¡Feliz y bayuroso 2012!

Que l'añu 2012 seya de cambiu pa toes y toos los que creemos nesti país, na igualdá ente les persones y na lliberación de la humanidá del Réxime Burgués y la opresión nacional.

¡Puxa Asturies llibre!

Sigue sangrando al Pueblu Asturianu la emigración forciada.

• Dende Darréu queremos treslladar de nuevu la nuesa esmolición pa col grave problema demográficu que carez Asturies ca vuelta que s'asoleya una estadística demográfica nesti país. Esta vegada'l datu ye permurniu. Dende qu'entamó l'añu 2011 hasta'l mes de setiembre un total de 970 asturianos emigraron fuera del Estáu Español guetando meyores condiciones llaborales y de vida. Esti datu supón un espoxigue del 36,4 % del total d'emigráos y emigráes d'Asturies a fuera l'Estáu Español. Al mesmu tiempu, los datos del “Instituto Nacional d'Estadística” dicen que dende l'añu 2009 un total de 7.863 inmigráes n'Asturies abandonaron el nuesu país con destín a otros estaos, na mayoría de los casos el so propiu d'orixe. A estos datos hai qu'amestar les tradicionalmente abultáes cifres d'emigráos asturianos per otros pueblos del Estáu.
  Dende la Organización de Mocedá Independentista Revolucionario Darréu tenemos delles consideraciones alredor d'estos caberos datos:
  


• Los datos demográficos d'Asturies una vuelta más amuesen la realidá d'un país que pasu ente pasu va despoblándose. Demientres estes décades, el númberu de compatriotes emigráos/es medró progresivamente con unes cifres peraltes, polo que la emigración forciada yá ye un problema estructural na realidá xeneral de la nuesa nación.
  
  


• L'heriede de la FSA-PSOE gobernando n'Asturies ye de desaniciu total. Esti partíu políticu español dexó n'Asturies un problema estructural que va ser perdificil d'iguar y del cual falaron como “lleenda urbana”, espresión insultante pola qu'entá nun pidieron perdón al Pueblu Asturianu. Per otru llau, vemos como'l gobiernu de Foro Asturias dende que llegó al poder nun foi capaz de llevar midíes alantre cola fin d'aparar esta llaceriosa situación. Nin tan siquier punxo nes preferencies de la so axenda aparar la murnia situación demográfica que sofre esti país. Camentamos qu'esti gobiernu tamién ta interesáu en que los asturianos colen de la so patria, dexando vía llibre esti fechu a los sos escesos y les sos midíes antiasturianes y antisociales.
  
  


• Esti fenómenu social confirma lo que dende la izquierda soberanista llevamos años diciendo: Asturies sofre una grave crisis económica de calter estructural dende qu'entró n'escena la supuesta “reconversión industrial”. La crisis actual del capitalismu agrava esa situación de crisis permanente asturiana. Los periodos de mayor númbero d'emigraos coinciden dafechu col trescursu d'esa crisis permanente de la que falamos.
  
  


• La emigración forciada ye un fuerte elementu desmovilizador de les reivindicaciones y lluches del Pueblu Asturianu y sobre manera de la mocedá. Nin la represión, nin la criminalización de la rempuesta social son tan efeutives como esti fenómenu p'aparar cambios sociales y políticos n'Asturies.
  
  


• La situación de dependencia d'Asturies nun fai más qu'agravar la yá negativa realidá social qu'hai nel país. La soberanía d'Asturies como nación y la capacidá del Pueblu Asturianu de tomar decisiones por sí mesmu estimularíen de forma positiva la nuesa economía y el nuesu nivel de vida. Ye anguañu la llucha d'izquierda soberanista'l meyor preséu p'algamar una realidá de xusticia social plena na nuesa nación.
  

Dende la organización xuvenil Darréu queremos facer ver a la mocedá la precaria situación que carez el país asturianu col fenómenu de la emigración forciada. D'otra miente, llamamos a les moces y mozos a lluchar contra esti despoblamientu al que quieren conderganos. Solo la rempuesta social de la mocedá pue facer que los responsables d'estos datos nun queden impunes, pues queremos vivir y trabayar n'Asturies.

¡NUN EMIGRES, LLUCHA!
¡PUXA ASTURIES LLIBRE Y SOCIALISTA

WWW.DARREU.ORG

Seis coleutivos roblen un comunicáu nel que demanden el retornu de les seleiciones asturianes

Nestes feches navidiegues ye vezu que les seleiciones nacionales ensin estáu disputen alcuentros amistososos, anque Asturies hai dellos años que nun disfruta d’esti tipu de choques. Seis coleutivos demanden el retornu d’estos partíos.

La Xunta Cultural Rebelgu, l’Asociación Cultural N’Ast, el Bloque de la Mocedá Asturianista, Darréu, Conceyu Abiertu y Andecha Astur son les organizaciones que sofiten esti comunicáu conxuntu que reclama a les instituciones asturianes que tornen a organizar, xunto coles federaciones respeutives, partíos de calter internacional nel que compitan les seleiciones absolutes asturianes. La primera en debutar nestos partíos navidiegos foi la de fútbol nel 2000 con aquel partíu recordáu nel Carlos Tartiere, que presentó un llenu nes grades, ante Macedonia (1-0). Tres el debú del combináu del deporte más mayoritariu, que celebró dos choques más nos años siguientes, llegaron más partíos internacionales en disciplines como balonmano, balonvolea o ḥoquei patinos, choque que lleven tamién dellos años ensin celebrase. Mentes, güei, la seleición de fútbol d’Euskadi va disputar el so tradicional alcuentru de Navidá –al final de temporada viaxa al estranxeru para celebrar otru partíu–, en San Mamés ante Túnez, mesmu rival que va visitar el vienres el Lluís Companys pa enfrentase a Catalunya.

Cola supresión de los partíos de los combinaos absolutos asturianos “vino una época de silenciu institucional alredor d'esti tema, nun queriendo tratalu énte la sociedá asturiano, ensabiendo’lgobiernu anterior que los ciudadanos y ciudadanes d'esti país demandaben partíos de la so seleición”. Por esti motivu, los seis coleutivos firmantes acusen a FSA-PSOE de ser la “gran responsable d'esti parón, pero tamién de bona parte de la decadencia y falta de promoción que tien bona parte del deporte asturianu, yá qu'estos alcuentros yeren una gran ferramienta pa visibilizar de forma internacional el potencial deportivu qu'hai n'Asturies”. Tres el cambiu nel Executivu, cola entrada de Foro Asturias Ciudadano (FAC), “un partíu políticu que se diz ‘rexonalista’ o ’asturianista’”, esperen que la situación cambie.

D’igual forma, creen importante que la organización d’estos eventos se faiga con “austeridá, faciendo que'l beneficiu económicu que salga d'ellos s’invierta nel deporte base asturianu, onde munches entidaes deportives pequeñes tan pasando munches dificultaes”. Por último, aboguen pola oficialidá de les seleiciones asturianes pa poder competir internacionalmente. Nesi sen, estos coleutivos diseñaron un logu pa facer visible la so reivindicación, símbolu que recuerda muncho a los fechos pola FIFA pa los sos torneos.

Fonte: Asturies.com

Mensaxe del Rei d'España

Vidiu presentación Iniciativa pol Asturianu.

Merucu xusticieru, poder popular.

Les muries dicen la verdá...

Les muries dicen lo que duel...

Olloniego, Asturies.

"(...) Dios te llibre de Castiella"

Valoración elleiciones estatales de 2011

Lo primero ye valorar el calter esceicional d’esta convocatoria elleutoral, qu’hebio se ser adelantada y que vieno fondamente marcada pola cris económica “internacional” y el bipartidismu, cola alternacia PSOE-PP nel gobiernu español. Ello asina, atalantamos que los analís al respeutu resultaríen tan complexos comu ineficaces a la hora de valorar estes elleiciones en clave nacional.

Situación previa

A la escontra, el puntu de partía tien de ser necesariamente la situación xenerada n’Asturies de magar les postreres elleiciones nacionales, de mayu d’esti añu, onde les opciones asturianes presentes non solo tornaron a acupar un espaciu marxinal nel panorama políticu asturianu sinon que nel casu d’URAS-PAS o el Bloque-UNA, los oxetivos marcaos quedaron tan descomanadamente lloñe de los resultaos algamaos que se xeneró un marcu nueu al que tendrán d’afayase y que los condiciona pa prósimes convocatories elleutorales. (Ver valoración d’Elleiciones Nacionales y de Conceyu 2011)
Nel casu d’Andecha Astur, qu’apostó por Conceyu Abiertu comu marcu ampliu al traviés del qu’algamar la xunidá d’aición, vista la imposibilidá d’avanzar mínimamente n’alcuerdos col restu de formaciones polítiques asturianes, la situación nun camudó un res coles elleiciones nacionales, aparte de confirmar l’aciertu táuticu de Conceyu Abiertu y les sos posibilidaes de futuru frente al inmovilismu partidista.Arriendes d’ello, la irrupción de Foro por Asturias nel panorama políticu asturianu, acupando col so mensaxe lo que fasta entós fuere l’espaciu asturianista, y l’asitiamientu d’IU na oposición, y per ende en situación de caltener la coherencia programática al nun tener acesu a les avezaes “compensaciones” pola so participación nel gobiernu del “Principado” col PSOE, modificaren fondamente la situación política asturiana.

Elleiciones estatales

Nesi contestu, la convocatoria d’Elleiciones estatales debiera tener servío pa facer un apueste por algamar esa xunidá d’aición elleutoral ente les formaciones polítiques asturianes y ver d’afitar un espaciu propiu de magar el que dir llimando aspereces y ufiertando a la sociedá asturiana una alternativa elleutoralmente viable. Llamentablemente los llamaos fechos por Andecha Astur nesi sen (Dii de la Nación Asturiana) nun atoparon el menor ecu,dexando erma esa posibilidá dende un entamu.
Arriendes d’ello, la nuea llexislación elleutoral española qu’obligaba, escontra tou xacíu democráticu, a algamar un mínimu del 0,1% de firmes del elleutoráu, suponía una torga pa la presentación de les formaciones polítiques asturianes que veníen de carecer un auténticu descalabru elleutoral, y en tantu que Conceyu Abiertu definió’l so espaciu d’actuación esclusivamente a nivel de conceyu y nacional, a lo menos mentes toviere na presentefas d’acumulación de fuercies y d’encadarmamientu organizativu, cabía seriamente la posibilidá de que l’espaciu políticu asturianu quedare ensin acupar, tresmitiendo una imaxe de debilidá estrema ensin precedentes.

