Trenta años del 23-F

Tamos viviendo’l trenta aniversariu’l güelpe d’estáu del 23 de febreru. Si hai una fecha bien presente na memoria dende la muerte de Franco, esa ye la del 23 de febreru de 1981. Los que la vivimos siendo entá mui mozos (yo tinía ventiún años) pensábamos qu’aquella muerte taba ya mui lloñe, como na nueche los tiempos, pero nun yera asina. Namái pasaren cinco años y la mayor parte de lo qu’entós llamábamos “poderes fácticos”, los que constituín de verdá’l “Poder” con mayúscula taben tan vivos como enantes. Nun yera’l primer sustu que llevábamos pero sí que fo’l más espectacular ya’l que pudo saldase con un bañu sangre si daquién d’aquel pelotón de guardies civiles perdiere los nervios.


Ye verdá oficial qu’aquella tarde-nueche d’iviernu, dempués del miéu y la coruxía, la historia diera un saltu y la democracia consolidose nel reinu d’España. Diz la versión oficial que’l fracasu’l güelpe abrió la puerte a un nuevu exércitu y a una nueva sociedá, de móu y manera qu’elli zarraba la transición, dando pasu a un gobiernu prácticamente provisional y a l’alternancia ensin conflictu un añu más sero, cuando’l PSOE ganaba les ellecciones con mayoría absoluto.


Ye verdá que’l 23 de febreru de 1981 supunxu un saltu, pero yo camiento que polo contrario. La transición finaba, no pol fracasu’l güelpe sinon, mui a la contra, pol so trunfu. La sociedá española que nacía d’aquella nueche de tricornios y transistores yera más medranosa, más plana, más acomplexada y más apolitizada que la de dos díes enantes. La sociedá nun se fixo más democrática sinon más acomodaticia.


Echar una güeyada a cómo se llegare a situación tala nun ta de más. El xeneral Franco dexara “amarrao y bien amarrao” la custión, sabeor como yera –ye hora d’entamar dicir que’l gallegu paticurtiu nun yera dengún babayu inorantón- que la monarquía nun diba poder caltener el modelu de 1939 y que la salía democrática yera la única posible. Lo “amarrao” nun taba en caltener el franquismu, sinon en construyir una democracia non participativa que nunca rompiera llazos col franquismu mesmu. Lo amarrao consistía nel escaecimientu de tolo anterior a la guerra civil. A los franquistes dexábase-ys la manda de que nun punxeren pilancos, col compromisu de que nun diben ser sometíos a un xuciu responsabilidaes como los sos compinches alemanes, italianos ya inclusive portugueses. Y a los comunistes diben dexalos participar siempres que s’engodollaren na bandera borbónica y permitieren que los muertos de la república y de la posguerra quedaren azotaos peles cunetes y nes foses comunes de los camposantos. ¿Y los socialistes?. Esos, ensin problema: yá pertenecíen al réxime dende los caberos sesenta. Yá fueran igual de rastriegos con Adefonso XIII, participando nel gobiernu de Primo de Rivera. El borbonismu de los socialistes ye patolóxico. Y sigue siéndolo: si un día se custiona la monarquía toi seguru que’l partíu más borbónicu va ser el PSOE. Por cierto, que yo poco lluché porque tinía diecisiete años cuando morriera’l dictador. Fixi lo que pude ya onde pudi, que fora más bien poco. Pero sí ye verdá que na facultá onde estudié (la más politizada de Madrid) nunca conociera a naide’l PSOE. Pero agora resulta que xente de la mio promoción y d’otres dos o tres anteriores tan, a lo que paez, enllenes de combatientes antifranquistes que güei son altos directivos del partíu de Pablo Iglesias.


Nel 1977, cuando les primeres ellecciones, hebo total llibertá… Eso dicen, pero nun ye verdá. Nun pudo presentase naide a la esquierda’l PCE nin naide que llevara la “r” de “republicanu”. Nun fora llegalizada Izquierda Republicana, nin Esquerra Republicana de Catalunya y nin tansiquier Alianza Republicana Democrática Española (ARDE), de centru-drecha. Con ello buscaba’l neofranquismu que tol esquierdismu cayera pa la macona’l PCE y la memoria republicana pal ocháu’l PSOE. Agora, bona verdá ye que tolos partíos faxistes, inclusive los que practicaben la violencia armada, pudieron presentase. Y saliera bien la cosa.


Pero nun contaran nel amagüestu cola fuercia’l nacionalismu. Creyíen controlaos al PNV y a CIU. Pero ye qu’había otru nacionalismu nuevu, estremáu del primer nacionalismu democristianu y pactista. Nun yera namás qu’ETA o Terra Lliure, sinon que yera un movimientu emerxente que diba dende la ERC illegal nel entamu, a la UPG de Galicia, el MPAIAC de Canaries o’l mesmu CNA d’Asturies. Y too esi movimientu espardiera pente 1979 y 1981.


Tampoco cuntaron con un movimientu obreru non obediente a UGT y CCOO, simplayos títeres del PSOE ya’l PCE en tou esti procesu. Dende sindicatos nacionalistes como LAB o INTXG hasta la vieya CNT, pasando por esperiencies autoxestionaries impresionantes n’Andalucía y por potentes cooperatives en Cataluña, Asturies ya’l País Vascu, poníase en custión un día sí ya otru tamién aquel pautu neofranquista.


