El camarada Fidel sobre la llucha armada.

Mubarak dimite de la Presidencia

El presidente d'Exiptu, Hosni Mubarak, dimitió y entregó'l so poder al Conseyu Supremu Militar, según acaba d'anunciar el vicepresidente, Omar Suleiman.

Namás conocese la decisión, la xente que corrompina la Plaza de Tahrir, n'El Cairu empezó a celebrar de forma enfervorecida la noticia pola que llevaben lluchando mientres 18 díes de protesta ininterrumpida.

Los cientos de miles d'exipcios arrexuntaos dende fai 18 díes na plaza Tahrir, nel centru d'El Cairu, recibieron con berros d'alegría l'anunciu.

Dempués de la decepción que provocó ayeri'l mensaxe de Mubarak, que dixo que se caltenía nel cargu pero dexaba los sos poderes al vicepresidente, Omar Suleiman, l'anunciu qu'acaba de facer ésti últimu llenó de felicidá a los exipcios.

A lo llargo del día, miles de persones concentrárense tamién frente al palaciu presidencial y a la sede de la televisión estatal n'El Cairu, calcando nel so pidimientu de que Mubarak dimitiera. Tamién hubo protestes multitudinaries n'Alexandría, la segunda ciudá del país, y n'otros puntos del país.

L'anunciu prodúxose, acabante conocese que Mubarak treslladárase cola so familia a Sharm el Sheij.

Una bona ayalga...

Semeya d'una movilización del Conceyu Nacionalista Astur, nel primeru de mayu de 1979, paez ser que en Sama de Llangréu. La imaxen s'asoleyó nel so día na revista qu'esta formación política asoleyó, la mítica revista " Asturies Dixebrá". Como se pue agüeyar el llema principal ye " Asturies pel so autodetermín", y acompanguen a esti mesmu otros como " Non al desmantelamientu del País Astur" o " Puxa Asturies socialista y dixebrá", amás d'otros en clave puramente social. Ye solliñable que pa ser una convocatoria d'eses carauterístiques, nun primeru de mayu y entamada dende'l propiu CNA namái, se ve xentuca. Nun ye una movilización masiva pero llega al poder de convocatoria y supera al de les organizaciones nacionalistes d'anguañu.

D'aquelles se pecaría d'inocencia, de faltes d'organización, de poneilo fácil al control policial de la pseudodemocracia ñaciente o de grandonismu. Pero lo que ta nidio ye los militantes del CNA, por exemplu, nun taben militando tres d'una pantalla, nun taben faciendo vaciu a naide y nun se pasaben hores y hores emporcando al vecín nacionaliego. D'aquelles la llucha taba na cai, non n'interné. Ta nidio, nun había, y que suerte pa ellos.

Anguañu asistimos al conflictu permanente ente nacionalistes, que dende l'anonimatu y con una conexión a la rede nun aparen d'engochar a otres formaciones polítiques, que consideren rivales cuando deberíen ser compañeres. Nun se dan interacciones dialectices, naide trata de convencer a naide nin pon argumentos enriba la mesa. Nada d'eso hai. Namái hai bilordios y miseries qu'asoleyar, miseries que solo ven nel güeyu ayenu, pero que nun son capaces de ver nel de so. Nun hai un mínimu de respetu y tolerancia ente patriotes, y como se repite, caun emporca a l'otru, pero naide trata de convencer a naide, nin s'amuesa un mínimu de voluntá n'ello. Caun, naide ta escluyíu, y si lo tuviere tendría un problema, tendrá los sos posicionamientos, pero una cosa ta nidia: el cainismu sigue medrando, Asturies sigue perdiendo, y los contautos ente la izquierda nacionalista solo son por cuatro foros d'internet. Muncha xente fala de que ye la policía dende comisaría, pero nun siendo sinceros naide nun cree neso, polo menos nes más de les vegaes. ¿ Somos toxs unos fios de puta o simplemente nun tenemos cultural política pa facer argumentos serios, coherente y dende'l respetu ?¿ Hasta cuando ?

Conceyu Abiertu preséntase'l 19 de febreru

El Salón d'Actos de la Biblioteca Xovellanos de Xixón acoyerá'l prósimu 19 de febreru la presentación de Conceyu Abiertu, una nueva iniciativa política afitada na xunidá d'aición dende la base y na que s'axunten persones de distintos ámbitos.

