Una persona detenía y delles mancaes na concentración contra la cris pa recibir al `Tren Negro'

La protesta plantó cara y desbordó a la policía

La concentración que'l Conceyu de Trabayadores escontra la Cris convocó esta tarde pa recibir al "Tren Negro", que llegaba a Xixón con autoridaes (ente elles el presidente del 'Principado' Tini Areces) y participantes pa dar aniciu a la 'Semana Negra' de Xixón, tuvo como rempuesta una carga policial xabaz que prevocó la detención d'una presona y feríes y contusiones en numberoses de les presones que participaren na concentración.


Na concentración, amás del Conceyu de Trabayadores, participaben dellos coleutivos de trabayadores d'empreses en cris, comu Chupa-chups o Venturo XXI. Tres la carga policial y la concentración de trabayadores enfrentóse a la policía, que se vio desbordada poles numberoses presones concentraes. De fechu, la presión de los y les manifestantes fizo que la policía tuviere que dexar en llibertá a otres presones que s'atopaben "reteníes".

El propiu Tini Areces foi'l qu'ordenó la detención de la presona qu'agora s'atopa en comisaría, acusándola d'una agresión qu'enxamás esistió. La concentración atópase delantre comisaría desixiendo la llibertá de la presona detenía, que yá tien l'asistencia d'una abogada.

Infoasturies.

Pasión borreguil

Cuando'l fúbol conviertese en política y cortines de fumu pal imperiu...

1000 euros por denunciar la usurpación del patrimoniu sindical

N'emprestando declaración ante la jueza d'instrucción, los afiliaos del nuesu sindicatu conocieron el pidimientu que va realizar la fiscalía nel xuiciu que se va cellebrar el próximu día 21 de xunetu.

D.A. y M.N. refugaron la propuesta d'aceptar una falta y una multa pa terminar col procedimientu rápidu empecipiáu tres la denucia de la FADE, sollertada por dalgún de los actuales inquilinos de la Casa Sindical d'Avilés. Ante la negativa de los imputaos frente a esta "xenerosa ufierta", la fiscalía va realizar un pidimientu de condena de mil euros de multa por un delitu de "usurpación con violencia". Tou ello a pesar de que l'atestáu policial confirmaba que los llocales taben abandonaos.

La CSI va siguir denunciando la usurpación, per parte de la patronal FADE, de los locales que tendríen d'utilizase pa defender los derechos de clase trabayadora.

La seleición española nun nós representa. Seleición asturiana yá!

NUEVA INICIATIVA POLES SELEICIONES NACIONALES ASTURIANES NEL FACEBOOK



Entamó nel Facebook una iniciativa cola creación d’un grupu col enfotu en puxar por una seleición asturiana ya que consideren que la seleición española de fútbol nun-yos representa. Son munchos los asturianos que consideren qu’Asturies tien de tener seleiciones nacionales propies nel ambitu deportivu.

Trés la "españolización" del deporte rei, el fútbol, los autores sorrayen que ye un grupu "Pa toes y tos esos a los que nun-yos representa la seleicíon española de futbol y que nagüamos por una seleción que por fin represente Asturies".

Los autores del grupu consideren que falen de futbol porque tien máxima difusión, "pero falamos tamién de cualquier seleición deportiva", sorrayen.

El grupu de Facebook nomase "La seleción española nun me representa nel mundial. SELECIÓN ASTURIANA YA!" y ya tien media centena d’amigos. P’apuntase pues facelu al traviés d’esti enllaz

Fonte: Aruelu.com

Darréu colos imputaos de la Corriente Sindical d’Izquierda

La Mocedá Independentista Revolucionario, Darréu, vien d'amosar la so solidaridá pa colos militantes de la Corriente Sindical d’Izquierda qu’esti xueves pasáu "fueron prindaos ya imputaos por cuenta d’intentar lliberar un espaciu". Los fechos asocedieron na tardi’l xueves cuando dellos militantes de la CSI ocuparen na Casa Sindical d’Avilés la sé de la patronal FADE. Dende Darréu llamentamos lo asocedío "pues amuesa una vegada más que la maquinaria represiva del Estáu sigue furrulando y obedeciendo ciegamente a les órdenes del capital".

A la par, la organización moza quier da-y tola so solidaridá a los imputaos y "tol sofitu a los compañeros y compañeres del Sindicatu de Clas pa siguir organizándose". Darréu camienta que l’aición del xueves ye una "gran iniciativa" y val pa "espeyar la braera cara d’un sistema onde los supuestos 'sindicatos' comparten llar social cola patronal qu’amarra a la clas trabayadora". Poro, pa la organización xuvenil independentista "ye d’aplaudir" l’aición desendolcada, que dexa ver "les contradicciones del sistema y l’entreguismu del sindicalismu mariellu, por supuestu, fondamente integráu nesti sistema".

Darréu desixe que nun haya represalies a los sindicalistes y que seyan retiraes les causes de les que se-yos acusa, que son "usuparción de llocal y daños". Darréu tamién quier facer un llamáu a la mocedá pa movilizase y dir a la concentración convocada esti prósimu martes día 6 a les 9:45 h nel xulgáu d’instrucción d’Avilés.

Más Democracia a la española esta vegada n'Euskal Herria

La perredumbre obedeciendo la voz del so amu.

¡Puxa'l Pueblu Trabayador!

