Conceyu Abiertu respuende al SUP considerando inalmisibles les sos mentires

La organización soberanista y conceyera respondió a les declaraciones públiques del SUP, que pide la identificación de les persones que participaron na concentración solidaria frente a la comisaría xixonesa'l 14 de Payares.

Conceyu Abiertu quixo "amosar públicamente'l nuesu asombru énte les declaraciones asoleyaes en dellos medios de comunicación d’ámbitu asturianu, sobre los fechos acaecíos na Fuelga Xeneral del pasáu 14 de Payares". Depliquen que "Esi día la policia antidisturbios incumplió numberoses lleis y normes de rangu llegal, saliendo a la cai como “antipiquete” patronal y gubernamental, queriendo torgar dafechu derechos fundamentales como’l de Lliberta Sindical ya’l de Manifestación como lo demuestra’l fechu de qu’estes unidaes policiales nun llevaben el Númberu d’Identificación Personal".
Manifiesten dende Conceyu Abiertu que "Nun contentos con ello, el “Sindicato Unificado de Policía (SUP)” lleva dellos díes intentando facer un llaváu de cara énte la criminal actuación de los sos compañeros faciendo por treslladar la responsabilidá a los fuelguistes, criminalizando una protesta social exemplar y que taba teniendo llugar ensin nengún incidente, hasta que los miembros de la U.I.P. entamaron a golpes cola xente que pillaben delantre, tal como puen atestiguar sindicalistes, activistes políticos, periodistes, vecinos y tola xente que perellí pasaba nesi momentu".
Denuncia la organización municipalista que "la policía polo menos protagonizó delles illegalidaes", desplicando que "qu’abusó de les sos atribuciones, causando grave dañu a los ciudadanos mandando a dellos a centros de salú y hospital. Amás tamién mintieren sobre la realidá de los fechos pa xustificar el so papel". Denuncien tamién que la policía "Atentó ensin motivu escontra la Llibertá Sindical y de Manifestación" y "Dende primera hora de la mañana y ensin xustificación posible, les decenes de miembros de la U.I.P. qu’acosaren a los fuelguistes".
Poro, Conceyu Abiertu desixe la "rectificación y disculpes públiques" del SUP, "El posicionamientu nidiu y ensin medies tintes por parte de les asociaciones policiales, si quieren ser consideraes como democrátiques pol conxuntu del Pueblu, escontra toes aquelles midíes que torguen la identificación" y "La dimisión del delegáu del Gobiernu español n’Asturies Gabino de Lorenzo y de l’alcaldesa de Xixón Carmen Moriyón, como másimos responsables políticos d’estos llamentables fechos que nun puen repetise enxamás".

Fonte: Infoasturies

La Xunión Europea llama a fortalecer el so poder militar

El Parllamentu Européu aprobó esta selmana un resolvimientu que llama a les fuercies de la Xunión Europea a fortalecer el so poder militar. Los parllamentarios proponen nun retayar los presupuestos pa la defensa. Podría trayer una perda de soberanía de los estaos nos asuntos militares.
 

El resolvimientu dicta que la Unión Europea tien de responder a los cambeos xeoestratéxicos y les amenaces a la seguridá global, usando toles midíes qu'esisten, inclusive les fuercies militares, p'asegurar la paz y seguridá de los sos ciudadanos. Tamién se sorraya que crisis económica d’anguañu nun puede ser la sida p'amenorgar los presupuestos pa la defensa, pa evitar el descensu estratéxicu.

Esta votación supon que pue ser creáu un nuevu mandu operativu na XE y que Bruxeles va tener l'autoridá d'interferir en distintes crisis, inclusive nos conflictos más intensos. Non tolos miembros del Parlamentu emponderen el resolvimientu, indicando que dellos países pueden vese venceyaos en conflictos militares nos que nun tengan interés. Tamién hai voces crítiques por mor de la violación de la soberanía de los estaos.

La Xunión Europea trata de sobreponese de la crisis económica con estrictes midíes d'austeridá y retayos sociales. Anguaño, Europa traviesa ún de los desafíos más ventureros de tola so esistencia, ensin poder llegar a un alcuerdu sobre'l proyectu de presupuestu de la XE pal períodu 2013-2020.

Conceyu Abiertu por Xixón refuga l'actuación policial durante'l 14P

Dende Conceyu Abiertu por Xixón queremos expresar la nuesa mas rotunda conderga pola actuación de la Policía Nacional, les Xunidaes d'Intervención y de la Policía Municipal de Xixón durante la Fuelga Xeneral del pasau 14 de payares. A lo llargo de tol día de fuelga, estos cuerpos dexaron bien nidio el so calter represivu, asina como'l serviciu que-yos dan Los d'Arriba, tapeciendo la llibertá informativa de los Piquetes. Primero mediante l'acosu y la intimidación, identificando caprichosamente y ensin motivos, y dempués cargando, golpeando, mancando y deteniendo a dellos sindicalistes.

