la oficialidá de la llingua asturiana o toa vuesa relación col movimientu obrero y sindical. Amás, les relaciones del Sindicatu Andaluz de Trabayadores (SAT), del cual soi militante, cola Corriente Sindical d'Izquierda (CSI) son escelentes, y a los miembros de la CSI que tuvi'l prestu conocer (desconozo les vueses relaciones cola CSI), paeciéronme xente honesto y coles idees bien centraes.

Creo qu'esa ye una de les meyores conclusiones que podemos sacar d'esti ratu tan entreteníu que tuvimos charrando: Unidá dientro de la diversidá.

Por tou lo demás, munches gracies por dirixivos a Universu Andalucista, munchos ánimos pa siguir nesta trabayosa xera, y equí tenéisme pa tou lo que queráis.

¡Vivan Andalucia y Asturies libres y socialistas!

N'Ast entama un ciclu de charres sobre'l republicanismu federal n'Asturies

Cola collaboración de la Sociedá Cultural Xixonesa.


L'Asociación Cultural N'Ast vien d'anunciar l'entamu d'un ciclu de charres dedicaes al republicanismu federal n'Asturies, pa lo que cunta cola collaboración de la Sociedá Cultural Xixonesa, en cuyes instalaciones (Cai Belmonte de Miranda, 4 Xixón) se desendolcarán les actividaes d'esti ciclu.

Asina, según despliquen, "Esti mes de mayu va cellebrase un ciclu de charres al rodiu del Partíu Democráticu Republicanu Federal, una fuercia política de calter anticaciquil que tuvo una importante presencia na sociedá asturiana ente los años 1868 y 1936. Esti sector destacó na so dómina pola so reivindicación del exerciciu de la soberanía pa la ciudadanía asturiana, llegando inclusive a plantegar en 1883 una propuesta de Costitución pa un futuru Estáu Asturianu".

Los distintos actos organizaos pal presente mes son los que vienen darréu:

El pensamientu federalista de Pi i MargallFaustino Zapico, hestoriador
Llunes 14 de mayu a les 20.00 hores

Republicanismu na Asturies de la I RestauraciónJosé Girón, profesor de Hestoria Contemporánea de la Universidá d’Uviéu
Miércoles 16 de mayu a les 20.00hores

La dimensión asturianista del Partíu Democráticu Republicanu FederalJavier Cubero, ensayista ya investigador
Llunes 21 de mayu a les 20.00 hores

Pin de Pria, un escritor federal na lliteratura asturianaInaciu Galán, escritor ya investigador
Miércoles 23 de mayu a les 20.00hores

¡¡La xeneración que vien!!

Sestu primaria.

CSI ganó les elleiciones sindicales en Caxastur

Nuevu ésitu del sindicatu de clas.

Caxastur cellebró elleiciones colos siguientes resultaos: CSI 7 delegaos (anantes 3), STC-CIC 5 delegaos, CCOO 3 delegaos (anantes 6), CSICA 3 delegaos (anantes 5), UXT 3 delegaos (anantes 7) y CSIF 0 delegaos. Asina, dende CSI declaren que "Dámos-yos les gracies a tolos collacios y collacies que depositaren la so confianza en nós, el sofitu que nos apurrieron, comprometiéndonos a non defraudalos y a facenos dignos d’él, nesti intre nel que’l sindicalismu tien de tornar a ser una ferramienta nes manes de los y les trabayadores, pa defender les nueses condiciones, los nuesos puestos de trabayu y la nuesa dignidá profesional y presonal".

Continúen desplicando que "Comu diximos na campaña eleutoral y comu venimos faciendo dende hai cuatru años, los delegaos de la CSI seguimos al llau de los compañeros y compañeres nel trabayu diariu y na llucha sindical, col arguyu de representalos y col compromisu de tar al altor de lo que tolos y toles trabayadores merecemos".

Poro, dan "Gracies a quienes formaron parte de la nuesa candidatura, a quienes collaboraron na campaña eleutoral y, otra vegada, a quienes nos votaron".