Y taba dempués la mocedá, una mocedá que yera ñeta de los afusilaos pol nacionalcatolicismu, una mocedá que yá nun tinía’l miéu de casa, aquella llerza de nun falar, de “nun metese”. Aquella mocedá taba esperando que, dempués de Franco, aportare la democracia, pero la democracia de verdá y non el sucedániu que-ys regalara Torcuato Fernández Miranda y Xuan Carlos I. Aquella mocedá peleara colo poco que tinía y cuntiando colos pocos que yeran –eso de que cientos de miles combatieran al franquismu ye una mentira noxante- por otra cosa.


Ya nesti panorama españó’l 23-F. A mi les histories conspiranoiques nun m’importen un res. ¿Quién taba implicáu?. Pa mi ta claro: parafrasiando al clásicu castellán, “del rei abaxo toos”. El 23-F yera polo qu’allampaben el rei, el PSOE, el PCE, la UCD y AP. Tamién lo queríen los banqueros, el PNV y CIU. Y, por supuesto, el gobiernu norteamericanu que taba peresmolecíu pola oposición al ingresu na OTAN d’una ciudadanía mui antiimperialista y, al empar, d’un exércitu franquista mui autárquicu y antiyanqui.


Y Tejero entró nel Congreso y Milans del Bosch sacó los tanques a la cai. Y nun pasó nada porque nada diba pasar sacantes que, como yá dixe, un par de guardies civiles se punxeran nerviosos o Tejero decidiere pasar a la historia de los héroes hispánicos. Esi yera l’únicu riesgo, que delles persones camudaran en “kamikazes”. Pero nin tansiquier eso fixeran. Inclusive dende’l puntu d’agüeye militar aquello nun tuvo nin migaya d’heroismu.


El 24 de febreru –ye una forma falar- España entró na OTAN, aprebáronse los mayores recortes llaborales dende la muerte de Franco, los nacionalistes del PNV y de CIU arrugáranse bien arrugaos y los movimientos sociales foran reprimíos política y socialmente, amás de ser criminalizaos por una sociedá acoyonada que pensaba que yeren los culpiables de que los militares torgaren la transición democrática.


Van trenta años. El güelpe trunfó con claridá. Agora, como pa cellebralo, pretenden acabar colos drechos llaborales que queden, coles más básiques llibertaes públiques y col estáu de les autonomíes. Nun ye casualidá. El reinu d’España, un cenciellu protectoráu económicu como bien diz el PP (qu’en nada va arrepentise d’eses pallabres porque seguirán siendo verdá cuando gobierne Rajoy), ye un exemplu de “democracia cleptómana representativa” que namás sobrovive sobro la corrupción y qu’entá tien unes cuantes decenes de miles de desapaecíos a los que-ys ñeguen, cuando menos, cristiana sepultura.

David M. Rivas

¿¿¿¿¿¿¿¿Como están usteeeeeeddeeeeeeeessss ??????

Concentración contra la esplotación llaboral esti vienres a les 20 hores n'Uviéu

Concentración contra la esplotación llaboral esti vienres a les 20 hores n'Uviéu
Esti Vienres 25 a les 20 hores la CSI convoca una concentración contra la empresa OUTDOOR XPRIME, xestora del recintu publicu conocíu como'l "Palaciu de los Neños" d'Uviéu (Parque d'Iviernu). Esta empresa vién exerciendo con total llibertá l'acosu a los trabayadores y la violación de los sos derechos llaborales. N'actualidá una trabayadora alcuentrase de baxa por mor de la persecución sufrida al denunciar estes irregularidaes ante les inspecciones de trabayu.

Manifiestu fundacional de Conceyu Abiertu y vidiu de la presentación.

CONCEYU ABIERTU somos un grupu de ciudadanos procedentes de distintos ámbitos políticos, sociales, sindicales, culturales y de movimientos populares de diversu tipu, que conscientes de la ineficacia de les polítiques d’anguañu y de la gravísima crisis permanente que sufre la sociedá asturiana, consideramos que llegó'l momentu de buscar nueves maneres de facer política entamando un movimientu de reconstruición nacional y social dende la base.

Denominamos precisamente al nuesu proyeutu como CONCEYU ABIERTU pa reivindicar esta institución de la tradición comuñal asturiana como una ferramienta coleutiva que nel momentu presente tien que sirvir pa sumar voluntaes, y que nel futuru tendrá de ser la estructura de base d'una Democracia participativa n’Asturies.

Les persones qu’integramos CONCEYU ABIERTU vamos a trabayar pa desbloquiar l'actual situación promoviendo nueves dinámiques d'organización y aición dende l’isquierda soberanista. Nesi sentíu apostamos pol municipalismu participativu como garantía d'una democracia plena y del control popular de la xestión institucional. Dende CONCEYU ABIERTU manifestamos que:

1º- La situación de crisis social, económica, identitaria y política que vivimos n’Asturies ye tan grave que resulta imprescindible que toos y toes faigamos un esfuerzu pa superar el fraccionamientu y la desmovilización esistentes. 2º- Hai una clase política apoltronada que cola so xestión corrupta y clientelar (PSOE, IU y PP) subordina los intereses coleutivos a los sos oxetivos particulares. Desiximos un cambiu n’Asturies protagonizáu necesariamente pol conxuntu de les clases populares.

3º- El paru, la emigración obligada de miles d’asturianos cada añu, l’emprobecimientu y la frustración del pueblu, ta direutamente prevocau pola destruición de los seutores productivos de la nuesa economía, como consecuencia de polítiques planificaes dende fuera d’Asturies. Ye preciso entós l’entamar un procesu de cambiu estructural col enfotu d’algamar un modelu sociu-económicu ecolóxicamente sostenible, realmente productivu, autocentráu na realidá específica d’Asturies y al serviciu de los intereses de la mayoría social.