Asina asocedió en Xixón, xustamente cuando'l Piquete de la CSI, SUATEA, CGT y CNT ya empobinabase a la Ca Sindical pa preparan la manifestación convocada a les 12 hores pola izquierda sindical. Daba la impresión que la Policía tenía marcada pa la mañana del 14P, una cuota golpes, ferios y detenios, teniendo d'apurar poco enantes del repliegue de los piquetes. Primero na cai Llangreu onde ensín mediar pallabra cargaron contra los sindicalistes, golpeando indiscriminadamente a persones indefenses, produciéndose un feriu y dellos mancaos, amás d'un deteniu. Poco dempués sedría na cai de Sanz Crespo, delantre de la Ca Sindical, onde intentaron quita-y la cámara a un fotógrafu provocando otru incidente, volviendo a cargar sobre los allí congregados, golpeándo-yos y lo que ye absolutamente intolerable: un posterior asaltu a la Ca Sindical, en cuyes escaleres y antoxana, alcontrabense numberosos sindicalistes que impidieron l'asaltu de la Policía Nacional del "so llar".

Esta aición absolutamente intolerable de la Xunidá d'Intervención de la Policía Nacional, saldose con numberosos mancaos y un feriu con la tiesta ensangrentada polos fuertes golpes recibios y que tuvo de ser treslladau al Hospital, además d'otros tres compañeros detenidos pola Policía Municipal que también cargó con saña desmedio.

Por tolo ocurrio y equí dicho, Conceyu Abiertu por Xixón, amás de felicitar pola lliberación de los cuatro detenios impuesta pola valiente y solidaria movilización de los miles de manifestantes que arodiaron la Comisaría durante dos hores, desixe:

> La llibertá ensin cargos de los cuatro detenidos de Xixón, y del que lo fuera en Uxo.
> La dimisión inmediata de Gabino de Lorenzo, Delegau del Gobierno n'Asturies y postreru responsable de la actuación de la Policía
> La dimisión inmediata de Rafael Felgueroso, Conceyal de Seguridá Ciudadano del Aytu. de Xixón

 

www.conceyuabiertu.org

 

 

Darréu denuncia'l continuismu franquista nesti 20 de payares.

Otru 20 – Payares de neofraquismu vixente n'Asturies.

Fai 37 años morriera'l dictador Francisco Franco, tres 40 años d'un terror sistematizáu militarista, facista y españolista. La Dictadura Franquista sigue siendo impune y la so supuesta tresformación y ruptura entá güei nun llegó. Les señes d'indentidá del franquismu yera un españolismu arcaicu, la confesionalidá del Estáu, la defensa de los porgüeyos de la oligarquía y la represión policial. Güei, depués de tantos años, vemos con esmolición la situación d'anguañu y nun podemos dende la mocedá soberanista dicir otra cosa qu'esi sistema franquista sigue vivu.

Dende Darréu atalantamos que tres l'añu 1975 nun vivimos nin n'Asturies nin l'Estáu Español nenguna transición como lleven tantos años vendiéndonos. Les maniobres qu'asocedieron depués del añu 1975 evidencien un gran montaxe empobináu pola burguesía y la oligarquía españolista y cola collaboración de munchos axentes cómplices. La situación d'opresión nacional y social que vivimos n'Asturies nun camudó enforma y coses tan mínimes como la reconocencia oficial d'un idioma milenariu nun se dan na realidá.

Na mal nomada transición el Réxime de Franco llavó la so cara ya incorporó a nuevos seutores de la élite político-social y económica al so xuegu, lo que-y servía como maniobra de llexitimidá énte la xente, los medios de comunicación y la comunidá internacional. De tal manera, afitaron un sistema sociopolíticu que diz ser democráticu y tar al serviciu de toes y toos por igual, con una Constitución vergoñosa y yá de por sí reaccionaria que supuestamente “aprebamos toos” y un xefe d'Estáu que ye heriederu direutu del xeneral Franco.

Dende Darréu caltenemos que'l sistema sociopolíticu del Reinu d'España sigue sirviendo a los mesmos intereses qu'enantes del 20 de payares de 1975. La defensa de la unidá política y territorial del Estáu Español y los intereses económicos del bloque oligárquicu son les razones de ser d'esta farsa que denomen “democracia española”. La misión sigue siendo la mesma pal Estáu Español y sigue teniendo los mesmos dueños na solombra. Les mázcares que'l neofranquismu punxo a lo llargo d'estos años son munches, pero pasu ente pasu y gracies a la situación d'evidencia que vive'l capitalismu paez ser que van cayendo.

Pa la Mocedá Independentista Revolucionario d'Asturies la propia esistencia del Estáu Español ye un fechu antidemocráticu y que va a la escontra de los intereses de los pueblos. La cárcele de pueblos que ye'l Reinu d'España namás tien un camín democráticu: Reconocer el drechu d'autodetermín a tolos pueblos que tien embaxo la so tiranía y facer qu'esos procesos seyan democráticos, populares y ensín cuestionar los sos resultaos.

Poro, nesti 20 de payares, dende Asturies y dende la mocedá d'izquierda soberanista Darréu queremos denunciar la farsa neofranquista na cual vivimos. El continuismu nel Estáu Español ye bien evidente y caltenemos que la mocedá asturiano tien de saber que'l so papel ye ser crítica y combativa nesti sen.

La moceda d'esti país nun podemos permitinos, enviendo'l futuru que mos ufierten, inorar que'l xefe d'Estáu qu'impón una institución colonialista nel nuesu pueblu foi escoyíu a deu por un xeneral facista.

Tampocu podemos tolerar qu'Asturies siga siendo una nación a la que nun se-y reconocen los sos llexítimos drechos nacionales o llingüísticos, como podríen ser el drechu d'escoyer el nuesu modelu d'autogobiernu, el propiu autodetermín o la oficialidá'l nuesu idioma.

