Posicionamientu de la CSI énte la convocatoria del 29 de setiembre

LA SITUACIÓN REAL: Asturies va camín de los 100.000 paraos y paraes, mientres que nel Estáu español acercámosmos a los 5 millones. Otros 5 millones de trabayadores nun lleguen al Salariu Mínimu Interprofesional (635 €). El 40 % de la mocedá ta desemplegao. Un millón y mediu de families tienen a tolos integrantes en paru (30.000 d’eses families son asturianes). Los sueldos nun algamen a la final de mes, la probitú y la precariedá van n’aumentu y l’emprobecimientu del conxuntu de la población ye cada vez más evidente.

LA PATRONAL Y LA BANCA: pretenden siguir consiguiendo los mesmos beneficios que nos bonos tiempos económicos a costa del dineru público y del bolsu de los y les trabayadores. Quieren que trabayemos más y que cobremos menos, faciendo a los ricos más ricos y a los probes más probes.

EL GOBIERNU: verdaderu pelele de la patronal y la banca, impón una reforma llaboral qu’abarata y facilita’l despidu (d’esta miente vuelve los contratos fixos n’eventuales), conxela y disminúi los salarios, reduz les pensiones o suprímeles, xube la edá de la xubilación a los 67 años, fai más precariu’l mercáu de trabayu y les condiciones llaborales, recorta les inversiones sociales y privatiza y deteriora la sanidá, la educación y los servicios públicos.

Pero, al tiempu, regala cientos de miles de millones d’euros a la banca y permite la continuidá d’una economía somorguiada (dineru prieto) que supón daveres una estafa a Facienda de más de 65.000 millones d’euros.

LOS SINDICATOS UXT Y CC OO: lo mesmó ún qu’otru son dinosaurios burocratizaos, con una casta dirixente cómpliz, bien de veces, del gobiernu y la patronal, financiaos y sosteníos polos distintos gobiernos (incluyíos los autónomos y de conceyos), con un exércitu de lliberaos que, munches veces, busquen un abellugu pa safase del trabayu. Agora, el 29 de setiembre entamen una fuelga xeneral que, por primer vez na Hestoria, convócase con 3 meses d’antelación y con una reforma llaboral aprobada y que yá se ta aplicando de manera abondo xeneralizada. Nun podemos siguir enfotaos nestos sindicatos porque los sos dirixentes nin puen nin quieren defender los drechos de los y les trabayadores.

LA FUELGA DEL 29 DE SETIEMBRE: na CORRIENTE SINDICAL D’IZQUIERDA tamos por faer, non solo una fuelga, sinón toles fuelgues xenerales y sectoriales que faigan falta pa frenar la reforma llaboral y les midíes antisociales del gobiernu y la patronal, pero nun vamos participar con aquellos que consideramos cómplices d’esta realidá dura en nengún actu o convocatoria.

Poro, pidimos a tolos y toles trabayadores que’l 29 de setiembre que vien nun vayan al trabayu y que participen na manifestación que la CSI va convocar el día 29 en Xixón a les 13:00 en La Plaza l’Humedal.

www.csi-asturies.org

Llibros recomendaos: No fondero l'alcordanza de Dios.

Xurde Álvarez ye l'autor d'esta novela, espublizada en 2004 por Ediciones Trabe. La novela cientrase na vida d'una familia humilde de la fastera rural de la Cuenca Minera'l Nalón, cuntada dende la perspeutiva d'un neñu que da'l pasu a la maduré. N'ellí narrase la llucha pola supervivencia de la familia demientres la fuelga de la metalurxa que duró dende payares de 1932 a agostu de 1933 en Llangréu. Una de les fuelgues más llargues y dures de tolos tiempos, que l'hispanista británicu Gerald Brenan calificó como " travesada y heroica".

El llangreanu Xurde Álvarez retrata perbien la llucha de clases n'Asturies de los años 30 cola metáfora de Moby Dick, novela a que va citandose en tol llibru. La obra d'esti poeta, narrador y autor teatral narra con crudeza la vida d'un neñu y la so familia pola so propia supervivencia, pero ensín dexar de llau la solidaridá de clas. Amás, esti impresu pue danos idea de como yeren les condiciones de vida y trabayu n'aquellos años nes Cuenques Mineres y l'Asturies central yá industrializada. Amuesa les inxusticies del sistema, los momentos tensos qu'esto crea dientru'l sen del llar y la desesperación por algamar el pan, pero supeditando siempres la dignidá. Pue ser interesante pa tola xente que-y llame l'atención la situación social d'Asturies nesa dómina de la nuesa hestoria y el movimientu obreru.

Amás el llibru espeya tamién comu yera la casería típica asturiana, yá que'l neñu fai una descripción nidia y continua de como ye'l so llar, inspiráu dafechu n'arquitetura tradicional del país. Tamién solliñar l'enfotu de tresmitir al llector la vida tradicional asturiana, coles xeres de cada familiar y les preocupaciones de caún.

Encamentaivos a toxs la llectura.

Espicha contra la represión de Sofitu en Samateo

Esti Sabadu 18, en plenes fiestes de San Mateo n'Uviéu, en Muerganu Antirrepresivu Popular Sofitu entama un nuevu actu col envís de siguir recaldando perres pa facer frente a la represión politico-policial que sufren los y les militantes de la izquierda soberanista d'esti país. Con ello, nos ultimos meses podemos cuntar:

-Detención por "atentáu a la autoridá" d'una moza acusada d'agredir a Tini Areces. La so madre tamién ye denunciada.
-Xuiciu escontra un policía español por agresión a un mozu independentista.
-Multes a solidarios por acudir a la carcele de Villabona a un actu solidariu colos presos politicos
-Xuiciu escontra un policía nazional español por amenaces y agresión a un mozu militante de Darréu
-Multa a una moza independentista por cantar "muncha policía, poca diversión" en Xixón.
-Multa a un mozu por portar la AS na matricula del so coche por contra de la impuesta E
-Acusación a un mozu de "ciberterrorismu"
- Detención illegal d’una independentista nun actu d’UPyD

Dende Sofitu camentamos que sólo la solidaridá de puede detener esta escalada represiva y que ye importante la implicación de toos/es. Con estos actos festivos recaldamos perres pal pagu de multes y abogaos y pa la ellaboración de campañes antirrepresives.