Fai! diz que la llibertá sexual fai a una sociedá más llibre

Fai! diz que la llucha pola llibertá sexual ye prioritaria y recuerda qu’anque’l coleutivu gai tenga los mesmu derechos llegales, tovía queda homofobia na sociedá.

La organización soberanista acudió a la movilización entamada por XEGA’l 28 de xunu pa remembrar los fechos d'hai 40 años cuando nel pub Stonewall de Nueva York la policía fixo una redada d'acosu al coleutivu gai, que retrucó a la represión con una revuelta en llucha pola llibertá sexual.

Fai! entiende que la llucha pol reconocimientu de la llibertá afectivo-sexual ye prioritaria pa construyir una sociedá realmente llibre y nueva na que nun heba nengún tipu de torga nin discriminación, “pa ello fáise precisu'l sofitu activu al movimientu LGTB y la implicación na so llucha que tamién ye la nuesa”.

Sicasí, dende la organización afirmen que, la situación pal coleutivu tien lluces y solombres. Ente les lluces señalen l'aprobación del matrimoniu ente persones del mesmu sexu. Ente les solombres recuerden la discriminación, ridiculización y fobies “que siguen apaeciendo en munchos nichos sociales y nes que la escuela y los medios de comunicación tienen muncho que dicir”. “Aisllar esos focos d'homofobia ye prioridá anguaño pa dir valtando prexuicios qu'aseguren un futuru a curtiu plazu de non discriminación y plenos drechos”, afirmen.

Dende Fai! tamién quier dar la norabona a Xente Gai Astur y al restu de les entidaes organizadores del día del Arguyu en Madrid por nun convidar a la participación d'instituciones como l'Ayuntamientu de Tel Aviv, “que nun conderguen la masacre xenocida en Palestina del sionismu israelín”. Al empar, feliciten a XEGA pola so postura de nun collaborar cola Comunidad Judía de Asturias "que tampoco nun conderga l'esterminiu palestín”.

Fonte: Asturies.com

Probitú democrática ya internacionalización del conflictu

Afayámonos nuna situación de país bien murnia. Los drechos nacionales y sociales d’esti pueblu milenariu son nulos y nun tan garantizaos en denguna fueya impresa. Lo único impreso garantiza precisamente la falta de drechos que l’Estáu Español nos da. Ufiértanos una llista amplia de pilancos llegales a la hora de desendolcanos con un mínimu non yá de soberanía, sinon d’autonomía. Les lletres, como digo, namás garanticen la falta de democracia n’Asturies, yá seyan impreses na Constitución Española o nel Estatutu d’Autonomía pal “Principado” d’Asturies. Les lletres dan frases, y estes mesmes frases asoleyen drechos democráticos, pero, evidentemente, ayenos a les necesidaes de los asturianos y asturianes. Ayenos y separtaos dafechu d’esos intereses del nuesu pueblu. Unes lleis y garantíes plantegaes únicamente dende’l centralismu españolista y que nunca sintieron les vindicaciones populares del país asturianu. Esta llei impuesta nin respeta a Asturies como nación, nin nos normaliza , nin nos respeta como asturfalantes, ente otres coses. Esta llei ampara a la maquinaria represiva p’actuar como-y pete.

Esos testos que tenemos, repito, namás afiten el sometimientu d’un pueblu a los intereses del réxime del Reinu d’España, testos redactaos col espíritu del tardo-franquismu más ranciu. Namás afiten represión y la ñegativa del Estáu a que les asturianes y asturianos seyan quien a algamar dalgo de puxu y tener drechu a decidir por sí mesmxs. Esti drechu a opinar y tomar partida ñeguenlu nel país títeres y poltroneros asitiaos col interés de la oligarquía imperante a cumplir la función yá programada. Hailos de tolos collores y de toles tribes, pero toxs salvaguarden l’espíritu del “ too queda atáu y bien atáu” de Franco y escúdense nunes cartes de drechos totalmente deficitaries de cara a la participación de la ciudadanía na vida política diaria.

Per otru llau tenemos númberos. Númberos que falen de cuasi 100.000 paraxs, ERE’s y múltiples cierres d’empreses, munches estandartes de la supuesta reactivación llaboral n’Asturies dempués de la reconversión. Cifres que falen d’emigración forciada, sobremanera ente la mocedá y tantos por cientu falando d’una altísima tasa de probitú nesti supuestu primer mundu. Y nun ye solo eso, los númberos dan pa más. Dan pa ver como eses y esos caciques de poltrona persiguen con multes millonaries a les organizaciones y ciudadanxs que quieren otra cosa. Multes a esos y eses que denuncien la situación que carez el país, escudándose nuevamente na so llei, qu’a la fin nun val pa más que perpetuar l’orde vixente , enxamás p’avanzar nes necesidaes qu’a los pueblos correspuenden.

Asina, merez la pena cavilar sobre’l tema y ser conscientes de lo pocu qu’insistimos a la hora d’enfrentanos énte la constitucionalidá del Estáu y l’Estatutu vergoñosu y antipopular que tenemos, totalmente alloñau de les demandes de los y les asturianes. Munches vegaes enfotámonos n’aldericar sobre qué facer nel campu xuegu. Dexamos tiempu en como combinar a lxs xugadores pa xugar el partíu de la democracia española y la constitución monárquica. Y pue tar bien, pero a lo meyor hai qu’entamar por camudar la competición, por camudar les regles del xuegu más al nuesu favor, yá que denguna garantizanos nin tan siquier finar los partíos.