Nun podemos tolerar que los mesmos torturadores d'antañu o los sos fios seyan quienes dirixen les fuercies represives españoles n'Asturies y reprimen la llucha social, nacional y obrera qu'hai nesti país.

Nun tenemos que tolerar tampocu que la bandera de la vergoña siga ximielgándose por Asturies ensín el refugu popular. Esa bandera, la bandera del Reinu d'España, ye la bandera que representa la gran victoria del continuismu franquista de los borbones.

Dende Darréu, caltenemos que nun podemos permitir que la mocedá asturiano permaneza impasible énte la situación d'emprobecimientu, miseria y violencia que'l sistema capitalista xenera sobro les clases populares tolos díes al travíes d'esi Estáu Español.

L'alternativa a esta gran farsa pasa por entamar dinámiques de participación social que quieran puxar por Asturies como la entidá nacional que ye, polos porgüeyos de les clases populares y pola tresformación social y revolucionaria de la nuesa sociedá. La única alternativa al continuismu franquista pa Darréu pasa pola emancipación nacional y social d'Asturies. Frenti a la “democracia a la española” hemos de da-yos “soluciones a l'asturiana”.

¡Abaxu la reforma franquista vixente y los sos responsables!

¡PUXA ASTURIES LLIBRE Y SOCIALISTA!

Conceyu Abiertu por Mieres pide la llibertá del deteníu n'Uxo

L'arrestáu foi llamáu a declarar nel xulgáu de Mieres acusáu de "terrorismu y atentáu contra l'autoridá".

Conceyu Abiertu desixió la lliberación del deteníu n'Uxo cuando participaba nun piquete informativu durante la xornada de fuelga xeneral del día 14 y que foi llamáu a declarar nel xulgáu de Mieres na mañana d'ayeri acusáu de "terrorismu y atentáu contra l'autoridá".

Tres prestar declaración, la Fiscalía desestimó los cargos anteriormente mentaos, pero caltién qu'esta persona incurrió en "desórdenes públicos" y soliciten una pena de cárcele d'ente 6 y 36 meses.
La formación llama "a la ciudadanía d'esti conceyu y d'Asturies a tresmitir la so solidaridá col compañeru deteníu ayeri" y desixe la absolución ensin cargos pola dinámica de "represión indiscriminada que vivimos nel 14P".

"Enviendo esta doble forma de midir y manexar la situación dende'l poder políticu y policial atalantamos como de xusticia y democráticu'l pidir la total absolución de los compañeros deteníos ayeri y la retirada de los cargos que-yos imputen".

FONTE: Queyeho.com

Darreú pidió l'absolución de tolos deteníos el 14P

Darréu fizo públicu'l sofitu a "les persones que fueron prindaes pola policia española n'Asturies. Primeru de too queremos tresmitir la nuesa solidaridá y llamar a la mocedá asturiano a facer lo mesmu p'asina amosar que la mocedá nun va dexar soles a estes persones imputaes".

Dende Darréu desixen "l'absolución dafechu d'estes persones, ye dicir, la llibertá total y ensín cargos pendientes. Nuna situación onde los lladrones y esplotadores faen lo que-yos peta y salten la so propia llei ensín consecuencies, vemos como les persones de clas trabayadora topen cada pocu cola represión de les fuercies d'ocupación españoles n'Asturies. Les persones que piden un futuru que mos tan ñegando sistematicamente dende los despachos de poder políticu y la oligarquía son víctimes de la represión más descomanda".

Despliquen dende Darréu que "nesta xornada de fuelga n'Asturies la policía detuvo a delles persones queriendo imputa-yos cargos propios d'un montaxe policial facista, agredió a decenes de persones y provocó de manera continua al Pueblu Asturianu pa tratar asina de crear conflictu y criminalizar la rempuesta social. incluso antidisturbios españoles quinxeron entrar a bas de golpes na Casa Sindical de Xixón, sitúación qu'enxamás pasó dende los tiempos de Franco. Toos estos fechos antidemocráticos y reaccionarios fueron orquestaos pol Delegáu de Gobiernu Gabino de Lorenzo, quien dende la solombra ta tratando d'amedrentar, condergar y encarcelar a la disidencia asturiana. Nesti sen, pidimos la dimisión de Gabino de Lorenzo".

Pa finar, manifestaron que "el capitalismu español cada vuelta va mostrase más agresivu n'Asturies y nel restu l'Estáu, frutu de la so actual situación de debilidá y evidencia. L'Estáu Español enxamás atendió a razones y menos en situaciones asina. Poro, tenemos de tener nidio que ye clave nesti momentu exercer la solidaridá activa con toles persones que tan siendo represaliaos y les que van venir y tar soyertes. Va siguir evidenciandose que l'aición policial, al serviciu de la oligarquía española y los políticos que la representen, va escontra los intereses del Pueblu Trabayador Asturianu. Siendo nós más, siendo la gran mayoría social tenemos de decatanos que ye necesariu si queremos construyir un procesu democráticu n'Asturies pidir la retirada de les fuercies policiales represives y d'ocupación d'Asturies. Dende Darréu hai muncho tiempu que llevamos reclamando esta midía, pues estes fuercies represives namás sirven a los porgüeyos de los capitalistes pero enxamás a los del Pueblu".