 Fonte. Infoasturies

65 aniversariu de la victoria escontra'l facismu na II Guerra Mundial.

En mayu de 1945 la Xunta de Repúbliques Socialistes Soviétiques vencía la Gran Guerra Patria y lliberaba Europa del facismu hitlerianu, daqué que nun foi fácil y costo munches vides humanes nel bandu soviéticu, alredor de 13 millones de persones cayeron en combate y más de 6 millones de civiles fueron asesinaos pola puxarra nazi. Dende llueu, esos díes fueron un trunfu de la humanidá, fueron un trunfu al odiu irracional, el racismu, al belicismu y a la non razón. Ciertamente, l'enemigu del movimientu revolucionario siguía siendo'l mesmu, el capitalismu burgués, el cual soltó a la bestia facista perende depués de la so crisis capitalista entamada col crack del 29.

Güei, vivimos otru desastre capitalista, propia de ñatura d'esi modelu de llibre mercáu nel que vivimos. El colapsu social y la progresiva radicalización de la sociedá van venir seles pero son yá irremediables. La situación nel mundu ye catastrófica, n'Asturies, como yá vieremos, el 20% de la población yá vive perbaxu la probitú y vamos n'aumentu. N'Europa la crisis descompón pali que pali les estructures burocrátiques y sociopolítiques de la Xunión Europea y les ferramientes de la burguesía cada vegada son más febles énte una riestra de pueblos que pieden la esperanza nel capitalismu y entamen a buscar una alternativa. Munches coincidencies cola crisis del 29, y munches más que van venir, como más guerres imperialistes y pequeñes revueltes populares.

Como vemos les asemeyances son clares y casualmente tamién nel planu tráxicu y avergoñante. Si bien falamos güei del 65 aniversariu de la victoria popular escontra'l facismu y el nazismu n'Europa, el domingu una organización neo-nazi algamaba 21 parlamentarios nel Parlamentu Griegu, un 6% del votu total nel país helenu. Grecia, ye anguañu'l país de la Xunión Europea que pior ta en términos socioeconómicos, pero tamién nel que más conflictividá social hai, con revueltes y convocatories anticapitalistes día si día tamién. Que casualidá, igual qu'Italia y Alemaña a principios del sieglu XX. ¿Nun sedrá que la burguesía griega y europea entamen a tener mieu y torna a amenazar cola bestia? ¿Nun sedrá que'l facismu nun ye sinón la pior cara'l capital?

Esto nun ye nenguna chancia, nin tan siquier de mal gustu. Nun ye un cuentu. Ye daqué qu'ehí ta, ye'l capital dimpuestu a lliquidar a los elementos más febles de la sociedá y a la propia clas trabayadora si fuere precisu, ainda aprovechándose d'ella. Poro, por toles persones cayíes a manes de los facistes, paramilitares del capitalismu, ye perimporante nun escaecer la gran xesta soviética, pero tampocu la gran resistencia asturiana escontra'l facismu y de tolos pueblos. Pa ello, ye precisu nun cayer en tolerancies barates nin siguidismos populistes. Pa que la hestoria nun se dea otra vuelta. Ye cuestión de toes y toos que'l facismu pase d'una vegada por toes al basureru de la hestoria, y pa ello vamos tener que tirar tamién al mesmu sitiu al so dueñu y amu, el sistema capitalista y les sos ferramientes de violencia y represión, como l'Estáu Español.

N'alcordanza de tolos cayíos escontra'l facismu: ¡Puxa'l Pueblu Soviéticu! ¡Puxa la llucha escontra'l capital y la so violencia!

Más del 20% de la población asturiana, en riesgu d'esclusión social

139.000 persones baxo l'umbral de la probitú.


Según los datos daos a conocer pol informe del Observatoriu de la Salú, n'Asturies hai más de 200.000 persones en riesgu d'esclusión social pola so situación de desamparu económicu pola falta d'ingresos o pola probitú d'estos, lo que fae que la situación social d'Asturies seya calificada pola Rede escontra la Probitú de "dramática". Amás, la cifra d'asturianos y asturianes baxo l'umbral de la probitú algamaría l'alarmante cifra de 139.000 persones.