Conceyu Abiertu promoverá la formación de candidatures d'unidá popular nes prósimes elleiciones de mayu al traviés d'agrupaciones de ellectores, lo que supón una novedá nel ámbitu políticu asturianu y una apuesta pola participación de base.

La iniciativa soberanista surde del alderique entamáu estos últimos meses sobre la situación política asturiana y la necesidá d'abrir un marcu de trabayu abiertu, ampliu y plural.

Asina, el sábadu 19 de febreru, nun actu públicu en Xixón, va presentase Conceyu Abiertu, el so manifiestu y desplicarase'l por qué del proyectu y los sos oxetivos.

Fonte: Infoasturies

Irregularides nel parque eólicu de Carondio

La Coordinadora Ecoloxista d'Asturies (CEA) vien de pidir al Conceyu d'Ayande que paralice darréu'l parque eólicu de Carondio por nun tener la llicencia municipal d'obres definitiva. Según alvierte la organización ecoloxista, esti parque vien construyéndose dende va cuasique un añu y tovía nun tien "la llicencia municipal del Conceyu pa los molinos d'una altura de 106 metros".

Pa la CEA ye increible que'l Conceyu "permita la construcción de les bases de les torres, al nun tener esa llicencia, que ye perceptiva, polo que resulta clara la complicidá del consistoriu cola empresa eléctrica". El parque «afectó de manera notable a la Carreiriega de los Gallegos, un camín históricu y bien protexíu d'alcuerdu col artículu 61 de bienes protexíos pola Llei 1/2001, de 6 de marzu, de Patrimoniu Cultural del Principáu d'Asturies», denuncien los ecoloxistes que "llamenten" el papel del Conceyu y del Gobiernu permitiendo "la destrucción del nuestru patrimoniu arquelóxicu nuna zona d'altu valor natural que diba quedar afectáu de facese'l parque eólicu previstu, pa beneficiu esclusivu d'una empresa eléctrica nesti vendaval eólicu que percuerre l'occidente asturianu".

Fonte: Infoasturies

Darréu opónse al proyeutu de muséu de l'aviación en Llangréu

El Conceyu de Darréu en Llangréu fexo públicu el so refugu al proyectu de construyir en La Felguera un Muséu dedicáu a la aviación y a l'exércitu. "Camentamos que ye un nuevu despilfarru que carez d'ética y xaciu, inda más nos difíciles momentos que carez el Pueblu de Llangréu, con una situación conflictiva que nun paez llegar al so fin y unes perspectives de futuru económicu nules", espliquen. El proyectu foi presentáu de forma oficial fai unos díes col sofitu del Ayuntamientu y l'Exércitu del Reinu d'España al Círculo Aeronáutico Jesús Fernández Duro, asociación que fai d'empobinadora.

Pa Darréu ye "una nueva humildación pa los ciudadanos llangreanos y de les cuenques pues esti tipu de museos nun puen iguar la llaceria social que viven los nuesos conceyos". Esti proyectu "de calter militarista", consistiría en facer un gran muséu onde s'alcuentren les vieyes instalaciones de Metalsa, propiedá d'Arcelor-Mittal. "El muséu taría empobináu a averar l'aviación a los nuesos paisanos y paisanes, pero too dende una perspectiva militar y bélica" denuncia Darréu que tien nidio que la idega de facer un muséu d'estes característiques "nun ye natural nesti conceyu, onde nun hai dengún tipu de tradición de aviación militar".Pa la organización xuvenil trátase "d'imponer esti modelu d'Estáu militarista que ye España nos llugares del país asturianu onde menos raigañu tien l'exércitu, cuntando'l cuasi nulu puxu que tien n'Asturies".

