N'alcordanza: Conceyu Nacionalista Astur ( 1976-1981).

Echar la vista p'atrás...

Güei, nun mundiu en xeneral y nuna sociedá asturiana, en particular, onde la implicación política y militante de la población ye mínima. Onde les cais yá nun s'enllenen por parte'l pueblu, ye bono echar la vista p'atrás, a tiempos meyores y de mayor actividá vindicativa, como por exemplu'l tiempu dempués a que morriera el dictador asesín Francisco Franco ya instaurare una "democracia", o falando en claru, el neofacismu que sofrimos anguañu. N'aquella segunda metá de los 70 y emtamos de los 80 emtamó a xorrecer el nacionalismu/independentismu asturianu en forma d'organizaciones y partios políticos. El primer nome que mos puer venir a la tiesta ye Conceyu Bable, caleyando ente'l nacionalismu y el rexonalismu ensín tener nada nidio dientru la so llinia ideolóxica.

A pesar de tolo que fizo'l Conceyu Bable en sofitu del autonomismu y en sofitu a la oficialidá y l'espardimientu del respetu haza la llingua, ye pa recriminar dende una perspeutiva independentista d'isquierdes la so actitú ente la cuestión nacional y la cuestión social. D'estos fallos de CB, d'esa ambiguedá y de la división de la organización en dos seutores: ún claramente independentista/nacionaliego y otru más en clave rexonalista, más averau a l'autonomismu que l'independentismu surdió el primer partiu nacionaliego y revolucionariu asturianu, El Conceyu Nacionalista Astur nel añu 76. Esti foi el primer partíu braeramente nidio nel so mensaxe alloñandose del mensaxe de Conceyu Bable. Podemos dicir que ye bono echar la vista atrás en dómines como güei pa ver como la iniciativa d'aquellos dies llevo a daqué, que a pesar de durar pocu foi un pasu más alantre p'afitar n'Asturies un movimientu de lliberación nacional. Güei día puede que nun seya un pasu más posicionase ente rexonalistes y nacionalistes, puede que les coses ten más nidies pero ye necesariu echar un pasu alantre de nueu como aquellos años. Un pasu que llevenos a un movimientu políticu y social que braeramente cuaye nel pueblu asturianu yá que los años pasen y anque medrando día a día, tamién desaniciennos el país día a día. Por eso ye per necesariu echar la vista atrás pa da-y un pasu alantre definitivu, por que un pueblu que nun conoz el camín que ta faciendo tará más alloñau del trunfu que supón la llibertá.

Dexo equí un articulu alredor del Conceyu Nacionalista Astur y la so curtia hestoria estrayiu de uiquipedia.

Conceyu Nacionalista Astur

Conceyu Nacionalista Astur (CNA) foi'l primer partíu políticu nacionalista asturianu, con actividá ente 1976 y 1981.

Entamos

El CNA foi un partíu creáu por un grupu de mozos marxistes, independientes y llibertarios. Definiose como un "conceyu políticu de militancia única", nel que s'almitíen les tendencies marxistes, leninistes, trotskistes, llibertaries, etc. Según los sos estatutos; l'ámbetu d'actuación direuta y d'afitamientu que se propón CNA vien determináu pol área nacional y xeográfica d'Asturies. Esti partíu caltuvo rellaciones con otros grupos asemeyaos del estáu y estranxeros.

Ideoloxía

Ente los sos plantegamientos políticos allugábense los que vienen darréu:

• Autonomía plena a curtiu plazu.
• Autodetermín.
• Revolución socialista n'Asturies na perspeutiva d'un estáu socialista protagonizáu pola clas obrera y otres clases populares, p'algamar la construcción d'una sociedá ensin clases, previu desaniciu del aparatu de poder de la burguesía.

Too ello nel marcu d'una confederación de pueblos cola idega d'algamar un autogobiernu que ficiera posible la participación de les mases partidaries d'una sociedá socialista y autoxestionaria.

Según los promotores del CNA -que queríen frañir cola tradición política asturiana y da-y una alternativa nacional asturiana al procesu de reconstrucción estatal na transición, reclamando p'Asturies un tratamientu nacional asemeyáu al que se-y taba dando a Cataluña o al País Vascu- el pueblu asturianu pertien toles condiciones oxetives qu'encadarmen una nación, ello ye; una comundiá identificada con un territoriu definíu; una hestoria y una llingua llariegues; una situación económica definida pola empresa pública (daquella y anguaño, al serviciu del capital mnopolista); una idiosincrasia que define a los asturianos como talos; una cultura llariega con aportaciones úniques a la cultura universal, como l'arte asturianu.

Pal bon furrulamientu conxuntu d'estes realidaes, según la CNA, requeríase:

• La descentralización dientro d'Asturies a tolos niveles: alministración, medicina, cultura, servicios, etc.
• L'autoxestión de les empreses.
• La ordenación y racionalización de l'agricultura y ganadería.
• Afalamientu de toles posibilidaes económiques d'Asturies.
• Recuperación de la cultura asturiana.
• L'algame del mayor autogobiernu y la unificación política europea.