4º- La ñegación y aniquilación de los ellementos culturales que configuren la nuesa identidá como nación hestórica y la non oficialidá de la llingua asturiana, son la preba del menospreciu al que nos tienen sometios los nuesos gobernantes, cola única fin de que nos avergoñemos de lo que somos. CONCEYU ABIERTU caltién qu’un pueblu ensin autoestima, ye un pueblu ensin voz nin futuru.

5º- Ye perimportante desendolcar un procesu de rearticulación coleutiva dende los conceyos afitando un proyeutu de renovación política p’Asturies al traviés de la creación d’una base social que lu pueda sostener nel tiempu.

6º- Les constantes agresiones al entornu natural (sobreesplotación del territoriu, contaminación, especulación urbanística, usu de elementos cancerixenos, política de cementu...) faen que sea necesario implicase activamente na defensa ecolóxica del nuesu territoriu, lluchando pola recuperanza del mediu ambiente y diendo a la escontra dafechu de cualesquier sistema productivu sofitáu na esplotación irracional de la natura, del xorrecimientu cuantitativu de la produición col únicu finxu d’acumular beneficios económicos y del fomentu del consumu escomanáu. Puxaremos poles tribes de trabayu y produición sofitaes nel respetu de los valores naturales y paisaxísticos, na renovabilidá de los recursos naturales y nel caltenimientu de la calidá de vida comu padrimoniu a tresmitir a les futures xeneraciones.

El movimientu ciudadanu CONCEYU ABIERTU, naguando pola ellaboración dende abaxu de nueves metodoloxíes, dinámiques y ferramientes polítiques a curtiu y llargu plazu, opta por estructurase como una rede de plataformes asamblearies d'ámbitu llocal.

El PSOE presiona a la xusticia pa que lliberen a los suyos

El secretariu xeneral del PSOE de Xixón y conceyal, José Manuel Sariegu, pronuncióse ayeri a favor de la escarcelación del ex conseyeru d'Educación, José Luis Iglesias Riopedre, en prisión comunicada y ensin fianza dende'l 25 de xineru per decisión de la xuez qu'instrúi la operación Amoria». Sariegu reconoz qu'el so pidimientu ye «incorrecta», pero demanda «qu'acabe esta especie de prisión preventiva pa un home vieyo y enfermo». El políticu xixonés ye'l primer dirixente del PSOE que pide abiertamente la escarcelación de *Riopedre.

El pronunciamientu públicu de José Manuel Sariegu llega en víspores de que Riopedre sía sometíu a un nuevu exame médicu sobre'l so estáu de salú y tres díes primero que'l presidente de la Sala Octava de l'Audiencia, con sede en Xixón, decida sobre'l recursu presentáu pol abogáu defensor del ex conseyeru, Sergio Herrero, contra l'autu de prisión preventiva alcordáu pola maxistrada Ana López Pandiella, qu'instrúi la operación Amoria».

«Sientolo. Nun aguanto más la estancia de Riopedre na cárcele, soterráu baxo un sumariu secretu. Nun lo entiendo», empecipia Sariegu un artículu nel que pide de forma esplícita que'l conseyeru d'Educación salga llibre. «Y escribo dende la corada, a sabiendes de la incorreición política que cometo», diz. El secretariu xeneral del PSOE xixonés, que va acompañar a Javier Fernández na llista a la Xunta Xeneral del Principáu, atribúi l'actual situación del ex conseyeru «a una desamarrada roxura xusticiero malo d'entender, que zarró a un septuaxenariu enfermu en Villabona». Amás de Riopedre, la xuez tamién alcordó l'ingresu en prisión del so «númberu dos», María Jesús Otero, y de la xefa de serviciu de la Conseyería d'Alministraciones Públiques, Marta Renedo. Sariegu diz confiar y respetar el sistema xudicial, pero reclama que «xueces y fiscales actúen como integrantes d'una comunidá determinada». Y tamién pide que se tenga en cuenta «al personaxe, la so trayectoria, la so redolada, la so vida pa ser precisamente más xustos». El secretariu xeneral de los socialistes xixoneses reconoz que nun puede «presumir d'oxetividá» n'este caso pero, diz, «quiero qu'acabe esta especie de prisión preventiva pa un home vieyo y enfermo, como voi querer que lo conderguen si demuestra la so culpabilidá».

El PP de Xixón denunció selmanes atras que la muyer de Sariego trabaya nuna de les empreses investigaes na operación Amoria». El conceyal y dirixente del PSOE decidió llevar al Xulgáu a los populares por venceyar a la so muyer cola trama de corrupción.

Últimos díes p’apuntase al cursu d’asturianu en Xixón

El CUPA ta mui contentu cola participación ciudadana nesti cursu que yá supera los quince inscritos a falta de más d’una selmana pa la fin del periodu d’inscripción

XIXÓN, 22/02/2011

El Conceyu Universitariu pol Asturianu (CUPA) tien abiertu’l plazu p’apuntase al so I Cursu Básicu d’Asturianu del CUPA, una esperiencia formativa qu’entama en collaboración cola Academia de la Llingua Asturiana y Caxa Rural que va celebrase nel conceyu de Xixón.

El cursu, que se va facer na sede del Conseyu de la Mocedá de Xixón (Avda. Manuel Llaneza 68), va entamar na primer selmana de marzu y va cuntar con 35 hores llectives.