Sabadu 18, L'Arcu la Vieya (Cai Postigu), 20:00 hores
Por 8 euros podras tomar:
Sidra
Tortiella
Morciella Matachana
Güevos Cocíos
Frixuelos
Empanada
Canutos Borrachos
Croquetes
"Pollo al ajillo"

ENCAMENTAMOS APUNTASE ENANTES DEL VIENRES 17 NEL MAIL: sofitu@nodo50.org

LA REPRESIÓN YE UN FECHU, LA RESISTENCIA UN DERECHU
PUXA ASTURIES LLIBRE

www.nodo50.org/sofitu

Darréu convoca'l I Concursu "Sones de Revolución"

Podrán participar hasta 10 grupos presentando temes en direutu en llingua asturiana.

La edición del añu 2010 del Día de la Mocedá Revolucionariu, entamará’l 2 d’ochobre, cola cellebración por primer vegada del concursu musical “Sones de Revolución”, que tendrá llugar n’Uviéu, nel llocal I-POP, de magar les 19:00 h. Esti concursu servirá p’elexir d’ente tolos grupos de música participantes a un grupu ganador, que sedrá’l grupu col que s’aniciará la IX edición del conciertu “Asturies nun escaez”.

¿Cómo funciona'l concursu?

Los grupos que s’inscriban nel concursu “Sones de Revolución” tocarán en direutu de magar les 19:00 hores del día 2 d’ochobre nel llocal I-pop d’Uviéu, según l’orde d’inscripción. Cuando finen de tocar tolos grupos participantes, el xuráu elexirá ente los grupos participantes al grupu ganador.

¿Qué premiu s’ufierta?

El premiu pal primer clasificáu va ser abrir el conciertu del sábadu 16 d’ochobre, la IX edición del “Asturies nun escaez” que se cellebrará en Xixón. D'esta manera’l grupo que resulte ganador va poder compartir escenariu con grupos de sonadía. N’edicioness anteriores participaron grupos comu: Dixebra, Skama la Rede, Obrint pas, Soziedad alkoholika, Lendakaris Muertos, Kaótiko, Koma, Habeas Corpus, Etsaiak, betagarri Skalariak...

¿Qué requisitos tienen de cumplir?

Sedrá imprescindible que los cancios del direutu, seyan na llingua asturiana. Ye necesariu que los cancios seyan propios del grupu, non puen presentase versiones. Podrán participar nel concursu “Sones de Revolución”, fasta un máximu de 10 grupos musicales (según l’orde d’inscripción). La soscripción ye de baldre pa tolos grupos.

¿Qué facer pa participar?

P’inscribise ye necesario unviar un corréu a: info@darreu.org, indicando’l nome del grupu, los datos de contautu y una breve descripción del mesmu. La fecha llímite pa inscribise ye’l 1 d’ochobre.

Pa cualisquier dulda dirixise al corréu info@darreu.

Fonte: Infoasturies.

El Día de la Mocedá Revolucionario 2010 va cellebrase los díes 2, 15 y 16 d'ochobre.

El IX festival "Asturies nun escaez" va ser en Xixón y cuntará otru añu más cola presencia, del grupu asturianu Escuela de Odio. Amás d’esti grupu, completarán el cartelu otros 3 grupos, un d’ellos el grupu asturianu que resulte ganador del concursu “Sones de Revolución”. DARRÉU anuncia la cellebración del Día de la Mocedá Revolucionario 2010 los prósimos 2, 15 y 16 d'ochobre, xornada de conmemoración de la Revolución Asturiana de 1934 y de vindicación de la mocedá revolucionario qu'esta edición va volver cellebrase en Xixón onde se ficiere en 2009 tres la expulsión "de facto" del Conceyu de Llangréu.

Como n'ediciones anteriores el DMR va cuntar con dellos actos (actu internacionalista, manifestación, conciertu "Asturies nun escaez",.. ). Amás por primer vegada esti añu, el grupu asturianu col qu’entamará la novena edición del festival "Asturies nun escaez" conmemorativu de la revolución y d'homenaxe a los y les revolucionarios, sedrá’l que seya elexíu como ganador nel I Concursu “Sones de Revolución”. Prósimamente Darréu asoleyará más información alredor del DMR’10 y los grupos partipantes nel IX "Asturies nun escaez".

Noticia d'Infoasturies.

Intervención Día de la Nación Asturiana 2010 por parte d'Andecha Astur.

Bonos dies collacios y collacies, un añu más tamos equí, nes casi d’Uviéu vindicando’l Díi de la Nación Asturiana. Hai que da-y les gracies a les persones qu’impulsaron esti manifestamientu dende la plataforma Democracia p’Asturies.

El lema y la vindicación nun podien ser mas acertaos: Asturies necesita democracia. El manifiestu de la plataforma Democracy for Asturies creo que lo esplica ampliamente. Hestoricamente vivimos en permanente conflictu con España. La desixencia de democracia p’Asturies, la reivindicación de los nuesos drechos coleutivos y de llibertá pa la nuesa patria ye hestórica. Nun importa la forma xurídico-política qu’adopte España: baxo una república, baxo una dictadura, baxo una monarquía parlamentaria l’intentu de sometenos ye una permanente hestórica.