Simboloxía

La bandera y escudu del CNA ye la Cruz de la Victoria n'oru sobre fondu azul. El so himnu: "Asturies, patria querida". Adoutar esti popular cantar como himnu oficial del partíu supunxo un retrasu na llegalización del partíu nel Rexistru per parte de los funcionarios, que lo emplegaron como pretestu, yá que los estatutos foron presentaos en mayu de 1978 y el partíu nun foi llegalizáu fasta'l 19 de xineru de 1979.

"Aquí temíamos que se tratara de un cahondeo"

- manifestaba'l Subdireutor Xeneral d'Asociaciones Polítiques nunes declaraciones a "Asturias", el 18 de xineru de 1979.

Fundadores

Ente los fundadores taben Xosé Lluis Carmona y Dubardu Puente, Xesús Cañedo Valle, Pepe Fernández Alonso, Fernando Cueto y miembros del Conceyu Bable. El so secretariu xeneral foi Anxelu Zapico.

Publicaciones

El CNA llegó a editar una publicación propia, la revista Asturies Dixebrá.

Elleiciones

Demientres la so esistencia nun algamó nengún llogru eleutoral. Nes eleiciones xenerales de 1977 nun presentó candidatura propia, sofitando la candidatura de la Unidá Rexonalista, encabezada por Aida Fuentes Concheso, Antonio Massip Hidalgo y Manuel Hevia Carriles. Nes eleiciones xenerales de 1979 presentó candidatura propia a dambes cámares. Al congresu presentara a: Eduardo Puente Fernández, José Álvarez Fernández, Angel José Cadenas Menéndez, Francisco Javier Fernández Romero, José Ramón González Cuesta, José Francisco Villabrille, José Manuel Fernández Vega, Luis Antonio Álvarez Alias, José Manuel Friera Poo y Julio César López Fernández algamando 3.049 votos el 0'55% del votu total, asitiandolu nel 9u llugar de les 17 llistes ensin representación nel congresu y pal senáu presentara a: Manuel Ángel González Zapico y José Luis Carmona García, con 8.309 votos, el 1'52% del votu total, asitiandose nel 17u llugar ensin representación parllamentaria.

Eduardo Puente -candidatu con namás que 29 años-, ficiera unes declaraciones a "El Comercio" de Xixón el 10 de febreru de 1979, nes que dixo;

"CNA más qu'un partíu convencional ye un frente ampliu onde tienen cabida toles tendencies d'esquierda. Nun somos dogmáticos, nin tenemos tampoco una ideoloxía rixa, sinón que, énte too, como bonos asturianos, somos pragmáticos" [...] "Les persones que formamos parte del CNA víamos fasta va poco con simpatía dellos partíos que se declaraben rexonalistes. Por embargu, les pallabres llevoles el vientu y na práutica, a la hora la verdá, les sos teoríes quedaron en meres promeses que nun tienen res que ver cola auténtica defensa de los porgüeyos asturianos. D'ehí qu'énte l'escaezu amosáu por toles fuercies polítiques de les sos declaraciones rexonalistes, tienmos llevao a xuntanos tolos que teníemos esti enfotu pa fundar una organización política asturiana y asturianista" [...].

Ún de los cartelos de propaganda elleutoral del CNA dicía:

"VOTAR CNA YE SOFITAR: la nacionalidá asturiana. El socialismu autoxestionariu. La llucha escontra'l colonialismu, qu'afuega Asturies. La nuestra llingua y cultura, artes, vezos. Un estatutu d'autonomía que dexe abiertu'l camín a l'autodeterminación. Una alternativa revolucionaria a la clas obrera asturiana. La defensa del nuestru frayau y escaecíu patrimoniu artísticu. La llucha ecolóxica. Ñatura escontra contaminación. Non al ICONA (Institutu pa la conservación de la naturaleza). Non a les centrales ñucleares. La llucha polos drechos la muyer. Libre usu del cuerpu, divorciu, albuertu, planificación familiar; mesmu salariu y drechos llaborales que'l (sic) home. La llucha pola lliberación y drechos de los homosexuales, escontra les lleis represives y en defensa d'ista (sic) natural expresión afeutiva. La llucha polos drechos de los pensionistes. Xubilaciones suficientes. Asistencia xeriátrica continua y gratuita. La llucha polos drechos de los minusválidos. Estructures y servicios ciodadanos (sic) afayaízos. Melecina y terapia recuperativa a niveles físicos y síquicos. Drechu a la integración y al trabayu" [..]

Disolución

Cabe destacar nesti procesu que dellos militantes del partíu fueron deteníos baxo acusación de colaborar con ETA politico-militar nel asaltu al Bancu Herrero d'Uviéu y dellos cumplieron años de prisión por ello.

Disolvióse en 1981. De les sos cenices surdieron otros partíos nacionalistes, como l'Ensame Nacionalista Astur (ENA), que tres la so fusión cola Xunta Nacionalista Asturiana (XNA) dio llugar a la Unidá Nacionalista Asturiana (UNA), que se presentó a les eleiciones europees de 1989 baxo la mano de José Suárez Arias-Cachero "Felechosa". Exercieron la secretaría Xeneral de la UNA Faustino Fernández Pereira, primero, y Xosé Lluis Carmona, dempués.