La muerte del "asturianismu" y los finxos móviles

Va unos años, abluquemos porque delles persones, acreditaes con títulos de filoloxía, aneciaben públicamente con que n´Asturies esistía una llingua que correspondía al tueru galaicu-portugués y dicíen "fálase portugués" n´Asturies. L´eonaviegu pasó a denomase “gallego-asturiano”, y yá pudieron arreblagar dellos pa poder quitar inda lo d´”asturiano”. Pues bien, resulta que nun ye abondo. Resulta qu´agora tamién se fala´l “castellanu-montañés”. Dixéralo un informe detrás del que paez ser hai manes del BNG, non digo na ellaboración (al autor-y supongo independencia y honestidá intelectual ensembre) sinón por cuenta los auspicios y encontos qu´alcontró.

Bien, yá la tenemos lliada nesta RFA, república filolóxica asturiana. Falamos asturianu, castellán, gallegu-asturianu (ergo, portugués), castellanu montañés, y quésiyo cuánto más. Tamién hai enguedeyu, porque l´asturianu debía nomase, según dellos, astur-lleonés, y eso, barrunto yo, podía obligar a un cambiu denominativu a l´ALLA. El casu ye tar en constante revisión, inestabilidá, anormalidá. El casu ye mover les isogloses, y facer como esi humorista manchegu- Pablo Mota- que quería conquistar Portugal pa España “a pocos”, moviendo los finxos de la frontera pali que pali, ensin que los del país vecín se decataren, “al merme, al merme” como dicía´l célebre cómicu. Equí lo mesmo, movemos un poco´l finxu, como siempre piensa l´aldeanu desconfiáu, y al cabu d´unos años queda´l campesín ensin prau.

El casu ye desacreditar a l´ALLA, ¡pa dalgo institucionalizao que tenemos a nivel nacional! Mañana otru día inventarán nueves llingües, nueves ortografíes, nuevos inventos.

Xuan Bello, en Les Noticies, dexó escrito qu´almiraba a Areces. Sí, ye d´almirar que l´autoritarismu qu´esti periodista y escritor critica a los que nun ven eso de “les múltiples llingües”, sía tamién cosa d´almirar nos gobiernos del PSOE-IU-BNG que tantu remanen l´asturianismu y lu echen a perder. P´autoritarismu y falta de realidá, la de Tini Areces, al que tantu almira l´escritor de Paniceiros.

Hai que dexase d´”asturianismos”. O somos nacionalistes asturianos o non.

Porque´l términu “asturianismu” ta echáu a perder. Si sigue en boca d´IU y sos nuevos inventos, ye puxarra. Si sigue en manes del Sánchez-Vicente y sos flirteos col españolismu más intransixente, ye cagalera en campu rasu. Si sigue en manes de Xuan Bello y sos “almiratibles” Tini Areces, feseanos y disgregacionistes, entós ye como volver a los tiempos de “los amigos de los bables”, en plural, ye tirar la patria pel ventán. Ye dicir, ye facer casu a una camaretá de persones qu´ensin derechu dalu quieren disgregar el dominiu llingüísticu asturianu, étnicamente venceyáu a la Nación Asturiana y territorialmente venceyáu, al empar, al País Astur.

Mira tu per ónde nun quiero criticar por criticar, namás que destructivamente. Quiero proponer idees positives tamién.

Ta, d´una banda, l´estremu de “reconquistar” l´Asturies de Santiyana pal País Astur, o inda llegar hasta les Encartaciones (onde descubrí palabres asturianes qu´usaba entá mio güela villaviciosina; vide los llibros de Txomin Etxebarría), y otres reivindicaciones territoriales que tan de moda tán na columna de llibre espublización de Glayíu.

D´otra banda tán los disgregacionistes, esos qu´inventen una llingua nueva n´Asturies cada selmana.

Yo propongo, mui herderianamente, venceyar llingua y nación y dexase de tontaes. Herder nun foi´l reaccionariu que nos quieren vender. Foi´l profeta de los nuevos tiempos, l´antítesis perfecha del xacobinismu y del nominalismu llingüísticu que quieren espardir les Academies Paraleles de la LLingua.

Y en cuenta d´anexonar Lleón, Asturies de Santiyana o los conceyos lucenses, propongo una ALLIANZA DEL NOROESTE. ¿Váis faceme casu? De mano sé que non. Pero toos somos pueblos hermanos, falando llingües hermanes y con un ethnos asemeyáu. Y a toos esti Reinu d´España ta dándonos como al gurrión. Debemos trabayar xuntos asturianos con gallegos, lleoneses, cántabros, y reivindicar lo nuestro nesti Reinu oficialmente mediterrániu que nos escaez y nos marxina. ¿Nun tien más xacíu esto, qu´andar corriendo finxos ya isogloses?.

*Carlos X. Blanco ye Doctor en Filosofía y Llicenciáu en Sicoloxía

Sofitu denuncia nuevos casos de represión

Acabantes de finar la selmana na qu’un nuevu militante independentista foi xulgáu, y con seguridá condergáu a pagar unos cuantos díes de multa por ser acosáu, amenazáu y golpeáu pola policía española, Sofitu quier asoleyar los nuevos casos de represión que tamos acabantes de carecer.

El primeru d’ellos ye la multa de 90€ que la policía española impuso-y a una moza independentista pol pergrave fechu de cantar el famosu estribillu "muncha policía, poca diversión" mentantu los axentes del cuerpu represivu identificaben a un mozu nuna plaza de Cimavilla en Xixón.

El segundu ye un fechu que se vién repitiendo delles vegaes nos años caberos, y ye qu’otru mozu independentista foi multáu pola guardia civil española n’autopista "Y" namás que por ser asturianu y amosalo llevando les iniciales "AS" na matrícula del so coche en cuenta de la impuesta "E" española. L’importe de la multa ye de 100€, anque con un descuentu del 50% si se fai pagu rápidu.

Per otru lláu dende Sofitu quier informase tamién que vienen de pagase 1.410€ poles multes alministratives que la delegación del gobiernu español n’Asturies metió a los y les solidaries que nes pasaes navidaes averáronse a Villabona a pidir l’Amnistía pa los prisioneros políticos. Perres que se sumen a los 195€ yá pagaos por multes de tráficu que tamién impusieron los guardies civiles de turnu, y qu’entá se pué sumar a los 630€ de multes que tan a l’aspera del recursu.