Oxetivos, valoración y analís de la situación poselleutoral

Ye nesa situación na qu’Andecha Astur asumió la responsabilidá de presentase a estes elleiciones, y féxolo con oxetivos mui concretos:
• Amosar la capacidá del nacionalismu asturianu pa superar les torgues impuestes pol Estáu español pa presentase a estes elleiciones.• Caltener la presencia de la opción nacional asturiana nestes elleiciones.• Avanzar na normalización llingüística.
Nesi sen, la valoración d’estes elleiciones tien de ser en tantu a los oxetivos marcaos y ye nidio que s’algamaren perriba de les propies espeutatives darréu que:
• Superóse ampliamente y ensin mayor dificultá la peñera de les 1.000 firmes.• Caltúvose una presencia considerable na campaña elleutoral, amosando una vuelta más la capacidá d’organización y militancia d’Andecha Astur.• Consiguióse otru avance na normalización llingúística al algamar que se dieren por válidos tolos documentos presentaos en llingua asturiana y que la mesma Xunta Elleutoral provincial ratificare per escrito la validez de les papeletes en llingua asturiana.
Por embargu, y pesia superar ampliamente los oxetivos colos que mos presentemos a estes elleiciones, l’analís nun pue ser positivu porque una vuelta más quedó n’evidencia’l calter marxinal del nacionalismu asturianu, y la falta d’un mínimu de comunicación ente les formaciones polítiques asturianes cara a avanzar en procesos de xunidá d’aición que dean puxu a un espaciu políticu propiu y a la so rentabilización elleutoral.
Ye nidio que los resultaos elleutorales demuesen la esistencia d’un espaciu elleutoral propiu pal nacionalismu d’izquierda y el caltenimientu del compromisu por un seutor de la sociedá asturiana que nun se dexa influenciar poles situaciones polítiques esternes, calteniéndose na coherencia y na llucha.Pero con afitar el so munchu valir y la garantía de futuru qu’ello representa, hai de reconocer que resulta insuficiente de toes toes si bramente queremos condicionar de dalguna mena’l panorama políticu asturianu.
Pa enriba, l’escenariu restante a nivel nacional determinará la “re-asturianización” de les propuestes de Foro, una vuelta fracasáu’l so intentu de “reconquista” de la drecha española, y l’ascensu d’IU que por primer vegada dende hai munchu tiempu nun va quedar n’evidencia por hipotecar les sos propuestes programátiques polo beneficios a algamar por participar nel gobiernu col PSOE, y de xuru resucitará’l so componente asturianista, defendiendola oficialidá, el mediu ambiente, la democracia participativo… agora que yá nun tienen posibilidaes polítiques de llevalo alantre.
Ello asina, lo mesmo que pasó nestes elleiciones estatales nes que la mayor parte del votu “asturianu” foi recuperáu por IU y el Foro por Asturias, quedaría por ver si dellos seutores fasta hai vien pocu prósimos a IU (mesmamente el Bloque por Asturies que tuvo coaligáu con ella y formó parte del gobiernu del “Principado” fasta unos meses enantes de les elleiciones nacionales) tornen de nueu al espaciu d’izquierda española autonomista, o si bien prefieren apuestar pola xunidá d’aición na esquierda soberanista y que los restos del votu URAS-PAS se vuelquen dientru Foro por Asturias o si se descuelguen definitivamente de les postures más rexonalistes y redefinen el so proyeutu averandose tamién más al soberanismud’izquierda.

Alternatives de futuru

A la fin, y comu concluxón d’esti analís, Andecha Astur perafítase na necesidá d’enartar un espaciu políticu asturianu, lo más ámpliu y respetuosu posible pa con toles formaciones y sensibilidaes polítiques, que marque una distancia col autonomismu españolista, y que ponga n’evidencia la precariedá de la nuesa supervivencia comu Pueblu, frutu del desigual enfrentamientu ente los intereses del Estáu español y d’Asturies, y del xabaz procesu d’asimilación nacional y de falta de llibertaes democrátiques que carecemos con esi oxetu.
Ello asina, Andecha Astur reitera la so dimposición permanente a participar en toes y caúna de les propuestes que puean dase cara a la xunidá d’aición de presones y formaciones, perafitando nel equí y agora, el so compromisu con Conceyu Abiertu, non solo porque la esperiencia asina lo avala, sinon en tantu supón la única iniciativa xunitaria fasta agora esistente.
D’otra miente, y dientru la necesidá refería de xenerar espacios políticos propios, Andecha Astur camienta qu’independientemente de los deseyables procesos de xunidá d’aición nos que se compromete a participar, faise tamién imprescindible redefinir y afondar nel conceutu de Movimientu de Lliberación Nacional comu espeutativa de futuru nel algame d’una Asturies llibre, independiente y socialista.

Que guapu ye querese.

¡España una y no 51!

¡Suprimamos las Comunidades Autónomas!

¡El bable es una forma de hablar residual!

¡Arriba España, malditos nacionalistas!

Iniciativa pol Asturianu, asociación nueva en defensa de la llingua, va presentase’l sábadu n'Uviéu

Dende hai unos meses, un grupu de persones ta trabayando na creación d’un coleutivu nuevu de defensa de la llingua asturiana. Ésti, que lleva’l nome d’Iniciativa pol Asturianu, va presentase’l sábadu n’Uviéu. L’actu, abiertu a toles persones interesaes nesti proyeutu, va desarrollase a les 19 hores nel salón d’actos de la Biblioteca d’Asturies (El Fontán). Nél van presentase les llinies xenerales de trabayu de la organización, que celebró’l so conceyu fundacional el 29 d’ochobre pasáu nel Auditoriu d’Uviéu, asina como’l so organigrama. L’eventu previstu esti sábadu tamién va tener güecu pal humor y la música. Tres el mesmu, magar les 21 hores, va celebrase una folixa nel chigre L’Esperteyu.

Iniciativa pol Asturianu ye una asociación “de ciudadanos pa ciudadanos” col oxetivu de trabayar pola normalización de la llingua asturiana y pol reconocimientu de los derechos llingüísticos de tolos asturianos. Por esti motivu, establez nos sos estatutos que nenguna persona de la xunta direutiva pueda exercer nengún cargu en partíu políticu y sindicatu. La intención del coleutivu ye tener implantación en tolos conceyos del país, dar visibilidá al conflictu llingüísticu y afalar la oficialidá.

Fonte: Asturies.com

Tertulia sobre 'Nacionalidá y Marxismu' en Xixón

La Tertulia García Rendueles d'esti prósimu xueves tratará sobro "Nacionalidá y marxismu"

Fonsu Suárez (Xixón, 1991) participara’l prósimu xueves 15 na Tertulia Enrique García Rendueles con una ponencia sobro la cuestión nacional nel pensamientu marxista. Suárez , estudiante de Filoloxía de la Universidá d’Uviéu, ye militante de Fai! y de Conceyu Abiertu por Xixón. Dende bien de mozu participa en dellos movimientos sociales y plataformes estudiantiles. Anguaño lleva los blogues D’ayuri a nenyuri y “Estratexa y táctica”.

Na so charra va presentarar dalgunes pincelaes sobro la concepción de la custión nacional na obra de Carlos Marx y Federicu Engels, desmintiendo dellos mitos sobro l’antisoberanismu de los autores y exemplificando sobro too na so opinión sobro’l casu irlandés. Plantegará tamién les visiones de les más importantes corrientes marxistes, destacando sobro too’l conflictu ente la visión leninista y la trotskista y luxemburguista. Mui penriba comentaranse delles esperiencies hestóriques comu Rumanía, Corea y Cuba y la so aplicación nel Estáu español al traviés de teóricos como Iñaki Gil San Vicente y de organizaciones polítiques como’l MDT catalán. Na tertulia analizarase en comuña si Asturies ta o non preparada pa la independencia baxo un modelu socialista de sociedá y qué fadría falta pa empobinar esi camín dao la situación d’anguañu.

Fonte: infoasturies

Cuba eliminará la probitú pa 2015 y ye l'únicu país ensín desnutrición infantil.

Nel últimu informe del Fondu de les Naciones Xunies pa la Infancia (UNICEF) tituláu como "Progresu pa la Infancia un Balance sobre la Nutrición", determinó qu'anguañu nel mundu esisten 146 millones de neños y neñes menores de cincu años con problemes de consideranza de desnutrición infantil.

Cuba ye l'únicu país d'América Llatina y el Caribe que nun presenta desnutrición infantil. Esti datu se fundamenta nel enfotu que punxo'l Gobiernu Cubanu por ameyorar l'alimentación, sobre manera la de los grupos necesitaos. LA FAO reconoz a Cuba como la nación americana con más avances pa aparar y desanicia la desnutrición.

Nun hemos d'escaecer que l'Estáu Cubanu garantiza una canasta básica alimenticia y promueve los beneficios de la llactancia materna, calteniendo hasta'l cuartu mes de vida la llactancia esclusiva y complementando hasta'l sestu mes con otros alimentos. Amás, a toles neñes y neños se-yos entrega dende la ñacencia a los siete años d'edá un llitru llechi de forma diaria, ente otros alimentos.

La propia ONU punxo a CUba na vanguardia de países que cumplen col desarrollu humanu. Pa 2015, por si fuera pocu, Cuba tien ente los sos oxetivos desanicia la probitú total y garantizar la sustentabilidá ambiental.

Nun hai qu'escaecer qu'estos datos y llogros vienen de la man de 50 años d'embargu y de bloqueu económicu, comercial y financieru impuestu por Estaos Xunios.

Darréu participó na manifestación contra la farsa costitucional.

La mocedá d'izquierda soberanista participó activamente na manifestación entamada en Xixón polos sindicatos de clas CSI y CXT coincidiendo col Día de la Constitución Española. Asina, los mozos y moces soberanistes participaron nesta movilización contra esa farsa costituciones y les agresiones ya imposiciones del capitalismu español. Nel actu, Darréu repartió'l so manifiestu nacional contra la CE'1978, que lleva dellos díes espardiéndose pela rede y les cais d'Asturies, y que nesti mesmu blogue podeis atopar unes entraes más abaxu. Cientos de persones participaron na manifestación d'ayeri 6 d'avientu pesie a que La Nueva Engaña y La Coz d'Asturies mientan alredor de la convocatoria, falando de "decenes" y dando-y un espaciu na prensa insinificante.

Ñaz "Acción y Política", nueva aniciativa na bloguesfera asturiana

Biblioteca en llinia y en llingua asturiana.