En resumen, que nun danse condiciones democrátiques nesti país pa entamar a facer frenti col mesmu métodu al poder. Quiciabes tenemos que tornar al entamu. Quiciabes deberiemos facer qu’esos drechos que se supón que garanticenmos un mínimu de llibertá seyan más alcordies a los pruyimientos y les vindicaciones qu’el Pueblu Asturianu reclama. En poques pallabres, igual ye hora de reclamar una democratización de la sociedá asturiano. Igual ye hora d’axuntar voluntades ente tol movimiento de reconstrucción nacional y social cola fin d’algamar un discursu únicu, ensín atayos, y ensín dexar de llau nunca les necesidaes primaries de la xente, pero cola fin d’algamar un marcu políticu dignu. Un marcu políticu onde toxs podamos participar n’igualdá de condiciones y oportunidaes.

Pa enfrentamos a esta xera tenemos que visibilizar la problemática y el conflictu qu’hai nesta nación. Tenemos que visibilizalu dientru d’Asturies, amosando les carencies evidentes que sofrimos día a día. Falando cola sociedá cara a cara, falando colxs nuesxs allegaxs. Nun avergoñanos de lo que somos y de lo que tratamos d’espeyar. Esto paez perfácil y cenciello pero toos y toes deberíemos danos cuenta de qu’estes conversaciones dexámoles pal nuesu círculu ideolóxicu y pocu más. Hai que finar con esto y guetar la nuesa normalización propia si queremos algamar dalgunes condiciones cíviques y democrátiques.

Pero, si vamos a dómines inda más escures de la nuesa hestoria podemos ver qu’esta visibilización del conflictu nun tien porque zarrase a les nueses llendes. Y refiérome a dómines más escures pa señalar el contestu hestóricu de los años 60 y entamos de los 70. Daquella, yera una rialidá qu’en tolos pueblos d’Europa y n’otros continentes clamábase pola fin de la Dictadura Franquista y la democratización del Estáu. El papel que tuvieron los movimientos populares fuera del tarrén estatal contra’l franquismu foi clave p’algamar migayines d’aire frescu y “bondaes” del réximen.

Agora, solo hai que treslladase al momento actual y visibilizar fuera’l país que n’Asturies hai un movimientu políticu esistente que tamién quier ser tratáu col respetu y les mesmes oportunidaes qu’una democracia normalizada ufiertaría. Tenemos qu’intentar cuntar col mundiu nesta dura xera que tenemos delantre, y eso solo pue aportar recibiendo la solidaridá d’otros espacios políticos foriatos. Internacionalizando la situación pre-democrática qu’arrecostina Asturies dende fai décades. Ye’l momentu de da-y puxu a les relaciones internacionales y medrar nestes. Ye’l momentu que nun teamos solos na difícil tarea de normalización demócratica porque globalizando’l nuesu conflicto y recibiendo fuercies d’otros compañeros y compañeres en llucha sedremos más fuertes y tendremos abondo llográu. Ye’l momento d’axuntar fuercies dientru d’Asturies pa enfotase en pedir rescate a nivel internacional.

*Xosé A. González. Estudiante y militante de Darréu – Mocedá Independentista Revolucionario.

Tres denuncies por tortures y maltratu policial en 2009 n'Asturies.

Asturies rexistró en 2009 trés denuncies por tortures y maltratu policial, trés denuncies de trés persones, una a la Guardia Civil y dos a policíes llocales. Nesi añu, nel Estáu español cuntabilizáronse 624 persones que denunciaron tortures y maltratu en situaciones de privación de llibertá o detenciones por parte de les 'Fuercies de Seguridá del Estáu', funcionarios de prisiones o otros encargaos de custodia. Los datos tan recoyíos nel informe sobre "La Tortura nel Estáu español" del añu pasáu de la Coordinadora pa la Prevención y Denuncia de la Tortura.

El 'Cuerpo Nacional de Policía' acumula 197 denuncies, los Mossos catalanes, 190; les policíes llocales, 64; los 'funcionarios de prisiones', 65; la Ertzaintza vasca, 46, y la Guardia Civil, 43. Cerca de la mitá de les denuncies (48,3%) foron presentaes por persones que participaron en movilizaciones sociales, les interpuestes por persones inmigrantes supusieron el 16,5%; les interpuestes por persones preses, el 11,1, y por deteníos en réxime d'incomunicación, el 7,2 %. Los centros de menores acumularon 12 denuncies, el 1,9%. L'informe tamién recueye les muertes de persones cuando s'alcontraben baxo custodia. En 2009 fueron 41 persones, la mayoría de las cuales -el 68%- nes cárceles.

Dende la Coordinadora señálase qu'anque los casos contrastaos se caltienen añalmente alredor de los 600-700 casos nel Estáu español hai una tendencia de aumentu de la "violencia institucional" que nun se ve espeyada nes estadístiques pol miéu a denunciar. Tamién amuesa la so oposición a que les funciones del 'Mecanismo Nacional de Prevención de la Tortura' seyan encomendaes al 'Defensor del Pueblo' y reitera la petición de s'ellimine la detención incomunicada y el réxime d'aisllamientu penitenciariu.La Coordinadora para la Prevención y Denuncia de la Tortura formenla alrededor de mediu centenar d'organizaciones d'estremaos paises y territorios del Estáu ente les que nun hai denguna asturiana.

