Torna a medrar el númberu de paraos y paraes en Febreru

Asturies raspia la cifra de los 100.000 paraos y paraes.

Según los datos asoleyaos pol Ministeriu d'Emplegu y Seguridá Social del gobiernu estatal, la cifra de persones en situación de desemplegu nel nuesu país tornó a medrar nel mes de Febreru, con un espoxigue de 2.746 persones qu'engorden la yá abultada cifra de paraos y paraes n'Asturies. En términos porcentuales l'espoxigue foi del 2,84% respeuto al mes de Xineru.

D'esta mena, nos caberos 12 meses el paru medró nel nuesu país en 11.281 persones, lo que supón casi un 13% más de persones en situación de desemplegu. En cuantes al repartu del espoxigue nos distintos seutores económicos, el seutor Servicios rexistró 1.570 paraos y paraes más, el de la construcción 575, l'industrial 362, y el coleutivu ensin emplegu anterior 269 más. Pel so lláu, l'agrícola creó 30 nuevos trabayos.

En cuantes a la distribución de xéneru, el total de paraos y paraes, anguaño en 99.353 persones, queda repartíu en 50.137 muyeres y 49.216 homes.

Fonte: Infoasturies.net

Yá sabeis.

Concentración pol despidu de la representante de CSI en Valoriza

CSI denuncia que la empresa Valoriza caltién unes condiciones llaborales illegales nel centru xeriátricu de Los Canapés (Xeres encomendaes, horarios y calendarios llaborales...), y la trabayadora, representante sindical de la CSI, denunció eses condiciones illegales de trabayu que tan dándose na empresa.

El prósimu xueves, 1 de marzu de 2012, a les 19:00h, la Corriente Sindical d’Izquierda convoca una concentración delantre’l centru xeriátricu de Los Canapés, n’Avilés, pol despidu de la so representante sindical na empresa “Valoriza”. La empresa “Valoriza”, subcontratada pol Gobiernu nes residencies d’ancianos, vien de despedir, nel centru xeriátricu avilesín de Los Canapés, a una trabayadora de 59 años, que tien reconocida una discapacidá del 50% y con varios familiares al so cargu, ún d’ellos en silla ruedes.

La representante sindical foi despedía’l pasáu mes de xineru, cola disculpia del baxu rendimientu de la trabayadora demientres el mes anterior. Pero demientres esa dómina de tiempu, la trabayadora atopábase de baxa por un acidente trabayu, que la empresa nun quier reconocer y pretende facer pasar por una baxa por enfermedá común.

Pa la CSI, la empresa Valoriza quier "reprimir y castigar a la so representante, pola defensa de los drechos llaborales que taba realizando nel centru de Los Canapés. Nun hai dubia denguna de que, pa Valoriza, esta trabayadora ye una “torga” que quier desaniciar con un despidu, que namás se pescancia comu un actu de persecución sindical y comu’l primer pasu de la empresa nel despidu de más trabayadores y na precarización de les condiciones de trabayu".

Por toes estes razones, la CSI desixe la realmisión darréu de la so representante sindical, la recuperanza de los drechos de los y les trabayadores y la normalización de les condiciones llaborales, pa lo cualo nun va dubiar nin un solu intre en remanar tolos preseos xudiciales y de presión social que tea al so alcance.

El gobiernu asturianu comunica nuevos retayos derivaos de la prórroga presupuestaria

Afeutaos coleutivos d'enfermos y discapacitaos.

El gobiernu asturianu comunicó a delles asociaciones d'enfermos crónicos y de discapacitaos que nel presente añu los fondos destinaos a sovenciones y ayudes sufrirán un retayu del 20%, lo qu'impedirá cumplir con munches de les obligaciones y compromisos algamaos con numberoses Organizaciones Non Gubernamentales rellacionaes cola estaya afeutada. Dende'l gobiernu argumenten el retayu por mor de la prórroga presupuestaria cola que l'executivu nun podrá ampliar el presupuestu destináu a la estaya sanitaria y de bientar.

Asina, dende delles organizaciones de persones con discapacidá despliquen que taben pendientes de recibir unos 90.000 euros a repartir ente hasta 57 asociaciones pa proyeutos yá executaos, polo que pa les organizaciones implicaes ye vitar poder cuntar colos recursos procedentes del executivu asturianu, y amosen la so esmolición pola situación na que queden.

Infoasturies.net

Disparidá ente soberanistes alredor de la territorialidá d'Asturies.

