El Bloque rexistra la proposición p'abolir los toros n’Asturies

El diputáu del Bloque por Asturies, Roberto Colunga, va defender na Xunta Xeneral una Proposición de Llei col fin de prohibir los espectáculos taurinos n’Asturies.

Colunga ufiertó esti llunes una rueda de prensa xuntu al voceru de BA, Rafael Palacios, pa presentar la proposición, rexistrada yá na Xunta Xeneral, y pa xustificar la mesma.

Asina, dambos aludieron a la Declaración de los Derechos Humanos de los Animales y destacaron que n'Asturies nun hai nengún espectáculu públicu, nin nenguna actividá recreativa yá sía autóctona o non, que pudiera definise oxetiva o subxetivamente como cultural, tradicional, identitaria, etnográfica, ritual, histórica o sentimental onde esista maltratu animal, que sía llegal o tea autorizada, cola esceición de los espectáculos taurinos.

"Na Asturies del sieglu XXI nun tienen cabida los espectáculos taurinos y faise necesariu'l cambiu de la Llei d'Espectáculos Públicos y Actividaes Recreatives", dixo Colunga. Esa llei ye la que’l diputáu del Bloque quier modificar nún de los sos artículos pa prohibir los toros n’Asturies.

Poques corríes n’Asturies
El portavoz de los nacionalistes indicó tamién que, según los últimos datos, Asturies ye, a la par de Baleares y Melilla, la comunidá con menor númberu de corríes de toros. De fechu namás que se celebra la Feria Taurina de Begoña. Cola so propuesta'l BA quier que'l Parlamentu asturianu siga l'exemplu del catalán y prohiba les corríes de toos.

Fonte: Asturies.com

Trabayadores de Venturo XXI entreguen a Areces 10.000 firmes

Los trabayadores de Venturo XXI van entregar esti martes más de 10.000 firmes d'apoyu a les sos reivindicaciones al presidente del Gobiernu asturianu nel rexistru de la sede de presidencia, según informó Comfia-CCOO nun comunicáu.

L'oxetivu ye mostrar al presidente la preocupación de miles d'asturianos ante l'inminente zarru de la empresa Venturo XXI, que yá dexó na cai a casi 70 trabayadores, na so mayoría mozos y moces de la Cuenca del Nalón. "Estes firmes muestren un enorme apoyu pa que, ente toos, s'alcuentre una solución que vuelva dar trabayu pa tola plantiya", caltién Comfia-CCOO.

Según el sindicatu, nel contestu actual de crisis económica, uníu a la constante necesidá de reindustrialización nes comarques mineres, "debe de ser una obligación pa toos torgar fracasos como'l de Venturo XXI, tovía más si cabe cuando se demostró que la causa d'ésti foi la mala xestión del so máximu órganu d'alministración, nel que participen delles sociedaes públiques".

Por ello, los trabayadores encamienten al Presidente, como máximu representante del Gobiernu asturianu, a poner too aquello que tea na so mano p'ayudar a algamar l'únicu oxetivu que la plantiya de Venturo XXI tuvo mientres toos estos meses: recuperar los sos puestos de trabayu.

Fonte: Asturies.com

Republicanos asturianos paralizaron el centru d'Uviéu

La manifestación convocada pol Ensame República Asturiana y que sofitaben delles organizaciones polítiques, sindicales y sociales cortó l'arteria principal d'Uviéu, la cai Uría, en protesta pola presencia de los principes d'España y refugando los sos premios.

A les 13:15 hores y baxó un despliegu policial descomanáu (con cuatro furgonetes d'antidisturbios, policia llocal y los secretes avezaos en toa movilización contra l'orde establecíu) salió la marcha de la Estación del Norte.

Baxo'l llema "Premios y Principes, la humildación d'un Pueblu" los republicanos asturianos manifestáronse pel centru d'Uviéu paralizando'l tráficu y repartiendo panfletos col llema "Nun tamos pa tirar les perres en cases reales" y glayando llemes antimonarquicos, independentistes y por una republica asturiana socialista y soberana. La marcha llegó ensin incidentes énte les puertes de la Xunta Xeneral onde un voceru del Enseme republicanu dio les gracies a los asistentes y lleó'l manifiestu.

Como nun podía ser d'otra manera, los medios de comunicación del sistema, públicos o privaos, nun atoparon sitiu nes sos "informaciones" sobre los Premios Principe pa informar sobre esta convocatoria nin pa cubrir el so desendolcu. Cabe reseñar tamién los efectivos de la policia española movilizaos pol Delegáu del Gobiernu español n'Asturies, Antonio Trevín, pa una movilización que, dende va trés años, se vien cellebrando con normalidá dafechu y que namás parez tener como oxetu'l criminalizar ente la sociedá a los organizadores y participantes nuna manifestación llegal dafechu, nuna simple y democrática escenificación pública de la llibertá d'espresión.

Seguramente, con dalgún policía llocal pa regular el tráficu yera abondo y seguramente-y saldría muncho más barato a los y les contribuyentes que pagar los sueldos de más de venti antidisturbios un sábadu al mediu día. Más nos tiempos de crisis y recortes sociales que vivimos.

Fonte: Infoasturies.