Güei tamos equí pa revelanos escontra esi sometimientu y pa denunciar que les instituciones asturianes tan tomaes por partios políticos sucursalistes. PP, PSOE ya IU representen esi sometimientu a los intereses d’España.

Fálase muncho de la necesidá d’entrar nes instituciones pa intentar condicionar los posicionamientos d’esos partios.

Andecha Astur apuesta pola Xunidá d’Aición elleutoral, venimos trabayando y trabayaremos por llegar a alcuerdos con otres formaciones p’axuntar fuercies nel planu eleutoral. Sí, ye importante esa vía pero nun escaezamos qu’el estáu español nun ye democráticu. Poro, hai otru recorríu que facer paralelamente. Que ye namai y ná menos que garrar el poder a nivel de cai. Tomar el poder sí o sí. Decidir por nosotros mesmos sin esperar a que nos dean el permisu pa facelo.

Nun conflictu como esti la vía político-istitucional ye importante pero ye más importante la costruición de cadarmes propies.

Ehí ta la xunidá que nós proponemos. La xunidá popular, la xunidá de los asturianos y asturianes pa salir a la cai a construyir una Asturies llibre. Salir a la cai sin miéu, con valentía pa pegar un puñetazu na mesa y dicir: Esto ye Asturies.

Esto ye Asturies y nosotros asturianos y asturianes llibres cola voluntá, el valor y la capacidá pa decidir por nosotros mismos.

Nun hai xuntances milagru, nun hai marques elleutorales milagru, nun hai candidatos milagru. Valledor nun tien denguna posibilidá de ser el candidatu del nacionalismu asturianu d’izquierdes. Ninguna. Porque yá conocemos a Izquierda Unida y yá conocemos a Valledor.

Esto nun ye la xunidá porque sí. Esto nun ye la xunidá pa colocar a un fulanu na Xunta Xeneral. Esto ye tresformación social y lliberación nacional. Esto ye un pueblu caminando hacia la independencia y hacia la so libertá.

Munches gracies collacios y collacies.

Puxa’l Día de la Nación Asturiana.
Puxa Asturies llibre y socialista.

El llema "Democracia p'Asturies" axuntó a ciudadanes/os nun manifestamientu

Les cais d'Uviéu fueron ayeri escenariu de la primer movilización convocada pola plataforma soberanista y ciudadana "Democracia p'Asturies", qu'axuntó a cientos de persones nel Día de la Nación Asturiana. El manifestamientu, que foi sofitáu pola organización política Andecha Astur, la organización de mocedá independentista revolucionario Darréu y pol sindicatu de clas Corriente Sindical d'Izquierda taba convocau pa les 13:00 hores.

Con dalgo de retrasu, alredor de les 13:20 el manifestamientu echó a andar dende la Estación del Norte, baxando pela cai Uria, con una banda gaites, un banderón cola bandera de la Nación Asturiana y una pancarta col llema " Democracia p'Asturies". Ente glayíos soberanistes y en clave social, los manifestantes fueron aportando hasta'l Parque San Francisco, onde xubieron pa pasar poles sedes d'UXT y Delegación de Gobiernu, onde les persones ellí aconceyaes amosaron el so descontentu con estes instituciones. Darréu, la manifestación finó nes inmediaciones de la Xunta Xeneral, énte l'edificiu de Presidencia, onde la policía nacional española amosó una vegada más, la so falta de formes y humildá.

Pa finar, los asistentes asistieron a l'actu políticu de la plataforma soberanista "Democracia p'Asturies". Paula Martín faló comu vocera de la plataforma ciudadana, dió les gracies a tolos/es asistentes y desplicó brevemente los aspectos principales del trabayu que ta desendolcando la plataforma. Tamién sorrayó de la necesidá d'axuntar más sensibilidaes de la izquierda nacionaliega asturiana a esti proyeutu ciudadanu, y denunció la llaceriosa situación pola que pasa'l nuesu país, recordando l'enfotu de tolos presentes d'algamar una democracia plena p'Asturies.


Dempués d'esta intervención dió paso a los voceros de les organizaciones que sofitaron la manifestación:


El primer n'intervenir foi Paco Iglesias por parte de la Corriente Sindical d'Izquierda. El representante de CSI agradeció a la plataforma que cuntaran col sindicatu y valoró que ye llabor de toos facer d'esta plataforma " una alternativa política fuerte". El sindicalista tamién denunció la falta de drechu a decidir que tenemos los asturianos, y que'l progresu d'Asturies tien qu'apareyar el progresu de la clas obrera asturiana, que ye la mayoría del Pueblu Asturianu. Dende la Corriente Sindical d'Izquierda tamién fueron críticos cola fuelga xeneral convocada pal 29 de setiembre poles centrales sindicales, yá que consideren que ye " apautada col Gobiernu y la Patronal".


Dempués vino'l turnu de Guillermo Amato, en representación de la organización moza Darréu, que valoró enforma'l trabayu de la plataforma y esta movilización. Tresmitío la voluntá de la militancia de Darréu en siguir trabayando na plataforma "Democracia p'Asturies", y animó a tola izquierda soberanista asturiana a facer suyu esti espaciu de trabayu conxuntu. A la par denunció la situación predemocrática que carez el nuestru pueblu.

Pa finar intervino'l voceru d'Andecha Astur Mariu Arbesú. Valoró'l trabayu de la plataforma, y quiso facer incapié na importancia de la xunidá d'aición, tantu n'iniciatives como "Democracia p'Asturies", como nel tarrén eleutoral. Asina mesmu, espresó'l so sofitu a una candidatura xunitaria nacionaliega pa les eleiciones de 2011, pero non a cualesquier preciu, y ensin Izquierda Xunida. Pero sobretoó valoró'l trabayu a nivel de cai sobremanera y fixo un llamáu a crear cadarmes propies dende les que trabayar.