A lo llargo de munchos meses foron asoleyándose numberosos informes qu'asitiaben na probitú un problema nidiu nel nuesu país, que según se desplica inda nun provocó l'españíu del problema pola solidaridá a nivel social y familiar que vien calteniendo a les miles de persones que s'atopen en situación de desemplegu dende va años, ensin prestación nin subsidiu de calter públicu dalu, nin perspeutiva d'ameyora económica nin llaboral nel futuru del nuesu país.

Estrayíu d'Infoasturies

Vidiu de la CSI de la mani pola oficialidá del idioma d'Asturies

¡L'ASTURIANU LLINGUA OFICIAL YÁ!

Otru trabayador fináu nel tayu

Nueva víctima de la siniestralidá llaboral.


Güei conociose la murnia noticia de la muerte d'un trabayador de 28 años d'edá al cayer dende una altura de 15 metros pol vuelque de la grúa dende la que taba trabayando na urbanización La Grandiella d'Avilés. Los servicios médicos desplazaos a la zona nun pudieron facer nada pola vida d'esti trabayador, que finó nel actu nunes circunstancies entá desconocíes, asina como les causes del accidente.

Améstase asina una nueva víctima d'accidente llaboral nel nuesu país, ún de los cabezaleros en tases de siniestralidá llaboral, pola falta de prevención y de medios puestos a dimposición del obreru polos sos responsables na mayoría de los casos. Cola situación de crisis capitalista, la precariedá de medios ye inda mayor, polo que la precariedá tamién, con consecuencies como esta tráxica noticia.

Fonte: Infoasturies

La XE encamienta al estáu español a presentar el plan de pieslle de les mines non rentables

Pieslle programáu de la minería de carbón n'Asturies.

La Xunión Europea vien d'instar, en persona y al traviés d'un escritu, al Ministeriu d'Industria del estáu español a presentar el so plan de pieslle de les esplotaciones mineres de carbón que recibieren ayuden y nun seyan rentables, lo que supondría'l zarru definitivu de la totalidá de los yacimientos activos nos sólo nel nuesu país, sinon nel conxuntu del estáu español cuando se faiga efeutivo, nel añu 2018.

A too ello hai que sumar el recorte del 70% nel ayudes pa la estracción de carbón que'l gobiernu estatal otorgará esti añu, lo que según diverses personalidaes representatives de l'actividá minera supón la muerte por inanición del seutor, consecuencia de les planificaciones de calter neolliberal desendolcaes dende la Comisión Europea p'acabar con tou resquiciu d'industria estractiva sofitada con fondos.

Fonte: infoasturies

Dos vidios coles dos convocatories importantes d'esti entamu de mayu

Xueves 10 mayu: xornada en defensa del enseñu públicu.

Conciertu antirrepresivu esti sábadu en Riañu (Llangréu)

Más información

Cano reclama nel Día de les Lletres Asturianes “racionalidá, planificación y xusticia” pa col idioma

La presidenta de l’ALLA, Ana María Cano, reclamó “racionalidá, planificación y xusticia” pa col asturianu nel so discursu institucional del Día de les Lletres Asturianes. Alredor de 1.500 persones participaron na manifestación previa pola oficialidá.

La lluvia tornó a facer presencia na marcha convocada pola Xunta pola Defensa de la Llingua Asturiana, anque nun frenó al millar llargu de persones que s’averaron a Uviéu pa demandar al Gobiernu asturianu la oficialidá del asturianu. Les úniques organizaciones que participaron na manifestación foron Andecha Astur y Bloque-UNA, anque éstos últimos con un baberu ensin firmar que namái rezaba ‘Oficialidá’. Jesús Iglesias, cabezaleru d’Izquierda Xunida, foi tres la pancarta de Comisiones Obreres Enseñanza. Tamién participaron los sindicatos FETE-UXT, SUATEA y CSI, el coleutivu Iniciativa pol Asturianu y un grupu de persones que pidíen la oficialidá pal gallego-asturianu.

