Asturies, dizlo tol mundu

Los retayos económicos duplicarán la cayida de la economía y l'emplegu n'Asturies

Según un estudiu de Funcas.

La Fundación de les Caxes d'Aforros vien de facer un nuevu estudiu pa l'actualización de les previsiones asoleyaes pol organismu a finales de 2011 respeuto a les previsiones económiques globales d'Asturies pal añu 2012. Según los datos d'esi primer estudiu, la mengua del Productu Interior Brutu asturianu taba estimáu nel 0,7%, demientres que la cayida nel mercáu llaboral prevista yera del 0,5%.

Coles nueves cifres, la mengua nel PIB qu'estima Funcas ye del 1,8%, más del doble que va pocos meses, demientres que la cayida nel mercáu llaboral algamará un retrocesu d'un puntu, esautamente'l doble de lo previsto. D'esta mena, la causa principal son los retayos, en primer términu del gobiernu estatal, cifráu en más de 1.000 millones d'euros, y en segundu términu del gobiernu asturianu, que según lo desplicao polos téunicos de Funcas, si'l gobiernu estatal obliga a cumplir el techu de déficit del 1,5% deberá menguar el so gastu n'alrodiu de 500 millones d'euros.

Fonte: Infoasturies.net

URXENTE: Concentración. Mañana, miércoles 14. 11 h. Xulgaos de lo penal de Natahoyo. Xixón

Xuicio penal contra militante de la CSI por denunciar la precariedá nel Bar Business

Mañana, miércoles 14 de marzu va cellebrase una concentración a les 11 h nos xulgaos de lo penal de Xixón pa denunciar la clara vulneración de derechos sofrida por Marcu A., delegáu de la CSI.
Axentes de la Guardia Civil apurriero...n-y esta mañana una comunicación na que se-y informaba, con menos de 24 h d'antelación, de la cellebración d'un xuiciu penal, nel que los propietarios del Chigre Business denuncien llevantos y bilordiu. Con caracter d'urxencia, l'abogada de la CSI solicitó un aplazamientu. Sosprendentemente esti pidimientu foi refugada pol xulgáu a pesar de la manifiesta imposibilidá de preparar la defensa del nuesu compañeru. 

La CSI vien realizando concentraciones ante'l Chigre Business pa denunciar los despidos de dos trabayadores y el sistemáticu incumplimientu del conveniu de la hostelería. D'ende derívase l'intentu de los empresarios de revertir l'acusación y pasar de denunciaos a denunciantes.
Nun podemos tolerar que l'exerciciu de les llibertaes básiques se convierta en delitu penal. Mientres la patronal asturiana despide y precariza a cientos de persones diariamente, nun podemos aceptar que quienes pasen polos xulgaos sían quienes denuncien solidariamente el empeoramientu de les nueses condiciones de vida.

¡Difunde!

Esti sábadu folixa antifacista ya irlandesa.

El coleutivu anticapitalista, antifacista y antiracista Uviéu Antifa entama una folixa pa conmemorar San Patriciu esti sábadu 17 nel C.S.O.A. La Madreña

Los candidatos a rector comprométense al usu del asturianu nel logu de la Universidá d’Uviéu

Vicente Gotor y Paz Andrés, candidatos al rectoráu de la Universidá d’Uviéu, comprometiéronse col Conceyu Universitariu pol Asturianu (CUPA) al usu del idioma nel logu de la institución. Asina, ésti va ser billingüe.
Según anunció’l coleutivu, tres un aconceyamientu con caún de los dos candidatos, éstos firmaron un documentu qu’establez un programa d’actuaciones en política llingüística pa desendolcar nos años vinientes. Ente los puntos firmaos destaca’l compromisu “de diseñar y oficializar” nun plazu d’un añu y mediu “un logotipu billingüe (asturianu/castellán) de la Universidá d’Uviéu / Universidad de Oviedo, nel que dambos nomes apaezan siempres y ensin diferencies gráfiques ente les dos llingües”. Amás, nun plazu de seis meses, Gotor y Andrés van impulsar y aprobar un reglamentu de rotulación pa que tolos cartelos que sían anovaos tean nos dos idiomes, y “van reclamar con firmeza” énte’l Gobiernu asturianu y l’estatal “el reconocimientu de les categoríes profesionales de los maestros y profesores d’asturianu, que colos títulos oficiales salen formaos de la Universidá d’Uviéu”.