Con too ello Darréu-Llangréu camienta qu'esti proyectu ye una "inmoralidá y un exemplu evidente de lo que quieren facer de les cuenques, que nun ye otra cosa qu'un llugar onde esplotar l'ociu como únicu recursu económicu, mentanto van pesllando tol texíu llaboral que de
verdá da puestos d'emplegu". Tratase d'una inmoralidá, despliquen, porque "nun respeta" la situación que carez el conceyu, "onde vemos como pocu a pocu la industria desapaez, y se fomenta la creación d'un museu que va dar perpocos puestos de trabayu y va costar más de 1,5 millones d'euros".Esos 1,5 millones d'euros van tener que ser desembolsaos por tolos llangreanos,"los cuales nun escoyeron de forma democrática, nin de denguna forma l'aprebamientu d'esti nuevu despilfarru museísticu" denuncia Daréu. L'alcaldesa del Conceyu, Esther Diaz, debería, según Darréu, d'avezase a sentir la voz de los ciudadanos, los cuales tan dafechamente a la contra d'esti nuevu plan de museu y quitar la costume de dar el so visto bonu a cualesquier proyectu que-y permita algamar favores electorales.

Amás, como organización de mocedá Darréu tien más razones pa espresar la so "radical negativa a esti atropellu" ya que creyen que l'espaciu onde se pretende facer el museu, allugáu cerca de Valnalón "sedría perfechu pa incrementar les infrastructures de formación llaboral o pa qu'esti mesmu suelu seya emplegáu como suelu industrial de nuevu".Asina, "como mozos y moces tamos careciendo la incertidumbre de que va ser de nós, pues les inversiones llocales solo s'invierten mayoritariamente n'aspectos d'ociu, demientres el texíu llaboral se desanicia cola complicidá de los nuesos gobernantes del Réximen( PSOE-IU-PP )". Amás, Darréu refuga "cualesquier proyectu que se vincule al exércitu español, pues caltenemos qu'esti
cuerpu militar ye una institución rancia y qu'enxamás fexo nada por Llangréu y pol país, namái que reprimir esti pueblu, poro, cualesquier espresión d'esta índole nun representa al nuesu conceyu".

Darréu Llangréu fai un llamáu a les demás organizaciones sociales, polítiques, culturales, sindicales o vecinales presentes nel conceyu a da-y la espalda al muséu de l'aviación. "Fadremos tolo posible por facer lo más popular posible la nuesa crítica radical de la murnia xestión que se
ta faciendo del Conceyu de Llangréu y de lo contraproducente d'esti proyeutu millonariu que nun va aportar nada a les ciudadanes y ciudadanos".

Fonte: infoasturies

Por una escuela asturiana, publica, laica y de calidá

L "asignatura" de Relixón perdió más de 4.000 alumnos en namás seis años nos centros públicos asturianos y eso que'l númberu d'estudiantes matriculaos aumentó en más de 6.000. La sangría d'alumnos que vive esta materia ye especialmente severa nos últimos cursos de la enseñanza non universitaria. En Bachilleratu namá consigue atraer al 15% de los matriculaos. Otra manera, n'Infantil y Primaria sigui teniendo enforma enraigono, sentando nes sos clases al 73%. Por contornes, tamién hai resultaos bien curiosos. Xixón y Nalón yá cayeron per debaxo inclusive del 50%.

Estos son los datos qu'acaba de faer públicos la Delegación d'enseñanza y Pastoral Educativa del Arzobispáu d'Uviéu, correspondientes a la estadística del cursu 2010-2011 de la matrícula de Relixón Católica.

La radiografía global Al marxe de los analises parciales, la delegación señala que, a día de güei, tán cursando Relixón Católica 75.271 estudiantes, lo que representa'l 69% de los 110.006 alumnos a los que se-yos ufierta l'asignatura. Na rede pública'l porcentaxe baxa hasta'l 57% (42.840) y nos centros de titularidá social, alcordaos y privaos, alzase hasta'l 94% (32.431). La suma de dambes redes ye la que refundia esa resultancia del 69%.

L'enclín, tal que lleva asocediendo más d'una década, ye a la baxa y la cayida aceleróse nos últimos cursos. Por casu, nos colexos públicos que dan Infantil y Primaria el númberu d'inscritos pasó del 83% nel cursu 2005-2006 al 73% de l'actualidá, ye dicir que perdió 10 puntos en namás seis años. Y en los institutos ye inda meyor, pasando del 43% al 29% nel mesmu periodu; un retrocesu de 14 puntos.


