Tres el fracasu del "diálogu" ente sindicatos y el Ministeriu d'Industria, los mineros y mineres tornaron güei a les cais coles sos aiciones combatives que dexaron siete barricaes colos sos correspondientes cortes de carretera, destacando'l de l'A-66 a dos altures -L.lena y Olloniegu-, amás d'otres n'El Padrún, Doriga, La Rodriga y Cornellana. Pela so parte, los mineros del otru lláu del cordal tuvieron el so puntu caliente en Ciñera, onde desendolcaron cortes de carreteres y víes de tren, too ello ente una presencia descomanada de la Guardia Civil, que desendolcó un estáu de sitiu na llocalidá con denuncies d'agresividá estrema viniente de les fuercies policiales, que continúen cola so escalada represiva. Los mineros tuvieron que replegase pol despliegue policial, abellugándose nos montes y cases nos que la Guardia Civil intentó prindar a obreros.
Pel so lláu, sigue la "Marcha Prieta" rumbu a Madrí, atopándose anguaño en Medina del Campo na que foi la duodécima xornada de caminata. Amás, resisten los siete mineros enzarraos nos pozos Santiagu y Candín, qu'amesten un día más a la so exemplar resistencia qu'acumula yá 37 díes embaxo tierra, fechu pol que nun apara la solidaridá diaria del pueblu pa con ellos mediante concentraciones y otros xestos.
Nel capítulu represivu, amás de les denuncies citaes en Ciñera, les redes sociales vienen espardiendo la denuncia de qu'una de les once persones deteníes ayeri pola Guardia Civil, recibió una paliza de seyes "axentes", que como ye vezu nes sos aiciones de tortura y represión quedarán impunes gracies a la complicidá de toles instituciones.
El coleutivu mineru anuncia que, una vegada comprobao que los planes de destrucción del seutor mineru del Ministeriu d'Industria siguen alantre, recrudecerán les sos aiciones, pa lo que piden tamién la solidaridá y sofitu de tol pueblu asturianu nesta llucha en defensa d'un seutor clave pa la economía del país.
FONTE: Infoasturies.net