D’igual forma, nun plazu d’un añu, van reforciase les competencies de la Comisión de Normalización Llingüística, encargandó-y la redaición d’un Plan de Normalización Llingüística pal periodu del mandatu rectoral coles midíes que se consideren necesaries pa completar el procesu de normalización na institución. Por último, los candidatos comprométense a siguir impulsando la presencia del asturianu nes cuestiones yá llevaes alantre nel mandatu anterior. “El CUPA celebra’l consensu xeneráu alredor de les polítiques llingüístiques na Universidá d’Uviéu depués de los pasos daos alantres nestos años, anque recuerda qu’entá queden munches coses por facer pa garantizar la igualdá de dambes llingües na institución”, espliquen nun comunicáu, nel que tamién feliciten a Gotor y Andrés pol usu del asturianu na campaña eleutoral pese a qu’ésti ye tovía pequeñu.

Fonte: Asturies.com

La Xunta pola Defensa de la Llingua ufierta un cursu avanzáu d´asturianu

La Xunta pola Defensa de la Llingua Asturiana organiza un cursu d’afondamientu llingüísticu pa persones adultes de 40 hores de duración, nel que los los alumnos van poder afondar nel bon usu del idioma tanto a nivel escritu como oral, asina como nes relaciones ente llingua y sociedá.

Les clases van escomenzar el martes 27 de marzu, nel local de la organización: Conceyu Abiertu, na cai La Gascona 12, baxu A, d’Uviéu, y n’horariu de 19’00 a 21’00 hores, los martes y xueves (horariu provisional hasta concretar y consensuar cola xente matriculao).

El preciu de la matrícula completa ye de 30 euros y pa inscribise nun ye necesaria nenguna titulación o profesión concreta. Sicasí, encamiéntase a les persones que se vayan matricular, que tengan una conocencia básica de la espresión escrita y oral del idioma.

Toles persones interesaes pueden apuntase llamando al 985 22 95 53 o al 679 65 09 98, o bien mandando un mail a la direición: info@exunta.org

Amás, la Conseyería d’Educación y Universidaes acreditó’l mes de febreru pasáu a la Xunta pola Defensa de la Llingua Asturiana como entidá organizadora d’actividaes de formación permanente del profesoráu. Agora tamos a la espera de qu’esti cursu se reconoza de formal oficial y pueda proporcionar creitos homologaos de formación al profesoráu de Primaria y Secundaria a quién lu curse con aprovechamientu.

Fonte: aruelu.com

Asturies: el país nel que paez que nun pasa'l tiempu.

Videu del cantar Tamos Fartos del grupu de folk asturianu Lliberdón. El tema pertenez al tercer discu del grupu, espublizáu en 1997, y que s'entituló de la mesma manera qu'esti cantar. Nél podemos ver al grupu en directo o nel estudiu de grabación mecío con imáxenes d'una manifestación pola oficialidá de la llingua asturiana de 1996 nes cais d'Uviéu.

Autor: Colectivu Bebes Furiosos

Videu Eleutoral d'Andecha Astur

Enferbus debe dos nómines y 200.000 euros en dietes a los trabayadores

Tornen los problemes a la compañía asturiana.