Fonte: Glayiu

Los empresarios Asturianos nun quieren que la xente estudie, y los qu'estudién que colen

El presidente de la Federación Asturiana d'Empresarios (FADE), Severino García Vigón, considera qu'Asturies puede tener «sobreproducción» de titulaos universitarios, qu'el so mercáu llaboral escarez de capacidá pa dar trabayu a tantos profesionales como se gradúen nes facultaes. «Somos lo que somos: una "rexón" con pocu más d'un millón de persones, con una estructura económica determinada y con una capacidá d'absorción que seique sía inferior a la cantidá de titulaos que lleguen al mercáu llaboral», espunxo ayeri García Vigón, al calor del nivel qu'algamó'l desempléu ente los universitarios asturianos: creció como media un 14% en 2010 y afectó a unos 8.700 llicenciaos y diplomaos.

El presidente de la patronal abogó por abrir una reflexón n'Asturies sobre'l sistema educativu, «sobre qué educación tenemos, qué educación queremos y qué educación podemos pagar». Vigón inclinase por reforzar la Formación Profesional (FP) y «poner los pies na tierra». «A toos gústanos como padres que los nuesos fíos tengan estudios universitarios, pero a ello tendríen d'aportar los meyores talentos y nun convertise nun espilfarru», señaló'l dirixente empresarial. «Asturies tien qu'analizar si la formación que s'imparte respuende a les necesidaes», dixo tamién, n'alusión a un discutiniu perenne: la relativa a la conexón ente'l sistema públicu d'enseñanza -particularmente la Universidá y la FP- y el texíu granible.

Severino García Vigón ve con esmolición que los recursos públicos utilizaos pa formar a los titulaos n'España acaben rentabilizándolos otros países, como Alemaña, cola so ufierta pa fichar universitarios españoles en paru. Pero'l presidente de FADE considera tamién que «nun tenemos de resgar nos les vestidures» pola salida de los mozos con alta cualificación pa trabayar nel estranxeru: «Alemaña ta creciendo y nós tenemos bien de titulaos nes llistes del paru; la realidá ye la que ye y na UE nun hai fronteres. Y puede resultar enriquecedor si la xente vase y vuelve con una esperiencia».

Fonte: Glayiu

L'asturianu sigue vivo en L.laciana

El Club Xeitu convoca'l tercer certame*lliterariu en paḷḷuezu*denomináu, Guzmán Álvarez, col que se va intentar revitalizar la *llingua vernácula del monte occidental ástur-*lleonesa, según la nota de prensa unviada por dicho grupu.

Esti concursu ta abiertu a tola ciudadanía polo xeneral, y esti añu va concedese un únicu premiu. Les obres van poder presentase antes del próximu día 15 de *mayu, y el fallu del xuráu fadráse públicu mientres el mes de xunetu y la entrega del premiu va tener llugar, mientres la celebración del Recital de Paḷḷuezu que se va entamar, per cuartu añu consecutivu, na Casona de San Miguel. Coles mesmes, la obra premiada va publicase nel boletín del Club Xeitu.

Los ganadores d'esti certame n'años anteriores fueron na categoría de poesía «Al Aviséu», de *Irma González-Quevedo, ente qu'en *relatu foi pa «Carta desde'l Vaḷḷe», de Guadalupe Lorenzana, que tamién consiguió'l premiu en poesía l'añu pasáu por "La sulombra d'él", ente que la *modalidá de prosa tuvo erma por nun presentase nenguna obra.

Fonte: Glayiu

El PSOE defende a los corruptos

La candidata socialista a l'Alcaldía d'Uviéu, Paloma Sainz, defendió la xestión del ex conseyeru d'Educación, José Luis Iglesias Riopedre, que mientres siete años "esllombóse pola educación na rexón, concitando'l so respetu personal y profesional".

En declaraciones realizaes a Europa Press, recordó que l'ex conseyeru, --encarceláu por presunta corrupción-- llogró elevar los recursos ministeriales penriba de lo que correspondía a la población y asitiar a Asturies como "la tercer comunidá en bonos resultaos educativos".

Sainz mostróse partidaria de que les investigaciones xudiciales que lleva a cabu'l Xulgáu d'Instrucción númberu 4 de Xixón sigan el so cursu y analícese "en fondura, en toles direcciones y sentíos" pa que se detecten toles supuestes irregularidaes y los responsables "paguen por ello". "Quiero que s'esclare too pronto, de la meyor manera posible", calcó.