La vocera de la plataforma despidió l'actu y agradeció de nuevu l'asistencia a tola xente, llamándola a xunise al proyeutu "Democracia p'Asturies. Zarró l'actu políticu la interpretación a la gaita asturiana del himnu independentista "La Flor del agua".

Fonte: www.democracyforasturies.blogspot.com

Saludu de Darréu nel manifestamientu "Democracia p'Asturies"

Dende Darréu queremos da-y la norabona a tola xente que se movió pa qu'esti manifestamientu saliera alantre. Como non, dar la norabona a la plataforma " Democracia p'Asturies" por abrir recientemente un espaciu ciudadano, de calter soberanista y que llucha polos drechos sociales d'esti pueblu. Espaciu al cual Darréu amosó'l so sofitu bien ceo y ferramienta política xunitaria y tresparente que queremos que tola izquierda soberanista asturiana faiga suya.

Güei Darréu ta equí porque compartimos el llema d'esti manifestamientu, si. " Democracia p'Asturies", daqué que pue sonar cenciellu, simple y con pocu fondu. Pero non, lo ciertu ye que non collacies y collacios, el nuesu país atópase nuna llaceriosa situación, y too ello bien empobináo pola situación pre-democrática qu'arrescontinamos dende fai décades. Yá sabeis, el marcu políticu que-y da a Asturies l'Estáu Español ye vergoñoso.

Añu tres añu l'esfarrape d'esta nación va medrando y el nuesu pueblu afronta agora un retayu nos sos drechos políticos y como trabayadores. Queremos democracia p'Asturies, queremos que los asturianos podamos decidir por nós mesmos que ye lo que más nos pruye y que marcu políticu queremos. Esti tardofranquismu tien de finar yá.

Namái dar tol nuestru sofitu a la iniciativa ciudadana " Democracia p'Asturies" y comentar de la necesidá de siguir trabayando pol nuesu futuru y pola dignidá del Pueblu Trabayador Asturianu dende esti espaciu políticu. Munches gracies a tolos que vos averasteis hasta esti actu güei.

¡Puxa Asturies dixebra!

¡Puxa Asturies socialista!


Por Guillermo Amato

Intervención de CSI na manifestación de Democracia p'Asturies

Un saludu a toos y a toes dende la Corriente Sindical d’Izquierda. En primer llugar, esti sindicatu quier agradece-y a la plataforma ciudadana Democracia p’Asturies la so consideranza pa con nós, convidándonos a participar nesta movilización xunitaria que, ente toos y toes, tenemos la responsabilidá de tornar nuna alternativa política fuerte que-y eche la galga a quienes-y ñeguen el pan y la Sal a Asturies.

Si falamos de democracia, dende la CSI, pescanciámoslo nel so sentíu lliteral, ello ye, poder pal pueblu. Y si falamos de democracia p’Asturies, tamos falando de poder pal Pueblu Asturianu. De poder pa que sólo’l Pueblu Asturianu tea la capacidá pa decidir cuálu va ser el so presente y cuálu va ser el so futuru. Nun podemos dexar que denguna otra istancia o istitución nos quite’l poder que nos correspuende exercer comu Pueblu que somos. Nin los gobiernos, nin los parllamentos, nin los Tribunales de Xusticia pueden usurpar el nuesu drechu a escoyer lo que queremos o lo que nun queremos ser.

Pero nun podemos escaecenos de la nuesa hestoria, la que nos llevó a ser, anguañu, los que somos la gran mayoría de nós: trabayadores asturianos y asturianes. Nun hai de tracamundiase. La soberanía d’un Pueblu nun pue subordinase a denguna consideranza, pero esta soberanía tampocu nos sirve si vamos algamala a cualisquier preciu. El progresu d’Asturies tien d’apareyar el progresu de la mayoría’l Pueblu Asturianu y esa mayoría nun ye otra que la clas obrera asturiana. Nun hai una cosa ensin la otra.

Y, nesi sen, dende la CSI queremos denunciar equí la necesidá d’enanchar el conceutu de democracia a la estaya llaboral. Anguañu, el sistema de representación sindical nos estremaos seutores productivos, apareya braeros pucherazos elleutorales y regala miles de millones d’euros del dineru públicu a los sindicatos CCOO y UXT que, col so exércitu de lliberaos y banduyos agradecíos, lleguen a facer comedies comu ésta que nos tienen entamada pal prósimu 29 de setiembre, con una fuelga xeneral apautada con Gobiernu y Patronal y que va apareyar, si nun-y ponemos remediu, un nuevu pasu atrás pal conxuntu de los y les trabayadores.

Por una democracia real p’Asturies, por un poder real pal Pueblu Asturianu y por un poder real pa la clas obrera asturiana, ye polo que tenemos de lluchar.

¡Puxa Asturies!

Por Paco Iglesias

Cientos de persones fain del 8 setiembre un día de llucha y reivindicación

Les dos ciudaes más importantes del país, Uviéu y Xixón, vivieron actos xunitarios onde se pidió democracia y futuru p'Asturies.

Dos actos xunitarios aconceyaron güei a cientos de persones nes cais asturianes pa facer d'esti 8 setiembre un día de llucha y reivindicación polos derechos del pueblu asturianu y pol futuru d'Asturies. En Xixón, la "Plataforma Unitaria 8 Setiembre" convocó una concentración a les 12:30 hores na Plaza del Nautico. N'Uviéu, la plataforma ciudadana "Democracia p'Asturies" convocó'l manifestamientu del Día de la Nación Asturiana.