La empresa d'orixe mierense Enferbus, dedicada al tresporte n'autobús al
traviés de la esplotación de delles llinies ente L.lena, Mieres y Uviéu debe a
la so plantilla de trabayadores les dos caberes nómines, situación qu'hai
qu'amestar a los más de 200.000 euros que la empresa adeuda a la so plantilla en
conceutu de dietes. Dende'l coleutivu de trabayadores denuncien que pesie a les
numberoses sentencies a la escontra del dueñu polos sos incumplimientos, ésti
nun cumple nenguna d'elles, polo que califiquen la situación d'incaltenible.

Amás, tamién denuncien que dende la fuelga que la plantilla desendolcó va
trés años, la empresa incumple los horarios llaborales y l'abonu d'hores estres
y xornaes llaborales desenrrollaes en Domingu o festivu. Sicasí, la plantilla
considera que les llinies n'activu son rentables y la situación ye frutu de la
mala xestión empresarial, polo qu'aconceyarán nuna asamblea pa decidir les
aiciones a tomar en defensa del puestu y les condiciones de trabayu de les 32
persones afeutaes.

Fonte: Infoasturies

¿D'onde vien l'ochu de marzu como Día de la Muyer?

De toes y toos ye sabíu que l'8 de marzu ye'l Día Internacional de la Muyer, pa munchos seutores reivindicáu como'l Día de la Muyer Trabayadora, amestando asina'l componente fundamental de clas y el papel importante de la muyer nel ámbitu llaboral. Por un día, toles instituciones, partios políticos, asociaciones y organizaciones alcuérdense de les problemátiques de la muyer con independencia de la ideoloxía que se tea. Ciértamente, tamién hai coleutivos n'Asturies y en tol mundu que reivindiquen esti día pero faen un gran llabor a lo llargu l'añu de cara a la emancipación social y de xéneru de les muyeres, lo que ye dignu d'aplaudir y mos enseña'l camín a tomar. ¿ Pero d'onde vien esta data como "Día de la Muyer"?

A entamos del pasáu sieglu venti los movimientos feministes d'estremáu calter medraben por tol mundu, anqu'especialmente n'Europa, con muncha fuercia. Les reivindicaciones de les muyeres dende una perspectiva igualitarista yeren oyíes polos gobernantes, anque rara vez s'influía nel poder políticu, por nun dicir nunca. La sociedá patriarcal tenía una cadarma xabaz contra la muyer y les sos reivindicaciones y munches militantes feministes fueron asesinaes, prindaes o torturaes. Entamose a tratar d'afitar un Día Internacional de la Muyer, siendo los primeros intentos el 28 de febreru y el 19 de marzu. Nun tuvieron muncho ésitu ciértamente estes dates.

L'8 de marzu ye emplegáu por primer vegada en 1913 poles muyeres ruses pa protestar contra la inminente I Guerra Mundial. Foi importante la represión que sofrieron eses muyeres na so protesta nesi 8 de marzu. Años dempués, en 1917, les muyeres tornen a salir a cai pa reivindicar los sos drechos, finar cola guerra imperialista que taben sofriendo y en solidaridá con tolos/es trabayadores de la fábrica Putilov, que 5 díes enantes dexó nel paru a unos 30.000 obreros/es. Esti 8 de marzu, nel que les muyeres ruses amosaron la so combatividá y el compromisu y solidaridá foi un dinamizador de cara derrocar el Zarismu Absolutista y facer la Revolución Social.

Tres la Revolución Socialista d'Ochobre de 1917, con un gran protagonismu femeninu, la muyer algamó'l drechu al votu, el divorciu y l'abortu. Alejandra Kollontai promovió l'8 de marzu como Día de la Muyer Trabayadora na URSS lo que algamó ensín torgues. Depués, pasu ente pasu l'8 de marzu foi adoptándose n'otros países como Día de la Muyer y el coleutivu feminista reivindicolu como tal. Paralelamente, la Organización de Naciones Unies (ONU) tardó en reconocer l'8 de marzu como Día de la Muyer más de 60 años.

La hestoria tapecía y manipulada.