Fonte: Infoasturies

Rueda prensa de los sindicatos de clas d'Asturies

Por mor de la xabaz represión del 14 payares.

Asturies paró pola fuelga xeneral

Durante la xornada d'esti 14 de Payares el pueblu asturianu respondió, una vegada más, a la convocatoria de fuelga xeneral, asitiándose a la tiesta estatal en cuantes a seguimientu.  

Esti miércoles 14 de Payares Asturies afrontó una convocatoria de fuelga xeneral que, dende'l principiu, taba previsto que fora masiva. Y asina foi, con movimientu sindical dende enantes del entamu oficial de la fuelga xeneral a les 00:00. Enantes d'esa hora servicios como la recoyida de basories n'Uviéu nun furrularon, fechu que foi repitiéndose a lo llargo de la nueche en numberosos enclaves de l'actividá llaboral nel nuesu país.

Durante'l día, los tresportes furrularon con servicios mínimos, que malapenes se desendolcaron durante les primeres hores, y que xunto con un paru casi total nel seutor industrial conformaron la espina dorsal de la movilización xeneral n'Asturies. Los piquetes informativos percorrieron los principales puntos llaborales y comerciales del país, consiguiendo que se baxaran les persianes de numberosos establecimientos. Nes cuenques mineres el paru foi absolutu, lo mesmo que n'Avilés, demientres que n'otros puntos importantes como Uviéu o Xixón el seguimientu foi tamién mayoritariu, anque dalgo menor que nes llocalidaes anteriormente citaes.

A les 12:00 CSI, CNT, CGT y SUATEA desendolcaron el so manifestamientu de la Plaza L'Humedal, depués d'una mañana movida pol asaltu policial a la Casa Sindical, con cuatro deteníos como bagaxe. Amás, CCOO, UGT y USO intentaron remanar la manifestación de la izquierda sindical asturiana convocando manifestación a la mesma hora, fechu que nun impidió'l desendolcu de la movilización. L'actu foi multitudinariu, con unes 25.000 persones qu'enllenaron el Náuticu pa escuchar los discursos de les distintes fuercies sindicales convocantes.

Depués, turnu pa la solidaridá, treslladándose una bayura de persones frente a dependencies policiales hasta que foron lliberaos los compañeros deteníos, aición solidaria que cuntó col sofitu de cientos de persones, que vivieron momentos de tensión colos destacamentos policiales ellí presentes. Finalmente, los cuatro deteníos foron puestos en llibertá, conformando xunto a un prindáu en Mieres los únicos represaliaos cola detención n'Asturies.

Tamién a les 12:00 La Felguera vivió la convocatoria "Arrodia l'INEM" d'ADEPAVAN, sofitada por un númberu importante de persones. Tamién L.lena y Llugones desendolcaron una aición asemeyada, sumando asina a los y les paraes coles sos propies movilizaciones de vindicación y denuncia.

Yá pela tarde Uviéu tuvo de nueu piquetes informativos previos al manifestamientu del sindicalismu mayoritariu, que foi masivu. Unes 100.000 persones enllenaron les cais d'Uviéu. Tal foi la cantidá de xente, que cuando la cabecera del actu yá finara'l recorríu, l'Avda Galicia y Plaza d'América, llugares d'entamu de la marcha, taben abarrotaos de xente que nun entamara entovía a caminar.

Nesi manifestamientu hebo presencia del Bloque Anticapitalista, coleutivu críticu que portó la so propia pancarta. Tamién hebo presencia del coleutivu de muyeres del carbón en llucha, PCPE, PCA, USO, CGT, SUATEA, Sindicato de Estudiantes, Asamblees Universitaries, y otros coleutivos, asociaciones y organizaciones.

Nesta xornada tamién hebo llugar pa les barricaes nes cuenques mineres, en llugares como Uxo, Figareo, nel centru Valnalón o n'Autovía Minera, nuna xornada na qu'Asturies tuvo a la tiesta del estáu en cuantes a cifres de seguimientu, nos centros de trabayu y nes movilizaciones convocaes nes cais. El pueblu asturianu tornó a responder a la movilización.

P'atopar más datos, noticies ya informaciones, consulta l'especial de Glayiu.org , o'l twitter d'InfoAsturies (@infoasturies).

Rueda de prensa de la plataforma municipalista y d'izquierda soberanista Conceyu Abiertu

Rueda de prensa de Conceyu Abiertu escontra'l desmantelamientu industrial d'Asturies, polos drechos sociales y llamando a la fuelga xeneral del 14-P.

www.conceyuabiertu.org

Rueda prensa de los sindicatos de clas asturianos.

Andecha anuncia "sofitu críticu" a la fuelga xeneral del 14P

Andecha Astur decidió dar un "sofitu críticu" a la fuelga xeneral convocada pal viniente 14 P al atalantar que les postreres midíes adoptaes pol gobiernu español suponen "una agresión ensin precedentes a los drechos sociales de la ciudadanía dientru d’una dinámica de perda xeneralizada de drechos y llibertaes sociales".
 