Confómenla: Acció dels Cristians per l'Abolició de la Tortura (ACAT), Alerta Solidària, Asociación APOYO, Asociación EXIL, Associació Catalana per la Defensa del Drets Humans, Associaçaõ Contra a Exclusão pelo Desenvolvimento, Asociación Contra la Tortura, Asociación para la Defensa de los Derechos de la Infancia, Asociación Libre de Abogados, Associació Memòria Contra la Tortura, Asociación Pro Derechos Humanos de Andalucía, Asociación de Solidaridad y Apoyo a los Presos de Aragón (ASAPA), Behatokia (Observatorio Vasco de Derechos Humanos - Euskal Herriko Giza Eskubideen), Centro de Asesoría y Estudios Sociales (CAES), Centro de Documentación Contra la Tortura, Comissió de Defensa de Drets Humans del Col.legi d'Advocats Barcelona, Comisión de Derechos Humanos del Colegio de Abogados de Baleares, Comité Anti-Sida de Lugo, Concepción Arenal, Coordinadora Antirrepressiva de Gràcia, Coordinadora Contra la Marginación de Cornellá, Coordinadora de Barrios de Madrid, Coordinadora Estatal de Solidaridad con las Personas Presas, Esculca (Observatório para a defensa dos direitos e liberdades), Eskubideak (Euskal Abokatuen Elkartea), Etxerat (Euskal Errepresaliatu Politikoen Elkartea), Federacion de Asociacions de Loita contra a Droga, Federación Enlace, Fundación Érguete, Grupo 17 de Marzo, Sociedad Andaluza de Juristas para la defensa de los DDHH individuales y Colectivos, Gurasoak, Institut Drets Humans de Catalunya, Justicia i Pau, Movemento polos Dereitos Civis, Observatori del Sistema Penal i els Drets Humans de la UB, PreSOS Extremadura, PreSOS Galiza, Rescat, SalHaketa (Bizkaia), SalHaketa (Araba), Santurtziko Torturaren Kontrako Taldea, Sos Racisme Catalunya, Subcomisión Penitenciaria del CGAE yTorturaren Aurkako Taldea

Mundial y Propaganda

Estes selmanes ta cellebrándose en Sudáfrica’l mundial de fútbol, un eventu mediáticu ya importante –sobre too pa la FIFA, que va ganar miles de millones-, y con elli llega’l mesmu cantar qu’invádenos cada dos años: ”la roja” entra n’escena algamando’l monopoliu informativu en radios, televisiones, periódicos, internet y na publicidá.

Esto ye asina dende siempres, anque dende la so cacarexada victoria na cabera eurocopa esi fenómenu amplificose, potenciando asina varies víes pa los que quieren aprovechar el tirón: d’un lláu,les empreses busquen beneficios al traviés del forofismu y d’ufiertes varies si la seleición española algama tal cosa, y d’otru lláu los medios de comunicación bombárdiennos díi y nueche col mesmu tema a sabiendes de que vende.

Ehí entama aquello de la pescadilla que se muerde la cola, ye dicir, los medios falen de la seleición española porque’l tema tien bona rempuesta ente la xente,y la xente respuende porque nun-yos queda otra depués de que-yos tuvieren metiendo la seleición polos güeyos y los oyíos de contino.

Aparte d’estes dos víes p’aprofitar económicamente l’asuntu esiste una “tercera vía”, más silenciosa y tresmitía más indireutamente, pero que ye la más potente ya interesante pa los gobernantes y les élites interesaes nel caltenimientu del modelu d’estáu xunitariu culturalmente,tresmitiendo valores y sentimientu d’españolía, d’arguyu “nacional”, y faciendo escaecer la realidá d’un estáu nel que conviven delles naciones tapecíes baxo la hexemonía de lo español, afitao nesti casu col sofitu mayoritariu de les empreses y los medios de comunicación oficiales.

Asina ye en tol estáu, pero si queremos centranos nel casu asturianu veses perfácil con un exemplu: la seición de deportes nos informativos de la TPA ye práuticamente un monográficu dedicáu a la seleición española. ¿Por qué nun pasa lo mesmo cuando un equipu o un deportista asturianu algama un trunfu importante o participa nuna competición internacional? -descontando fútbol y fórmula 1 pol fechu de que la TPA tien los drechos d’esos deportes, polo qu’interesa’l so espardimientu por custiones d’audiencia- La rempuesta ye la mesma d’enantes: esaltación, promoción y normalización de vezos y actitudes españolistes, qu’en munchos casos yá nun s’emplegaben dende’l franquismu (¿Quién diba dicinos que diba recuperase’l normal emplegu del perconocíu “arriba españa”?).

Otru aspeutu d’esti procesu de promoción y puxu de lo español ye l’atropu de la mocedá, pincipalmente de los guah.es, qu’ente l’atractivu que supón la imaxe de la seleición y los pás qu’afiten los comportamientos enantes citaos son un oxetivu fácil de llevar al so tarrén.