Como se pue ver, la Revolución Socialista de 1917 yá tuvo un fondu calter de xéneru pa los años que trescurríen, con una mentalidá estremada a la qu'hai anguañu. El bloquéu de la ONU al 8 de marzu ye más que sinificativu y da a entender el pocu enfotu de los grandes muerganos capitalistes en reconocer la dignificación de la muyer, inda más si venía de la man del socialismu de Marx, Engels y Lenin.

Anguañu, dende los más facistes ( agora lliberales o neo-lliberales) a los socialdemócrates anti-marxistes reconocen l'8 de marzu como propiu y reivindiquen como suyes dalgunes causes del feminismu, anque siempres dende la folclorización más absoluta y con pocu envís de tresformar la realidá y superar la sociedá patriarcal, inclusu faciendo un analis que ñega la esistencia del patriarcáu. Esto mos lleva a ver que nun se pue analizar la igualdá de xéneru ensín facer enantes un analis críticu de la realidá social de división de clases esistente ya interrelacionar dambes variables.

Poro, ye perimportante l'aporte del socialismu revolucionariu a la causa feminista y a la emancipación de la muyer, y tamién sinificativu que la sociedá burguesa coles sos estructures de poder tapeza esa aportación del socialismu a la hestoria de la humanidá y de la muyer, tanto como persona como ser social. Inevitablemente, la hestoria da lleiciones y nesti casu solo podemos sacar como conclusión que queda muncho por facer pa baltiar el patriarcáu y pa ello la llucha feminista tien de tornase en revolucionaria y saber comprender el trescursu y la evolución de la llucha de clases, pues les persones, muyeres y homes, son quien tienen de decatase de que la muyer ta doblemente oprimida: como muyer y como trabayadora. Y lo que ye entá pior, nel casu d'Asturies tríplemente, como asturiana tamién tien enriba la opresión nacional.

¡Puxa la muyer trabayadora!

¡Abaxu'l patriarcáu y el capital!

Posicionamientu de Darréu énte'l 8 de marzu, Día de la Muyer Trabayadora.

Esti xueves 8 de marzu conmemórase'l Día Internacional de la Muyer Trabayadora, destacando'l gran númberu d'actividaes institucionales y populares que se desendolquen en tol planeta en pro de la igualdá de xeneru y con calter progresista y feminista inclusive. Dende Darréu creemos que ye importante siguir lluchando pola dignificación de la muyer y pola equiparación de drechos en tolos xacios col home. Cellebramos que se dean pasos nesi sen, pero dende la Organización de Mocedá Independentista Revolucionario Darréu nun podemos atalantar esta llucha ensín una llucha direuta contra'l sistema capitalista.


Nel sistema capitalista de corte neolliberal nel que vivimos, y cola situación d'opresión nacional que carez Asturies, entendemos que la muyer ta tríplemente esplotada: como muyer, como trabayadora y como asturiana. El sistema capitalista esclaviza al ser humano col envís de producir más beneficios multimillonarios pa una minoría oligárquica, les más de les vegaes, por nun dicir toes, configurada por homes. Nesta sociedá na que vivimos les persones son simple mercancía al serviciu del gran capital financieru y mercantil que mueve los filos importantes. La situación de la clas trabayadora ye inda más grave nel casu de ser muyer, yá que productu d'una sociedá entá machista y fondamente patriarcal el coleutivu femeninu ye muncho más vulnerable énte'l sistema capitalista y la so estructura de dominación social, nesti casu l'Estáu Español. Al mesmu tiempu, la muyer asturiana ve torgaos los sos drechos como asturiana, ñegando-y drechos democráticos básicos como'l drechu d'autodetermín o la oficialidá de la llingua'l país, lo que fai que tea sometía tamién, como'l conxuntu'l Pueblu Trabayador Asturianu, a la situación antidemocrática na que vive la nuesa nación.