Nuna encuesta asoleyada nesti blogue cola entruga ¿crees que'l territoriu que conforma anguañu'l "Principáu d'Asturies" se correspuende cola realidá territorial de la nación asturiana? y con dos items de rempuesta hebo muncha división ente los lleutores. Pesia a tar equilibráu gano'l non, ye dicir, ganó la opción que caltién que'l modelu territorial asturianu d'anguañu nun se correspuende cola realidá territorial íntegra de la nación asturiana.

Asina, un 56 % de los encuestaos y encuestaes escoyeron la rempuesta que dicía que'l modelu (territorial) ye imcompletu dafechu. Asturies ye una realidá territorial separtada en delles alministraciones. Por contra, un 43 % mos dicen que si, que los conceyos que conformen anguañu la comunidá son los qu'entienden que conformen Asturies.

Posicionamientu de Conceyu Abiertu énte'l 25 de marzu.

¿Qué ye eso d'UPyD? ¿Sedrá l'alternativa?

La reforma llaboral acumula 540 afeutaos n'Asturies dende la so aprobación

Primeros efeutos de la xabaz reforma.

Según el seguimientu realizáu pol sindicatu UGT dende l'aprobación de la reforma llaboral vía decretazu, un total d'aprosimadamente 540 trabayadores yá foron afeutaos pola nueva normativa impuesta dende'l gobiernu estatal. Asina, un total de siete empreses s'acoyeron hasta'l momentu a les nueves condiciones llaborales -Fábrica d'Armes de Santa Bárbara, Norte Motor, Hormigones Pelayo, Rioglass, Hermanos Robledo, Transevares y la Cafetería del Aeropuertu- promediando unos 54 trabayadores afeutaos y afeutaes cada día.

La cifra cuntabilizada ta referida a empreses qu'aplicaren dalgún de los apartaos vixentes, abarcando dende despidos, Espedientes de Regulación d'Emplegu, reducciones de xornada o sueldos, y cualquier otra modalidá cola que la patronal asturiana desendolcará les sos midíes de mena más cenciella y barata.

Fonte: Infoasturies

¡Llibertá pa los cinco patriotes cubanos!

Armanorte despide a 36 trabayadores

Nuevos despidos n'Asturies.

La empresa Armaduras del Norte (Armanorte), asitiada en Cuideiru, despidirá a la metá de la so plantilla tres algamar un alcuerdu colos representantes sindicales pol que s'estinguirán 36 contratos de los 72 vixentes na empresa, a cambiu de qu'ésta nun adopte les nueves condiciones qu'impón la reforma llaboral recientemente aprobada vía decretazu.

La empresa, dedicada principalmente a la ellaboración, suministru y montaxe de ferralla p'autovíes, ferrocarriles y construcción en xeneral, argumenta la midida na "cayida en picáu de la obra pública", situación que s'amesta al declive de la construcción de viviendes tres l'españe de la burbuxa inmobiliaria.

Fonte: Infoasturies.net

Iniciativa pol Asturianu denuncia la situación del idioma n’Uviéu

La supresión de la llingua asturiana na cartelería del programa ‘La nueche ye tuya’ foi calificada por Iniciativa pol Asturianu como un pasu atrás nuevu pal idioma n’Uviéu. El coleutivu recuerda que’l conceyu nun tien nin Serviciu de Normalización.

Esti programa d’ociu xuvenil venía utilizando, dende años atrás, la denominación billingüe ‘La nueche ye tuya-La noche es tuya’, pero na cartelería d’esti 2012 despaez l’asturiana pa dar namái protagonismu a la castellana. Yá l’añu pasáu, el pesu del idioma del país menguó, al tar les feches en castellanu y non nes dos llingües como n’ediciones anteriores. Pa Iniciativa pol Asturianu, esti fechu denota’l poco enfotu del Conceyu d’Uviéu pa col asturianu. “Si la normalización social del idioma, por parte de los socesivos equipos del gobiernu llocal yera yá bien probe y deficiente, nos últimos años tamos asistiendo a un desaniciu del asturianu en tolos sitios onde ganara un espaciu”, afirmen dende esti coleutivu de defensa del idioma, que pon como exemplu la desapaición del asturianu de web municipal va poco más de dos años.

D’igual forma, denuncia que’l segundu conceyu con más población del país “fai poco o nada por respetar la Llei d'Usu y por da-y puxu al idioma dende les instituciones”, como amuesa la falta d’un Serviciu de Normalización Llingüística o l’ausencia d’interés en recuperar la toponimia tradicional. Por esti motivu, Iniciativa pol Asturianu esixe a los responsables del Conceyu “qu'adquieran el compromisu de dar pasos nuevos nel usu d'un idioma que ye patrimoniu de toos”.

