lunes, 28 de noviembre de 2011

CSI: Basta de farsa constitucional

NUN VAMOS PARAR: Manifestación. Martes 6. 12:30 h. Plaza l’Humedal. Xixón.


Tamos fartes y fartos de sentir que la Constitución Española ye la norma cimera pola que nos empobinamos nel Estáu español. Que gracies a ella vivimos en democracia, fuimos quien a algamar la triba sociedá de la qu’agora esfrutamos y que, a la fin, tolo que tenemos, debémos-ylo a esta Constitución.
Pero, cola que ta cayendo, tenemos de facenos una entruga: ¿qué ye, en realidad, lo que tenemos?, ¿cuáles son les conquistes d’esta Constitución?.
La rempuesta ye bien fácil. Dempués de 33 constitucionales años, vamos camín de los 100.000 paraos y paraes n’Asturies. Más de 5 millones nel Estáu. Les contines Reformes Llaborales prevoquen más paru, más emplegu temporal y despidos poco menos que de baldre. Les Reformes de les Pensiones aumentaron de 65 a 67 años la edá xubilación, amenorgaron les pensiones y la realidá ye que’l 72% los y les pensionistes cobren menos de 1.000 € y el 58% (más de la metada) cobren menos de 600 €. El desemplegu algama’l 45% la mocedá y los contratos de Formación y Aprendizax conderguen a los menores de 33 años a sueldos perbaxu los 600 € y a despidos de baldre ensin drechu a paru. Una presona de cada 4 ta na probitú y les condiciones de vida tan esfarrapándose ca vegada más. ¡Un gran ésitu Constitucional!.
El fraude fiscal, ello ye, lo que dexen de pagar los ricos, anda a la raya los 80.000 millones añales. La economía somorguiada, o seya, los beneficios empresariales non sopelexaos y que van “pa la faltriquera”, algamen los 250.000 millones d’euros añales (la mayor economía somorguiada de la Xunión Europea) y llevamos espetaos otros 240.000 millones nel rescate de la banca privada. Y too ello baxu l’abellugu llegal de la Constitución. ¡Otra gran victoria Constitucional!.
La Constitución garantízanos drechos básicos, comu’l drechu al trabayu o a una vivienda digna. Pero, cola Constitución na man, milenta de families vense desahuciaes y espulsaes de la so casa y yá son millones les presones ensin trabayu y ensin denguna triba d’ingresu. ¡Una nueva conquista Constitucional!.
La nuesa Constitución reconoz que la Soberanía l’Estáu reside nel Pueblo y que d’ésti Pueblu remanecen tolos poderes. Por embargu, y por mandáu Constitucional, tórgasenos la posibilidá d’escoyer la República comu forma de Gobiernu, deñégasenos la reconocencia’l drechu d’Autodetermín recoyíu nos estremaos sopelexos de la ONX y tórnase a les presones inmigrantes en man d’obra esclava, cuandu non se-yos detién arbitrariamente y se-yos espulsa. ¡Un nuevu trunfu de la nuesa Constitución!.
Esta situación agravóse entá más cola Constitución Europea. Un Tratáu metíu a calzador, ensin sofitu popular y al serviciu de quienes controlen la economía y nos averaron a la situación de bancarrota na qu’agora s’atopa la mayor parte de la población europea.
Pero nun yera una Constitución perféuta. Y hai dellos meses fízose una reforma costitucional. La “intocable” Constitución fízose “tocable”, cola disculpia d’amenorgar el débidu públicu. Y ensin entruga-y a naide, ensin permisu y ensin referendum, la nuesa Constitución ordena, agora, meter la tisoria nos servicios públicos más básicos, comu la Sanidá, la Enseñanza o los Servicios Sociales. Gracies a la nuesa Constitución, la Salú y la Educación van tornase en padrimoniu esclusivu de quienes tean perres pa pagalo. ¡Qué gran Constitución tenemos!.
Dende la CSI, camentamos que nun se trata d’ameyorar o reformar esta Constitución, porque esti camín Constitucional que nos planteguen ye un camín muertu. Nin ún solu de los grandes problemes que tenemos puede iguase en nome la Constitución, porque, a la fin, siempres va tar al serviciu d’eso que llamen “Los Mercaos”.
Tenemos un presente de paru, inxusticia y represión. Nun hai Constitución dala que nos igüe’l futuru. Namás que la firmeza y la llucha continua polos nuesos drechos pueden traenos un futuru meyor que’l que pretenden danos.