La bloguesfera n'asturianu vien de conocer l'entamu d'una nueva aniciativa cola llingua del país como mediu d'espresión, asina como col enfotu d'aidar al treslladu del pensamientu alternativu al conxuntu de la población de la nuesa nación. Denómase "Acción y Política", biblioteca en llinia na nuesa llingua.

Según se desplica, Acción y Política "nun tién otru envís que'l de proporcionar testos, cartafueyos o llibros n'otres llingues tornaes al asturianu sobre temes que, normalmente, tan vetaos na nuesa llingua. La edición d'un llibru ye caro, los llectores (y mas na llingua llariega) pocos, el sistema de sovenciones creáu polos españoles n'Asturies torga la posibilidá de falar temes como la llucha armada o'l socialismu y les editoriales qu'asumen esti papel, con gran esfuerzu pola so parte tamién sía dicho, suelen apostar por llibros nuevos mas que por tornes (asumiendo que si un llibru ya ta en castellanu ya puede lleese) colo que nun son quien a finar coles ganes de mas llectura na llingua de nueso".

D'esta mena, l'internacionalismu, la lliberación nacional, el socialismu, el feminismu, la defensa de la tierra, los drechos llinguísticos, la hestoria, l'antifacismu, o la formación militante cunten con un nuevu espaciu na rede.

http://accionypolitica.blogspot.com/



Fonte: Infoasturies.net

Manifiestu Nacional de Darréu escontra la Constitución Española de 1978.

Dende la organización xuvenil Darréu queremos amosar la nuesa posición a la sociedá asturiano respeutu a la Constitución Española. Esti manifiestu ye contrariu a la carta magna, dende'l nuesu coleutivu d'izquierda soberanista pidimos la abolición polos motivos que vienen darréu:

• Antidemocrática. La redaición y el supuestu consensu d'esti cuerpu llegal foi fecha a puerta zarrada, ente dellos grupos parlamentarios (UCD-PSOE-PDC-AP-PCE) y ensín consultar al conxuntu de la sociedá civil. Amás nun hai qu'escaecer que la mayoría de los cuadros direutivos qu'eses dos fuercies polítiques salieron del propiu Réximen franquista anterior, asimilando toles directrices que'l franquismu punxo de cara a un escenariu de reforma “democrática” que permitiera la entrada del Estáu Español nel capitalismu europe. Igualmente esti testu privilexa les formes de representación partitocrática sobre cualesquier mena de mecanismu de participación direuta y decisión popular. La constitución española amás establez una supuesta separtación de poderos, inesistente na práutica como s'espeya nel fechu de que'l poder xudicial tea controláu pol control políticu. El “si” algamó n'Asturies el 89% de los votos, pero lo que nunca nun se diz ye que namás el 61 % de los/es asturianos/es votaron nesa cita de sufraxiu.
  
  




• Nacionalista española. L'artículu 2 del títulu preliminar del testu llegal español afita que “ La Constitución fundaméntase na indisoluble unidá de la Nación española, patria común e indivisible de tolos españoles”. Asina, la Constitución del Estáu Español dexa claru que l'estáu nun ta dimpuesto a garantizar el drechu al llibre determín a los pueblos, oponiéndose a que la ciudadanía de les estremaes naciones qu'hai nel Estáu voten de forma democrática si quieren dar o non un pasu alantre nel so llibre exerciciu de la soberanía, prohibiendo l'Estáu la separtación de los pueblos del Reinu d'España. Amás, les cuotes d'autonomía y autogobiernu son efeutives siempres cuando quiera'l Poder Central, única fonte llegal d'autoridá política, y non cuando quiera la ciudadanía de cada país. Asturies, como nun podría ser d'otra manera nun tien dengún tipu de drechu nesi sen, diendo'l marcu llegal de nuesu mui per detrás del sentimientu de la sociedá asturiana.






• Capitalista y monárquica. Anque según el testu constitucional España s'establez como “un Estáu Social y de Drechu”, el testu llegal dexa vía llibre a cualesquier agresión y abusu del neolliberalismu económicu y políticu. Los drechos sociales y llaborales tan supuestamente garantizaos d'una forma ambigua y pocu rigurosa. Per otru llau la Constitución Española de 1978 ta firmada pol actual xefe del Estáu, Juan Carlos I, rei borbón nomáu pol dictador facista Francisco Franco, polo tantu herederu activu de Franco y persona de confianza del facismu españolista. Amás, s'implanta nesti Estáu Español una monarquía corrupta qu'enxamás foi aprebada baxo un exerciciu de votación. Asturies amás tien qu'aguantar el status de Principáu, con unos principes d'Asturies que dengún asturianu decidió si teníen de ser principes o non, y si teníen de ser d'Asturies o non. Lo ciertu ye que'l pueblu asturianu enxamás tuvo ente les sos señes d'identidá la defensa de la Monarquía española na hestoria moderna, calteniendo a lo llargu de la so hestoria grandes conflictos col Reinu de Castiella, y el so sucesor, el Reinu d'España.






• Con esta Constitución Asturies pierde. L'Estáu Español y el so axente nesti país, el Gobiernu del Principáu, imponen un modelu alloñáu a les necesidades del Pueblu Asturianu. Asturies carez de muérganos reales de decisión política y social yá que la Xunta Xeneral ta encarcelada dientru de les llendes alministratives qu'establez la Constitución de 1978 y la so ideoloxía: El nacionalismu españolista, que viola los drechos nacionales a los pueblos del Estáu como Asturies y la defensa de los privilexios de la oligarquía capitalista. El testu constitucional nun val de muncho p'Asturies, la so interpretación oxetiva solo se puen facer dende'l poder centraliegu del Estáu, siendo exemplu d'ello la situación de la llingua asturiana, que nun tien entá un situación de reconocencia oficial pesie a que'l testu constitucional establez que “les demás llingües españoles serán también oficiales nes respeutives Comunidaes Autónomes d'alcuerdu colos sos Estatutos”.
  

Asina pues, dende Darréu llamamos a la sociedá a entamar un exerciciu de crítica política ya ideolóxica del actual marcu llegal actual qu'Asturies carez cola Constitución de 1978, una Constitución alrodiu de la cual s’estructura como Estáu’l “Reino de España” al serviciu del capitalismu y del nacionalismu español más autoritariu. Creemos que'l Pueblu Trabayador Asturianu tien de dase cuenta de que la Constitución Española ye un documentu siguidista del Réximen Franquista, siendo'l constitucionalismu d'esta II Restauración borbónica’l franquismu d'antañu. Poro, amás d'esi exerciciu teóricu y críticu pidimos a la población asturiana la implicación y l'aición pa superar esti marcu en favor d'una Asturies xusta no social y soberana no nacional.

¡Abaxu la Constitución Española de 1978! ¡Abaxu'l Réximen monárquicu españolista!

¡SI a la soberanía nacional d'Asturies!. ¡SI a la xusticia social!





Fonte: http://www.darreu.org/

Manifiestu Nacional de Darréu escontra la Constitución Española de 1978.

Mapa de riesgos y barreres por Conceyu Abiertu por Noreña.

Conceyu Abiertu por Noreña presenta un mapa participativu col oxetivu de ser ferramienta de denuncia, prevención y d’actuación política, la primera denunciar los numberosos pasos de peatones ensin adaptar y qu'incumplen la llei. El mapa, qu’agora recueye mediu centenar d’incidencies, va dir actualizándose periódicamente col material recoyíu y la intención de Conceyu Abiertu ye llevar alantre iniciatives pa iguar no posible les riesgos y barreres recoyíos.
Pasos de peatones ensin adaptar
Nesta llinia la primer iniciativa de Conceyu Abiertu ye, a la vista de la esistencia de polo menos 7 pasos de peatones ensin adaptar, poner en conocimientu del gobiernu y los grupos municipales, esta situación illegal qu’atenta contra los drechos de les persones discapacitaes y con problemas de movilidá. Dase la circunstancia, apunta CA NOREÑA qu'en munchos casos nuna acera si ta adaptáu pero la d’enfrente non, lo que dexa claro qu’hai una falta de planificación y d’interés énte la necesidá d’una Noreña accesible y de toos y toes, amás llama la intención qu’unu d’estos pasos de peatones ensin adaptar alcuentrase xusto delantre de la sede del PSOE, que vien gobernando nos últimos años.
Presentación pública
Con too ello, el 30 de payares Conceyu Abiertu por Noreña va facer una presentación pública del Mapa de riesgos y barreres de Noreña na Casa de la Cultura, a cargu del conceyal Pablo Pérez y debatirase sobre estes problemátiques y les medíes a proponer "p’avanzar hacia un pueblu pa les persones".

Fonte: CA

CSI: Basta de farsa constitucional

NUN VAMOS PARAR: Manifestación. Martes 6. 12:30 h. Plaza l’Humedal. Xixón.

