El pasáu miércoles 3 d’agostu de 2011, na piscina municipal d’El Quirinal (Avilés), alrodiu les 11:00 h., entamó a sentise un fuerte olor a disolvente al traviés de los conductos de ventilación de la piscina. El delegáu de prevención compreba que l’equipu caltenimientu ta pintando con pintura y disolvente nel arrodiu los conductos de ventilación. D’esta manera, taben saliendo pel aire acondicionáu los efluvios de productos tósicos (traemos a l’alcordanza que, de cincu monitores de natación de la Fundación Deportiva, dos carecieron una Incapacidá Temporal de 6 meses y otros dos una Incapacidad Absoluta, darréu una intosicación por cloru nel so puestu trabayu). Los trabayadores punxéronse en contáutu cola Téunico de Prevención del Ayuntamientu y el Xerente de la Fundación Deportiva Municipal del Ayuntamientu d’Avilés, alertándolos del pelligru pa la salú pública y llaboral qu’apareyaben los fechos que taben sucediendo, ensin que dengún de los dos mencionaos adoptare denguna triba de midía pa igualo.
La Corriente Sindical d’Izquierda quier alertar a tola ciudadanía d’Avilés y a cuantes presones visiten la nuesa ciudá, del pelligru que puede apareyar pa la so salú la utilización de les piscines municipales del Ayuntamientu avilesín. Son abondos los antecedentes:
-Payares de 2008. Piscina municipal de La Madalena (Avilés): produzse una intosicación por cloru de toles/os monitores municipales que s’atopaben trabayando nesta piscina, asina comu d’otres/os trabayadores y población usuaria. El resultáu de tala intosicación foi de 2 monitores, d’una plantía de 5, con lesiones inreversibles qu’apareyaron la so incapacidá total pal desendolcu’l so trabayu, con una amalaúra de por vida.
-2009. Piscina Municipal de La Madalena (Avilés): produzse otra intosicación por cloru de 2 de los monitores sobrovivientes a la primera.
-Llunes 20 de xunu de 2011. Piscina municipal d’El Quirinal (Avilés): les/os monitores y socorrista de la piscina avisan d’un fuerte olor a cloru y d’irritaciones en güeyos y gargüelu. El martes 21, a les 18:15 h., eses/os trabayadores tuvieron de desaloxar la piscina demientres 1 hora porque se paró tola maquinaria: dosificadores de cloru, estractores d’aire, les máquines del agua... Too dexó de furrular. Naide los avisó, los servicios de prevención nun acudieron, el serviciu caltenimientu nun dio desplicaciones, nin el xerente, nin el direutor deportivu nin el cordinador de piscina. Naide fizo actu presencia y tuvieron de ser les/os trabayadores quienes se decataren de la situación y punxéren-y igua.
Toos estos fechos fueron y siguen siendo debidamente denunciaos énte les autoridaes municipales, sanitaries y xudiciales, asina comu énte la Ispeición de Trabayu y Seguranza Social, pero tovía güei la Fundación Deportiva y los sucesivos conceyales de deportes siguen ñegando les intosicaciones y sacando pechu polo bien que ta too: nun se sancionó a naide, nun se fizo responsable a naide y, a la fin, nun se fizo nada.
Les/os trabayadores municipales entrúguense si va haber que llamentar dalguna muerte pa que se manguen midíes.
Demientres, dende la CSI aconseyamos a tola ciudadanía d’Avilés y a cuantes presones visiten el nuesu conceyu, que garren toles precauciones afayadices cuandu utilicen les piscines municipales del Ayuntamientu d’Avilés.