Primer congresu

Esti sábadu, a les 17 hores nel Auditoriu d'Uviéu, va tener llugar la celebración del primer congresu d'Iniciativa pol Asturianu. Esta Xunta Xeneral estraordinaria tiene como oxetivu la escoyeta de la Xunta Direutiva de l'asociación. Pa tener derechu a votar, ye necesario tar al corriente de los pagos.

Fonte: Asturies.com

Comunicáu mov. estudiantil asturianu en solidaridá cola llucha en Valencia.

Les Asamblees d´Estudiantes de la Universidá d´Uviéu REFUGEN Y CONDENEN la brutal actuación que les fuerces represores del Estáu Español tuvieron durante tola selmana pa colos estudiantes, padres, madres y docentes de l´IES Luis Vives de Valencia, en llucha polos sos drechos y defendiendo la Educación Pública.

La situación actual d´acosu y derribu que tamos sufriendo a tolos niveles namás que dexa a los estudiantes que, al traviés d´Asamblees, faigan movilizaciones escontra d´esti ataque frontal pa cola educación pública, asina como escontra de la represión a quienes la sofiten y, d´igual forma, escontra de les medíes tomaes, tantu por esti gobiernu como pol anterior, en materia llaboral, coles dos reformes llaborales que condenen a la mocedá a una eterna precariedá que supón una innegable perda de drechos que nun fueron fáciles d´algamar.

Mañana nel C.S. La Semiente

Gastos policiales pa escueles y hospitales

La Corriente Sindical d’Izquierda quier asoleyar la so solidaridá coles estudiantes de Valencia, asina comu col restu les movilizaciones entamaes per tol Estáu español.

El panorama ye “too un exemplu” del futuru que nos espera: policíes agrediendo brutalmente a menores d’edá, que namás pedíen daqué tan fácil de pescanciar comu tener calefación nes aules; el xefe de la policía en Valencia calificando a los y les estudiantes de “enemigu” y la Delegada’l Gobiernu llamando “anécdotes” a los graves sucesos ocurríos.

Pa la CSI, la movilización de les universidaes y centros d’enseñanza yá ye la única igua que-y queda a una mocedá que s’atopa con un 50% de paru, una enseñanza condergada a la precariedá y un futuru de trabayu esclavizáu. Por too ello, la CSI quier facer un llamamientu a tola mocedá asturiana y del conxuntu l’Estáu, pa que continúen esta llucha, porque ta en xuegu la so educación y el so futuru.

Asturies internacionalista siempres

N'Asturies y en tolos países ¡REVOLUCIÓN POPULAR Y SOCIALISTA!

¡Puxa'l Pueblu Trabayador Griegu!

Solidaridá colos estudiantes de Valencia.

Dende Asturies queremos solidarizanos colos estudiantes del IES Lluis Vives de Valencia (PPCC) qu'estos díes lleven sofriendo la más impune y xabaz brutalidá policial pol simple fechu de reclamar una Educación Pública, Llaica y de Calidá. Dende hai muncho tiempu que les persones más crítiques y actives políticamente vienen denunciando la represión político-policial qu'hai nel Estáu Español. Agora, a la fin, aportó'l momentu nel que los pueblos del Estáu tan decatándose pa quien trabaya la policía nacional y que Réxime Franquista reformáu defendi.

¡Ye'l momentu de la izquierda revolucionaria y emancipadora de les naciones oprimíes! ¡ A los facistes torturadores queden-yos dos díes !

¡España ye represión ya inxusticia! ¡La llibertá y la xusticia social reside na lliberación de los pueblos!

Día Internacional de la Llingua Materna.

Dende esti pequeñu y vieyu país del mundu namái tenemos una cosa que dicir:

El conflictu llaboral na multinacional Hewlett Packard continúa

Dempués de mas d'un añu de movilizaciones, la empresa continúa despidiendo trabayadores p'aumentar les sos yá millonarios beneficios y negándose a roblar un alcuerdu d'empleabilidá que ponga fin a los despidos indiscriminaos. El gotéu ye continuo, dende daqué mas d'un añu yá se despidieron a mas de 140 compañeros en tol estáu español, mandándolos al infiernu del paru y la crisis.