Los dos actos xunitarios axuntaron bien de xente nes dos ciudaes más importantes del país reivindicando y refugando los actos institucionales del "Principado".
El primer actu del día foi'l convocáu col llema "Pol futuru d'Asturies" en Xixón, que sofitaron los partíos Bloque por Asturies, UNA y Andecha Astur, les formaciones llocales d'UICA, Asturianistes por Nava, Más Corvera y S.XXI de Muros del Nalón, los sindicatos CSI y SUATEA y los coleutivos Fai! y Entemecer. L'actu entamó con retrasu cerca de la 1 de la tarde con una pieza del gaiteru Llorián García y la presentación del actu a cargu del actor Toño Caamaño, delles intervenciones y l'actuación de Mari Luz Cristobal Caunedo dieron pasu a la llectura del manifiestu consensuáu y el pieslle del actu.



N'Uviéu, a la una y media, entamaba'l manifestamientu del Día de la Nación Asturiana col llema "Democracia p'Asturies" que percorrió les cais de la capital asturiana, dende la Estación del Norte hasta delantre de Presidencia del "Principado" y que sofitó'l partíu Andecha Astur, el sindicatu Corriente Sindical d'Izquierda y la organización xuvenil independentista "Darréu". Al final de la marcha, una vocera de la plataforma ciudadana "Democracia p'Asturies" presentó l'actu políticu dando pasu a les intervenciones de voceros de les organizaciones presentes.

Fonte: Infoasturies

El 8 setiembre como ‘Día de la Nación Asturiana’

D’un tiempu p’acá, hai ciertu alderique dientru del movimientu nacionalista asturianu alredor de cuála sedría la meyor fecha pa la cellebración del “Día de la Nación Asturiana”. L’oxetu d’esti artículu nun ye buscar la meyor fecha, o posicionase a favor d’una o d’otra, sinón l’analizar cómo y por qué, el movimientu nacionalista asturianu fexo del 8 setiembre’l “Día de la Nación Asturiana”, un fechu oxetivu, continuáu nel tiempu y que llega a los nuesos díes siendo aceptáu como tal polos partíos nacionalistes.



A la d’entrar nel tema, ye necesario afitar que’l nacionalismu asturianu ye un movimientu surdíu na denomada “Transición”. L’añu 1977 ye clave col pasu oficial de Conceyu Bable a definise como nacionalista nel so "Cartafueyu so’l rexonalismu" a entamos d’añu y l’apaición del primer partíu nacionalista asturianu, el Conceyu Nacionalista Astur (CNA), llegalizáu finalmente en 1979 y disueltu en 1981. Nesta fase inicial del nacionalismu asturianu entra tamién l’Ensame Nacionalista Astur (ENA) que surde en 1982, siendo l’únicu partíu nacionalista hasta finales de 1985 y entamos de 1986, cuando surden el Partíu Asturianista (PAS) y la Xunta Nacionalista Asturiana (XNA). Tamién ye necesario remembrar, enantes d’entrar en materia, que, al traviés de la Llei 5/1984 de 28 de xunu, en 1984 declárase’l 8 setiembre como Día d’Asturies y fiesta de la CCAA. Sicasí, na dómina preautonómica ya s’escoyera como Día d’Asturies y dende 1982 cellébrense actos institucionales del “Día d’Asturies”, dempués de la constitución de la Xunta Xeneral en marzu y la entrada en vigor del la Llei Orgánica 7/1981, d’Estatutu d’Autonomía p’Asturies el 30 de xineru.

En 1980, Conceyu Bable asoleya un comunicáu oficial con motivu del 8 de setiembre nel que podemos atopar una primer visión dende’l nacionalismu d’esta fecha . Pa CB, “el 8 setiembre tien pa los asturianos un sentíu fondu que xustifica abondo que s’escoyere como “Día d’Asturies”: ye’l fechu de cellebrar el llevantamientu de Cuadonga y de faei llueu de Cangues d’Onis la capital de la nación asturiana. CONCEYU BABLE vien, entós, a esta fiesta convencíu de la necesidá que’l pueblu tien d’acorda-se d’ello y de festexar los anicios d’un estáu, l’Estáu Asturianu, el reinu más vieyu d’ente tolos peninsulares” (Fueyes informatives, 17).

En 1982 entama a facese un “Día d’Asturies” institucional y el nacionalismu asturianu va caltener un posicionamientu de vindicación de los derechos nacionales y denuncia del procesu autonómicu. Naquel Día d’Asturies de 1982 van ser deteníos 13 militantes nacionalistes, 11 n’Uviéu por protestes nel actu institucional y dos n’Avilés nes protestes nos festexos institucionales. La denuncia de la falta dafechu de vindicación nel “Día d’Asturies” y la so conversión en simple folixa va ser una constante nestos primeros años. De relevancia foi la protesta entamada en Ribeseya nel “V Día d’Asturies” en 1986 col llema “Nun tamos pa estes fiestes” d’ENA, MC, LCR y CSI onde s’abucheó al presidente Pedro De Silva con una pancarta que lu llamaba “funcionariu de Madrid” . Nel númberu 0 del periódicu DIXEBRA d’ENA (xineru de 1987), el 8 setiembre va tener protagonismu, la portada ye pal artículu “Día de la Patria Asturiana” y nel interior recuéyese la crónica de les protestes de Ribeseya.

En “Día de la Patria Asturiana” alcontramos una segunda visión dende’l nacionalismu d’esta fecha, en parte coincidente cola anterior de CB pero más ellaborada y completa. Nelli deféndese l’ocho setiembre como día “d’especial significación pal Pueblu Asturianu”. l'argumentación podría resumise mui rapidamente en:



- El 8 setiembre representa l’aniciu del Reinu d’Asturies, l’aniciu d’Asturies y de la nación asturiana, non l’aniciu d’España, como caltienen les tesis españolistes.



