Durante la xornada d'esti 14 de Payares el pueblu asturianu respondió, una vegada más, a la convocatoria de fuelga xeneral, asitiándose a la tiesta estatal en cuantes a seguimientu.
Esti miércoles 14 de Payares Asturies afrontó una convocatoria de fuelga xeneral que, dende'l principiu, taba previsto que fora masiva. Y asina foi, con movimientu sindical dende enantes del entamu oficial de la fuelga xeneral a les 00:00. Enantes d'esa hora servicios como la recoyida de basories n'Uviéu nun furrularon, fechu que foi repitiéndose a lo llargo de la nueche en numberosos enclaves de l'actividá llaboral nel nuesu país.
Durante'l día, los tresportes furrularon con servicios mínimos, que malapenes se desendolcaron durante les primeres hores, y que xunto con un paru casi total nel seutor industrial conformaron la espina dorsal de la movilización xeneral n'Asturies. Los piquetes informativos percorrieron los principales puntos llaborales y comerciales del país, consiguiendo que se baxaran les persianes de numberosos establecimientos. Nes cuenques mineres el paru foi absolutu, lo mesmo que n'Avilés, demientres que n'otros puntos importantes como Uviéu o Xixón el seguimientu foi tamién mayoritariu, anque dalgo menor que nes llocalidaes anteriormente citaes.
A les 12:00 CSI, CNT, CGT y SUATEA desendolcaron el so manifestamientu de la Plaza L'Humedal, depués d'una mañana movida pol asaltu policial a la Casa Sindical, con cuatro deteníos como bagaxe. Amás, CCOO, UGT y USO intentaron remanar la manifestación de la izquierda sindical asturiana convocando manifestación a la mesma hora, fechu que nun impidió'l desendolcu de la movilización. L'actu foi multitudinariu, con unes 25.000 persones qu'enllenaron el Náuticu pa escuchar los discursos de les distintes fuercies sindicales convocantes.
Depués, turnu pa la solidaridá, treslladándose una bayura de persones frente a dependencies policiales hasta que foron lliberaos los compañeros deteníos, aición solidaria que cuntó col sofitu de cientos de persones, que vivieron momentos de tensión colos destacamentos policiales ellí presentes. Finalmente, los cuatro deteníos foron puestos en llibertá, conformando xunto a un prindáu en Mieres los únicos represaliaos cola detención n'Asturies.
Tamién a les 12:00 La Felguera vivió la convocatoria "Arrodia l'INEM" d'ADEPAVAN, sofitada por un númberu importante de persones. Tamién L.lena y Llugones desendolcaron una aición asemeyada, sumando asina a los y les paraes coles sos propies movilizaciones de vindicación y denuncia.
Yá pela tarde Uviéu tuvo de nueu piquetes informativos previos al manifestamientu del sindicalismu mayoritariu, que foi masivu. Unes 100.000 persones enllenaron les cais d'Uviéu. Tal foi la cantidá de xente, que cuando la cabecera del actu yá finara'l recorríu, l'Avda Galicia y Plaza d'América, llugares d'entamu de la marcha, taben abarrotaos de xente que nun entamara entovía a caminar.
Nesi manifestamientu hebo presencia del Bloque Anticapitalista, coleutivu críticu que portó la so propia pancarta. Tamién hebo presencia del coleutivu de muyeres del carbón en llucha, PCPE, PCA, USO, CGT, SUATEA, Sindicato de Estudiantes, Asamblees Universitaries, y otros coleutivos, asociaciones y organizaciones.
Nesta xornada tamién hebo llugar pa les barricaes nes cuenques mineres, en llugares como Uxo, Figareo, nel centru Valnalón o n'Autovía Minera, nuna xornada na qu'Asturies tuvo a la tiesta del estáu en cuantes a cifres de seguimientu, nos centros de trabayu y nes movilizaciones convocaes nes cais. El pueblu asturianu tornó a responder a la movilización.
P'atopar más datos, noticies ya informaciones, consulta l'especial de
Glayiu.org , o'l twitter d'InfoAsturies (@infoasturies).
