Darréu entama esti prósimu fin de selmana les II Xornaes "Trabayadora Güei, Trabayadora Siempres". La organización de mocedá independentista ufierta delles actividades el vienres 5 y el sábadu 6 de marzu empobinaes na llucha escontra’l patriarcáu y el machismu vixente. Con estes xornaes, Darréu quier "ufiertar a la ciudadanía asturiana, sobremanera a la mocedá, un espaciu escontra los roles machistes y sexistes que vivimos n’actualidá dientru’l modelu capitalista".
El vienres 5 de marzu, nel Chigre L’Ayalga de Xixón, a partir de les 20:30 hores va proyeutase dellos curtiometraxes escontra’l machismu y abordando’l tema de la la llucha escontra’l patriarcáu, el feminismu revolucionariu y la violencia machista. Dempués de la proyeición habrá una espicha en L’Ayalga a precios populares.
El sábadu 6 siguen les actividaes d’estes xornaes. Por un llau, a les 12:00, en La Felguera va faceser un mural reivindicativu cola temática d’estes xornaes. Pela tarde, en Xixón, Darréu entama una riestra de charres-alderique nos llocales de la Corriente Sindical d’Izquierda, na Casa Sindical. Les charres , que van zarrar les xornaes tan orientaes a la situación de los movimientos feministes y les diferentes visiones del feminismu. Dende’l marcu xuvenil al marcu sindical o llaboral. Asina Darréu quier guetar "un espaciu abiertu p’aldericar sobre les problemátiques d’anguañu de la sociedá patriarcal na que vivimos".
Con estes xornaes dende Darréu tamién quier reivindicar "como de toxs la llucha que caltienen munchxs muyeres y homes pa finar con esta sociedá sexista, patriarcal y esplotadora".
Estrayíu d'Infoasturies.