Amás, y en confesando la so "sorpresa" pola detención de los que fueron ente'l 2003 y el 2007 los sos compañeros, recordó qu'Iglesias Riopedre "yera'l primeru en llegar a la oficina y l'últimu en marchar" y destacó la so "permanente disponibilidá" pa solucionar los múltiples problemes qu'afectaron siempre al departamentu.

Sainz, que se refirió al so antiguu "xefe" como una persona "con carácter", afirmó que l'apoyu del ex responsable rexonal d'Educación a lo público ta "fuera de toa duda" y encamentó repasar la so xestión y la modernización de la Conseyería "a múltiples niveles".

Siempre en relación a la conocida como 'Operación Marea', la vocera del Grupu Municipal Socialista "alvirtió del peligru" de vincular el procedimientu xudicial col llabor de gobiernu del presidente, Vicente Álvarez Areces, a quien atribuyó una "xestión amplia, bona y ambiciosa, con resultaos estupendes".

Amás, sorrayó que foi la mesma Alministración la que detectó les irregularidaes y les punxo en manes de la Fiscalía. "Paezme bien peligroso que se quiera contaminar lo que ta alredor porque ta en xuegu la lexitimidá de les instituciones y de la política, como instrumentu de llucha pa que les coses funcionen meyor", remachó.

No que se refier a Uviéu, la candidata dixo que los grupos de la oposición nun vieron tovía los espedientes municipales qu'esti xueves-yos ofreció l'alcalde, al qu'acusa de nun permitir l'accesu a la información y de "mentir".

Fonte: Glayiu.

La militancia de Darréu nel Nalón participó na manifestación d'Alas Aluminium

De la páxina web de Darréu:

Más de 2.000 persones participaron ayeri, sábadu 5 de febreru, na marcha convocada en sofitu de los y les trabayadores d'Alas Aluminium. La empresa plantegó fai unes selmanes despedir y presentar un ERE qu'afectaría a cientos de trabayadores. Mentantu, los trabayadores estes selmanes tan realizando delles aiciones reivindicatives, cola fin de ser escuchaos dende les alministraciones del país, que miren pa otru llau como ye vezu. De toos y toes ye persabio la inutilidá de PSOE-PP-IU pa plantar cara a la patronal. Por otru llau, UXT Y CCOO paez que tan recibiendo crítiques dientru'l sen de la propia empresa de Ciañu, polo que nun ye d'estrañar que nos prósimos díes llevemos una mala noticia pa colos sindicatos de sistema. Los fondos públicos naide nun sabe nada d'ellos, pero s'invirtieron cientos y cientos de millones de les antigües pesetes y nin patronal, nin políticos, nin sindicatos saben daqué.

Militantes de Darréu na Cuenca del Nalón participamos ayeri sábadu na manifestación que foi dende Sama hasta'l Parque Vieyu de La Felguera. Decidimos partipar, en sofitu a los trabayadores, col llema " Pol futuru de les cuenques", por que por xenéricu que seya, dende Darréu camentamos qu'estos conflictos pol tayu han de vistos como la resistencia de les cuenques y d'Asturies por un futuru vidable. Y non como un conflictos llaborales separtaos. La llucha ye l'únicu camín pa qu'Asturies nun fine siendo un desiertu industrial, ensín futuru a la llarga y onde la patronal faiga lo que petei. Asina, llamamos a la mocedá de les cuenques a lluchar pol futuru de los nuesos conceyos y del país.

Fonte: http://www.darreu.org/

Unos encaperuzaos secuestren al Putu King del Burri King

Xuntanza eleutoral, ¿a qué preciu?

El movimientu nacionaliegu asturianu siempres se carauterizó por caltener una llinia d'izquierda nidia y marcadamente independentista con percuntaes esceiciones (qu'incluso pueden cuntase como esternes al movimientu con esperiencies murnies como PAS). El camín que caltuvo Andecha Astur, heriede de CNA y d'ENA, siempres foi (y paez ser que sigui siendo) lleal a la llinia tradicionalmente marcada pola tendencia del, yá denomáu, "nacionalismu asturianu revolucionariu". D'ehí res que dicir.