Sicasí, dende Andecha Astur considérase que’l calter estatal de tala convocatoria "desvirtúa fondamente la rialidá asturiana, pretendiendo enartala dientru d’un conxuntu estatal, cuandu resulta nidio que la situación que carez Asturies y que vien producía dende enantes de la cris, respuende non yá a una situación económica concreta sobro la qu’habría enforma que dicir, sinón a la resultancia d’una política sociu-económica aplicada pol Estáu español n’Asturies empobinada a la destruición del texíu sociu-económicu asturianu y que tien de resultes el paru, la precariedá nel emplegu y la emigración forzada de decenes de miles d’asturianos, inclusive nes dómines de 'España va bien'".
P'Andecha, "ye nidio que siguir defendiendo la seutorialidá de los conflictos sociu-llaborales asturianos, negándose a integralos nun tou común, que contemple la especificidá del marcu llaboral asturianu, llévamos a una dispersión de fuerces y en definitiva a una indefensión".

Per otra parte, dende Andecha Astur atalanten que la convocatoria ta "fuertemente desprestixada" al partir principalmente de los sindicatos UGT y CCOO, cuyos dirixentes "prauticaron una dinámica sindical que los convierte en cómplices necesarios na destruición del texíu sociu-económicu asturianu, y que per ende, desacreditalos dafechu".

Ello ansina, Andecha Astur sofita de forma crítica esta convocatoria de fuelga xeneral del 14 P y llama a la convocatoria d’una fuelga xeneral específica d’ámbetu nacional asturianu, "acullá de la dinámica de cubrir l’espediente, que faiga posible la fin de l’actual situación, que mos llibere de les politiques d’esterminiu que ta aplicando l’Estáu español n’Asturies y que tán llevando a la sociedá asturiana a una situación de sufrimientu y precaridá inaceutables, y que garantice un futuru dignu pal nuesu Pueblu".

FONTE: INFOASTURIES.NET

INTERVENCIÓN DE DARRÉU NEL HOMENAXE A LOS MÁRTIRES DE CARBAYÍN

Un añu más, esti ye'l segundu, venimos nel mes de payares a homenaxar a los Mártires de Carbayín y a tolos nuesos compatriotes que cayeron dignamente contra la bestia capitalista, facista y españolista. Como dicimos, esti ye'l segundu añu pero asperamos que dende Darréu y dende la izquierda soberanista sigamos acudiendo tolos años a esti llugar a ufrir un dignu homenaxe a estos heroes del Pueblu Trabayador Asturianu.

 

Na nueche'l 24 d'ochobre de 1934, nel procesu sistemáticu de represión a la Comuñá Asturiana qu'entamó l'Estáu Español, 24 persones fueron llevaes a La Curuxona procedentes de Ciañu y Sama. Depués de que la Guardia Civil baxara a estes persones del camión fueron enterraos vivos depués de la más xabaz tortura. Los facistes uniformaos ataron a estes persones con cuerdes y na escuridá emplegaron machetes y bayonetes pa mutilar y tortura a estes persones hasta la más doliosa muerte. Munchos, cuando yeren enterraos, tovía taben vivos. Lo asocedíu esi día, por supuestu, cuntó cola total complicidá'l poder capitalista, reaccionariu y españolista.

 

Estes persones fueron torturaes y asesinaes pola so militancia y compromisu anti-capitalista y por lluchar y pensar nuna Asturies meyor y un mundu más xustu. Esa foi la razón que tuvo l'Estáu Español pa asesinar impunemente a estes persones, trabayadores y revolucionaries, y tamién, como non, pa tratar de tapecer estos fechos. Poro, nun podemos escaecer l'exemplu d'estos heroes, que morrieron pasando pola peor de les muertes pero enxamás doblaron la rodiella énte l'enemigu facista y capitalista.

Al igual qu'anguañu, en 1934, cuando asocedió esta salvaxada, namás propia d'un Estáu fondamente reaccionariu, la dominación social exercida pol sistema pol sistema capitalista cada vegada taba más cuestionada pola esplotación, represión, miseria y probitú qu'ufría a les clases populares. Los paralelismos hestóricos son incuestionables y mos revelen la natura inmovilista y violenta que tien el capital y el Bloque Oligárquicu Español como señes d'identidá.

Depués de 78 años, siguimos sofriendo la represión del mesmu sistema socioeconómicu,al empar que'l mesmu estáu, España, sigue imponiendo al nuesu país les recetes y midíes que namás beneficien a la burguesía y tornen más na miseria y la esclavitú al Pueblu Asturianu. Dende Darréu queremos tresmitir una entruga a la mocedá asturiano: ¿ Por qué siguimos escoyendo capitalismu y España cuando namás signifiquen miseria y xabaz represión? ¿ Nun sedremos más llibres cuando optemos por desaniciar la esplotación capitalista y la opresión nacional?

Nesti sen, dende Darréu tenemos nidio que'l camín de la llibertá namás ye un: el de la soberanía política y económica d'Asturies como nación, construyendo un procesu popular col qu'algamemos una República Asturiana al serviciu de les y los trabayadores, non de los esplotadores y caciques. Y nesta ambiciosa pero irretrucable xera nun podemos más que tomar exemplu de la entrega revolucionaria y el valir d'estes persones que güei homenaxeamos. Ellos son la lluz qu'alluma'l camín de la llibertá'l nuesu pueblu y ellos nun querríen ver que la mocedá asturiano d'anguañu s'acobarda contra la oligarquía española de güei. Tenemos que confiar que con llucha, voluntá y compromisu el futuru ye de nueso, como'l futuru ye d'ellos, de los Mártires de Carbayín, por pertenecer yá por méritu propio a la hestoria d'Asturies. Que nun caigan nel escaezu, que vayan con nós pa siguir na llucha.