La marcha abrióla una banderona d'Asturies, siguida d'un grupu de pandereteres que marcharon al son del so cantar a favor de la llingua asturiana. A la llegada a la plaza Porlier, llugar onde acabó la manifestación esti añu pol pasu del actu de l’Academia de la Llingua Asturiana al Teatru Filarmónica, Paula Cristóbal, de Xunta Moza, lleó un discursu nel que criticó duramente a los políticos asturianos. “Esti Día de les Lletres llega depués d’un añu de tiempu perdíu, parálisis y inmovilismu. La nuestra clas política, que nun supo qué facer coles sos atribuciones y que nun quixo cumplir los sos deberes, sigue igual que siempre”, yá sía “con unos nomes o con otros”, señaló Cristóbal, qu’añadió que “les poques novedaes, faltaría más, son pa peor; p’abrir el camín al discursu de la negación y l’odiu; pa negar la xusticia y la evidencia”.

 La militante de Xunta Moza llamó a la ciudadanía “a trabayar pa qu’eso cambie”, “pa que l’airón de la nuestra indignación arrastre’l so inmovilismu y la so axenda oculta de desaparición de la nuestra llingua”. Darréu esixó que los gobiernos próximos cumplan cola llexislación llingüística y cola toponimia, xeneralicen la enseñanza, incorporen l’idioma a los medios de comunicación y usen l’asturianu en toles alministraciones. Tamién reclamó la reforma del Estatu d’Autonomía pa incluyir la oficialidá.

Actu académicu

Tres la intervención de Cristóbal, una bona parte de los presentes dirixéronse al Filarmónica pa presenciar l’actu de l’Academia de la Llingua Asturiana (ALLA). Dientro pudo vese nes fileres primeres, reservaes a les autoridaes, a Noemí Martín y Iglesias (Izquierda Xunida) y a Carlos Rubiera, el senador Isidro Martínez Oblanca y Inaciu Iglesias (Foro de Ciudadanos), ente otros. Sonia Avellaneda y Próspero Morán repitieron como presentadores del actu, qu’abrió Xuan Nel Expósito con una añada tradicional asturiana col acordión, a la que siguió Marisa Valle Roso con ‘Al pasar pel puertu’.

El secretariu de l’ALLA, Roberto González-Quevedo, abrió la xunta extraordinaria de la institución que, como novedá, nun tuvo nomamientos institucionales. “Asistimos a la celebración d’esti XXXIII Día de les Lletres Asturianes nuna situación d’esceicionalidá. Esceicionalidá que vien marcada a nivel del estáu por una crisis económica ensin precedentes na historia recién y, a nivel d’Asturies, por una crisis d’estabilidá política con perfondes implicaciones socio-económiques y culturales. Na Academia de la Llingua Asturiana somos conscientes d’esta situación y, darréu d’ello, quiximos facer un actu del Día de les Lletres non convencional”, esplicó más tarde la presidenta nel so discursu institucional. Asina, l’ALLA apostó por dar la pallabra de persones de dellos ámbitos cultural comprometíos con Asturies y la so llingua pa que reflexonaren sobre’l futuru del idioma.

 La primera en tomar la pallabra foi la periodista Pilar Rubiera, que recordó’l so primer contautu cola llingua na so infancia en Quirós y señaló que “ensin falantes la llingua ta condergada a la desapaición, y cada vez somos menos”. El caderalgu d’Enseñances Medies, Luis Arias Argüelles-Meres, que faló n’occidental, entrugóse ú ta l’asturianu na vida pública y dispidióse con un “salú ya República” y un “llarga vida a Asturies y a les sos pallabres”. Pela so parte, la vicerrectora d'Investigación de la Universidá d’Uviéu, Paz Fernández, centró’l so discursu nel llabor de la institución universitaria pa caltener tol patrimoniu asturianu y, respeuto al asturianu, destacó que la Universidá “fixo tolo posible dientro del marcu normativu”.