- La ilésia apropióse de la fecha, lo mesmo que de la significación precristiana de la zona de Cuadonga.



- Los nacionalistes tienen que vindicar la hestoria d’Asturies, da-y la vuelta a la historia oficial y denunciar la falsedá de les tésis españolistes y dotar a la fecha del conteníu nacional qu’interesadamente ficieren esapaecer.





L’artículu puntualiza que’l “fechu de reivindicar el 8 de setiembre comu día d’especial significación pal pueblu asturianu nun significa que los nacionalistes nun tengamos en cuenta otres feches, peremportantes na hestoria d’Asturies”, como’l 25 de mayu o Ochobre’l 34.



El 8 de setiembre va ser importante en 1987 y por primer vez una organización política va cellebrar un “Día d’Asturies” alternativu al oficial. Como vimos veníen dandose protestes nos actos oficiales y venía denunciándose la falta de vindicación pero esti añu l’ENA decide dar un pasu más y entamar un “Día d’Asturies” alternativu al institucional. Asina, ENA cellebra un eventu en confrontación a la cellebración oficial, un “día d’Asturies nacionalista”, nel Pueblu d’Asturies de Xixón, con un llema claru: “Asturies ye Nación”.

El pasu definitivu llega un añu depués, en 1988, cuando ENA y XNA, les dos formaciones d’izquierda nacionalista, entamen un nuevu Día d’Asturies alternativu, pero esta vez yá ye’l primer “Día de la Nación Asturiana” nel que tamién participa la Candidatura Independiente de Mieres-Conceyu Astur. Esta ellebración xunitaria pue considerase l’aniciu formal del procesu de xuntanza que finaría un añu depués cola fusión d’ENA y XNA pa formar un únicu partíu nacionalista d’izquierdes, l’antigua Unidá Nacionalista Asturiana (UNA).

Yá na década de los 90 del sieglu XX, el “Día de la Nación Asturiana” va dir garrando nueves formes, empicipien a organizase movilizaciones, llegando les primeres manifestaciones. Asina dende qu’Andecha Astur convocare la primer manifestación “Pol Autodetermín” na hestoria d’Asturies en 1995, vienen cellebrándose añu tres añu hasta anguañu. Pero esto yá ye otru tema que sal del oxetu d'esti artículu, el surdimientu del 8 setiembre como “Día de la Nación Asturiana” y la visión nacionalista d’esta fecha.

L’alderique sobre si una o otra fecha ye más significativa pa ser “Día de la Nación Asturiana” ye llexítimu dafechu. Esi sí, nelli ye imprescindible tener una visión histórica, non sobre la mayor o menor importancia, significación o relevancia, de los fechos históricos a vindicar nesi día, sinón na propia hestoria del movimientu nacionalista y del significáu que da ésti al 8 setiembre históricamente, que, como vimos, ye consideráu “Día de la Nación Asturiana” dende va más de venti años, dalgo que nun se da con denguna otra fecha, independientemente de que se conmemoren tamién otres.

artículu de Toño Martínez

“Democracia p’Asturies” fai un llamamientu a participar nel manifestamientu del 8 setiembre

Los promotores de la iniciativa ciudadana “Democracy for Asturies / Democracia p’Asturies” queremos facer, al traviés d’esti comunicáu, un llamamientu públicu a la sociedá asturiana, en xeneral, y a los militantes y simpatizantes de la izquierda nacionaliega, en particular, a participar nel manifestamientu xunitariu que convocamos, precisamente baxo’l lema “Democracia p’Asturies”, pal prósimu 8 de setiembre.


Camentamos que pa esa fecha tan señalada, el Día de la Nación Asturiana, ye imprescindible la convocatoria d’esta movilización, col enfotu de facer del mesmu un díi de reivindicación nacional y social y de denunciar la situación pre-democrática que carez Asturies. El manifestamientu ta convocáu pa les 13’00 hores con salía de la Estación del Norte (Uviéu) y yá cunta colos sofitos, ente otros, de la organización política Andecha Astur, de la organización xuvenil Darréu y del sindicatu Corriente Sindical d’Izquierda.


“Democracy for Asturies / Democracia p’Asturies” ye una iniciativa ciudadana que nació nel mes de xunetu del presente añu, que ta promovía por militantes de la izquierda nacionaliega asturiana y encadarmada alrodiu del “Manifiestu pola consecución d’una democracia plena p’Asturies: Democracia p’Asturies”, col que se quieren algamar dos oxetivos: per un llau, axuntar les estremaes sensibilidaes de la izquierda nacionaliega asturiana y, per otru, dar a conocer fuera de les nueses llendes la yá citada situación pre-democrática que carez el nuesu país. Anguañu, la iniciativa cunta col sofitu de más de 35 organizaciones polítiques, sindicales, sociales y culturales y cientos d’adhesiones individuales de toa Europa.

Andecha Astur participará nos actos xunitarios del 8 setiembre

Llama’l Pueblu Asturianu a movilizase polos sos derechos democráticos
Énte’l prósimu 8 Setiembre, Día de la Nación Asturiana, Andecha Astur va participar nos actos xunitarios entamaos por diferentes plataformes. Asina, la organización nacionalista va participar na concentración "Pol futuru d'Asturies" qu'entama la "Plataforma Unitaria 8 setiembre" y nel Manifestamientu del Día la Nación Asturiana n'Uviéu, col llema Democracia p'Asturies, que convoca la plataforma ciudadana "Democracia p'Asturies" a les 13:00 hores na estación del Norte d'Uviéu.