Tamos fartes y fartos de sentir que la Constitución Española ye la norma cimera pola que nos empobinamos nel Estáu español. Que gracies a ella vivimos en democracia, fuimos quien a algamar la triba sociedá de la qu’agora esfrutamos y que, a la fin, tolo que tenemos, debémos-ylo a esta Constitución.
Pero, cola que ta cayendo, tenemos de facenos una entruga: ¿qué ye, en realidad, lo que tenemos?, ¿cuáles son les conquistes d’esta Constitución?.
La rempuesta ye bien fácil. Dempués de 33 constitucionales años, vamos camín de los 100.000 paraos y paraes n’Asturies. Más de 5 millones nel Estáu. Les contines Reformes Llaborales prevoquen más paru, más emplegu temporal y despidos poco menos que de baldre. Les Reformes de les Pensiones aumentaron de 65 a 67 años la edá xubilación, amenorgaron les pensiones y la realidá ye que’l 72% los y les pensionistes cobren menos de 1.000 € y el 58% (más de la metada) cobren menos de 600 €. El desemplegu algama’l 45% la mocedá y los contratos de Formación y Aprendizax conderguen a los menores de 33 años a sueldos perbaxu los 600 € y a despidos de baldre ensin drechu a paru. Una presona de cada 4 ta na probitú y les condiciones de vida tan esfarrapándose ca vegada más. ¡Un gran ésitu Constitucional!.
El fraude fiscal, ello ye, lo que dexen de pagar los ricos, anda a la raya los 80.000 millones añales. La economía somorguiada, o seya, los beneficios empresariales non sopelexaos y que van “pa la faltriquera”, algamen los 250.000 millones d’euros añales (la mayor economía somorguiada de la Xunión Europea) y llevamos espetaos otros 240.000 millones nel rescate de la banca privada. Y too ello baxu l’abellugu llegal de la Constitución. ¡Otra gran victoria Constitucional!.
La Constitución garantízanos drechos básicos, comu’l drechu al trabayu o a una vivienda digna. Pero, cola Constitución na man, milenta de families vense desahuciaes y espulsaes de la so casa y yá son millones les presones ensin trabayu y ensin denguna triba d’ingresu. ¡Una nueva conquista Constitucional!.
La nuesa Constitución reconoz que la Soberanía l’Estáu reside nel Pueblo y que d’ésti Pueblu remanecen tolos poderes. Por embargu, y por mandáu Constitucional, tórgasenos la posibilidá d’escoyer la República comu forma de Gobiernu, deñégasenos la reconocencia’l drechu d’Autodetermín recoyíu nos estremaos sopelexos de la ONX y tórnase a les presones inmigrantes en man d’obra esclava, cuandu non se-yos detién arbitrariamente y se-yos espulsa. ¡Un nuevu trunfu de la nuesa Constitución!.
Esta situación agravóse entá más cola Constitución Europea. Un Tratáu metíu a calzador, ensin sofitu popular y al serviciu de quienes controlen la economía y nos averaron a la situación de bancarrota na qu’agora s’atopa la mayor parte de la población europea.
Pero nun yera una Constitución perféuta. Y hai dellos meses fízose una reforma costitucional. La “intocable” Constitución fízose “tocable”, cola disculpia d’amenorgar el débidu públicu. Y ensin entruga-y a naide, ensin permisu y ensin referendum, la nuesa Constitución ordena, agora, meter la tisoria nos servicios públicos más básicos, comu la Sanidá, la Enseñanza o los Servicios Sociales. Gracies a la nuesa Constitución, la Salú y la Educación van tornase en padrimoniu esclusivu de quienes tean perres pa pagalo. ¡Qué gran Constitución tenemos!.
Dende la CSI, camentamos que nun se trata d’ameyorar o reformar esta Constitución, porque esti camín Constitucional que nos planteguen ye un camín muertu. Nin ún solu de los grandes problemes que tenemos puede iguase en nome la Constitución, porque, a la fin, siempres va tar al serviciu d’eso que llamen “Los Mercaos”.
Tenemos un presente de paru, inxusticia y represión. Nun hai Constitución dala que nos igüe’l futuru. Namás que la firmeza y la llucha continua polos nuesos drechos pueden traenos un futuru meyor que’l que pretenden danos.

http://www.csi-asturies.org/

Manifiestu conxuntu nel Día Internacional Contra la Violencia de Xéneru.

Concentración d'ayeri n'Uviéu

Manifiestu conxuntu nel Día Internacional Contra la Violencia de Xéneru.

Nesti 25 de payares de 2011, Día Internacional contra la violencia de xéneru, les organizaciones xuveniles CSI-Mocedá, Darréu y el Bloque de la Mocedá Asturianista, queremos amosar otru añu más el nuestru rechazu a esta llacra social y la nuesa solidaridá coles víctimes.

Pesie a los numberosos reconocimientos ya iniciatives institucionales, el terrorismu de xéneru sigue dexando víctimes cada día, llevantando tamién interrogatorios al rodiu la efectividá de les midíes empobinaes p’acabar con esti problema.

Como organizaciones xuveniles, también vemos con especial esmolecimientu la pervivencia de la violencia sexista ente la mocedá. D'esti mou, dende CSI-Mocedá, Darréu y el Bloque de la Mocedá Asturianista, proponemos una serie d'iniciatives pa fomentar l'alderique social necesariu nel que se tien qu'afondar pa combatir con mayor eficacia esta llacra:

Igualdá económica y social:

Mentanto siga existiendo desigualdá y dependencia económica de la muyer en rellación al home, siguirá habiendo violencia sexista. Poro, llamamos a desendolcar polítiques efectives y reales que regulen el mercáu de trabayu col oxetivu d'acabar cola discriminación salarial y social de la muyer.
Más tovía n’Asturies, país nel que la precariedá xuvenil, la mínima tasa de natalidá y les altes cifres de paru femeninu, agraven el problema.

La educación, motor del cambiu:

El sexismu impónse dende la temprana infancia, por eso llamamos a l'actualización de los planes educativos pa torgar la reproducción d'estereotipos sexistes, fomentar les rellaciones n'igualdá y la formación n'educación sexual.

Al empar, exisimos a les instituciones públiques que regulen los conteníos sexistes nos medios de comunicación de mases, aspectos determinantes pa la socialización de les persones y nos qu'impera'l sexismu al traviés de la publicidá y la programación televisiva. Lo mesmo pa los productos infantiles, materiales d'ociu que reproducen abondos elementos sexistes.

Más fondos pa la llucha contra'l terrorismu de xéneru:

Nun contestu nel que yá nun existe nengún conflictu armáu nel Estáu español, recomendamos destinar el presupuestu destináu anteriormente a la llamada llucha contra'l terrorismu pa emplegalu en combatir efectivamente'l terrorismu de xéneru, primera causa de muerte femenina nel conxuntu del Estáu.

Al mesmu tiempu, creemos que la vía policial y xudicial nun ye la única p'acabar cola violencia sexista; polo tanto, tamién creemos n’afrontar el problema dende’l raigañu y na necesidá de destinar mayores partides presupuestaries a la educación, a la prevención y a l'ayuda real a les víctimes.

El cambiu entama per cada persona:

Toes estes propuestes quedaríen n'ermu si cada persona nun entama a cambiar la so actitú de manera individual. Somos munches les que conocemos a víctimes de violencia sexistes, munches les qu'en dalgún momentu toleramos y combayamos con ciertes actitúes sexistes; polo tanto, nós tenemos que ser la base qu'acompañe a les demás midíes públiques pa que'l cambiu y la erradicación d'esta llacra sea tanxible.

Por último, les organizaciones xuveniles d’izquierda soberanista firmantes, recordamos que nesti contestu de crisis ye fundamental la fortaleza del sector públicu y de los servicios sociales pa torgar la desigualdá. Polo tanto, oponémonos al desmantelamientu de los servicios públicos y a la escalada neolliberal dictada polos mercaos y cumplida sumisamente polos distintos gobiernos capitalistes españoles y asturianos.

Bloque de la Mocedá Asturianista, Corriente Sindical d’Izquierda-Mocedá, Darréu. 25 de payares de 2011

Piden que'l nueu llíder del PSOE seya un "español ensin complexos"

Siguiendo la escuela de la FSA.

Destacaos miembros del PSOE a nivel estatal vienen de manifestar nes caberes feches que la persona que llidere al partíu al traviés de la secretaría xeneral tres el batacazu elleutoral del 20 de Payares debe "apostar por españa y dexar al marxe la defensa de los territorios"; el nacionalista español José Bono, de la fastera más drechista del PSOE, afitó que'l nuevu llíder tien que ser "un español ensin complexos, que lluche pol partíu y polos españoles".

Asina, el PSOE consolida non sólo la so deriva haza la drecha neolliberal, con casos recientes como l'indultu al númberu dos del grupu bancariu Santander, que diba camín de la inhabilitación pal exerciciu de cualquier cargu n'entidaes bancaries, lo que supondría un güelpe importante pal bancu d'Emilio Botín. El PSOE, nún de los sos caberos servicios prestaos a la banca, concedió l'indultu nel Conseyu de ministros.

Agora presumiblemente consolida tamién una deriva centraliega, qu'habrá que güeyar si afeuta a les poques federaciones con una mínima sensibilidá y respetu haza la identidá nacional de la so comunidá; ente eses poques, nun s'atopa l'asturiana, que va décades qu'adoptó los requisitos qu'agora reclamen Bono y otros dirixentes "socialistes".

Fonte: Infoasturies.net

Asturies asítiase nos 25 territorios europeos con más paru

Xube 8 puestos nun añu.

Nel añu 2010 Asturies xubió 8 puestos nel "ranking" de territorios europeos con mayor tasa de desemplegu, pasando del puestu 30 al 22 nos caberos 365 díes. De los 271 territorios que conformen la Xunión Europea, les pertenecientes el estáu español ocupen les primeres posiciones, acompangaes polos dominios franceses de Reunión, Guayana, Guadalupe y Martinica.Asina, Asturies colócase a l'altor de rexones pertenecientes a Grecia o Eslovenia no que se refier a tasa global de trabayadores en situación de desemplegu.

No cincante al desemplegu xuvenil, el más de 37% de mozos y moces asturianes en paru asitien al nuesu país nel puestu 20 de la Xunión Europea, baxando cuatro puestos por mor del espoxigue descomanáu del desemplegu xuvenil en dalgunes rexones italianes que superaron el 40%. Sicasí, nun se cunten factores como la mocedá que se ve forzada a emigrar a la gueta de la supervivencia, lo que xubiría de manera sensible la posición d'Asturies na clasificación.

La plataforma poles llibertaes y contra la represión solidarízase col independentista A.O.R.

Xulgáu na "Audiencia Nacional".

La Plataforma Poles Llibertaes y Contra la Represión fae un "llamáu públicu a la solidaridá col compañeru A.O.R. por cuenta de la apertura del so xuiciu oral na Audiencia Nacional". Despliquen que "A esti militante independentista asturianu, que hai yá casi dos años foi deteníu pola Guardia Civil so lexislación antiterrorista, secuestráu y treslláu a Madrid, y dempués puestu en llibertá con cargos, la fiscalía pretende'l so encarcelamientu mientres añu y mediu en base a un presuntu delitu de “menospreciu o humildación de les victimas de delitos terroristes”".
Asina, dende la Plataforma camiente que "Una vuelta más mos atopamos énte una nueva espresión de la invasión de los espacios de llibertá y opinión individual por parte del aparatu represivu del Estáu español col únicu fin de criminalizar los movimientos de calter anticapitalista y castigar la disidencia ideolóxica". Poro, afiten qu'esti casu "hai qu'enmarcalo necesariamente dientro d'una dinámica ininterrumpida n'Asturies a lo llargo de los últimos años de retayu de derechos civiles y d'agresiones y acosos a les minoríes militantes, que siempres foi paralela a la destrucción sistemática de puestos de trabayu y una non menos permanente erosión de los derechos sociales, siendo asina más necesaria que nunca l'articulación dende l'amplia heteroxeneidá de la esquierda tresformadora d'una rempuesta colectiva, política y fuerte como pueblu trabayador asturianu pa la defensa de les nueses llibertaes ciudadanes y de los nuesos intereses como clase".