Asina, facemos un llamamientu dende'l coleutivu políticu y xuvenil Darréu a siguir reivindicando los drechos de la muyer, reconocer el so papel na sociedá y trabayar pola so dignificación. Dende Darréu amás camentamos que la llucha feminista tien de facese dende postures revolucionaries y teniendo en cuenta la realidá sociopolítica y económica esistente. Tamién pa finar dende Darréu queremos refugar la más que previsible perda de conquistes sociales algamaes pol feminismu que planifica'l patriarcáu cola escusa de la crisis económica capitalista.

¡8 de marzu ye tolos díes!

¡Ensín la muyer nun hai Revolución! ¡Ensín una muyer llibre Asturies nun sedrá llibre!

www.darreu.org

¡Escueye un bon asesor pa salir de la crisis!

Capitalismu ye esplotación, miseria, deshumanización, aculturización y opresión nacional. ¡ÍRGUITE YÁ!

Consensu en xuncir fuercies, reflexonar y camudar coses nel soberanismu asturianu.

A la entruga planetagada nesti blogue la situación del soberanismu asturianu ¿esixe un replanteamientu y un exerciciu de fondu exerciciu d'autocrítica? la rempuesta mayoritaria ente los visitantes a esti espaciu foi que si, el soberanismu tien de marcase nueves estratexes, oxetivos, metodoloxíes y taútiques. El modelu actual ta agotáu. Esta opción na encuesta algamó un 52% de los votos. Pel so llau, un 35% entiende que lo únicu que pue salvar el futuru d'esi movimientu ye la xuntanza de les asociaciones y organizaciones polítiques del mesmu. Como podemos ver hebo disparidá nesti sen, y si bien unes persones llamen a la fonda reflexón otres creen como prioridá la xuntanza de fuercies del actual movimientu políticu soberanista y/o nacionaliegu.

El 10% creen que nun hai grandes torgues y pilancos, pues creen que non, qu'hai que camudar delles coses, pero nada estructural y que lo que fai falta ye más trabayu y compromisu. Un tímidu 2% entiende que pa nada, que'l soberanismu ta nun momentu nel que nun tien necesidá de camudar nada y que la dinámica ta siendo la afayaiza.

Col resume d'esta modesta encuesta fina este ciclu d'encuestes y en dalgún tiempu habrá más entrugues a los visitantes d'esti blogue. Agradecer la participación de la xente y esperemos qu'esti tipu de coses abran un alderique constructivu y críticu.

¡Pierde la inocencia!

Torna a medrar el númberu de paraos y paraes en Febreru

Asturies raspia la cifra de los 100.000 paraos y paraes.

Según los datos asoleyaos pol Ministeriu d'Emplegu y Seguridá Social del gobiernu estatal, la cifra de persones en situación de desemplegu nel nuesu país tornó a medrar nel mes de Febreru, con un espoxigue de 2.746 persones qu'engorden la yá abultada cifra de paraos y paraes n'Asturies. En términos porcentuales l'espoxigue foi del 2,84% respeuto al mes de Xineru.

D'esta mena, nos caberos 12 meses el paru medró nel nuesu país en 11.281 persones, lo que supón casi un 13% más de persones en situación de desemplegu. En cuantes al repartu del espoxigue nos distintos seutores económicos, el seutor Servicios rexistró 1.570 paraos y paraes más, el de la construcción 575, l'industrial 362, y el coleutivu ensin emplegu anterior 269 más. Pel so lláu, l'agrícola creó 30 nuevos trabayos.

En cuantes a la distribución de xéneru, el total de paraos y paraes, anguaño en 99.353 persones, queda repartíu en 50.137 muyeres y 49.216 homes.

Fonte: Infoasturies.net

Yá sabeis.

Concentración pol despidu de la representante de CSI en Valoriza

CSI denuncia que la empresa Valoriza caltién unes condiciones llaborales illegales nel centru xeriátricu de Los Canapés (Xeres encomendaes, horarios y calendarios llaborales...), y la trabayadora, representante sindical de la CSI, denunció eses condiciones illegales de trabayu que tan dándose na empresa.