Pero cabe entrugase si detrás del supuestu sofitu mayoritariu de los asturianos y asturianes pa cola seleición española ye dalgo más qu’un patrón de comportamientu, un efeutu de lo que mos dicen que tenemos que facer.Na mio opinión n’Asturies la influencia qu’exercen los medios de comunicación ye un factor decisivu,ente otres coses porque diverses encuestes realizaes amosen que los asturianos somos los menos identificaos con españa per detrás d’Euskadi y Catalunya, seya por una ideoloxía de calter nacionalista, por descontentu coles polítiques del estáu pa con Asturies o por otros motivos.

¿Camudaría esi sofitu a la seleición española ensin campaña propagandística dende tolos frentes? Toi seguru de que sí.

De toles maneres esto ye lo que mos trae y traerá la seleición española demientres dure’l filón, y en nós ta nun sigui-yos el xuegu y facer ver la realidá d’un aparatu propagandísticu escondíu baxo’l disfraz del deporte.

Artículu d'Adrian Calvillo.

La muerte del "asturianismu" y los finxos móviles

Va unos años, abluquemos porque delles persones, acreditaes con títulos de filoloxía, aneciaben públicamente con que n´Asturies esistía una llingua que correspondía al tueru galaicu-portugués y dicíen "fálase portugués" n´Asturies. L´eonaviegu pasó a denomase “gallego-asturiano”, y yá pudieron arreblagar dellos pa poder quitar inda lo d´”asturiano”. Pues bien, resulta que nun ye abondo. Resulta qu´agora tamién se fala´l “castellanu-montañés”. Dixéralo un informe detrás del que paez ser hai manes del BNG, non digo na ellaboración (al autor-y supongo independencia y honestidá intelectual ensembre) sinón por cuenta los auspicios y encontos qu´alcontró.

Bien, yá la tenemos lliada nesta RFA, república filolóxica asturiana. Falamos asturianu, castellán, gallegu-asturianu (ergo, portugués), castellanu montañés, y quésiyo cuánto más. Tamién hai enguedeyu, porque l´asturianu debía nomase, según dellos, astur-lleonés, y eso, barrunto yo, podía obligar a un cambiu denominativu a l´ALLA. El casu ye tar en constante revisión, inestabilidá, anormalidá. El casu ye mover les isogloses, y facer como esi humorista manchegu- Pablo Mota- que quería conquistar Portugal pa España “a pocos”, moviendo los finxos de la frontera pali que pali, ensin que los del país vecín se decataren, “al merme, al merme” como dicía´l célebre cómicu. Equí lo mesmo, movemos un poco´l finxu, como siempre piensa l´aldeanu desconfiáu, y al cabu d´unos años queda´l campesín ensin prau.

El casu ye desacreditar a l´ALLA, ¡pa dalgo institucionalizao que tenemos a nivel nacional! Mañana otru día inventarán nueves llingües, nueves ortografíes, nuevos inventos.

Xuan Bello, en Les Noticies, dexó escrito qu´almiraba a Areces. Sí, ye d´almirar que l´autoritarismu qu´esti periodista y escritor critica a los que nun ven eso de “les múltiples llingües”, sía tamién cosa d´almirar nos gobiernos del PSOE-IU-BNG que tantu remanen l´asturianismu y lu echen a perder. P´autoritarismu y falta de realidá, la de Tini Areces, al que tantu almira l´escritor de Paniceiros.

Hai que dexase d´”asturianismos”. O somos nacionalistes asturianos o non.

Porque´l términu “asturianismu” ta echáu a perder. Si sigue en boca d´IU y sos nuevos inventos, ye puxarra. Si sigue en manes del Sánchez-Vicente y sos flirteos col españolismu más intransixente, ye cagalera en campu rasu. Si sigue en manes de Xuan Bello y sos “almiratibles” Tini Areces, feseanos y disgregacionistes, entós ye como volver a los tiempos de “los amigos de los bables”, en plural, ye tirar la patria pel ventán. Ye dicir, ye facer casu a una camaretá de persones qu´ensin derechu dalu quieren disgregar el dominiu llingüísticu asturianu, étnicamente venceyáu a la Nación Asturiana y territorialmente venceyáu, al empar, al País Astur.

Mira tu per ónde nun quiero criticar por criticar, namás que destructivamente. Quiero proponer idees positives tamién.

Ta, d´una banda, l´estremu de “reconquistar” l´Asturies de Santiyana pal País Astur, o inda llegar hasta les Encartaciones (onde descubrí palabres asturianes qu´usaba entá mio güela villaviciosina; vide los llibros de Txomin Etxebarría), y otres reivindicaciones territoriales que tan de moda tán na columna de llibre espublización de Glayíu.

D´otra banda tán los disgregacionistes, esos qu´inventen una llingua nueva n´Asturies cada selmana.

Yo propongo, mui herderianamente, venceyar llingua y nación y dexase de tontaes. Herder nun foi´l reaccionariu que nos quieren vender. Foi´l profeta de los nuevos tiempos, l´antítesis perfecha del xacobinismu y del nominalismu llingüísticu que quieren espardir les Academies Paraleles de la LLingua.

