CSI énte'l conflictu de la minería.

Los y les trabayadores de la minería asturiana decidieron finar la fuelga y tornar al trabayu.

Cada trabayador y trabayadora sabe cuála foi la so actitú y la so aportación presonal demientres esti conflictu. Cada Trabayador y trabayadora sabe cuála foi l’actitú de toos y caún de los sindicatos. Cada trabayador y trabayadora sabe cuála foi la conducta y les direutrices de tolos dirixentes sindicales.

Nun ye l’intre reproches, pero sí de tener nidies delles realidaes:

1-El Gobiernu impuso, de momentu, les sos condiciones.
2-Los oxetivos que se plantegaben los sindicatos, al entamu la fuelga, nun s’algamaron de denguna les maneres.
3-El conflictu pesllóse en falsu y va tornar a recrudecese en pocos meses.

Na CSI nun damos esta llucha por finada y nin siquier pescanciamos comu un fracasu’l camín andáu fasta equí. El conflictu’l carbón deprendiónos que la xunión y la firmeza los y les trabayadores pueden engabitanos a algamar un futuru estremáu del que nos tienen preparáu.

Nesi sen, l’absolución dafechu de tolos imputaos en causes xudiciales remanecíes de les movilizaciones, ye una reivindicación inrenunciable.

Les movilizaciones tienen de continuar, porque la resinación enxamás traxo nada bono pa la clas obrera. Manifestaciones, paros temporales, xornaes de llucha, aiciones contundentes..., too ello puede servinos pa preparar, ensin munchu desgaste, les condiciones favoratibles pa un nuevu conflictu que, ensin dubia, va tornar a coyer protagonismu.

Pa ello, ye necesario que los dirixentes sindicales de CCOO y SOMA-UXT camuden d’actitú, defendiendo los drechos reales de los y les trabayadores y abandonando vieyes postures que namás van tornar traenos pieslles de pozos y perda de puestos de trabayu.

Les direiciones de CCOO y SOMA-UXT tienen la obligación de defender, perriba cualisquier sigla, los drechos ya intereses comunes del conxuntu los y les trabayadores y abandonar toa actitú ispirada nos intereses particulares de cualisquiera de los dos sindicatos o de los sos propios dirixentes.

De nun ser asina, queda nes manes de los y les trabayadores desbancar a estos dirixentes sindicales, afondar na propia autoorganización obrera y tornar a garrar, coles sos propies manes, unes riendes qu’enxamás debieren soltar.

Pero nes condiciones nes que tamos, dengún seutor, nin siquier el seutor mineru, va ser quien a iguar los sos problemes por sí solu. Los y les trabayadores de la mina necesiten urxentemente abrir el so conflictu a la participación y el sofitu d’otros seutores sociales y llaborales, porque esto yá tornó nuna llucha de tola sociedá asturiana.

Nun podemos siguir lluchando per separtáu en cada empresa o seutor, porque esto namás va empobinanos a la derrota. Ye necesario xunir a tolos y toles trabayadores d’empreses en conflictu ya incorporar a esa griesca al seutor más perxudicáu de toos: les presones en paru o con trabayos precarios.

Tenemos d’asumir y sofitar que cualisquier presona, de cualisquier seutor llaboral, minera o non, parada o non, tien d’amestase a cualisquier conflictu de cualisquier seutor. Trátase de sumar lluches y voluntaes.

La pallabra “rendición” nun ta nel nuesu dicionariu. La hestoria d’Asturies escribióse y va escribise con otres pallabres: firmeza, solidaridá y llucha obrera.

Andecha considera zarráu en falsu'l conflictu mineru

Una vegada más quedó n’evidencia que la estratexa de les direiciones sindicales de CCOO y SOMA-UGT lleven al esmantelamientu dafechu del seutor.
El determín de poner fin a la fuelga de la minería ensin tener algamáu nin el más mínimu de los oxetivos sindicales plantegaos y col trunfu de les condiciones impuestes pol Estáu español supon el zarru en falsu del conflictu mineru que, con toa probabilidá, tornará enfoscase nos prósimos meses.
Frente a quien da esta llucha por terminada y consideren fracasada la reivindicación, Andecha Astur quier destacar l’esfuerzu y l’exemplu de los mineros, y sopelexar el so convencimiento de que los únicos que fracasaron fueron les direiciones sindicales de CCOO y SOMA-UGT, que cola so enfermiza sumisión a los dictaos de Madrid seutorializaren el conflictu y porvocaren el so aisllamientu social y xeográfico, nuna dinámica suicida qu’agora tenemos que pagar toos.
Nesi senu Andecha Astur torna a faer un llamamientu a diches direiciones sindicales por que lleven alantre’l cambiu d’actitú que non solo la minería, sinón tola sociedá asturiana-yos demánda; que ruempan cola so dependencia de Madrid y dean en defender los drechos ya intereses de los trabayaores asturianos, abandonando dinámiques que namás tornarán trayemos zarros de pozos y perda de puestos de trabayu.

Ye nido que siguir defendiendo la seutorialidad del conflictu y negase a integralu dientru’l conxuntu de conflictos llaborales esistentes nel nuesu país, asumiendo la especificidá del marcu llaboral asturianu, non solo costitúi una torpeza que mos lleva de fracasu en fracasu, sinón una collaboración y complicidá coles polítiques d’esterminiu que ta aplicando l’Estáu español n’Asturies y que tán llevando a la sociedá asturiana a una situación de sufrimientu y precariedá inaceutables.

A lo último, Andecha Astur quier remembrar la necesidá de consiguir l’absolución de tolos imputaos en causes xudiciales derivaes de les movilizaciones, reivindicación inrenunciable que complica y agrava’l conflictu en sigo mesmu.