La térmica d’Aboño y Arcelor d’Avilés, ente les cien plantes industriales más contaminantes na XE

La contaminación industrial cuesta a España ente 6.451 millones y 10.182 millones d’euros al añu en daños a la salú y el medioambiente, según la estimación publicada esti xueves pola Axencia Europea del Mediu Ambiente con datos correspondientes aL 2009. Acordies con esti estudiu, ente les 100 plantes de la UE cola contaminación más perxudicial hai cuatro españoles, dos d’elles asturianes. Trátase de la central térmica Litoral de Almería, en Carboneras (qu’ocupa’l puestu 57 nel ranking de la UE); la central térmica d’Aboño, en Xixón (puestu 70); la central d’As Pontes, n’A Coruña (puestu 83); y la planta d’Arcelor n’Avilés (89).

Nel conxuntu de la UE, la contaminación atmosférica procedente de les 10.000 mayores plantes industriales en territoriu comunitariu cuesta ente 102.000 y 169.000 millones d’euros, esto ye, ente 200 y 330 euros por européu de media nel 2009.

La metá d’esti costu cáusase namás les 191 instalaciones más contaminantes, principalmente productores d’eletricidá. Los costos calculáronse utilizando los datos d’emisiones entregaos poles mesmes plantes.

Alemaña, Polonia, Reinu Uníu, Francia y Italia, onde s’alcuentra un mayor númberu de grandes plantes industriales, son los países que más contribúin a estos daños. Sicasí, si se tien en cuenta la productividá, les emisiones de Bulgaria, Rumanía, Estonia, Polonia y República Checa resulten más importantes.

Les emisiones de CO2 son les que más contribúin al costu total, aproximadamente 63.000 millones nel 2009. Otros contaminantes atmosféricos que contribúin a la lluvia ácida y puen provocar problemes respiratorios, como’l dióxidu d’azufre, l’amoniacu, les partícules y los óxidos de nitróxenu causen un dañu mediu d’ente 38.000 y 105.000 millones d’euros al añu.

Fonte: Aruelu.com

Darréu sofita al movimientu estudiantil nes sos movilizaciones

Nes caberes feches asistimos n’Asturies al entamu de movilizaciones estudiantiles, principalmente a nivel universitariu anque con aiciones tamién a nivel d’enseñanza secundaria y post-obligatoria, que tuvo la so xornada cimera el xueves 17 de Payares, con una bayura de fuelgues, concentraciones, protestes y un enzarru universitariu nel edificiu hestóricu de la institución educativa n’Uviéu.

Dende la mocedá independentista y revolucionario queremos amosar el nuesu sofitu pa coles vindicaciones del movimientu estudiantil, pues consideramos prioritario defender una educación pública y de calidá, non sólo oponiéndonos a los recortes de la mesma, sinón que tamién puxando pola tresformación de la educación como bas importante pal futuru de la mocedá del nuesu país, que debe completase con un mercáu de trabayu dignu y llibre d’esplotaciones que nos dea salida llaboral dientru d’Asturies.

Poro, refugamos los intentos de desaniciu de la enseñanza pública del gobiernu asturianu, cola intención de desviar recursos económicos de la enseñanza pública haza la concertada y adoptar un modelu educativu tovía más desigual y clasista que’l de los caberos tiempos, siguiendo los pasos del mercantilismu educativu imperante n’otros estaos.

De la mesma manera, señalamos tamién al gobiernu estatal dirixíu pol PSOE como cómpliz d’éstos ataques frontales escontra lo público y, por estensión, escontra la clas trabayadora, y llamamos a los y les estudiantes a siguir pel camín de la llucha, tanto nel ámbitu educativu como nes demás estayes que conformen la nuesa nación, yá que la nuesa alternativa programática como nacionalistes revolucionarios/es nel campu educativu nun pasa por una modificación superficial del actual sistema d’educación sinon pola so sustitución por un nueu sistema educativu que te definíu y estructuráu en función de la realidá social del País Asturianu y de les sos necesidaes, y non de los intereses de les grandes empreses y de los compromisos oligarquicos del Estáu español, lo que necesariamente pasa pola articulación y materializacióm efeutiva d’una estratexa de tresformación global de la sociedá asturiana dende la mocedá, dende la base y dende la llucha.

Uviéu: 25 de payares.

Campaña de denuncia de les espulsiones d'inmigrantes

Entama la Ruta Contra'l Racismu.

La Ruta Contra'l Racismu y la Represión acaba d'entamar una campaña na que denuncien la persecución que sufren les persones inmigrantes, asina como l'usu de la inmigración como chivu espiatoriu pa tapecer los efeutos y culpables de la cris económica qu'anguaño vivimos.

Pa ello el movimientu antirracista fadrá un trabayu de visibilización pública al traviés del repartu de pegadielles y cartelos peles cais del país, asina como la formación d'un grupu de denuncia que va a actuar namás conocese la detención d'una persona inmigrante, en defensa y sofitu de la mesma. D'otra miente, La Ruta anuncia que n'Avientu convocará una movilización na redolada del día 18.

Homenaxe a los mártires de Carbayín

Darréu y Nora Antifa entamen esti prósimu sábadu 19 de payares un homenaxe a los mártires de Carbayín na fosa común del cementeriu de Carbayín Altu, una convocatoria d'homenaxe pero tamién coles mires puestes nel presente y futuru d'Asturies.

La organización de mocedá d'izquierda soberanista Darréu y el coleutivu políticu, social y cultural Nora Antifa organizarán un actu n'homenaxe a los mártires de Carbayín y tolos asturianos y asturianes que nel so tiempu dieron lo meyor d'ellos lluchando contra'l facismu y por una Asturies meyor y más llibre. L'actu ta programáu pa les 13:00 hores del sábadu 19 nel cementeriu de Carbayín actu, y rezará'l llema " El meyor homenaxe siguir cola llucha". Ellí, ente l'espaciu dedicáu a estos heroes del Pueblu Asturianu les organizaciones convocantes dexarán un ramu de lloréu y realizarán un actu d'alcordanza hestórica de calter antifacista, revolucionariu y soberanista.

Per otru llau, nesti actu les organizaciones Darréu y Nora Antifa quieren espeyar la necesidá de siguir faciendo alcordanza y homenaxe a toos y toes aquelles persones que nel so tiempu dieron lo meyor de si mesmes pa ameyorar la situación d'Asturies nel so tiempu y lluchar por un mundiu más xustu ya igualitariu. Tamién trátase de dinificar la memoria coleutiva del Pueblu Trabayador Asturianu y mirar al presente y futuru ensín escaecer el continuismu franquista que supón el constitucionalismu del réximen borbónicu d'anguañu, el cual caltién unes estructures polítiques y económiques venceyaes a una minoría oligárquica y oprime la soberanía de los pueblos.

Poro, dende Darréu y Nora Antifa llamamos a acudir a esti actu pa recordar la nuesa hestoria y garrar puxu de cara a la construición d'Asturies llibre y socialista, y como non tamién, d'un mundiu onde lo prioritariu seyan les persones, non los intereses del gran capital.

¡Asturies llibre, anticapitalista y antifacista!

La Xunta Eleutoral permite votar n’asturianu pero nun dexa ufrir papeletes nesi idioma’l 20-P

La llingua asturiana torna a vivir un situación surrealista pola falta d’oficialidá. Los votantes que s’averen a les urnes el 20-P van poder votar n’asturianu, pero nun van disponer de papeletes pa ello, según denuncia Andecha Astur.

La Xunta Eleutoral tomó ayeri esta decisión tres, nun primer momentu, bloquiar les papeletes presentaes pola formación nacionalista pa la so validación. “Vistas las papeletas electorales presentadas por el Representante de Andecha Astur se acuerda la homologación de las papeletas presentadas para las Elecciones al Congreso y Senado, si bien estas papeletas no podrán ofrecerse en los Colegios Electorales el día de la votación, aunque sean válidas para emitir el sufragio (Acuerdos 14 y 27 de febrero de 1979, 12 de noviembre de 1980 y 26 de mayo de 1986, entre otros). Séllense, rubríquense y hágase devolución de las mismas con la notificación de este Acuerdo”, establez la decisión de la Xunta Eleutoral.

“Énte esta nueva espresión de l’anormalidá democrática que se vive n’Asturies, na que se mos ñeguen los nuesos drechos llingüísticos más evidentes, Andecha Astur recurrirá a lo llargo’l díi l’alcuerdu de la Xunta Eleutoral y emplaza públicamente al ‘Principado’ y a l’Academia de la Llingua Asturiana a intervenir en defensa de los drechos llingüísticos de los asturianos”, apunta la organización nun comunicáu. “Al ‘Principado’ como responsable principal de que la nuesa llingua nacional continúe ensin ser oficial y énte les reiteraes declaraciones del Gobiernu nuevu de la so intención de respetar y defender el so usu; y a l’Academia de la Llingua Asturiana en tantu qu’estatutariamente ta obligada a defender los drechos llingüísticos de los asturianos”, continúa.

Consciente del pocu tiempu que queda pa la cita del domingu, la intención d’Andecha ye la de recurrir esta decisión de la Xunta Eleutoral y facer llegar a los sos votantes potenciales papeletes n’asturianu pa que puedan exercer el so derechu a votar na so llingua materna. “Con esti alcuerdu, la Xunta Eleutoral aplica un auténticu ‘apartheid’ llingüísticu darréu que permite utilizar les papeletes n’asturianu siempres que se traigan de casa, pero prohibe la so presencia pública nos llugares destinaos a la votación. Pa esta organización política ye nidio que si nun prohibe tamién les propies papeletes débese a la sentencies del Tribunal Costitucional español que nel añu 2000 dio la razón a Andecha Astur nel sen de poder utilizar l’asturianu nes eleiciones”, apunten dende la formación nacionalista.

D’igual forma, señalen que la decisión del órganu non solo “nun asume la so obligación democrática d’ufrir a los asturianos la posibilidá d’emplegar la so llingua nacional pa votar, sinon que prohibe qu’otres organizaciones, Andecha Astur nesti casu, puedan suplir esta deficiencia”.

Fonte: Asturies.com

Recibimientu al ministru de paru, precariedá y espulsión d'inmigrantes

NUN vamos paRar: Concentración. Martes 15. 19 h. Plaza La ilesia (l'Entregu)

El martes día 15, Valeriano Gómez, Ministru de Trabayu ya Inmigración, va participar nun actu de campaña del PSOE acompañáu por Antonio Trevín.
En respuesta a los retayos en derechos, la estensión de la precariedá llaboral y el paru, la reforma llaboral y de les pensiones, la espulsión d'inmigrantes y la criminalización de la protesta social, gustaría ufiertar a dambos el recibimientu que se merecen, polo que se convoca una concentración el martes 15 a les 19 h en Plaza La ilesia (L'Entregu).