Amás de participar nestos actos xunitarios, Andecha Astur va cellebrar, a les 15:00 hores, una xinta y actu políticu nuna céntrica sidrería d’Uviéu. Con too ello, Andecha Astur anima a la sociedá asturiana "a participar nos actos xunitarios que se cellebren esti día".

Fonte: Infoasturies

El desempléu sube n'Asturies en 1.281 persones n'agostu

El númberu de paraos rexistraos n'Asturies subió en 1.281 persones n'agostu, un 1,79 por cientu sobre'l mes anterior, polo que'l total de desempleaos asitióse en 72.956, según los datos fechos públicos pol Ministeriu de Trabayu y Inmigración.

En comparanza con agostu del 2009, el paru aumentó n'Asturies un 6,61%, esto ye, 4.523 persones más, mientres que n'España subió un 9,38%, al rexistrase 340.581 persones nes oficines d'empléu.

Paru por sectores
Por sectores, el paru aumentó n'Asturies sobre'l mes anterior en toos menos na agricultura, onde baxó en 14 persones al respecto de xunetu. La mayor subida rexistróse nel sector servicios, con 971 nuevos paraos. Tamién medró nel sector de la construcción, con 253 paraos, n'industria con 56 y nel colectivu sin empléu anterior con 15.

D'esta manera, más de la metá de los paraos contabilizaos al zarru d'agostu nel Principáu d'Asturies concentrábense nel sector servicios, atropando 46.473 persones. Siguen a esta actividá la construcción, con 11.672 paraos, la industria, con 7.931, el colectivu sin empléu anterior (5.955) y l'agricultura (825).

Sexu, edá y estranxeros
Del total de les persones desemplegaes n'Asturies son mayoría les muyeres, con 38.944 ensin empléu, mientres que'l restu, 34.012 son homes. Amás, la gran mayoría, 65.584 pertenecen al colectivu de mayores de 25 años. D'esta manera, los paraos menores de 25 años son 7.372.

Frente a la subida xeneral, el paru baxó ente la población estranxera al rexistrase 20 paraos menos, colo que la cifra total asítiase en 5.019 paraos estranxeros. Pero, en comparanza con agostu del 2009, aumentó un 17,21%, al sumar 737 paraos más nun añu. Del total de paraos estranxeros, 3.122 veníen de países estracomunitarios, mientres que 1.897 yeren de la Unión Europea.

Baxa la contratación
Xunto col aumentu del paru, n'agostu baxó la contratación. Asina, el mes pasáu robláronse n'Asturies 22.993 contratos, lo que supón 5.724 menos qu'en xunetu d'esti añu (-19,93%). Pero, en comparanza col mesmu mes del 2009, robláronse 2.062 más, esto ye, un aumentu del 9,85%.

De les más de 13.500 firmes contabilizaes na rexón tan sólo 1.385 correspondieron a contratos indefiníos, dao que la mayoría (21.608) fueron temporales.

D'esta forma, los indefiníos baxaron un 25,98% en comparanza con xunetu (486 contratos menos), y tamién baxen un 3,01% en relación a agostu de va un añu (con 43 firmes menos).

Pela so parte, los temporales recortáronse nel últimu mes un 19,51%, al rexistrase 5.238 menos, pero aumentaron un 10,79% nun añu, al sumar 2.105 firmes más.

Fonte: Asturies.com

Darréu sofita la manifestación de "Democracia p'Asturies" del 8 de setiembre

Anima a participar a la mocedá asturiano.

La organización de Mocedá Independentista Revolucionario - Darréu- quier asoleyar el so sofitu públicu a la manifestación convocada l'8 de setiembre pola plataforma ciudadana " Democracia p'Asturies". Darréu valora positivamente "la bona voluntá de la iniciativa ciudadana d'axuntar a tol soberanismu asturianu d'izquierdes na mesma convocatoria xunitaria" y qu'esta convocatoria "pal Día de la Nación Asturiana llega a tiempu, con fuercia y con un mensaxe acertáu, pues dende Darréu valoramos que'l contestu d'anguañu desixe denunciar la situación pre-democrática que carez el país asturianu".

"Camentamos qu'esti pue ser un puntu de xunión ente militantes de toles sensibilidaes polítiques dientru'l soberanismu, y qu'esto pue llevanos a una manifestación fuerte nesti prósimu 8 de setiembre". Darréu ve como un "ñiciu válidu esta convocatoria conxunta pa finar cola dinámica d'otros años, onde nun s'algamó axuntar a tol nacionalismu enbaxo una mesma convocatoria".

Poro, Darréu quier facer públicu'l so sofitu a la convocatoria anunciada pola plataforma soberanista y ciudadana " Democracia p'Asturies". Animamos a tolos/es nuesos/es militantes y simpatizantes a acudir a la mesma y facer ver que la mocedá asturiano tamién tien drechos.

El Coleutivu Pola Xuntanza espubliza una «Xuntanza programática» pa camudar Asturies

El Coleutivu Pola Xuntanza espubliza una “Xuntanza programática pa camudar Asturies”, un documentu que pretende amosar les llinies comunes de los partíos asturianistes/nacionalistes asturianos y facer xuntanza al rodiu d’elles.



Lleer documentu equí:
http://polaxuntanza.webcindario.com/wp-content/Una%20Xuntanza%20programatica.pdf

Andecha valora positivamente la convocatoria de "Democracia p'Asturies" pal 8 setiembre

Reafirma’l so compromiso cola Xunidá d’Aición y la so voluntá de participar en cualquier otra iniciativa xunitaria l'ocho setiembre.