Con un saludu n’asturianu y en bretón presentóse ante’l Filarmónica Lisardo Lombardía, direutor del Festival Interceltique de Lorient/An Oriant, que se calificó como “ciudadanu del mundu”. Lombardía fixo una defensa firme de la identidá propia y señaló que “pue facese más, abondo más, al respeuto del asturianu”, poniendo como exemplo’l llabor de recuperación que ta faciendo Breizh col bretón y el galó pese a que les lleis franceses nun reconocen la oficialidá d’otru idioma que nun sía’l francés. El siguiente en falar foi Ricardo Saavedra, músicu y escritor, que llamó a los habitantes del occidente del país a “usar as noitas palabras”. Zarró les intervenciones el matemáticu y profesor Pedro Suárez, qu’arrancó les rises de los presentes con un discursu cuidáu y prestosu. Nél amosó que ye posible “impartir una clase de matemátiques n’asturianu” y afirmó que “la oficialidá nun pue esperar más”.

Darréu, Cano lleó’l discursu institucional, nel qu’agradeció a les seis persones qu’intervinieron nel actu “poles sos aportaciones y pola sinceridá y valentía con que les planteguen”. La presidenta de la institución académica faló de la crisis, que llevó al Gobiernu a recortar nun 40 por cientu el presupuestu de l’ALLA, y demandó “proporcionalidá” en casos como’l de l’Academia. “Dende equí pidimos a los nuevos dirixentes políticos del Principáu que se rectifique una decisión presupuestaria dafechu inaceptable”, aseguró.

“Necesitamos racionalidá, planificación y xusticia”, demandó Cano pa col asturianu: “Un elementu de racionalidá (ya inclusive de rentabilidá económica) ye la reconocencia de la especialidá de llingua asturiana pal profesoráu d’Educación Primaria y Secundaria; un elementu de planificación ye’l diseñu d’un verdaderu procesu de recuperación llingüística n’Asturies; un elementu de xusticia (l’únicu almisible) ye’l qu’empobine a un procesu aicionáu de reconocencia de la oficialidá de la llingua asturiana”, esplicó. Amás, afirmó que’l Gobiernu entrante “ha tener la seguranza de la nuesa llealtá porque de lo que tamos falando nun ye solo (y ello ye fundamental) del futuru económicu de nueso, sinón que tamos refiriéndonos, cenciellamente, al futuru d’Asturies como pueblu, futuru que nun ye dable sin un futuru pa la llingua asturiana”.

Una llectura de poemes, por parte d’Avellaneda y Morán, y una actuación de la Banda Gaites Villaviciosa, que tocó un set homenaxe a Dixebra pol 25 aniversariu del grupu avilesín, siguieron al discursu de Cano. L’himnu d’Asturies sirvió de pieslle al actu académicu.

Fonte: Asturies.com

Más documentos na Biblioteca Dixital d'esti blogue.

Podeis atopar na nuesa Biblioteca Dixital dos nuevos documentos, nesti casu de la organización d'izquierda nacionaliega Andecha Astur. Per un llau presentamos el documentu del añu 1998 El procesu autonómicu n'Asturies: erbies y propuestes pal so analís. Esti documentu afonda na posición política de cada fuercia nel sen nacional y autonómica y plantega un analís sele y estensu pero en clave soberanista. Cunta con 32 fueyes y fai amás un repasu de la dinámica hestórica del Estatutu d'Autonomía del "Principáu d'Asturies".

Per otru llau, tamién d'Andecha Astur ye'l documentu asoleyáu con motivu de la pasada charra entamada pola plataforma soberanista "Democracia p'Asturies" nel añu 2010, onde la organización d'izquierda soberanista plantega la so posición política ya ideolóxica respeutu a la Constitución Española de 1978 y dalgunes pautes y posicionamientos alredor d'un posible cambeu de les coses y un afondamientu na tresformación social y nacional n'Asturies y dientru del Estáu Español. Perinteresante documentu pa comprender la ñatura continuista de la Constitución borbónica y los sos puntos febles.