Pola llibertá de los pueblos.

Homenaxe de la izquierda soberanista bretona a les víctimes del imperialismu internacional.

¡Breizh dixebrá! ¡Asturies dixebrá!

A collación colos retayos ....

+ Futuru; - Represión.

Creatividá y Revolución.

Murial conmemorativu de la Revolución Asturiana de 1934 n'ochobre de 2011. Pintáu nel Festival musical "Asturies Arde", Riañu, Llangréu.

CA por Llangréu amosa'l sofitu a los trabayadores d'Aguas de Langreo y desixe la so realmisión

Despidíos nel serviciu d'agües llocal.

Conceyu Abiertu por Llangréu quier amosar el so sofitu pa colos trabayadores d'Aguas de Langreo, empresa mista del Ayuntamientu de Llangréu y Aqualia, que s'encarga de xestionar esti serviciu na zona. Según despliquen, "Trabayadores d'esta empresa se tan viendo impotentes al ver que se-yos ta despidiendo de forma improcendente y amás dende la empresa almiten la improcedencia de los despios".
Asina foi'l procesu según pallabres del movimientu ciudadanu:
"El 8 de xunetu d'esti añu notifícase-yos a estos trabayadores que tan acusaos d'un delitu de robu de material y nel mes d'agostu'l so despiu, improcedente dafechu y que llega enantes de saber nada alredor de l'acusación por supuestu robu. Amás, nesi intre se reconoz la improcedencia. Los trabayadores aseguren que la denuncia de robu nun tien xaciu y que nun s'esperó al xuiciu porque'l direutor de la empresa tuvo muncha priesa n'echalos, pues en xuiciu la parte denunciante nun diba recibir la razón.

Depués se reconoz la improcedencia del despiu, pero nun se planteguen dende la empresa la realmisión, pues paez que l'únicu enfotu ye'l de llendar los drechos de los trabayadores. Como solución se decide dar 20.000 euros d'indemnización que salen de les arques públiques llangreanes. Darréu d'ello el Conseyu d'Alministración almite que pa facilitar el despiu d'estos trabayadores se-yos acusó falsamente d'un delitu de robu, a lo que los trabayadores reaccionaron con una denuncia al conseyu alministraor. Nestos meses recibieron inclusu llamaes telefóniques dende abogaos de lo priváu en Madrí amenazandolos con que nun diba a trabayar n'otres empreses por que diben a dar males referencies d'ellos.

El pasáu 29 de setiembre se llevó al plenu del Ayuntamientu esti casu de represión llaboral, ya Izquierda Xunida y Frente de la Izquierda votaron pola reincorporación d'estos trabayadores. Curiosamente, PP, PSOE y FORO votaron a la contra la realmisión y la igua del conflictu. Tamién curiosamente, estes 3 formaciones polítiques manexen el conseyu d'alministración d'Aguas de Langreo. Estes persones afeutaes por esti atropellu van siguir na llucha, anque'l sindicalismu oficialista yá-yos diera'l costazu pues camienten que nun se presionó pa la realmisión d'estos trabayadores y qu'amás roblaron el conveniu coleutivu d'empresa".

Poro, dende Conceyu Abiertu por Llangréu atalanten les siguientes custiones:

"-Qu'estos despios improcedentes son denunciables y que nun son más qu'una forma de quitase delantre a unos trabayadores incómodos pal Conseyu d'Alministración y direición de la empresa.
-Qu'esti casu d'acosu sobre los trabayadores y engaños desplicase baxo'l mesmu contestu que llevamos décades sofriendo en les cuenques mineres: el PSOE ocupa les istituciones ya impón como seya'l so autoritarismu, dende tolos frentes posibles. PP y FORO bailen al mesmu son y garren la so parcela de poder a cambeu d'una actitú pasiva y acrítica cola inxusta realidá.
-Que en Llangréu estes práutiques nun son la primer vegada que se dan cola xestión de la señora Esther Diaz al frenti l'Ayuntamientu.
-Desiximos la realmisión d'estos trabayadores en llucha y la so reparación como ciudadanos y trabayadores. Los responsables de denuncialos por dalgo que nun ficieron y despedilos de forma improcedente han de pagar de forma xusta estes irregularidaes.
-Animamos a la población de Llangréu a entamar un camín a la gueta la democracia participativa, la tresparencia política, la defensa de los drechos de los y les trabayadores y la soberanía de los conceyos y del país. Llangréu necesita otra xente, Llangréu tien de ser capaz d'echar a esta xente que manexa el nuesu ayuntamientu como quieren p'asina beneficiase y asegurar los sos intereses personales."

Fonte: Infoasturies

Sofitu denuncia qu'un militante independentista sedrá xulgáu na Audiencia Nacional española

Por un presuntu delitu d'enaltecimientu del terrorismu.

Sofitu denuncia que'l militante independentista Bertu O.R., sedrá xulgáu el 20 d'avientu n'Audiencia Nacional española por un presuntu delitu d'enaltecimientu del terrorismu motiváu por un comentariu al traviés d'una rede social. Según desplica l'organismu antirrepresivu, "El mozu de 31 años y vecín de Xixón, sedrá xulgáu a les 10:30 hores pola Sala de lo Penal Seición 001 del nomáu tribunal d'esceición. Acusáu d'un presuntu delitu d'enaltecimientu del terrorismu, la fiscalía pide una pena de 18 meses de prisión por unos fechos que se remonten al añu 2009, cuandu Bertu foi deteníu pola Guardia Civil pa ser treslladáu a l'Audiencia Nacional baxo llexislación antiterrorista, onde quedaría en llibertá con cargos".

Dende Sofitu denuncien "esti nuevu casu de represión escontra l'independentismu asturianu, y nesti casu escontra la llibertá d'espresión. Y ye qu'a Bertu quieren condergalu namás que por nun opinar comu dende Madrí manden, por nun pensar comu dende España mos quieren obligar a pensar, y por nun creyer nes sos "verdáes" absolutes".

Poro, dende Sofitu faen un llamamientu a solidarizase con Bertu, participando en toles aiciones de refuga que s'entamen, como'l viaxe a Madrí'l 20 de Payares p'amosar el sofitu y la solidaridá pa col mozu represaliáu. Tolos interesaos ya interesaes pueden contautar con Sofitu pa informase alrodiu del viaxe na direición que vien darréu: sofitu1934@terra.es

Radio Sele va volver a emitir la so programación pela FM

Xuan Xosé Mariño, direutor de Radio Sele, confirmó que la emisora ta a la gueta d’un llugar afayadizu pa instalar una antena cola que retomar les emisiones per FM. L’equipu mantién la programación al traviés d’Internet.

Esta decisión tomóse esta fin de selmana nos dos aconceyamientos que vivieron los responsables de Radio Sele: el vienres, coles persones que trabayen na emisora, y el sábado con representantes de les radios comunitaries Radio Kras, Radio QK.racha y Radio Nava. L’ausencia d’un espediente por parte de Telecomunicaciones contra Radio Sele, yá que l’orde de zarru foi de forma oral a Mariño por parte del xefe nuevu n'Asturies, José Antonio Díez Menéndez, lleva a la única emisora de radio dafechu n’asturianu a buscar un sitiu onde instalar una antena que permita llevar la so programación a los sos oyentes peles ondes –l'argumentu pa retirar esta antena yera qu'ésta yera illegal–. “Vamos tratar que sía nel menor tiempu posible, anque nun ye una tarea fácil”, señaló Mariño, que nun descarta tampoco camudar de centru emisor.

No que respeuta al aconceyamientu del sábadu, Radio Sele recibió la solidaridá del restu de radios comunitaries, qu’amosaron el so esmolecimientu pola posibilidá de recibir una carta de Telecomunicaciones que-yos pueda llevar una situación asemeyada a la de la emisora uviedina.

Fonte: Asturies.com

Pasucais L´únicu camín ye la llucha

La CSI entama una campaña de denuncia contra la trampa los retayos y les reformes. Les polítiques d'axuste sofítense sobre la idea de que ye necesario pagar una deuda que nun ye nuesa: nin nos consultaron al asumila nin la disfrutemos. Por eso, ye fundamental refugar esta deuda ilexítima y amosar que l'únicu camín pa salir de la crisis consiste n'acabar colos sos privilexos, en nome de los cualos pretenden recortar los nuesos derechos.

La primer aición d'esta campaña va consistir nun pasacais convocáu xuntu con SUATEA y CXT. Coincidiendo con una convocatoria estatal de sindicatos alternativos, el xueves día 3 de payares -con salida a les 19h de la plaza'l Parchís (Xixón)- van percorrese les sedes de los principales partíos-empreses políticos y los grandes bancos, amás de delles empreses representatives de la esplotación llaboral qu'alimenta a los anteriores.

Aición de Darréu contra la represión nel Plenu Municipal de Llangréu

Militantes de Darréu tovieron na tardi d'ayeri, xueves 27, nel plenu mensual que se cellebró na Casa Conceyu de Llangréu pa "denunciar nesti espaciu públicu la represión sofría pola militancía de la organización demientres los díes nos que se cellebró'l DMR'11, asina como los díes anteriores". Nun taba namás Darréu nel actu institucional, tamién despidios de Cuenques Mineres Televisión, Aguas de Langreo, l'asociación de vecinos de Riañu pol xeriátricu y persones disconformes cola xestión del executivu llangreanu. "Esto espeya perbien el descontentu d'amplios seutores de la ciudadanía de Llangréu cola clas política qu'hai nesti municipiu" despliquen dende la organización xuvenil.
Nel plenu, que duró alrodiu les 4 hores, los militantes de Darréu mostraron cartelos con distintos llemes que diben enfocaos "na represión y censura política que praútica'l PSOE en Llangréu, la falta de participación ciudadana, la situación socioeconómica de crisis d'Asturies y la hipocresía y l'amiguismu de l'alcaldía a la hora de conceder espacios públicos. Gran parte de los asistentes amosaron solidaridá con Darréu y coincidieron cola organización xuvenil nel analis de les coses". Los xóvenes independentistes afirmaron que l'actitú de los cargos públicos del PSOE "foi chulesca y autoritaria demientres duró tola sesión plenaria".
El momentu clave foi cuando nel turnu de ruegos y entrugues los conceyales del Frente de la Izquierda de Llangréu entrugaron al equipu gobiernu alredor de los fechos qu'asocedieron nel DMR'11. Fueron dos les entrugues, per un llau a que se debía'l proceder del Ayuntamientu pa colos actos del DMR'11 y per otru'l porqué se cellebró un conciertu ensín permisu del conceyal de turnu l'añu pasáu nel Pozu Maria Luisa. Julio Cesar García Menendez, conceyal de la policia llocal, retrucó a los portavoces d'izquierda "de forma agresiva y con una riestra d'imprecisiones y mentires" y l'alcaldesa Esther Díaz "amosó'l so esmolecimientu tamién cola actitú soberbia y prepotente que la carauteriza" despliquen. Mentantu estos acontecimientos mozos y moces sacaron dellos cartelos de nuevu n'alusión a esti nuevu casu de represión en Llangréu.
Dende Darréu agradecen "la receptividá y voluntá de los conceyales del Frente de la Izquierda pa con nós, al escuchanos y llevar esta problemática al plenu del Ayuntamientu llangreanu" y anuncien que la organización política moza va siguir denunciando públicamente "l'actitú y proceder autoritariu del PSOE nesti conceyu".