L’horariu plantegáu ye los llunes y miércoles de 19 a 21 hores.
El preciu de la inscripción ye de 30 euros, incluyendo los materiales necesarios pa llevar alantre’l cursu, como’l manual “Xeitu”, que va sirvir de guía pal cursu y qu’asoleyó l’Academia de la Llingua Asturiana.
Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, hasta’l próximu llunes, 28 de febreru de 2011.
Dende’l CUPA animamos a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura asturianes.

Conceyu Abiertu preséntase como movimientu popular dende la base y dende los conceyos.

Estructúrase en plataformes asamblearies d’ámbitu llocal y apuesta pol municipalismu activu.

El Salón d'Actos de la Biblioteca Xovellanos de Xixón foi escenariu de la presentación de Conceyu Abiertu y del so manifiestu fundacional. El nome de Conceyu Abiertu vindica esta institución de la tradición comuñal asturiana “como una ferramienta coleutiva que nel momentu presente tien que sirvir pa sumar voluntaes y que, nel futuru, tendrá de ser el pilpayu d'una Democracia participativa n’Asturies”.

Conceyu Abiertu confórmenlu ciudadanos y ciudadanes procedentes de distintos ámbitos políticos, sociales, sindicales, culturales y de movimientos populares de diversu tipu que, “conscientes de la ineficacia de les polítiques d’anguañu y de la pergrave cris permanente que carez la sociedá asturiana”, piensen que “llegó'l momentu de buscar nueves maneres de facer política entamando un movimientu de reconstruición nacional y social dende la base”.

Esti movimientu ciudadanu nagua pola “ellaboración dende abaxo de nueves metodoloxíes, dinámiques y ferramientes polítiques a curtiu y llargu plazu” estructurándose como “una rede de plataformes asamblearies d'ámbitu llocal” y trabayando pa desbloquiar l'actual situación, “promoviendo nueves dinámiques d'organización y aición dende la izquierda soberanista”. Nesi sen, apuesta “pol municipalismu participativu como garantía d'una democracia plena y del control popular de la xestión institucional”.

Nel actu comparecieron una decena de persones promotores, pa presentar la iniciativa, énte unes 70 persones presentes na sala, interviniendo David Álvarez, Paloma García y Mariu Arbesú. Álvarez foi l’encargáu de presentar l’actu y agradecer l’asistencia a la presentación y dar pasu a Mariu Arbesú que fizo una intervención política y García que lleó’l manifiestu fundacional de Conceyu Abiertu.

Arbesú fincó na idega de l’apueste pola xunidá d’aición que “ye posible y ye necesaria tolos dies del añu y en diferentes ámbitos de llucha”, ún d’esos ámbitos, dixo Arbesú son les elleiciones, “creemos na xunidá d’aición elleutoral” y Conceyu Abiertu “ye una espresión práutica” de que dende la izquierda asturiana “tamos dimpuestos a continuar con esta propuesta. Tamos dimpuestos a ser xenerosos, a superar dogmatismos, a superar diferencies personales, a superar sigles. Tamos dimpuestos a entamar un movimientu popular ensin que nadie renuncie al so proyeutu políticu dende la Xunidá d’aición”, afirmó. Na so intervención, quixo dexar claro tamién lo que nun ye Conceyu Abiertu, “nun ye una marca elleutoral especifica pa unes elleiciones concretes” ya que pretende tener una continuidá a llargu plazu y “nun ye una organización política”, pretende ser “un movimientu popular” faciendo política d’abaxo arriba, dende la bas y dende los conceyos”.

Pa rematar , Arbesú desplicó qu’hai muncha xente organizándose yá por conceyos” pero que Conceyu Abiertu entama “cola voluntá de dir medrando como movimientu politicu, medrando como pueblu y medrando como país”.

Fonte: Infoasturies.

Tolos proyeutos, toles oportunidaes.

Ayeri en Bilbo, una multitudinaria manifestación percorrió'l centru de la ciudá col envís de facer ver al Gobiernu d'España la necesidá de pertimir q Sortu ser llegal nel procesu eleutoral. Miles y miles sofitaron cola movilización la opción de presentase a les eleiciones de la Izquierda Abertzale, anque l'Estáu nun paez que va abandonar la actitú belixerante d´un día pa otru.

La nueva marca Sortu, ñaz refugando dafechu la praxis tradicional de la izquierda patriota vasca, pero tamién paez que dexa nel so discursu l'axitación social y la tresformación social nun segundu planu. Muncha xente ta cuestionando esti proyeutu y separtandose d'el dientru d'Euskal Herria. La manifestación, de toles formes, espeyó la necesidá de dar un pasu más na superación del conflictu y dexar con garanties democrátiques presentar Sortu a les eleiciones. Pudieron vese na manifestación delles banderes d'Asturies. El tiempu dirá que va ser Sortu, que va facer el Gobiernu d'España y que van facer les bases de la izquierda abertzale. Ye perimportante que les bases tean un espíritu críticu pues paez que Sortu nun fina de conxugase col proyeutu ideolóxicu de autodetermín y socialismu pol que se lleva décades puxando n'EH.

Tamos fartos de represión

Trabayadores de Alas Aluminium y ciudadanos críticos y esmolecios retenios pola Policia d'España por defender el so drechu a trabayar y el futuru de les cuenques. La Corredoria, Uviéu, énte la visita de ZP y la corte de só.

Entrevista en F*C al blogue " Andecha Obrera".

Reproducimos equí la entrevista que'l Blogue Frayando Cadenes fexo al blogue compañeru Andecha Obrera, que ta entamando na rede anguañu. Esperemos que seya bienllegada y presta a los lleutores.