Y en cuenta d´anexonar Lleón, Asturies de Santiyana o los conceyos lucenses, propongo una ALLIANZA DEL NOROESTE. ¿Váis faceme casu? De mano sé que non. Pero toos somos pueblos hermanos, falando llingües hermanes y con un ethnos asemeyáu. Y a toos esti Reinu d´España ta dándonos como al gurrión. Debemos trabayar xuntos asturianos con gallegos, lleoneses, cántabros, y reivindicar lo nuestro nesti Reinu oficialmente mediterrániu que nos escaez y nos marxina. ¿Nun tien más xacíu esto, qu´andar corriendo finxos ya isogloses?.

*Carlos X. Blanco ye Doctor en Filosofía y Llicenciáu en Sicoloxía

Sofitu denuncia nuevos casos de represión

Acabantes de finar la selmana na qu’un nuevu militante independentista foi xulgáu, y con seguridá condergáu a pagar unos cuantos díes de multa por ser acosáu, amenazáu y golpeáu pola policía española, Sofitu quier asoleyar los nuevos casos de represión que tamos acabantes de carecer.

El primeru d’ellos ye la multa de 90€ que la policía española impuso-y a una moza independentista pol pergrave fechu de cantar el famosu estribillu "muncha policía, poca diversión" mentantu los axentes del cuerpu represivu identificaben a un mozu nuna plaza de Cimavilla en Xixón.

El segundu ye un fechu que se vién repitiendo delles vegaes nos años caberos, y ye qu’otru mozu independentista foi multáu pola guardia civil española n’autopista "Y" namás que por ser asturianu y amosalo llevando les iniciales "AS" na matrícula del so coche en cuenta de la impuesta "E" española. L’importe de la multa ye de 100€, anque con un descuentu del 50% si se fai pagu rápidu.

Per otru lláu dende Sofitu quier informase tamién que vienen de pagase 1.410€ poles multes alministratives que la delegación del gobiernu español n’Asturies metió a los y les solidaries que nes pasaes navidaes averáronse a Villabona a pidir l’Amnistía pa los prisioneros políticos. Perres que se sumen a los 195€ yá pagaos por multes de tráficu que tamién impusieron los guardies civiles de turnu, y qu’entá se pué sumar a los 630€ de multes que tan a l’aspera del recursu.

La Cope rectifica una nota criminalizadora contra Fer.

La cadena ultraconservadora COPE vien de rectificar una noticia asoleyada'l pasáu 2 de marzu na que acusaba al independentista asturianu Fernando G.R. de "terrorista" y de la "colocación de 19 bombes". Les acusaciones apaecieron nuna noticia criminalizadora d'una charra d'Aición Antifacista na Facultá de Xeografía y Hestoria de la Universidá de Salamanca y na que diba participar esti ciudadanu asturianu que tuvo 102 díes presu baxo la llei antiterrorista y que depués nun foi condergáu por dengún delitu de terrorismu.

Na so rectificación la cadena episcopal reconoz que "Fer" enxamás foi acusáu de colocar 19 bombes, yá que pesie a ser imputáu por estos fechos, nin foi acusáu nin condergáu por delitu de terrorismu dalgún.

Otros munchos medios de comunicación españoles, amás de la organización ultraderechista AVT, asoleyaron tamién nel so día esta mesma noticia coles mesmes acusaciones escontra'l independentista asturianu, siendo la cadena COPE la única que fasta agora rectificó estos fechos.

Conceyu Abiertu del Ensame República Asturiana

L'Ensama Republica Asturiana convoca un conceyu abiertu pal proximu dia 26 de xunu a les 11:00 hores en L'Arcu la Vieya (Uviéu). Esti ye'l comunicau:

L'Ensame Republica Asturiana nació hai casi dos años col enfotu de dar una rempuesta a la presencia borbonica nes tierres asturianes nos mui “cacarexaos” Premios Principiegos. Daquella un garrapiellu de persones entendieron la importancia de tomar esti día como referente del movimientu republicanu astur, qu'hasta entós, nun yera quién a salir a la cai a amosar la nuesa refuga haza la presencia humildante de los reis y principes españoles y, amás, col axetivu de republicanu, terminu mui remanáu y que n'Asturies taba perdiendo'l so significáu de naguar por una Asturies llibre.

A ello sumaronse SOFITU, FAI!, ANDECHA ASTUR, DARRÉU, UNA-MOCEDÁ y mas tarde sumariase la CSI, inclusive nel so día GOMERU, grupu musical, convidó a acudir a los actos entamaos pol ERA. Un par de manifestaciones, una xuntanza escontra la constitución, una folixa y un conciertu son el nuesu bagaxe nestos dos años de viaxe, quiciás non mui abultáu pero importante ya que yera la primer esperiencia coleutiva del movimientu a la que tamién se sumaron persones a titulu individual.

Agora, mirando p'atras, vemos la necesidá d'afitar la esperiencia del ERA na rede del movimientu organizativu astur: meyorar la coordinación ente coleutivos y persones a titulu individual, marcar un calendariu conxuntu, llograr una mayor visualización del conxuntu... y tolo necesariu pal medrar del movimientu. Por ello convidamos a tolos interesaos a acudir a un conceyu abiertu'l prosimu Sábadu 26 de xunu a les 11:00 en L'Arcu La Vieya d'Uviéu a los coleutivos y persones que ya participen nel ERA asina como a otros coleutivos que se quieran sumar o individualidaes que vean nel ERA un importante pegollu sobre'l qu'afitar el movimientu republicanu d'Asturies.

Afalamos a los coleutivos y persones qu'acudan a que lo faigan con propuestes concretes, a poder ser en papel y con delles copies pal so estudiu.