Vidiu aición: http://www.youtube.com/watch?v=q1_FTM7Syo4

Más info: http://www.darreu.org/

DMR'11: ¡Esther Díaz REPRESORA!

El llema más coréau na marcha de Darréu en Llangréu, última actividá d'esti DMR 2011
La marcha hasta la Casa Conceyu en Sama, que se cellebró ayeri, depués del homenaxe a los revolucionarios na cai Belarmino Tomás, acabó por ser la última actividá d'esti Día de la Mocedá Revolucionario, tres la prohibición a dos díes de la cellebración de la décima edición del conciertu 'Asturies nun escaez' y otres actividaes culturales que se diben cellebrar nel colexu públicu Jose Bernardo de Sama.

Esti fechu fexo que la marcha antifacista garrare un calter antirrepresivu y de denuncia onde los glayíos "Esther Díaz represora" y "Alcaldesa represora" foron los que más se repitieron. La asturina, la bandera collorada y un gaiteru abrieron la marcha que tenía de llema proncipal "Mocedá nun te rindas". Otra pancarta espresaba un "Tamos fartos de represión".

Darréu homenaxeó a los revolucionarios en Llangréu

Dientro de les actividaes del Día de la Mocedá Revolucionario que 'sobrevivieron' a la campaña represiva del PSOE en Llangréu, pasaes les seis de la tarde, Darréu cellebró delantre del monolitu en recuerdu a Belarmino Tomás l'homenaxe a los y les revolucionares, nel que la denuncia de la represión tuvo mui presente.

Tres la presentación del actu una vocera de Darreu desplicó a los presentes lo sofrío pola mocedá independentista en Llangréu nos díes últimos y agradeció les muestres de solidaridá que ta recibiendo Darréu, lo mesmo que l'esfuerciu de los militantes y collaboradores nestos meses de preparación del prohibíu conciertu 'Asturies nun escaez' y n'espacial a los grupos que diben participar pola so comprensión y apoyu."Queremos anunciar que'l conciertu nun se cancela, namás se pospón. Agora nun tamos en condiciones de dicir cuando, pero esta edición va cellebrase".

A continuación otra militante fizo la intervención cientrada na Revolución de 1934, nel exemplu de los y les revolucionaries d'ochobre, n'especial el de la mocedá. Recordóse la figura de Belarmino Tomás, presidente del tercer comité revolucionariu en 1934 y en 1937 del Conseyu Soberanu d'Asturies y Lleón. Nel 76 aniversariu de la Revolución Asturiana sorrayóse la necesidá, nesti contestu de cris capitalista del protagonismu necesariu, de que la mocedá seya'l motor de cambiu necesariu. "Los revolucionarios d'anguañu tenemos un bon espeyu onde miranos pa trabayar tolos díes por una Asturies llibre y socialista".

Tres el saludu de les delegaciones del Bloque Independetista de Cuchas d'Aragón y Regüelta de Cantabria, cola interpretación de La Flor del Agua a la gaita y la colocación d'un ramu de lloréu nel monolitu finó l'actu que dió pasu a una marcha hasta la Casa Conceyu en Sama.

Esitosa primer xornada del DMR 2011 cola represión como protagonista

La sala de la Casa de los Alberti enllenóse na primer xornada del Día de la Mocedá Revolucionario 2011 p'asistir a la presentación na que se cellebró una rueda prensa onde se desplicó la nueva ofensiva represiva del PSOE en Llangréu. Dempués proyeutóse un documental sobre l'autoxestión n'Asturies ya intervino una vocera de Darréu desplicando la situación vivida nos dos últimos díes "d'intimidación y acosu continuu".
La charra de Candido González, históricu sindicalista del Naval de la Corriente Sindical d'Izquierda convirtióse, tres una breve intervención solidarízandose con darréu, nun conceyu abiertu p'analizar y aldericar sobre la situación política actual, la solidariedá y la rempuesta a la represión en Llangréu y n'Asturies.
L'Alcuentru Internacionalista con delegaciones internacionales zarró la primer xornada de DMR.
Sofitu, Bloque de la Mocedá Asturianista y Conceyu Abiertu solidarizaronse con Darréu hasta la fecha.

Mañana echa a andar el DMR'11 en Llangréu.

En les xornaes, que van comprender el vienres 21 y sábadu 22 van desendocase una bona riestra d'actividaes d'estremáu calter. L'emplazamientu del DMR'11 va ser nel Conceyu de Llangréu, en distintes llocalidaes.

Esti vienres 21 echa a andar el DMR'11 en Ciañu (Llangréu). Na Casa de los Alberti d'esti pueblu va presentase'l DMR d'esti añu, pa depués entamar cola proyeición d'un documental autoxestionáu asturianu. Pa siguir, el sindicalista de Naval Xixón, Candido Carnero, va protagonizar una charra-alderique que va entitulase " Reflexones sobre'l movimientun obreru asturianu d'ayeri y güei". Darréu d'ello va siguir, a les 20:00 hores la cellebración del alcuentru internacionalista coles delegaciones foriates que van venir al nuesu país. Depúes, pa finar la xornada, va haber un amagüestu con precios populares y música del país a les 21:00 nel Colexu Públicu de Sama José Bernardo.

La xornada del sábadu entama ceo a les 12:00 hores con xuegos tradicionales pa neños y adultos nel CP José Bernardo de Sama. A les 14:00 va cellebrase una xinta popular con sidra y fabes pa tol mundiu. Depués, de tardi, a les 18:00 va entamar l'homenaxe a los revolucionarios asturianos de 1934 nel monolitu felguerín n'alcordanza de Belarmino Tomás y cuando fine l'actu una marcha reivindicativa de mocedá echará a andar hasta la Casa Conceyu de Llangréu, asitiada en Sama.

A les 20:00 vamos poder esfrutar del X Conciertu "Asturies nun escaez". Nesta nueva edición tocarán Skama la Rede, Escuela de Odio, Skontra, Adizión Etílika, I.R.A., Taranus y una sesión de reggae con Ozono y Xosé N'ast. El preciu de les entraes ye de 10 euros l'anticipada y 12 entaquilla.Pa esti día s'aspera una bona afluencia de mocedá nestos actos y un programa d'actividaes cargaos d'alcordanza hestórica, actitú crítica yreivindicativa y animación cultural.

Andecha Astur cellebró l’actu d’homenaxe a la revolución Asturiana d’Ochobre del 34 y a Belarmino Tomás.

La tumba de Belarmino Tomás en Pando –Llangréu- foi de nueu’l llugar onde’l nacionalismu d’izquierda asturianu homenaxeó al Pueblu Trabayaor Asturianu protagonista de la revolución d’Ochobre del 34; y perafitó’l so compromisu de caltener la llucha y la coherencia por algamar esa Asturies independiente y socialista a la qu’achuquinó’l franquismu.

Nel actu y tres la colocación del ramu lloréu intervino Mariu Arbesú, que denunció l’escaezu al que tantu’l gobiernu del “Principado” comu’l llangreanu tienen condergao tanto a la revolución asturiana d’Ochobre’l 34 comu a la figura de Belarmino Tomás, espresión de la so refuga a una hestoria de socialismu y soberanía protagonizá pol Pueblu Asturianu. Asina mesmo remembró dellos aspeutos de la revolucióna asturiana y del calter universal de la mesma y finó afitando’l compromisu del nacionalismu asturianu colos idegales d’una Asturies Independiente y Socialista.

A la fin de la so intervención guardóse un minutu de silenciu que resultó especialmente emotivu y que finó ente aplausos y glayíos de ¡Puxa Asturies Llibre! ¡Puxa Asturies Socialista! ¡Puxa Asturies Dixebrá!

Programa DMR'11 en vidiu.

www.darreu.org

Conceyu Abiertu por Noreña refuga la invitación de la Guardia Civil pa participar nos sos actos del 12 d’ochobre

El conceyal de Conceyu Abiertu nun asistirá a los actos

El destacamentu de la Guardia Civil en Noreña convidó a los conceyales del Conceyu a participar nos actos que cellebren el 12 d'ochobre, con motivu de la so fiesta patronal, consistentes nuna misa na ilesia parroquial y un convite, con vinu español, na Plaza Polivalente. Conceyu Abiertu por Noreña fexo pública la so refuga de la invitación y anunció que’l so conceyal nun asistirá a los actos que la Guardia Civil cellebra en Noreña el 12 d’ochobre. Conceyu Abiertu desplica que ta a favor de la retirada del "cuartelillu" que'l cuerpu militar español tien en Noreña.

N'esti sen, recuerda que "la instalación d'éstos, nos nucleos urbanos, obedez históricamente a la intesificación de los llabores represivos y centralizadores del Estáu, llabores que n’Asturies y Noreña conocemos perfectamente dáu'l protagonismu hestóricu d'esti cuerpu na represión del Pueblu Asturianu".

Pa Conceyu Abiertu la seguridá de la zona urbana de Noreña, "tien de ser asumida, igual que se fai n'otros conceyos, pola Policia Llocal" y camienten "necesario avanzar na tresformación de la policia llocal de Noreña nun serviciu públicu democráticu al serviciu del ciudadanu les 24 hores y adaptada a la rialidá y necesites de Noreña, exerciendo asina’l Conceyu de Noreña, como sedría normal, les sos competencies en materia de seguridá ciudadana y asegurando asina la prestación de los servicios básicos necesarios".

La organización d'izquierda soberanista sorraya que "son conocíes les deficiencies en materia de seguridá ciudadana que l’actual estáu de les coses conlleva y la ineficacia de la Guardia Civil en Noreña, que cubre un area grande de Siero y Noreña, y cuyes actuaciones nun dependen del conceyu, nin ta diseñada pa cubrir les necesidades de Noreña y los noreñenses".