1. ¿Por qué surde "Andecha Obrera" nesti momentu? ¿Qué se quier tresmitir dende esti blogue?

El proyeutu d’Andecha Obrera entama agora poles dos grandes problemátiques del nacionalismu que tan surdiendo caberamente: el medrante anticomunismu, principalmente representáu por cierta xente que postea per Glayíu, provocáu por un odiu infundáu haza PCPE y CMC (acusaos d’españolismu xabaz, insisto, infundáu) y pol crecimientu de les opciones socialdemócrates que representen BpA y UNA que, dende’l respetu a los seutores de militancia que nun comulguen cola reforma pero busquen salíes eleutorales (que nun comparto pero, en parte, comprendo), tán faciendo dañu a la ideoloxía revolucionaria tradicional del nuesu movimientu representáu hestóricamente por CNA, ENA y AA.

2. ¿Cómo ves la bloguesfera n'asturianu? ¿Crees que la izquierda patriota asturiana tien munchu pesu dientru d'esta?

Paezme que ta medrando d’una forma ilusionante y cásique siempres dende una óptica nacional y vindicativa. Ensin embargu tornamos a lo d’enantes, ta tirando per una vía pela que nun taba y puxando por una propaganda contrarrevolucionaria.

3. ¿El blogue "Andecha Obrera" ñaz col enfotu nun pasar del ámbetu de la rede o se quier tresmitir el mensaxe a nivel de cai, foros, dende "Andecha Obrera"?


Nun creo que se vaiga formar un movimientu d’esto (rises). Sedría bono, pero nun s’espera. Paezme que yá esisten organizaciones que defienden el socialismu y l’autodetermín y, poro, nun sedría necesario pasar a mayores.

4. Como podemos agüeyar hasta'l momentu el blogue va tornar y recuperar testos de la tradición marxista revolucionario y otros más actuales nesi sen. ¿Ye esti un de los proyeutos que se propón el blogue dende un entamu?

La idea ye la d’averar a los asturfalantes la lliteratura comunista al traviés de los clásicos (Marx, Engels, Lenin, Stalin, Mao…) y de nuevos autores cola torna d’artículos y testos, amás de dalgunos de producción propia. Tamién creo que ye importante emplegalu pa la promoción d’actos y opciones polítiques asturianes averaes a la nuesa tendencia marxista.

5. Como ves la situación d'Asturies y el Pueblu Trabayador Asturianu anguañu. ¿Crees qu'hai soluciones a curtiu-mediu plazu?

Habeles hailes. Interpretando la realidá asturiana dientro d’España cualaquier partíu socialista (real) que lleve alantre l’avance de l’autonomía puede meyorar la nuesa situación, anque non iguala del too. Les llinies que más me tiren (refiriéndome a partíos políticos) son les d’Andecha Astur y del PCPE, yá que dambos tán pol drechu d’autodetermín y pol socialismu, que son los finxos que debemos tener toos y toes siempres no cimero de la nuesa torre ideolóxica. Pero tengo bien nidio que, pa min, el verdaderu oxetivu ye la formación de la República Socialista Asturiana y la consiguiente llegada de la sociedá comunista.

6. ¿Qué opinión ties de los movimientos políticos que se tán dando dientro de la izquierda nacionaliega? ¿Cómo se ve'l movimientu soberanista? ¿Crees que ye necesariu construyir espacios comunes y caltenelos?

Nel ámbetu esclusivamente nacionaliegu solo observo dos que se puedan definir d’izquierda nacionaliega (por nun dicir ún). Paezme increyible que los medios alternativos nacionales sigan tratando a PAS como una candidatura nacionalista. BpA-UNA son una coalición a observar y a tener bien en cuenta tanto pol potencial d’averamientu a la cuestión nacional que paecen tener como polos problemes que pué provocar nel nuesu movimientu l’averamientu al centru-izquierda.

Les coses nun van como debieren dala situación perprobe del País pero demientres qu’esistan les plataformes de xuntanza como l’Ensame República Asturiana y Democracia p’Asturies, refugaes pola nueva “jet-set” nacionaliega, y demientres haiga militantes concenciaos con ganes de trabayar siguiremos dando lo qu’agora son pasinos pero igual mañana son “pasonos”.

7. ¿Cómo se ven les eleiciones nacionales de 2011 dende "Andecha Obrera"? ¿Meyor mirar pa 2015?
Murniamente pemeque nun sacaremos muncho a nivel nacional anque pa opinar va haber qu’esperar a la campaña eleutoral y a les eleiciones en si. Dende Andecha Obrera tirarase siempres pola opción más d’izquierdes y más independentista qu’haiga, de momentu esi papel represéntalu Conceyu Abiertu.

8. ¿Que falla n'Asturies pa que nun cale'l mensaxe revolucionario y patriota? ¿Crees que la izquierda española y estatalista fexo muncho por confundir a la xente? ¿Crees que s'ha de combatir esta mesma coles contradicciones que produz el so centralismu que-y fai el xuegu al nacionalismu español más ranciu?

Lo murnio ye que’l discursu revolucionariu nun ta calando cásique en dengún sitiu y Asturies debiere ser de los primeros, anque equí se prefiera tirar pa Cascos o pa Rajoy. Los partíos comunistes europeos cayeron cola llegada del eurocomunismu, qu’eliminó a tres de los más grandes partíos marxistes occidentales: l’español, el francés y l’italianu (que yera’l más grande). Solo’l Partíu Comunista de Portugal ya’l KKE griegu (anque haiga que tener en cuenta exemplos como los chipriotes AKEL o’l gobiernu bielorrusu del Presidente Lukashenko) representen una verdadera vanguardia.

