CSI sofita la mani escontra los premios principe

Dende la Corriente Sindical d'Izquierda asoleyen el mensaxe que vien darréu:

"Dende la Corriente Sindical d'Izquierda faemos un llamamientu a participar na manifestación del Sabadu 23 d'Ochobre a les 13 hores na Estación del Norte d'Uviéu y qu'entama'l Ensame República Asturiana escontra los premios principiegos.
Porque como bien diz l'ERA nun tamos pa mantener a families reales, porque tenemos drechu a decidir el nuesu futuru, porque los premios principe son la humildación d'un pueblu.

¡¡PUXA ASTURIES LLIBRE Y SOCIALISTA!!"

Fonte: Glayiu.

El TSXA declara illegal el númberu mínimu de 8 alumnos pa formar grupu n'Asturianu en secundaria

El Tribunal Superior de Xusticia d'Asturies (TSXA) considera «contrario a derechu» l'establecimientu d'un númberu mínimu d'estudiantes pa formar grupu na asignatura de Llingua Asturiana na Educación Secundaria asturiana. Una recién sentencia del altu tribunal asturianu da la razón al sindicatu Comisiones Obreres, que nel so día recurrió una resolución de la Conseyería d'Educación y Ciencia pola que s'establecía que'l grupu pa la impartición del asturianu nun podía ser menor d'ocho alumnos.

La sentencia de la Sala de lo Contencioso Alministrativu de la TSXA declara «nulu y ensin efectu» l'artículu 5.1 de la resolución de la Conseyería que preside Herminio Sastre y que tien fecha de 16 de mayu de 2008. Nella l'Alministración educativa asturiana establecía la ufierta y les condiciones pa la elección de materies optatives y materies opcionales pa la Educación Secundaria Obligatoria (ESO).

El sindicatu Comisiones Obreres recurrió. El so voceru, Luis Fernández Lleón, esplicaba ayeri: «Entendíamos que la resolución frayaba la llei d'Usu y Promoción del Asturianu, un testu que garantiza la impartición de l'asignatura en tolos niveles educativos».

Comisiones Obreres asegura que se trata d'una sentencia «de caláu enforma», qu'amás ye la primera al so favor nesta cuestión, yá que les hai anteriores favorables al Principáu, anque na fase d'Educación Infantil. Esta sentencia nun ye recurrible, apunta'l sindicatu.

Hasta la fecha, cuando'l númberu d'alumnos per cursu nun llegaba a ocho, derivábase a esos alumnos interesáu n'estudiar Asturianu a otres materies.

Fonte: Infoasturies.

Cientos de mozos y moces participaron nos actos del Día de la Mocedá Revolucionario

InfoAsturies ufre una galería con más de 60 semeyes de los actos del DMR.

Esta fin de selmana Darréu entamaba una nueva edición del Día de la Mocedá Revolucionario (DMR) en Xixón. Les actividaes repartiéronse énte'l vienres 15 y el sábadu 16 y tuvo una importante participación de mocedá. Mientres los dos díes foron bastantes les actividaes programaes que remataron cola IX edición del festival "Asturies nun escaez" conmemorativu de la revolución d'ochobre.

El vienres enllenóse L'Ayalga p'asistir a la charra "Ochobre 34-37" - na que l'hestoriador Antón Martínez fexo un repasu de la historia del movimientu obreru nos años 30 del sieglu pasáu cola revolución de 1934 y la ocupación d'Asturies de 1937 como exes- , la proyeición del documental "Ochobre 1934, memories d'un país" fechu por Darréu en 2009 con motivu del 75 aniversariu y pa participar nel alcuentru internacionalista onde prticiparon deleganciones de Cajei y Maulets, organizaciones de mocedá catalanes que tan nun procesu de xunidá, Azarug de Canaries, Yesca de Castiella, Agora del País Llionés y Regüelta de Cantabria. La xornada del vienres finó con una espicha con música del país.

El sábadu, a les 11:30 hores, les delegaciones internacionales y miembros de Darréu tvieron un taller de deportes y xuegos tradicionales nel Muséu del Pueblu d'Asturies. A les 14:30 hores, l'Ayalga volvió enllenase pa participar nuna xinta popular consistente nuna fabada y un platu de postres asturianos, de clater antirrepresivu y a beneficiu del muerganismu antirrepresivu popular Sofitu. Yá pela tarde, delantre de la casa Conceyu de Xixón féxose un homenaxe a los revolucionarios y revolucionaries onde participaron ya intervinieron Darréu, CJC-CMC, Fai!, CSI-Mocedá y Andecha Astur.

El Día de la Mocedá Revolucionario 2010 finó cola IX edición del festival "Asturies nun escaez" que yá ye un clásicu nel entamu la seronda y qu'esti añu cuntó colos grupos asturianos IRA y Escuela de Odio xunta los grupos foriatos KOP dende los Països Catalans y Gatillazo d'Euskal Herria. El Pabellón Asturies de la Feria Muestes foi l'escenariu d'esta edición qu'axuntó unes 600 persones.
Los ganadores del concursu pa grupos mozos "Sones de Revolución", entamáu por Darréu a principios d'ochobre n'Uviéu, IRA abrieron el conciertu cola sorpresa de cuntar cola collaboración Wanye intercalando descargues hardcore col hip hop vindicativu. Escuela de Odio acabó d'encender al públicu colos sos temas direutos y perconocíos y la perbona puesta n'escena que los carauteriza. Nesti descansu foi'l momentu del actu políticu de Darréu qu'animó a la mocedá a siguir na llucha por una Asturies llibre y socialista.


Tres l'actu, foi'l momentu de KOP, que llegaba a Asturies por primer vez y notáronse les ganes que teníen tanto'l públicu como'l propiu grupu de qu'esto asocediese. Los catalanes ufrieron una bona amuesa del so repertoriu y un gran espeutáculu. Finada l'actuación de KOP, que cuntó cola collaboración de Pirri (Escuela) en "No te rindas" cellebróse l'avezáu actu internacionalista onde les delagaciones subieron al escenariu y un voceru d'elles fexo una intervención agradeciendo l'acoyida y mandando un mensaxe solidariu ya internacionalista. Zarró'l conciertu, Gatillazo col so punk y con Evaristo enllenando l'escenariu como ye vezu y enllenando de folixa la sala. La organización fexo una valoración positiva d'esti DMR 2010 onde participaron cientos de mozos y moces.

InfoAsturies ufre una completa galeria de semeyes de los actos del Día de la Mocedá Revolucionario con especial atención al IX Conciertu Asturies nun escaez:

http://www.infoasturies.net/index.php?option=com_phocagallery&view=category&id=38&Itemid=85