Ensin embargu paez que les polítiques reformistes, alministracionistes y burocrátiques que proponen el Bloque por Asturies y los sumisos y oportunistes cabezaleros d'Unidá Nacionalista Asturiana tán perlloñe d'asitiase na llinia socialista que decíen defender cuando munchos d'ellos coincidieron en BIA, momentu nel que la xente d'IAS y PCPE decidió dar el costazu al seutor d'Izquierda Nacionaliega d'Asturies (presentáu como ún de los más firmes defensores de la llinia enantes nomada) que fundó l'enxendru asturianista y pro-IU del BpA.

Ensin embargu IAS colos años acabó algamando'l puestu que deseaba; quita-y el puestu a Andecha como partíu bandera del nacionalismu asturianu d'izquierda.

Fundose UNA como una plataforma que se presentaba mui interesante nos medios asturianistes, como la gran y esperada coalición de tola izquierda independentista, pero nun foi asina. UNA nin fai por meter a AA en sitiu dengún nin quier caltener la llinia obrera, socialista y de base del nuesu nacionalismu, la llinia na que ye más importante sofitar a los trabayadores y facer presencia nacional na cai que tener puestinos n'alministración. En términos xenerales, la nuesa llinia, la del pueblu.
Esti añu el nacionalismu d'izquierdes va presentase na candidatura popular Conceyu Abiertu, un proyeutu cercanu a les CUP catalanes y mui ilusionante no que cinca a política llocal y nacional, fuera de llinies pactistes y burocrátiques (que suponemos y esperamos que non tolos militantes de la "Gran" coalición sofiten, faigan crítica y autocrítica y tornen al cauce obreru de la lliberación nacional).

Por eso ye que, ¿a qué preciu tamos pagando la "xuntanza"? ¿Merez la pena traicionar les nueses idees a costa d'un puñadín de votos? Esperemos que la xente nacionaliego opine que non.

Del blogue: Andecha obrera.

Izquierda Xunida frañe definitivamente

El PCA presentarase a les elleiciones al Parllamentu Asturianu y a los conceyos al marxe d'IU

El Partíu Comunista d'Asturies (PCA) concurrirá a les elleiciones a la Xunta Xeneral y a los conceyos con una marca propia, fuera del paragües d'Izquierda Unida. Dende'l PCA critícase l'actitú de la direición d'IU n'Asturies «contraria a cualaquier posibilidá d'integración de la izquierda rexonal».

La cris ente PC ya IU n'Asturies entamó va dellos años y agora va espeyase nes elleiciones de mayu con candidatures estremaes. El PCA diz tomar la decisión «una vez constatada la persistente actitú d'Izquierda Unida d'Asturies», contraria al proyectu d'unificación de la izquierda.


Amás, dendel PCA, critícase'l «continuismo de su subalternidá política con respecto a la FSA», cola que comparte gobiernu y les «continues apaiciones públicas presentando nueves candidatures municipales unillateralmente». Con too ello, el PCA va presentar llista al Parllamentu asturianu y en dellos conceyos.

Desgaste d'IU

Col PCA con llista propia la fuercia ellectoral d'IU mengua abondo lo que pue facer que la coalición amplie los sos pautos ellectorales, qu'agora tien namás con Los Verdes tres la salida de Bloque por Asturies, a otres formaciones. Si IU sigue la llinia d'anteriores convocatories ye previsible qu'ufierte un pactu ellectoral a otres formaciones que contrareste el so desgaste.

Andecha Astur consider intolerable'l nueu aumentu del paru n’Asturies

Pa la organización d'izquierda nacionaliega, estos nuevos datos, que cuasi que dublen la media estatal, ponen n'evidencia al “Principado”, y alcen al candidatu del PSOE "a la categoría de farsante", tres les sos declaraciones.

Andecha Astur considera que los nueos datos de paru d'esti mes confirmen les repitíes denuncies que lleven facuendo nel sen "de que la situación sociu-económica a la que les polítiques del Estáu español llevaron a Asturies, ye cuantitativa y cualitativamente munchu pior que la propia del Estáu español".

La medría del paru nun 5,92% (doblando práuticamente'l 3,2% de media estatal, el 3% si se xebren los datos asturianos), y un númberu de paraos de 86.008 presones, xuntu coles "escandaloses cifres" de población obligao a emigrar (alredior de los 20.000 añales) dibuxen un panorama "dantescu", nel que'l "nivel de sufrimientu social ye difícilmente ancultable magar tola hipocresía de la que faen gala los partíos del “Principado”, especialmente los del gobiernu “PSOE-IU”, empeñaos n'amazcarar una realidá de la que son cómplices y responsables" denuncia la organización soberanista asturiana.