¡PUXA LOS MÁRTIRES DE CARBAYÍN!

¡PUXA ASTURIES LLIBRE Y SOCIALISTA!

Darréu homenaxeó a los Mártires de Carbayín

La organización de mocedá Darréu desendolcó un actu d'homenaxe nel cimenteriu de la llocalidá sierense, n'alcordanza de los Mártires de Carbayín.
 

Según despliquen dende la organización de mocedá Darréu "Una veintena de persones axuntámonos esti sábadu 10 de payares pa rendir homenaxe a los Mártires de Carbayín. Pasaes les 13:00 hores entamó l'actu d'homenaxe a estes 24 persones, asesinaes y torturaes pola Guardia Civil Española d'una forma xabaz n'ochobre de 1934 por mor de la so militancia y compromisu cola causa revolucionaria y anticapitalista. Les persones ellí aconceyaes entramos nel Cimenteriu de Carbayín Altu hasta llegar énte la fosa común que rinde homenaxe a estos heroes del Pueblu Trabayador Asturianu".

Nesi llugar tan simbólicu "depositamos una ramu flores, una bandera de la organización Darréu y una asturina como símbolu d'homenaxe. Depués d'un xunitariu aplausu un compañeru de la organización entamó la intervención d'homenaxe de la mocedá soberanista revolucionario. Na intervención cincó en caltener viva la memoria de los Mártires de Carbayín, como exemplu de l'Asturies digna que nun se rinde. Amás, el nuesu compañeru quinxo tresmitir la idea de los paralelismos hestóricos ente l'Estáu Español de 1934 y el d'anguañu, como muérganu de poder y represión de la oligarquía capitalista, cola so natura reaccionaria y violenta".

Amás, dende Darréu "llamose de nuevu a recuperar la memoria d'estes persones, atalantando que'l so espíritu enxamás morrerá y son exemplos de compatriotes como ellos los que deben allumar la nuesa llucha pola lliberación nacional y social d'Asturies. Cincose na idea de qu'esta doble lliberación ye l'únicu garante de plena soberanía y llibertá pal nuesu pueblu. Con un puxa emotivu finó esti actu que dende Darréu queremos siguir faciendo añu tres añu cola fin de recuperar la memoria'l Pueblu Trabayador Asturianu y tresmitir a les nueves xeneraciones l'enfotu exemplar d'estos mártires d'Asturies. Dende Darréu queremos agradecer fondamente l'asistencia a toles persones por facer posible esti actu d'alcordanza".

FONTE: Infoasturies

¡A LA FUELGA XENERAL!

Esti prósimu miércoles, los sindicatos desclasaos, burocratizaos, capitalistes y españoles CCOO y UGT llamen a la fuelga xeneral en tol Estáu Español. Esta convocatoria coincide tamién con una xornada de fuelga xeneral en bona parte d'Europa.

Nun podemos escaecer, dende la izquierda soberanista asturiana, la entidá de los convocantes d'esta xornada, una xornada que llega tardi, mal y con un mensaxe, claro ta, aburguesáu y español, como nun podría ser d'otra mena dende los sindicatos mariellos. Obviamente, hai que ser críticos y reflexivos a la hora de facer analis d'esta convocatoria, pero tampocu podemos dexar de llau la mesma, yá que la fuelga xeneral ye tan d'ellos como de nueso.

Esti 14 de payares, tenemos d'aprovechar a espeyar nes cais d'Asturies la postura'l soberanismu socialista asturiano énta la grave situación socioeconómica y política que vivimos. Tenemos qu'aprovechar la convocatoria pa facenos ver, pa dicir al Pueblu Asturianu qu'anque nun seyamos un gran movimientu de mases pel momentu nós siempres tamos ehí y nós siempres calteniendo la dignidá y la coherencia, non como otros oportunistes.

Por supuestu, nin que dicir tien que nun fai falta llamar a los y les patriotes d'Asturies a la cai'l miércoles. El soberanismu d'esti país medrará y entamará grandes dinámiques el día que seyamos quien a caltener el tipu y tar nes cais continamente coles lluches populares d'esti pueblu. Poro, nesti día, tenemos de tar colos piquetes informativos, tenemos de crear una rede de propaganda de cara a llamar a la xente a secundar la fuelga o tenemos de tar nes convocatories qu'asumamos. Esi ye l´únicu camín pa normalizar esti movimientu políticu y non baxar los pantalones a nivel ideolóxico y convertinos en fuercies rexonalistes y socialdemócrates.

Asina pues, esperemos que'l soberanismu revolucionario d'esti país seya quien a visibilizase nesta convocatoria de fuelga. Ye fundamental participar de forma masiva na movilización de los auténticos sindicatos de clas y amosar ellí que'l camín de la soberanía política y económica pa esta nación ye'l camín y l'alternativa real al bloque capitalista español.

Siendo realistes, da la sensación que la convocatoria, como casi siempres, garra col pie tornáu al nuesu movimientu políticu. Hai que ser realistes pero tamién ambiciosos. Tenemos de tener en cuenta esta xornada de fuelga y nun quedar en casa. Depués, cuando pase tou, habrá qu'analizar puntos fuertes y febles y dir sacando conclusiones válides y granibles de cara ameyorar na prósima convocatoria d'esti tipu. La fuelga ye un día de llucha y compromisu, pero hai que tener un nivel de movilización caltenía, permanente. Namás asina podremos facer esconsonar al Pueblu Trabayador Asturianu de la situación real y les posibles soluciones asturianes y revolucionaries.