El patrón ye nidio, despidir a trabayadores con condiciones llaborales más o menos dignes, pa subcontratar o deslocalizar en condiciones de semiesclavitud, tola plantiya ta nel puntu de mira, llegóse a despidir a xente con 59 años d'edá, esto ye a cencielles inmoral y mas teniendo en

cuenta los beneficios de HP.

El futuru agora plantégase entá mas negru colos últimos retayos de los nuesos derechos cola reforma llaboral del gobiernu del PP. La movilización va siguir hasta que la empresa recapacite, dende la CSI, xuntu colos compañeros de la CGT y de CCOO, vamos siguir lluchando pa poner fin a los despidos con tolos medios hasta agora utilizaos, realizáronse en tol tao concentraciones, manifestaciones, empancartadas, flahsmobs en feries y eventos de HP, fuelgues, cortes de tráficu …, y van emplegase tolos medios que se crean necesarios pa detener esta política de despidos por beneficios.

Mientres esti mes de febreru, les protestes van intensificase, y l'empresa va tener que decidir si prefier tener un conflictu abiertu, con cada vez un mayor sofitu de la plantiya, o bien robla un alcuerdu d'empleabilidá beneficiosu pa toos. Tamos decidíos a siguir engarrando hasta garantizar que nengún trabayador de HP pueda ser despidíu en contra de la so voluntá, nin un solu despidu por beneficios, tenemos claro que, la única llucha que se pierde ye la que s'abandona, asina que … la llucha continua.

N’Ast pide poder votar n’asturianu nes elecciones del 25-M

L’asociación N’Ast, n’escritu presentáu énte la Xunta Eleutoral Provincial solicitó formalmente a la mesma “que facilite a tolos asturianos l’exercer el so drechu a votar n’asturianu, emitiendo les papeletes eleutorales de toles candidatures presentaes a estes prósimes eleiciones del 25 de marzu en llingua asturiana y distribuyéndoles con normalidá nos colexos eleutorales”, pa dar acabu “d’una vegada” a lo que califiquen de “situación predemocrática que carecemos anguaño”.

Con esta petición N’Ast aguarda que se se fine “cola contradictoria situación agora mesmo esistente na que se validen les papeletes en llingua asturiana al empar que s’impide la so pre¬sencia nos colexos eleutorales”, lo que supón pa N’Ast “una incaltenible práutica d’apartheid llingüísticu col que se vulneren los llexítimos drechos y llibertaes de los asturianos en materia llingüística”.

Fonte: Asturnews.

Iniciativa pol Asturianu protesta pol retayu de financiación a l’Academia de la Llingua Asturiana

L’asociación aprovecha pa recordar que la máxima institución llingüística asturiana sigue ensin recibir fondos del Gobiernu central.

a organización Iniciativa pol Asturianu considera que’l retayu d’un 40% a los presupuestos de l’Academia de la Llingua Asturiana (ALLA) ye un ataque al idioma asturianu, nun contestu mui difícil pa la llingua d’Asturies, y teniendo en cuenta que l’ALLA ye una institución siempres austera y que yá hasta agora cuntaba con namás los fondos imprescindibles pal desenrrollu del so llabor.

Por ello pedimos al Gobiernu d’Asturies que rectifiquen esta partida del presupuestu prorrogáu pa 2012, calteniendo, polo menos, la cantidá establecida pal añu anterior, y nunca con rebaxes penriba de la media del restu de los retayos de presupuestu.

Financiación estatal: l’asturianu nun cuenta

Amás, Iniciativa pol Asturianu, recuerda que ye tamién responsabilidá del Gobiernu d’España la financiación de l’Academia de la Llingua Asturiana, pues nos sos presupuestos incluyen una partida pa financiar a toles academia de les diferentes llingües que se falen nel Estáu español.
La Real Academia Española recibe más de 4 millones d’euros, mientres que l’academia del catalán (l’Institut d’Estudis Catalans) recibe cuasi 1 millón d’euros, la de la llingua vasca, mediu millón d’euros y la Real Academia Galega, 200.000 euros. Esto supón una nueva marxinación hacia la nuesa llingua, que nun cuenta pa les autoridaes estatales.

Por ello, Iniciativa pol Asturianu reclama al Gobiernu d’Asturies, amás del cambiu nos sos propios presupuestos, qu’esixa al Gobiernu d’España una partida pa l’ALLA nos presupuestos xenerales, pa finar con esta marxinación a la institución asturiana y ayudar a la financiación d’una institución imprescindible pa la normativización del idioma.

Fonte: Aruelu.