Respeuto al mensaxe patriota, hai esperances entovía, pero hemos de quitanos d’enrriba d’una vez por toes la fatada d’“Asturies ye España y lo demás tierra conquistao”. Somos ún de los pueblos con más argumentos hestóricos, económicos y políticos en pro de la independencia o, como mui mínimo, d’una autonomía que vaiga muncho más lloñe d’una simple federación. Si se caltuviere España habíemos de baxar la dependencia d’ella a cásique cero.

La izquierda española nun solo fexo sinón que fai por ñegar la nuesa identidá. Incluso medios hispanistas y proto ultraderechistas como’l Catoblepas (onde participen dende supuestos maoistes d’UCE fasta ultraderechistes pasando per personaxes como Gustavo Bueno, cercanu al nacional bolchevismu según ciertos análisis del so discursu) almiten que’l nuesu nacionalismu tien un potencial pergrande, amás de comparar insistentemente a Andecha Astur y a Darréu cola izquierda patriota vasca pa tentar de criminalízalo. Si de verdá nun fueremos naide como dicen ellos, el señor Areces nun se diba nin a dignar a nomanos enxamás, pero’l fechu ye que lo fai. Sabe que somos los únicos que podemos tirar abaxo’l so sistema corruptu y la única salida ye falar mal de nós y repetir consignes dignes de Jose María Pemán.

España ye un Estáu qu’apunta a desapaecer como s’acabaron los imperios hestóricos y, murniamente, la URSS, escontra los cualos naide de la dómina diba apostar. La que yera Una, Grande y Llibre, pola fuercia de la hestoria, va tornase n’otra cosa. La entruga ye: ¿sedrá’l futuru que queremos o va apaecer dalgo peor? Esi ye un llabor que nos toca a nós, los militantes.

Munches gracies por contestar esta entrevista. A siguir puxando por una Asturies dixebrá y socialista

Gracies a vós, camaraes. Un saludu socialista y asturianu.

A 17 de febreru de 2011 en Frayanco Cadenes

Esti sábadu a les 13:00 presentación de Conceyu Abiertu en Xixón.

La plataforma ciudadana Conceyu Abiertu informóde que l'actu de presentación d'esti proyectu políticu va facese’l próximu sábadu, 19 de febreru de magar les 13.00 hores nel Salón d'Actos de la Biblioteca Xovellanos de Xixón. Nél va dase llectura a un Manifiestu fundacional, esplicándose de siguío el procesu que fizo posible y necesaria la criación de Conceyu Abiertu asina como la nueva metodoloxía política que va dir desendolcando esti movimientu.

Conceyu Abiertu ta estructurándose “como una rede de plataformes asamblearies a nivel de conceyu” col oxetivu de dir arrexuntando a curtiu y a mediu plazu a toos aquellos seutores sociales de la esquierda combativa qu'apuesten pola reconstruición nacional d'Asturies como País.

Dempués del actu políticu, al que tán convidaes toles persones interesaes, va celebrase una espicha nel Centru Social L’Ayalga de Xixón.

Fontes cercanes a Conceyu Abiertu adelantaron yá a Asturnews, que Conceyu Abiertu ta incorporando “tanto a militantes d'Andecha Astur como a militantes procedentes del sindicalismu alternativu de clas y de los movimientos sociales qu'enxamás militaron naquella formación política”.

Fonte: Asturnews

Andecha Astur reclama la dimisión de l’alcaldesa de Llanes

La formación nacionalista apunta a Antonio Trevín, ex alcalde de Llanes, y a la primer edil actual, Dolores Álvarez Campillo, como culpables de les consecuencies graves que tien pal conceyu l’anulación del PXOU. Andecha pide la dimisión de l’alcaldesa.

P’Andecha Astur, la sentencia del Tribunal Supremu que torna’l recursu impuestu pol Gobiernu y el Conceyu de Llanes contra’l fallu del Tribunal Superior de Xusticia d’Asturies (TSXA) qu’anulaba nel 2007 el Plan Xeneral d’Ordenación Urbana (PXOU) de Llanes, ye “una victoria más na llarga llucha contra la vergonzosa especulación urbanística y el despotismu en Llanes qu’Andecha Astur y otres organizaciones vecinales y ecoloxistes llevamos calteniendo mientres décades”, señalen dende la formación na so páxina web. El partíu nacionalista “celebra la sentencia del Tribunal Supremu” y pide “la dimisión inmediata de l’alcaldesa poles consecuencies económiques, urbanístiques y sociales graves que van trayer les sos irregularidaes y intereses”. Amás, reclama a Antonio Trevín, delegáu actual del Gobiernu estatal n’Asturies y alcalde de Llanes nos periodos 1987-1993 y 1999-2004, “qu’asuma la so responsabilidá y dé la cara nesti asuntu”.

Tres el fallu del Tribunal Supremu, que se conoció ayeri, Andecha Astur anunció que “va estudiar la sentencia a fondu colos sos servicios xurídicos y les posibles aiciones xudiciales a tomar” en feches próximes. Hai que recordar que la sentencia del TSXA vino tres un recursu interpuestu por Andecha Astur contra los alcuerdos adoptaos sobre'l PXOU de Llanes pola Comisión d'Urbanismu y Ordenación del Territoriu d'Asturies (CUOTA) en xunetu del 2002 y abril del 2003.