¡Esti miércoles nun quedes en casa!

¡Trabaya por Asturies y pol to futuru! ¡Secunda la fuelga y participa activamente!

¡Puxa Asturies llibre y socialista!

Conceyu Abiertu llama a secundar la fuelga xeneral del 14-P

Dende la formación asturiana llamen "al Pueblu Asturianu a facer fuelga'l prósimu miércoles 14 de payares, yá qu'entendemos que nun queda otra que secundar activamente la convocatoria ante la realidá socioeconómica y política que tamos viviendo anguañu".

Dende Conceyu Abiertu despliquen nun comunicáu que "Asturies superó yá la cifra los 100.000 paraos, la tasa de xente viviendo na probitú sigue medrando de forma xabaz, la emigración forciada ye una realidá social evidentey la precariedá que vivimos nun tien precedentes. Cola escusa de la “crisis” privaticen sanidá, educación y otros drechos básicos y universales que deberíen de ser totalmente públicos y de calidá. Pero por si too esto, y otres coses, fueren pocu, aprovechando tamién la “crisis” recorten tamién en drechos y llibertaes, faciendo que teamos llegando a un nivel represivu y de persecución política propiu d'un sistema dictatorial, por supuestu, eso si, esa represión siempres empobinada a finar coles vindicaciones de les clases populares".

Por eses razones, pa CA "ye natural y obligatoriu salir a la cai, exercer el drechu de fuelga y entamar dinámiques verdaderes de tresformación social, lluchando contra les élites oligárquiques dende'l nuesu país y con un marcáu calter de clas. El Pueblu Asturianu tien d'entamar a asumir que ye responsabilidá del conxuntu'l Pueblu cambiar esta situación y que nun vamos aparar los recortes y les agresiones del capital ensín llucha, unidá, conciencia y compromisu".

Nesi sen manifiesten que "Agora, más que nunca, ye'l momentu de romper col estáu de les coses. Ye'l momentu de dicir al Gobiernu Español del PP que nun queremos pagar la crisis de los capitalistes por que nós nun tenemos culpa. Ye'l momentu de dicir al gobiernu'l Principáu, títere de Madrid, que nun mos creemos nada del PSOE, por que ye lo mesmu que'l PP, dambos sirven al mesmu amu: el señor capitalista y españolista".

Pa finar, camienten dende Conceyu Abiertu que "Ye'l momentu d'entamar dinámiques de resistencia, democracia popular y creatividá social cola fin de que'l Pueblu Asturianu esconsone y entame'l so propiu camín contra'l capitalismu y el so instrumentu, l'Estáu Español. Ye tiempu de lluchar, dende la base pola soberanía política y económica d'Asturies, p'asina poder escoyer el nuesu futuru en llibertá, ensín imposiciones y creando una alternativa al capitalismu al serviciu de les clases populares".

FONTE: Infoasturies.net
 

Esplotación y racismu na Sidrería Dársena

Ante la situación que vien sufriendo una trabayadora, senegalesa, que tuvo trabayando ensin asegurar, y entá nun se-y pagó, en La Sidrería La Dársena de Xixon, ta formandose un grupu de sofitu a la mesma, col oxetivu más ampliu de denunciar l’acosu y esplotación que nel sector de la hostelería sufren estos compañeros y compañeres.

Coles mesmes pretende crease un grupu de sofitu mutuu a trabayadores nestes situaciones. Faise un llamamientu especial a trabayadores/as que topen estáu nestes condiciones, pos pueden ayudar nesta llucha, yá que sabemos, por casu, que nesta Sidrería la esplotación vien de tras.

El próximu sábadu 17 de noviembre de 2012, a les 13 hores, delantre de la Sidrería Dársena, en Claudio Alvargonzalez Nº 8, Paséu del Muelle, va haber una quedada pa denunciar la esplotación y el racismu.

www.csi-asturies.org

Denuncien más de 100 despidos nes subcontrates d'HUNOSA dende que finó la fuelga

El coleutivu d'afeutaos polos despidos denuncien les intenciones de la hullera de siguir despidiendo trabayadores, al tiempu qu'anuncien la constitución d'una plataforma.

Los retayos d'ayudes pa la producción de carbón autóctono non sólo ta teniendo consecuencies nes esplotaciones privaes, sinon que tamién afeuten a decenes de trabayadores de la empresa pública HUNOSA. Asina, según el coleutivu d'afeutaos, dende'l final de la fuelga minera desendolcada durante los meses de Xunu y Xunetu la hullera pública yá executó más d'un cientu de despidos nes subcontrates que trabayen pa la compañía. La mayoría de los despidos, según despliquen, tan dándose dende finales d'Ochobre.
Amás, el coleutivu denuncia los planes d'HUNOSA pal despidu inminente de, al menos, mediu centenar más d'obreros y obreres de les subcontrates, fechu pol qu'anuncien la creación d'una plataforma qu'atrope a los trabayadores despidíos, y "evitar que más de 150 families queden na cai". Tamién anuncien el pidimientu d'ayuda a los sindicatos del seutor SOMA y CC.OO, colos que s'amosen percríticos pol so "pocu interés" pa con esta problemática que, según paez, inda ta entamando les sos piores consecuencies.