Puxa Asturies Llibre!! Puxa Asturies Republicana!!

Cellebráu'l xuiciu contra'l policia denunciáu por acosu a un militante de Darréu.

La Fiscalía pide l'absolución amparandose na so credibilidá como "funcionarios".

Cellebróse güei pela mañana n'Uviéu el xuiciu escontra un policia español, venceyáu a movimientos fúboleros y neonazis, qu'agredió y amenazó a un mozu independentista militante de Darréu. Unes 30 persones solidaries aconceyaronse pela mañana énte los xulgaos, convocaos pola organiación antirrepresiva Sofitu y la organización xuvenil Darréu na que milita'l xoven, p'amosar la so refuga a estos actos. Pasaes les 12 la mañana, con mas de media hora de retrasu, entamó'l xuiciu.

El policia en cuestión, conocíu como "Richi", mui conocíu dende hai años pola so agresividá cuando diba antroxáu de bonehead cola so peña "Brigadas Azules", ñegó la mayor, diciendo que foi'l rapaz en que los amenazó y se ñegó a identificase. Dase'l casu que'l rapaz ye estudiante de derechu y sabe perfechamente que nun pué negase pues podria ser deteníu. Tamién ñegó conocer al rapaz, pese a los sos alcuentros nos ambientes fuboleros, y reconoció nun saber que significa "¿fue usted procesado alguna vez por cargo similares?" a lo que respondió "No sé que significa ser procesado" lo que llevantó sorises na sala. Esti policía yá tuvo un xuiciu por una agresión y amenaces a otru mozu, nun va muncho.

El compañeru de "Richi" fizo un exemplu de coorporativismu cargando él cola actuación policial. Lluéu'l mozu, desplicó la so versión, como lu siguieron más de 300 metros al so llau dende un coche patrulla, como xubieron a l'acera énte l'asombru de la xente que pasiaba pela cai Uría, como se ñegaron a da-y los sos datos y como foi golpeáu na mano cuando anotaba la matricula del coche patrulla.

La defensa/acusación del rapaz, yera un xuiciu doble ya que los policies denunciáronlu cuando él interpunxo la so denuncia, desixó al tribunal que reclame a la oficina bancaria de Caxastur y a l'Ayuntamientu d'Uviéu les grabaciones d'aquel día, dalgo que yá pidieren esnin atopar rempuesta. La fiscalía del estáu pidió l'absolución pa los policies amparandose na so credibilidá como "funcionarios". "Al final la sensación de que la xusticia española tién bién montada la so rede de coorporativismu y que naide pué tocar a un agresor si lleva placa", según esplica Sofitu.

Al salir del xuiciu los 10 antidisturbios qu'acompañaron al policía nel xuiciu punxieron la nota mas cañí al salie xiblando l'himnu español y el "Cara al sol", himnu falanxista.

Andecha Astur llamenta la reconstrucción del toru d’Osborne n’Ambás (Carreño)

Andecha Astur lamenta la decisión tomada por parte del Grupo Osborne d’iguar el toru d’Ambás, nel conceyu de Carreño, que resultó destruyíu’l pasáu mes de febreru a causa de les fuertes raches de vientu. Atalantamos como daqué intolerable que demientres el padremuñu asturianu sigue ignoráu y esfarrapándose por falta de presupuestu, sigan gastándose perres en recostruyir estos símbolos del españolismu.

P’Andecha Astur ye inalmisible que s’utilice comu reclamu publicitariu y de propaganda la silueta d’un animal que representa’l maltratu y l’agresión animal pagaos y sovencionaos por parte del Estáu Español. Amás hai qu’amestar la refuga social que xeneren n’Asturies estes valles, una amuesa d’ello son les constantes agresiones que sufren (ésta en concreto taba enllena pintaes).

Andecha Astur quier denunciar qu’estos toros son otra manera más de fomentar ya imponer la cultura españoliega y les sos tradiciones. Enxamás s’integrarán nel nuesu paisax porque enxamás formaron nin formarán parte d’él. Andecha Astur yá se manifestara nel so momentu escontra la sentencia del Tribunal Supremu del 30 d’avientu de 1977 que-y apurría valir cultural a esti antiguu reclamu publicitariu, espresión del tardofranquismu y de la falta de gustu.Poro, Andecha Astur quier reiterar nuevamente la so petición de retirada de les 5 valles publicitaries (Ambás, Grau, Santa María de Piedramuelle, El Berrón y Llanes) que’l Grupo Osborne mantién anguaño nel nuesu país pol so calter antiasturiano, por sofitar postures d’imposición cultural españoliega y por sofitar el maltratu animal. Lamentablemente Asturies ye’l territoriu non andaluz con más valles d’esti tipu. Y tamién asinamesmo, pide-y a les autoridaes que sigan los exemplos de dalgunos conceyos asturianos y declaren Asturies como un país antitaurín.

Asoleyáu na páxina d'Andecha Astur.

Darréu llama a participar na concentración de Sofitu del prósimu miércoles n’Uviéu

La convocatoria coincide col xuiciu a la policía española por acosu a un militante independentista, nesti casu miembru de Darréu.

La organización de Mocedá Independentista Revolucionario, Darréu, anima a la mocedá en xeneral, y n’especial a los sos simpatizantes a acudir a la la xuntanza antifacista que’l Muerganismu Antirrepresivu Popular "Sofitu" entama esti prósimu miércoles 16 de xunu.