Nesti sen, p'Andecha "estos datos llamentables ponen n'evidencia otra vuelta al “Principado”, y alcen a la categoría de farsante al candidatu del PSOE nestes eleiciones, Javier Fernández, cuandu apocayá declaraba que con ellos diben faer d’Asturies un llugar onde allegar a trabayar en cuentes del país d'emigrantes y paraos nel que mos convertieron les sos polítiques d'humildación y sumisión a los intereses de Madrid".

A la fin, Andecha Astur fai un llamamientu al conxuntu de la sociedá asturiana "a defender ca puestu trabayu ún a ún y a responder activamente frente a estes polítiques de destruición del nuesu texíu económicu y productivu que nun tienen otra fin que l’esaniciu del nuesu futuru como Pueblu".

Fonte: Infoasturies.net

Darréu diz basta a los recortes sociales

Comunicau de Darréu:

EL GOBIERNU DE MADRID HIPOTECA’L FUTURU DE LA MOCEDÁ ASTURIANA COLOS PEORES RECORTES SOCIALES DE LA HISTORIA

Ante les continues agresiones neolliberales que venimos careciendo por parte del PSOE, tantu desde Madrid como dende la so sucursal n’Uviéu nel “Gobiernín” la mocedá dicimos basta. Hai que plantase y hai que planta-yos cara.

Les recientes medies aprobaes por gobiernu y empresarios, col beneplácitu de los grandes sindicatos vendíos al poder, UGT y CC.OO. suponen los peores recortes de la hestoria en materia llaboral y de bientar social, una vuelta al entamu del sieglu XX que va facer que seyamos la mocedá d’anguaño quienes paguemos los platos rotos d’esta crisis qu’entamó por culpa de la especulación que ye intrínseca al capitalismu y que se propagó rápidamente por tolos centros de poder económicu del gran capital, sumándose a la crisis inducida que carecemos n’Asturies dende hai más de treinta años y que convierten el nuesu país na fastera con más paru y emigración xuvenil d’Europa. L’abaratamientu del despidu, la posibilidá de desendolcar ERE’s n’empreses hasta cuando nun tengan pérdides a antoxu del empresariu, la desapaición del conveniu y la negociación colectiva, xubilación a los 67 años, allargamientu del periodu de cotización etc suponen que con tala precariedá va ser perdificil pa la nuesa xeneración poder tener los 38 años y mediu cotizaos que van requerise pa que podamos algamar la xubilación. Asina, un mozu de 26 años debería ponese a trabayar y nun perder un solu día ya na so vida si quier aportar cola cotización necesaria a la edá de xubilación. Y tal como ta la situación llaboral, toos sabemos qu’esto ye imposible, ye dicir, quieren tenenos ente’l desempléu y los trabayos precarios sin parar hasta que morramos.

Sin embargu nun ta perdíu, al contrariu de lo que quieren facenos creer si qu’hai solución y alternativa a esti estáu de les coses. Debemos garrar l’exemplu de la mocedá d’otros países y d’otros momentos de la hestoria que foron igual de difíciles qu’esti, tenemos qu’organizanos y salir a la cai a defender los nuesos derechos y pasando a la ofensiva, reclamando más estáu, más atención social a quien lo necesite y que quien más dineru tien, la clase alta, sea quien más aporte al estáu pa beneficiu de la mayoría. Hai qu’acabar cola corrupción de la clase política y eso pasa por francer col vieyu modelu de la política representativa d’estos grandes partíos, organizándonos dende la base y de forma asamblearia, apostando asina pola auténtica democracia, la participativa onde toles persones tengamos nun solu votu cada cuatro años, sino tamién voz. Pa que toles persones podamos decidir sobre los que nos afeuta, plantando cara a tolos opresores y enemigos del Pueblu que tan instalaos nes instituciones, dende Darréu vamos siguir apostando por organizanos cada vegada meyor y movilizanos escontra los enemigos d’Asturies y del pueblu trabayador.

El pueblu xuníu, enxamás será vencíu.