Fonte: Infoasturies

Programa del Día de la Mocedá Revolucionario 2011

La organización de mocedá Darréu vien de confirmar el programa d'actividaes del Día de la Mocedá Revolucionario na so edición del añu 2011, que va a desendolcase los díes 21 y 22 d'ochobre nel conceyu de Llangréu.

Dende Darréu quieren,amás de "facer alcordanza de la Revolución Asturiana d'ochobre de 193,facer d'estes xornaes un marcu reivindicativu dende una perspectiva xuvenil, tresformadora y soberanista. Darréu enfotase un añu más en facer lo que camentamos que ye l'actu más importante a nivel añal dientru de la mocedá d'izquierda soberanista d'esti país".

D'esta mena, el programa del DMR '11 ye'l siguiente:
--------------------------------------------------------------------------------

Vienres 21 d'ochobre:

Casa de Los Alberti - (Ciañu, Llangréu).

- 18:00 h. Presentación del Día de la Mocedá Revolucionario 2011.
- 18:15 h. Proyeición Documental Autoxetionáu.
- 19:00 h. Charra-alderique con Candido Carnero, sindicalista de Naval Xixón "Reflexones sobre'l movimientu obreru asturianu d'ayeri y güei".

- 20:00 h. Alcuentru Internacionalista coles delegaciones internacionales desplazaes al DMR'11.

Colexu Públicu José Bernardo (Sama, Llangréu):
- 21:00 h. Amagüestu + espicha + música del país.


Sábadu 22 d'ochobre:

Colexu Públicu José Bernardo (Sama, Llangréu):

- 12:00 h. Xuegos Tradicionales pa guah.es y adultos.
- 14:00 h. Xinta Popular.
- 17:00 h. Mural conmemorativu DMR'11.

Nel monolitu n'homenaxe a Belarmino Tomás (La Felguera, Llangréu):

- 18:00 h. Homenaxe a los/les Revolucionarios/es.
- 18:30 h. Marcha reivindicativa de mocedá fasta la Casa Conceyu de Llangréu, en Sama.

Colexu Públicu José Bernardo (Sama, Llangréu):

- 20:00 h. X Conciertu "Asturies Nun Escaez". Cartelu completu y entraes a la venta nos prósimos díes.
--------------------------------------------------------------------------------
Dende Darréu anuncien novedaes nos prósimos díes, polo qu'encamienten a tar sollertes a la so páxina web.

Fonte. Infoasturies

DMR'11 21 y 22 d'ochobre: Llangréu.

Ochobre siempres ye revolucionariu.

Cais de Mieres del Camín.

Meyor poner a estes persones d'exemplos a siguir pal Pueblu Asturianu qu'a famosillos, políticos corruptos o banqueros. Persones que nel so tiempu, trataron de facer lo que meyor se-yos daba en pro del Pueblu Trabayador, de la mayoría social, lloñe d'intereses personales y egoistes, lo más común anguañu ente los exemplos pa la mayoría de la xente. Piensa por ti mesmu, piensa pol Pueblu Trabayador Asturianu.

Darréu anuncia'l DMR 2011

21 y 22 d'Ochobre en Llangréu.

La organización de mocedá Darréu vien d'anunciar al traviés de la so páxina web qu'entamará una nueva edición del Día de la Mocedá Revolucionario, l'actu de referencia de la mocedá independentista y revolucionario d'Asturies qu'algamará un nuevu capítulu, desendolcáu esta vegada nel conceyu de Llangréu col enfotu de remembrar la revolución asturiana d'ochobre de 1934, y a los homes y muyeres que llucharon por una Asturies llibre y socialista.

Asina, anque'l programa d'actividaes sedrá ampliu y diversu a lo llargo de los dos díes, l'actu cume un añu más sedrá'l conciertu "Asturies nun escaez", qu'algama la so décima edición. Por ello, Darréu anuncia que nesta edición va a potenciase la escena musical asturiana, cola presencia de dellos grupos asturianos, énte los que puede confirmase la presencia del puxante coleutivu musical I.R.A y del míticu grupu Escuela de Odio, un clásicu nesti conciertu.

Dende Darréu anuncien que nos prósimos díes anunciarán más detalles alrodiu del DMR y les actividaes que lu componen.

Fonte: Infoasturies

Conceyu Abiertu por Noreña denuncia que la Llingua Asturiana sigue tando prohibida na Casa Conceyu

PSOE ya IDEAS votaron a la escontra de que pudiera tratase nel plenu una moción favoratible al drechu a usar l'asturianu.


Conceyu Abiertu por Noreña denuncia que dicha moción foi torgada cola escusa de que "nun tenía calter d'urxencia", polo que PSOE ya IDEAS baltiaron la posibilidá de que l'aniciativa fuera tratada na Casa Conceyu.

Na moción de Conceyu Abiertu solicitábase que'l conceyu de Noreña realizara un conveniu con instituciones como l'Academia de la Llingua Asturiana (ALLA) y l'Oficina de Política Llingüística p'asesoramientu y traducciones o l'Institutu Adolfo Posada pa la formación de los funcionarios.

CAN desplica que "La votación na que se valoraba si incorporar a alderique nel plenu o non la moción sobre la llingua asturiana tuvo que repitise al haber un empate a cinco na primer votación. (Conceyu Abiertu con ún conceyal, IPÑ con tres y FDLI con ún votaron a favor, PSOE con cuatro ya IDEES con ún votaron en contra mientres que PP y FORU con dos y ún respeutivamente abstuviéronse). Na segunda votación repitióse la mesma resultancia y asina foi l'alcalde Cesar Movilla (PSOE) quien col so votu calidable como alcalde y presidente del plenu resolvió l'empate votando en contra de la so almisión a plenu".

Dende Conceyu Abiertu denuncien "l'actitú antidemocrática del alcalde de Noreña y del so partíu (PSOE) qu'aportuna en poner torgues al llibre usu de la llingua asturiana nel nuesu conceyu. De primeres, porque prohibe'l so usu, al nun almitir escritos n'asturianu pa ser trataos en plenu municipal, y de segundes, porque nin siquier almite que pueda aldericase una propuesta anque sía billingüe na que se solicita que sí se puedan tratar mociones escrites n’asturianu. Mentanto los drechos de los noreñenses asturfalantes siguen suspendíos non solo pola actitú antiasturiana del alcalde y los edieles del PSOE ya IDEAS que gobiernen en Noreña y votaron en contra sinón tamién pola ambigüedá del conceyal de Foro Asturias, Inaciu Iglesias, que fala n'asturianu nos plenos pa dempués abstenese nuna votación por que se envalore una moción a favor del asturianu, y pola connivencia del PP col españolismu recalcitrante de los sos hermanos del PSOE".

Conceyu Abiertu por noreña comprométese a "siguir velando polos derechos llingüísticos de los noreñeses" y anuncia que va siguir aportunando "al traviés de tolos calces llegales hasta consiguir que se cumplan los drechos de los asturfalantes en Noreña".

Álvarez-Cascos diz tar nes “antípodes” del nacionalismu

El presidente d’Asturies, Francisco Álvarez-Cascos, aseguró esti miércoles nel Forum Europa, en Madrid, que ta nes “antípodes” del nacionalismu. Nesta mesma xornada, el líder de FAC inauguró la sede del so partíu na capital castellana.

Nel desayunu informativu de Forum Europa, Álvarez-Cascos presentó’l proyeutu de Foro Asturias Ciudadano (FAC) pa les eleiciones del 20-P col oxetivu de dar calce a "les aspiraciones reformistes de cambiu políticu, de progresu social y d'igualdá ente toles comunidaes autónomes españoles, ensin privilexos nin esclusiones”. Una iniciativa cola que va tratar de ganar la confianza de los votantes dende “les antípodes” del nacionalismu y coles mires de garantizar la igualdá y cohesión territorial. Amás, negó que'l so partíu divida'l votu de la derecha, dao que son los ciudadanos los que “reparten la confianza”.

Al so xuiciu, ye necesario que surdan fuercies territoriales “perifériques” que “neutralicen a les fuercies centrífugues nacionalistes actuando de contrapesos nes sos reivindicaciones”. Según recordó, hasta nos periodos de mayoría absoluta les formaciones nacionalistes forzaron na ellaboración de los Presupuestos Xenerales del Estáu (PXE). Na so intervención, Álvarez-Cascos refugó dar detalles de la so rellación col PP y tampoco quixo emitir la so opinión sobre les aspiraciones de los populares nes eleiciones. “Caún tien los sos propios problemes, dar solución a los retos que tien; y yo nun tengo que referime a otres fuerces polítiques”, defendió.

Otra manera, el presidente del páis acusó esti miércoles al xefe del Executivu estatal, José Luis Rodríguez Zapatero, de cometer un actu de “insumisión constitucional ensin precedentes” al nun aprobar un decretu de prórroga de los PXE, como marca la Constitución. “Tamos ante un actu d’insumisión constitucional ensin precedentes na nuesa democracia, realizáu por puru interés eleutoral partidista; que nun acarreta consecuencies polítiques pa los infractores pero que, amás, añade incertidumes nueves al escenariu económicu ‘nacional’ y al de les comunidaes autónomes; que nun podemos conocer nin siquier les estimaciones de los ingresos que vamos recibir del Estáu pa ellaborar los presupuestos rexonales pa 2012”, censuró

Inauguración de la sede en Madrid

Baxo’l lema ‘Más Foro, mejor España’, l’ex ministro de Fomentu inauguró la sede en Madrid del Foro de los Ciudadanos col oxetivu de reunir les 5.000 firmes necesaries pa presentase a les xenerales. En declaraciones a los medios, Álvarez-Cascos indicó que les sensaciones primeres son “mui positives”, yá que tolos voluntarios que salieron a la cai “volvieron colos pliegues de firmes enllenos”Mentes, el líder de la formación asturiana refugó falar del númberu de votos que pue alcanzar el partíu nes eleiciones xenerales porque “tovía nun hai percepción suficiente de la presencia de Foro”.

“Creo qu’hai un espaciu políticu pal nuesu partiu, que defendemos un mensaxe de cohesión social positivo pa que tolos territorios d’España y los sos repartos sían iguales”, resaltó’l presidente d’Asturies al tiempu que celebró que, cola inauguración de la sede del so partíu en Madrid, la so formación “echa raíces” na Comunidá de Madrid. El llar de FAC na capital castellana ta na cai Hilarión Eslava, númberu 49 baxu, na zona de Moncloa.

Fonte: Asturies.com