Sofitu denunció los fechos yá que’l mozu foi acosáu, rexistráu, identificáu y finalmente agredíu polos policies. Tanto Sofitu como Darréu denuncien la falsedá de l'acusación de desobediencia denunciada polos dos polícies.

"Una vegada más salta a les clares el carauter d’esta policía nacional que tenemos n’Asturies, que cumple’l so deber d’afitar l’españolismu y l’orde estableciu, anque tea que recurrir a la violencia gratuito y la persecución".

La organización de mocedá independentista, "énte esta situación d’enfrentamientu nos xulgaos ente les fuercies facistes d’ocupación y l’independentismu asturianu" fai un llamamientu "a tola mocedá asturiano" a dir a sofitar al militante de Darréu a la concentración entamada por Sofitu a les 10:45 hores delantre’l xulgaos d’Uviéu, en Llamaquique, el miércoles 16.

Chupa Chups afita que la so decisión de marchar d'Asturies ye "irreversible"

Depués d'aconceyar col comité d'empresa güei, Chupa Chups aseguró que la decisión de dexar de producir na factoría asturiana ye "irreversible" y que ye una midida "meditada y estudiada enforma". La firma va centralizar tola producción de porres nel so centru de Sant Esteve Sesrovires (Barcelona), cola fin, según ellos, de garantizar la competitividá de la compañía y "poder caltener la produición" de Chupa Chups nel estáu español". La empresa diz tener "voluntá decidida" d'atopar soluciones pa los 121 trabaydores afectaes, ente les midíes contémplase'l treslláu a Catalunya d'una parte de la plantiya.

La empresa argumenta pa zarrar la fábrica en Piloña que l'adopción d'esta decisión respuende a la necesidá d'adautar la capacidá productiva a la demanda del mercáu global, "lo qu'obligó a la compañía a racionalizar la so estructura industrial n'España".

Noticia d'Infoasturies.

Campaña d'e-mails escontra la bandera española na bandera de la Federación Asturiana de deportes d'iviernu.

Fai unos díes el blogue Fueya en Blanco asoleyó una noticia na que pidía a los internautes qu'amosaren el so refugu a la bandera d'España nel llogotipu de la Federación de Deportes d'Iviernu del Principáu d'Asturies. Dende equí queremos da-y puxu a la iniciativa d'emails y animamos a tolos llectores a que dende'l so correu personal o d'organización faigan lo mesmu y unvien un corréu a la Federación. Remenbramos que xunto cola madrilana, l'asturiana ye la única federación del Estáu qu'incluye na so imaxen la bandera del Reinu d'España. Tamién dicir qu'esta ye la única federación deportiva asturiana que tien la bandera roxigualda nel so escudu.

El corréu pa unviar la so quexa ye'l que vien darréu:correo@fdipa.com

Animate tú tamién a amosar el to refugu a la bandera española.

¡ VALIÓ DE SIMBOLOXÍA ESPAÑOLISTA !

Sofitu convoca dos actos, ún pal miercoles 16 n'Uviéu y otru'l 19 en Xixón.

Dende SOFITU convoquen pal miércoles 16 próximu, a les 10:45, nos xulgaos de Llamaquique d’Uviéu una xuntanza antifascista pol xuiciu a un militante independentista por un presuntu delitu de faltes por desobediencia. Nel mesmu, dos policíes españoles y un militante independentista sentaránse nel banquiellu como denunciantes y denunciaos.Los fechos asocedieron a entamos d’esti añu cuando una patrulla de uniformaos españoles acosó, rexistró, identificó, y tamién menació y golpió a un mozu dixebriegu, militante de Darréu, na cai Uría d’Uviéu, namái que pola so conocida militancia política.

Énte estos fechos l’organismu popular antirrepresivu Sofitu presentó una denuncia nos xulgaos, anque tamién los dos policíes denunciaren al mozu por una supuesta desobediencia, "mintiendo dafechu na so declaración" según afirmen dende Sofitu.

L’organismu asoleya qu’unu de los policíes españoles, ye un conocíu fascista d’Uviéu, con delles semeyes en redes sociales d’internet onde queda clara la so ideoloxía, militante de dellos grupos nazis del mundu del fútbol, que yá fuera xulgáu malpenes va unos meses por unos fechos idénticos d’acosu a otru militante independentista, y qu’a finales de los 90, fuera condergáu por matar dellos gatos d’otra militante nacionalista.

Dende Sofitu afiten, que tanto l’exercitu español, como "los cuerpos represivos españoles, son un ñeru onde s’afayen bona parte de los fascistes d’Asturies. Tres la proteición que-yos da una placa y una pistola, actúen con impunidá escontra tolo que suene a independentismu asturianu".

Énte estos fechos, Sofitu convoca l’aconceyamientu sopelexáu pal miércoles 16 de xunu, a les 10:45 hores delantre los xulgaos d’Uviéu pa denunciar la impunidá de los cuerpos represivos españoles y amosar solidaridá pa col militante. Tamién el sábadu 19 a les 14:00 h entamarán una xinta antirrepresiva nel CSA Sestaferia de Xixón, al envís de recaldar perres pa les continues multes que representa’l ser militante activu n’Asturies.