Ensin paga de navidá

HUNOSA tamién anunció a la representación sindical la supresión de la paga navidiega, según despliquen "al aplicar el Real Decretu" aprobáu pol gobiernu central y qu'afeuta a los trabayadores d'empreses y alministraciones públiques. Otra mala noticia pa un seutor mineru qu'agoniza ante la falta de sofitu institucional, sindical y gubernamental.

FONTE: Infoasturies.net

DARRÉU llama a la fuelga esti prósimu 14 de payares.

La Organización Darréu fai un llamamientu a la mocedá asturiano y al Pueblu Asturianu en xeneral a participar na fuelga xeneral del prósimu 14 de payares y a la movilización activa esti día y les prósimes selmanes.

 

Camentamos qu'esta convocatoria llega tardi y ye insuficiente pa tornar la situación de la clas trabayadora y d'Asturies pero ye una xornada afayaiza pa espeyar les fonderes contradicciones del sistema capitalista y l'Estáu Español, polo que llamamos a la movilización activa y crítica a les moces y los mozos del nuesu país.

 

Dende la mocedá soberanista y revolucionario asturiana siguimos calteniendo que'l bloque oligárquicu español oprime nacional y socialmente al nuesu pueblu. Al empar que pisa les necesidaes y drechos del Pueblu Trabayador Asturianu, con recortes y crímenes xabaces, roben la nuesa soberanía política pa torganos decidir el nuesu futuru y que nun podamos asina constituyir una alternativa al capitalismu n'Asturies.

 

La mocedá asturiano ta siendo la mayor perxudicada d'esti procesu de desmantelamientu económicu, de drechos o de llibertaes. La sanidá, la educación y otros servicios públicos tan cayendo na más pura privatización, entregando estos servicios a les carteres de los inquisidores financieros ya inorando dafechamente les necesidaes de la xente. Trabayar n'Asturies cada vuelta más complicáu y si puede ser sedrá colos mayores niveles de precariedá. La emigración forciada sigue siendo una “lleenda urbana” bien visible y real mentantu la probitú nun da tregua y sigue medrando.

Esta ye la ufierta que'l capitalismu y l'españolismu dan al Pueblu Asturianu. Nes nueses manes, na nuesa fuercia obrera y asturiana ta'l tornar esta situación y escoyer un futuru soberanu, llibre y socialista. El neolliberalismu ye crimen, ye miseria y ye violencia, nun podemos siguir atendiendo a razones cola barbarie capitalista, tenemos que desaniciar esi modelu socioeconómicu y nun sedremos quien a superar esti sistema mentantu nun seyamos un pueblu con poder decisoriu.

Poro, nesti 14 de payares, dende Darréu reclamamos una vegada más la nuesa soberanía política y económica, entendiendo una vegada más que la situación d'Asturies nun tien más igua que siguir afondando na concenciación nacional de la nuesa xente col envís d'algamar un mañana nel que'l Pueblu Asturianu pueda ser dueñu'l so destín, y non dexe'l so destín en manes del bloque oligárquicu.

El futuru pertenez a los pueblos y les/os trabayadores, somos los más y tenemos la razón. El capitalismu tien de finar yá y la so superación dará pasu al socialismu como alternativa real y necesaria empobinada poles clases populares. Namás colos nuesos drechos nacionales y col socialismu podremos ser un país llibre y podremos superar la situación de crisis permanente que vive Asturies.

¡¡¡ A LA FUELGA XENERAL !!!

Los retayos del Gobiernu pa saldar la mal llamada “delda pública” nun son más qu'una escusa pa regalar a la banca privada tolos recursos económicos que'l conxuntu la clas obrera precisa pa poder llevar una vida digna. NUN YE LA NUESA DELDA, YE LA SO DELDA: QUE LA PAGUEN ELLOS.

L'INSOPORTABLE NIVEL DE PARU, coles remortines de miseria y probeza que prevoca, l'esmantelamientu los servicios públicos (Sanidá, Educación, Servicios Sociales, etc.), el descomanáu aumentu’l nivel de probitú, la Reforma Llaboral, la precarización xeneralizada de les condiciones de trabayu y la brutal represión de les protestes y movilizaciones obreres, son razones enforma pa entamar, non yá una fuelga xeneral, sinón cuantes sían precises p’algamar la xusta repartida la riqueza, recuperar los drechos sociales pa toes y toos y, cuantimás, el drechu de toles persones a vivir dignamente.

Retayar en Sanidá ye matar, porque atenta escontra la nuesa salú. Retayar n'Educación ye tornanos en man d'obra analfabeta. Retayar en Servicios Sociales ye abandonar a la so suerte a les presones más necesitaes. Despidir ye mandar a les persones a comer de la basura.

Pa la CSI, hai demasiaes razones pa faer una fuelga xeneral y nenguna pa nun faela.

La CSI refuga del sindicalismu del pactu social y llama a la fuelga xeneral non sólamente como un día de paru llaboral, sinón como l'entamu d'una movilización xeneral de la clas obrera asturiana que, solidariamente cola del restu los pueblos del Estáu español y d'Europa, llante cara al capitalismu y avance nel camín del so desaniciu dafechu.

Porque'l capitalismu ta fracasáu. Porque namás trae miseria y probeza. Porque encarcela a los y les trabayadores y protexe a los poderosos y a los braeros criminales.

EL 14 PAYARES: ¡A LA FUELGA XENERAL!.Ver más