El prósimu xueves, 1 de marzu de 2012, a les 19:00h, la Corriente Sindical d’Izquierda convoca una concentración delantre’l centru xeriátricu de Los Canapés, n’Avilés, pol despidu de la so representante sindical na empresa “Valoriza”. La empresa “Valoriza”, subcontratada pol Gobiernu nes residencies d’ancianos, vien de despedir, nel centru xeriátricu avilesín de Los Canapés, a una trabayadora de 59 años, que tien reconocida una discapacidá del 50% y con varios familiares al so cargu, ún d’ellos en silla ruedes.

La representante sindical foi despedía’l pasáu mes de xineru, cola disculpia del baxu rendimientu de la trabayadora demientres el mes anterior. Pero demientres esa dómina de tiempu, la trabayadora atopábase de baxa por un acidente trabayu, que la empresa nun quier reconocer y pretende facer pasar por una baxa por enfermedá común.

Pa la CSI, la empresa Valoriza quier "reprimir y castigar a la so representante, pola defensa de los drechos llaborales que taba realizando nel centru de Los Canapés. Nun hai dubia denguna de que, pa Valoriza, esta trabayadora ye una “torga” que quier desaniciar con un despidu, que namás se pescancia comu un actu de persecución sindical y comu’l primer pasu de la empresa nel despidu de más trabayadores y na precarización de les condiciones de trabayu".

Por toes estes razones, la CSI desixe la realmisión darréu de la so representante sindical, la recuperanza de los drechos de los y les trabayadores y la normalización de les condiciones llaborales, pa lo cualo nun va dubiar nin un solu intre en remanar tolos preseos xudiciales y de presión social que tea al so alcance.

El gobiernu asturianu comunica nuevos retayos derivaos de la prórroga presupuestaria

Afeutaos coleutivos d'enfermos y discapacitaos.

El gobiernu asturianu comunicó a delles asociaciones d'enfermos crónicos y de discapacitaos que nel presente añu los fondos destinaos a sovenciones y ayudes sufrirán un retayu del 20%, lo qu'impedirá cumplir con munches de les obligaciones y compromisos algamaos con numberoses Organizaciones Non Gubernamentales rellacionaes cola estaya afeutada. Dende'l gobiernu argumenten el retayu por mor de la prórroga presupuestaria cola que l'executivu nun podrá ampliar el presupuestu destináu a la estaya sanitaria y de bientar.

Asina, dende delles organizaciones de persones con discapacidá despliquen que taben pendientes de recibir unos 90.000 euros a repartir ente hasta 57 asociaciones pa proyeutos yá executaos, polo que pa les organizaciones implicaes ye vitar poder cuntar colos recursos procedentes del executivu asturianu, y amosen la so esmolición pola situación na que queden.

Infoasturies.net

Disparidá ente soberanistes alredor de la territorialidá d'Asturies.

Nuna encuesta asoleyada nesti blogue cola entruga ¿crees que'l territoriu que conforma anguañu'l "Principáu d'Asturies" se correspuende cola realidá territorial de la nación asturiana? y con dos items de rempuesta hebo muncha división ente los lleutores. Pesia a tar equilibráu gano'l non, ye dicir, ganó la opción que caltién que'l modelu territorial asturianu d'anguañu nun se correspuende cola realidá territorial íntegra de la nación asturiana.

Asina, un 56 % de los encuestaos y encuestaes escoyeron la rempuesta que dicía que'l modelu (territorial) ye imcompletu dafechu. Asturies ye una realidá territorial separtada en delles alministraciones. Por contra, un 43 % mos dicen que si, que los conceyos que conformen anguañu la comunidá son los qu'entienden que conformen Asturies.

Posicionamientu de Conceyu Abiertu énte'l 25 de marzu.