Otra manera, l’Asociación de Vecinos y Amigos de Llanes (Avall), que tien interpuestu otru recursu ante’l Tribunal Supremu qu’aborda aspectos más amplios del PXOU, tamién reclamó la dimisión de Dolores Álvares Campillo.

Fonte: Asturies.com

Sigui el terrorismu patronal

Un home, de 26 años d'edá resultó mancáu en cayendo dende un quintu pisu cuando taba trabayando, na cai Francisco Eiriz, númberu 14, en Xixón, según informó'l 112-Asturies.

Según los datos facilitaos pol Serviciu d'Atención Médica Urxente (*SAMU), el mancáu presentaba, por cuenta de más pruebes y hasta nueva valoración médica,*politrauma de calter reserváu. L'home que foi atendíu pol equipu médicu de la UVI-móvil de Xixón foi treslladáu al Hospital de Cabueñes.

El Centru de Coordinación d'Emerxencies recibió l'avisu, dende la Policía Nacional, a les 11.44 hores. Según indicaben un home que taba trabayando na rehabilitación d'una fachada d'un edificiu cayérase d'un andamiaxe, dende un quintu pisu.

Según esplicaron a los sanitarios la cuerda del arnés que llevaba puestu'l mozu rompióse, al cayer, cuando s'atopaba al altor del tercer pisu.

Lo que pasa por nun reconocer la oficialidá de la llingua

La Conseyería d'Educación y Ciencia d'Asturies decidió nun convocar esti añu oposiciones d'ingresu al cuerpu de Maestros d'Infantil y Primaria y asina lo comunicará formalmente esti martes, día 15 de febreru, al Ministeriu d'Educación, como s'acordó na última xunta de la Comisión Xeneral de Personal.

L'Alministración educativa asturiana adoptó esta decisión en función de les perspectives que se constataron nel restu del país, según indica la Conseyería.

Nel contestu nacional, la mayoría de les comunidaes autónomes refugaron la convocatoria d'oposiciones, nun siendo aquélles que tienen llingua propia oficial y onde los procesos selectivos suponen una criba inicial pa los aspirantes procedentes d'otres autonomíes.

Según el Gobiernu autonómicu, otru de los factores determinantes a pa tomar esta decisión ta "nel eleváu costu que supondría una convocatoria nes circunstancies actuales". Ello ye que "puesto que nun se van celebrase oposiciones na mayor parte de les comunidaes autónomes, la concurrencia ante una posible prueba n'Asturies sería mui elevada y les places a cubrir escases, porque que se llendaríen namás a cubrir la tasa de reposición, asitiada nun 30%".

"La unión de toes estes circunstancies desaconseya la convocatoria d'oposiciones pal próximu mes de xunu", argumenten dende la Conseyería d'Educación y Ciencia

¿ Hasta cuando vamos confiar nel sindicalismu capitalista español ?

La plantiya de Barros acepta'l recorte énte l'amenaza de zarru de Duro Felguera. El 31% de la plantiya votó a la escontra d'aceptar el recorte pesie al ultimatum de DF.

Los mayoría de la plantiya del tallerón de Barros aceptó la última propuesta de Duro Felguera pa la factoría llangreana qu'inclúi un recorte de 75 puestos de trabayu. Nuna asamblea de más de trés hores, los trabayadores decidieron abrir otra vez calces de negociación cola compañía tres l'ultimatum col que menanciaba col pieslle dafechu.

L'asamblea desendolcóse nes instalaciones de CC OO del Nalón en Llangréu y los trabayadores decidieron, por 68 votos a favor, 33 en contra y 6 abstenciones, reabrir negociaciones con Duro Felguera «tomando como base la última propuesta de la empresa», que, nun principiu sedría aceptada «con condiciones». Aceptaríen asina dexar la plantiya en 69 persones, prexubilaríense 35 empleados; tramitaríase la baja por incapacidá a nueve y otros nueve sedríen traslladaos a centros de trabayu n'Asturies. Amás, 22 trabayadores incorporaríense definitivamente a las filiales de Duro a las que ya foren treslladaos temporalmente

Esta selmana la empresa afirmó que taba dimpuesta a zarrar directamente el taller de Barros si no se seguía coles negociaciones. «Podemos calificar directamente la so actitú como terrorismu patronal, chantaxea a la plantiya non abonándo la so paga cuando'l grupu empresarial tuvo esti añu 107 millones de euros de ganancies», señaló Pablo Barroso del Comité d'empresa.

El Supremu desestima tolos recursos contra l'anulación del PXOU de Llanes

Una sentencia de la sala de lo Contencioso-Alministrativo del Tribunal Supremu decidió desestimar el recursu interpuestu pol "Principado" y el Conceyu de Llanes contra la sentencia del Tribunal Superior de Xusticia d'Asturies de 2007 qu'anuló el Plan Xeneral d'Ordenación Urbana tres un recursu xudicial d'Andecha Astur.

El Supremu decidió tornar tolos motivos de casación alegaos y declaró que 'nun hai llugar' a los recursos de casación interpuestos pola Xunta de Compensación del Plan Parcial S.A.O.3 'La Portiella-Pancar', la Xunta de Compensación del Plan Parcial 'La Huertona', el Principáu d'Asturies, el Conceyu de Llanes, y la Xunta de Compensación del Plan Parcial 'La Talá', contra la sentencia de la TSXA. Contra la sentencia nun cabe recursu ordinariu dengún.