PUXA ASTURIES LLIBRE Y SOCIALISTA

Fonte: www.darreu.org

Aumenta'l sofitu a les propuestes de la CSI, qu'amplia la so presencia un 125 %

ALMINISTRACIÓN: Resultaos de les eleiciones sindicales

Ayeri, 1 de febreru, tuvieron llugar les eleiciones sindicales pa renovar los Comités d'Empresa que representen a la mayoría del personal llaboral de la nuesa Alministración. Vaya per delantre que la Corriente creció un 125 % al respective de los resultaos de 2006 (de 8 delegaos pasamos a 18), lo que supón un respaldu perimportante a una manera d'entender l'aición sindical que, colos sos erros y fallos, intenta ser honráu ya independiente perenriba de too.

Ente otres consecuencies, estos resultaos suponen que la Corriente gana'l derechu a tar na negociación del Conveniu Colectivu, negociación que vamos intentar activar y frayar l'actual y absurda paralización. Amás, queremos davos les gracies a toos aquellos y aquelles que col vuesu sofitu nos ayudásteis nesti saltu cuantitativu y confiásteis na nuesa propuesta. De verdá, munches gracies.

Resultaos: http://www.csi-asturies.org/noticias/110201_alministracion_eleiciones.pdf

Fonte: www.csi-asturies.org

Patrimoniu pide cuentes al Conceyu de Noreña pol abandonu de la ponte d'El Rebalde

Consecuencia d'una denuncia d’Andecha Astur, la Comisión Permanente del Conseyu de Patrimoniu Cultural de Asturies alcordó solicitar un informe al Conceyu de Noreña en relación cola situación de la ponte ferroviaria del s.XIX, desmontada va 15 años y n'estáu d'abandonu.

Andecha Astur congratúlase de que por fin "dalguna instancia s’esmoleza d'esti grave y vergoñosu casu", que lleva denunciando dende va años cola "total indiferencia" del Conceyu, Esta formación política espera qu'una vegada’l Conceyu unvie l'informe solicitáu, esti organismu tome les midíes oportunes ante esta situación "insostenible" y la indiferencia del Conceyu ante los constantes pidimientos y denuncies.

"Tamos convencíos de que'l Conceyu va tener un 'papelón' al contestar a les cuestiones a les que tien de responder l'informe" diz Andecha Noreña nel so comunicáu. Seguramente, dicen, van saber responder cuando se desmontó y numberó la ponte, "anque seya tirando d'hemeroteca", quiciabes seya fácil, amesten, “Indicar les xestiones realizaes pol conceyu pa cumplir l'alcuerdu del Plenu, de 26 de noviembre de 1999, sobre la so reconstrucción" ya que la remuesta ye "nada" pero "nun va ser nada fácil" desplicar “la situación actual na que s'atopen los materiales procedentes del desmontaje de la ponte”.

Andecha Astur camienta que vanm tener "díficil" responder ante Patrimoniu "daqué qu'amazcare esti atentáu cultural del que son complices tantu'l gobiernu actual como anteriores". Amás recuerden l'alcalde d'anguañu, Cesar Movilla, agora del PSOE, foi responsable de cultura antañu, mientres munchos años, nos gobiernos d'Aurelio Quirós. Andecha Astur Noreña sorraya que va siguir el casu "de cerca y presionar tolo posible, onde seya necesario, pa salvar esti importante patrominiu noreñense y asturianu".

FONTE: Infoasturies

Asturies, dizlo tol mundu.

Rosa Diez ta esmolecía.

«La gente tiene que pensar que Asturias no tiene futuro contra España, sino que su futuro está dentro de España. Por eso me preocupa que se esté proyectando ese discurso» Rosa Diez, n'El Comercio del 28 de xineru.

Claro, el futuru ye políticos sucursalistes, gobiernos corruptos, represión a la nuesa identidá como país y ataques a los y les trabayadores. Ta perbien que la señora Rosa Diez s'esmolezca, por que'l día que los asturianos y asturianes garren concenxa de lo que ta pasando nesti país y faigan aición d'ello nun va queda-yos nin una poltrona, y por supuestu, nin un requexu públicu. Porqu'a vegaes les coses t'españen na cara, y esti Réximen perpetuo, de raigañu tecnócrata-revionista-folclorista (PP, PSOE, IU; UPyD, FORO ASTURIAS, IDEAS...), nun va ser eternu, como nada na hestoria lo ye, inda menos na hestoria del nuesu pueblu.