Andecha Astur considera "perpositiva" la convocatoria fecha dende la iniciativa Democracia p’Asturies "pa la celebración d’un manifestamientu xunitariu’l prósimu 8 de setiembre, Díi de la Nación Asturiana" al entender qu’el plantegamientu fechu dende la plataforma ciudadana "recueye perbien el conceutu de Xunidá d’Aición que vien defendiendo Andecha Astur dende va tiempu". Talu plantegamientu xunitariu encóntiase en que "les organizaciones caltienen la so soberanía ya identidá política al tiempu que se busquen y potencien aquellos elementos de coincidencia que permitan un trabayu en comuña ente les diferentes formaciones".


Poro, dende Andecha Astur sofiten la propuesta xunitaria "por ser oportuna nel tiempu, pola so carga política innegable y porque abre una puerta interesante pal aniciu d’un espaciu de trabayu xunitariu nel ámbitu de la reivindicación soberanista n’Asturies".

Arriendes d’ello, Andecha Astur reafirma la so voluntá "de participar en cualaquier otra convocatoria xunitaria que pudiera dase nesti díi". Nesi sen, la organización d'izquierda nacionaliega fai un llamamientu "al conxuntu del nacionalismu asturianu" pa que "tantu a nivel individual comu d’iniciatives ciudadanes, asuman el protagonismu necesariu nel procesu de Xunidá d’Aición pa francer con vieyes dinámiques presonalistes y/o comportamientos sectarios que puean tar torgando l’entendimientu ente les formaciones polítiques asturianes, nel comencimientu de que la situación na que s’afaya’l nuesu país nestos momentos desixe tol esfuerciu y xenerosidá posible ente’l conxuntu de les formaciones sociales y polítiques asturianes".

Asoleyau n'Infoasturies.

Andecha cellebra un actu d'Alcordanza de la declaración de soberanía del Conseyu d'Asturies y Lleón

Ye'l domingu 28 y va haber autocar dende Xixón, Noreña y Llangréu hasta'l Puertu Tarna.

Andecha Astur cellebra nel Puertu Tarna un actu d'alcordanza nel 73 cabudañu de la declaración de Soberanía del Conseyu d'Asturies y Lleón, el 24 d'agostu de 1937. Tres facer l'actu dellos años en Xixón, delantre de la que fore la sede del gobiernu soberanu, Andecha Astur cellebrólu l'añu pasáu en Tarna otru llugar símbolicu nesti casu pola resistencia contra'l facismu y onde se colocó un monumentu d'alcordanza. Nel Puertu Tarna hai programáu un percorríu poles llinies defensives del exércitu asturianu p'acabar cola ascensión al picu Abedular (1.813 m.).

Yá a les 14:00 hores va cellebrase un actu políticu cola intervención de voceros d'Andecha Astur y de Darréu, pa dempues rematar la xornada con una espicha popular.

Pal actu, Anddecha Astur pon un autocar que va salir de Xixón a les 8:30 hores. Plaza l'Humedal y va pasar per Noreña (9:00 h. L'Apeaderu), La Felguera a les (9.30 h. Parada Cabranes) y que va llegar al Puertu Tarna pa les 10:30 hores.

Pa más información y p'apuntase a l'actividá: info@andecha.org

Fonte: Infoasturies

La plataforma ciudadana "Democracia p'Asturies" convoca un Conceyu Abiertu esti vienres en Llangréu.

La iniciativa ciudadana "Democracia p'Asturies" llama a participar a tolos ciudadanos que tean interesaos a un conceyu abiertu esti vienres 27 d'agostu na Casa la Cultura de Sama de Llangréu. El conceyu abiertu sedrá de magar de les 19:00 hores nel aula 1 de la mesma. La Casa la Cultura Escueles Dorado s'asitia na Cai Dorado.


Esti conceyu abiertu quier ser un puntu d'alcuentru ente ciudadanos/es sensibilizaos cola situación pre-democrática que carez el país, seyan militantes de coleutivos o non. La mayor razón d'entamar esti conceyu abiertu ye axuntar fuercies de cara a la manifestación convocada esti 8 de setiembre n'Uviéu ya intercambiar posiciones y postures alrodiu d'esta convocatoria. Por otru llau, tamién se quier afondar en nueves formes de trabayar dende "Democracia p'Asturies/Democracy for Asturies" y entamar con nueves dinámiques de trabayu y aición política dende la plataforma.

Los/es ciudadanos/es que participamos y sofitamos esta iniciativa llamamos a la sociedá asturiano a acudir a esti aconceyamientu, pues vemos perimportante l'axuntar voluntades y facer un analís conxuntu de la situación de la plataforma y de la rialidá sociopolítica d'Asturies.

Fonte: www.democracyforasturies.blogspot.com

La Pantoxa nun viende...lo que-y paguen...

La organización previera un "llenu total"

Pesie al maquillaxe de dalgunos medios, lo de La Pantoja y Moreno en La laboral nun se pue calificar más que de chascu y pa llegar alpenes a la media entrada, Moreno, nuevu promotor artísticu del centru cultural, convidó, namás y na menos que a 600 persones. Según El Comercio, hebo 1500 persones, según La Nueva España unos mil pagaron entrada a les que se sumaron 600 convidaes, La Voz fala de algo más de media entrada con invitaciones incluyíes. L'aforu total del eventu yera 2.600 espectadores.

L'eventu pesie a nun ser pa nada esitosu tuvo un ampliu seguimientu de los medios ocupando páxines escrites y minutos en televisión y radio abondo, tanto de promoción como de difusión d'un éxitu inesistente. Más cuando la propia organización del conciertu, la promotora madrilana de José Luís Moreno, de la tonadillera previera y garantizara un "llenu total", dalgo que quedaron lloñe d'algamar nin con tol sofitu mediáticu, nin nun Xixón enllenu turístes.

"Lo más grande en Zarcuela", ye'l prósimu eventu programáu pola productora que, según el propiu Moreno, quier convertir La llaboral nun "Zara de la cultura".