Lo mesmo Andecha Astur como Fai refuguen la posibilidá de que se reconstruya’l “toru d’Osborne” baltiáu pol aire de la galerna que sufrió Asturies los últimos díes y que ta asitiáu en Llanes. Dambes organizaciones esixen a l’alministración que nun se gaste dineru públicu pa la so igua.
Nun comunicáu Andecha Astur conseña que “énte la bona anuncia de que l’acabante vendaval baltó cuasi que dafechu el toru d’Osborne de Llanes, Andecha Astur pide a les autoridaes competentes que s’aprofite la circustancia y se proceda a la retirada de los restos de semeyante amuesa de mal gustu y españolismu cañí”. Pa la formación nacionalista “si de rializar inversiones en recuperar el padremuñu se trata, quier remembrar la situación na que s’afaya’l más importante yacimientu paleolíticu llaniscu, la Cueva las H.errerías (Llanes) pesia tar declarada Bien d’Interés Cultural, que s’afaya nunes llamentables condiciones, sigún espeyen informes acabantes, con agua contaminao, basories,pintaes, estalactites rotes y vaciáu de sedimientos”.
Pela so parte “la organización social d’esquierda soberanista” Fai, al traviés d’un comunicáu, “desixe la non financiación pública pa la reconstrucción del “toro de Osborne” de Parres, símbolu de la tortura animal y la imposición cultural n’Asturies”. Fai pide amás “la retirada inmediata de los otros cuatro paneles de OSBORNE Y CIA S.L. en Grau, Carreño, El Berrón y Sta. María de Piedramuelle. Abúltanos escandaloso que dende instituciones públiques se fomenten y defendan con perres de toes y toos”.
No hay comentarios:
Publicar un comentario