Si quies collaborar con esti proyeutu de Biblioteca Dixital unvía un correu a frayandocadenes@gmail.com

La moza acusada de golpiar a Álvarez Areces en L'Humedal acepta una pena de dos años pa evitar la cárcel

“Equí hai una inxusticia permanente y un acosu y derribu, nesti Estáu, nesti país y nesta Sala, sobre manera”, espresó nel actu de conformidá la moza acusada de golpiar nel 2010 a Vicente Álvarez Areces. Aceptó una pena de dos años.

La vista oral, señalada ayeri, a les 10.30 hores, na Estaya Octava de l'Audiencia Provincial, con sede en Xixón, nun se llegó a celebrar. V.S.T. viose obligada a aceptar una pena de dos años, una multa de 360 euros y una indemnización de 300 euros al d’aquella presidente del país pese a que nun sufrió mancadura nenguna. D’esta forma, evitaba entrar na cárcel al nun tener antecedentes penales. Xunto a la moza acusada xulgábase tamién a la so madre, C.H.T.F., qu'aceptó una multa de 90 euros por tratar de torgar la detención de la so fía mordiendo supuestamente na mano a un axente del Cuerpo Nacional de Policía, y el pagu d'una indemnización de 30 euros al axente.

Nel actu de conformidá, que foi n'audiencia pública, V.S.T., nel so derechu a unes pallabres caberes, criticó'l procesu siguíu contra ella y la so madre. "Equí hai una inxusticia permanente y un acosu y derribu, nesti Estáu, nesti país y nesta Sala, sobre manera", indicó, mentes que la so proxenitora llendóse a indicar que "Garzón tenía razón". Pela so parte, l'abogada de les acusaes, Xulia Fernández, tresmitió, en nome de los sos clientes, que se sienten "maltrataes pol sistema" y que nun deseen salir a la lluz pública. Precisó que nenguna de los dos tien antecedentes nin tuvieren "nunca" problemes cola Xusticia.

Añadió que la moza niega los fechos, pero qu'aceptó l'acuerdu de conformidá pa evitar entrar en prisión, dao que con dos años de pidimientu de condena y ensin antecedentes, nun va tener que dir a la cárcel. Dambes muyeres, mientres l'actu en sesión pública, tapeciéronse pa evitar que les fotografiaren con un papel nel que podía lleese 'Prensa manipuladora'. Nel esterior del Xulgáu, mentanto, delles decenes de persones concentráronse n'apoyu a les procesaes. L’organismu antirrepresivu Sofitu ye ún de los coleutivos que tán trabayando enforma pa visibilizar esta inxusticia y p’ayudar económicamente a les dos muyeres nel pagu de les multes.

La Fiscalía d'Área de Xixón solicitaba de primeres una condena de cuatro años de prisión y el pagu d'una multa de 1.920 euros pa l'acusada. El Ministeriu Públicu caltién que, sobre les 16.20 hores del 9 de xunetu del 2010, por cuenta de la celebración de la XXIII Semana Negra de Xixón, llegó'l Tren Negru a la estación de la Plaza de L’Humedal, nel que viaxaba, ente otros, Álvarez Areces nel exerciciu de les funciones propies del so cargu. Con caráuter previu, estableciérase nel llugar un gordón de seguridá, dao que se concentraren munchos trabayadores en protesta pola so situación llaboral. Ente elles alcontrábase l'acusada V.S.T., que, amás d'increpar a Álvarez Areces, dio-y un manotada na cabeza, ensin llegar a causa-y lesión dalguna.

Nel cursu de la detención, y mientres conducíen a l'acusada al vehículu policial, la so madre, C.H.T.F., pa tratar de torgar la detención de la so fía, y según la versión de l'acusación, llegó a morder na mano a un axente del Cuerpu Nacional de Policía, ensin que tuviera nengún día impidíu pa les sos ocupaciones habituales. Nun-y quedaron secueles.

Una cayida provoca a Álvarez Areces una fractura nel brazu

L’agora senador, Álvarez Areces, cayó al suelu de forma accidental el vienres pasáu, fracturándose l’húmeru. Fontes socialistes señalaron que l’ex presidente del país recuperándose de la lesión con normalidá.

Fonte: Asturies.com