Foi'l 11 d'abril de 2007 cuando la Sala de lo Contencioso Alministrativu del Tribunal Cimeru de Xusticia del Principáu d'Asturies (TSXA) anulaba'l Plan Xeneral d'Ordenación Urbana de Llanes (PGOU) por non afaese al ordenamientu xurídicu'. El recursu xudicial foi presentáu pola formación nacionalista Andecha Astur contra l'alcuerdu del 10 de xunetu de 2002 adoptáu pol Plenu de la Comisión d'Urbanismu y Ordenación del Territoriu d'Asturies (CUOTA), al igual que l'alcuerdu de dichu Plenu de fecha de 15 d'abril de 2003, consecuencia del anterior, relativu al Testu Refundíu del PGOU.

FONTE: Infoasturies

N'Ast entama col Voluntariáu Llingüísticu

El voluntariáu llingüísticu ye una actividá empobinada a qu'aquelles presones que nun saben falar asturianu, o que nun tienen posibilidá d'emplegalu na so vida diaria pola situación de marxinación y represión llingüística que carecemos n'Asturies.

Lo que se pretende con esti voluntariáu ye qu'estes presone puean ponese en contautu con voluntarios colos que falar n'asturianu, de tala miente que nunos casos deprendan la llingua de forma efeutiva, y n'otros casos, puean recuperar el vezu de falar n'asturianu.

Los voluntarios destienen una horina a la selmana (demientres un mínimu de 10 selmanes) a charrar con presones que quieran deprender o prauticar l'asturianu con normalidá n'estremaos contestos sociales.

Ser voluntariu requier un esfuerzu curiosu, darréu que supón invertir un númberu d'hores pa dar sofitu a una presona pa que deprenda asturianu. Amñas el voluntariáu acarreta la participación nel entamu d'estremaes actividaes que pretenden dar a conocer aspeutos de la rialidá asturiana.

N'Ast abre la posibilidá de participación a toes aquelles presones que tean enfotu en participar, ensin denguna esixencia académica pa participar, namás la capacidá d'usar un asturianu correchu. En tou casu les presones que s'apunten asisten a un cursu de formación enantes d'entamar la so actividá, poniéndose-yos a la so dimposición materiales y recursos (guíes, vocabularios, páxines ueb, ect.) que resulten de gran utilidá.

Pa participar nesti proyeutu: nast.oficialida@gmail.com

Fai! entama la proyeición de “Film Socialisme” en V.O.S.A.

El 18 de febreru la organización d’izquierda independentista, Fai! Asturies, proyeuta por primer vegada n’esti País y con sotítulos n’asturianu el caberu filme de Jean-Luc Godard.

Faen agora 80 años del nataliciu del cineasta francés, el cualu foi mui importante pal avance del socialismu en Francia y nel mundiu, qu’estendío en midida dalguna les idees marxistes ente les mases de cinéfilos nos años 60-70 especialmente.

L’actu va consistir primero nuna charra fecha per parte del compañeru Sergio Naves, na que falaremos de la trayectoria de Godard, de la Nouvelle Vague y de la so trayeutoria como militante maoísta.

Depués daremos pasu a la proyeición, en versión orixinal y sotitulada n’asturianu, a lo que-y siguirá un alderique.

La entrada ye de baldre y tais toes y toos convidaos. El llugar escoyíu ye'l Centru Social Sestaferia (c/ Joaquín Alonso Bonet, 3 (Barriu'l Fomentu, Xixón)).

Acosu llaboral nel "Palacio de los niños" d'Uviéu

Un grupu de trabayadores, familiares, amigues, y ex-compañeres concetróse esti sábadu delantre del "Palaciu de los Neños", pa denunciar la precariedá llaboral y les irregularidaes que sufren tantu madres y padres como'l personal del centru.

El "Palaciu de los Neños" construyose nun terrén públicu y dispon d'un gran equipamientu que costó alredor de 9 millones d'euros. Dempués apurrióse a una empresa privada, Outdoor Xtrm, que consiguió que'l conceyu abone les sos factures de lluz y agua, amás de 120.000 euros al añu n'entraes y concesiones pa eventos como San Mateo, L'Ascensión... Grandes empreses y multinacionales como Coca Cola, FCC o Prenatal tienen alcuerdos con ellos, sicasí'l preciu al públicu nun ta a la mano de cualesquiera. Rescampla que tou esti dineru nun se va nel sueldu de el monitores, pués mientres los usuarios paguen hasta'l peracabo minutu pola diversión de los sos fíos la empresa nun paga nin un minutu de más a les sos trabayadores, nun llegando nin a 6€ la hora de salariu; a lo qu'hai qu'añader qu'el 60% de les trabayadores namás son contrataes por dos o tres díes a la selmana.

Daños nel vehículu del representante sindical de la CSI

Acoso pela parte de la mafia sindical nes eleiciones en Xixón Fabril

El vehículu del representante que la Corriente Sindical d'Izquierda unvió como Apoderáu a guardar les elecciones en Xixón Fabril, sufrió dellos desperfectos: les ruedes fueron pinchaes y parte del vehículu pintáu cuando s'atopaba aparcáu dientro del recintu de la mesma fábrica.

Los fechos asocedieron alrodiu les 6:30 hores de la madrugada, media hora dempués de qu'entamara el turnu la mañana. Tratase del vehículu de Francisco S.I, que foi delegáu sindical de la CSI. Mientres años caltuvo una práctica sindical reivindicativa, contrariu a la proliferación d'hores estraordinaries y otres polítiques empresariales pocu o nada favorables al conxuntu de el trabayadores.

A la situación de precariedá llaboral, de paru y de retayos sociales ye necesariu añader tamién la represión "interna” qu'el mesmu sindicalismu mariellu paez tar dispuestu a faer pa caltener los sos privilexos