Conceyu Abiertu por Llangréu pide la dimisión del gobiernu llocal "pol escándalu de los Talleres del Conde"

Conceyu Abiertu por Llangréu desixó nun comunicáu "la dimisión de la totalidá de los responsables del equipu de gobiernu de Llangréu" pol so despilfarru y escurantismu.

Según desplica Conceyu Abiertu por Llangréu, "L'Ayuntamientu de Llangréu aprebó a la fin de forma oficial la suspensión del proyeutu de recintu ferial nos terrenos qu'ocupen los Talleres del Conde, en La Felguera. Nel vienres 28 de setiembre votose nel plenu municipal la paralización de les obres col votu a favor de PSOE, Izquierda Xunida y PP. Depués de meses d'inactividá, silenciu y escurantismu estes últimes selmanes l'equipu de gobiernu del PSOE en Llangréu yá foi dexando clara la so posición y la situación d'esti proyeutu. Agora'l proyeutu ta suspendíu de forma temporal de manera oficial, anque too paez indicar que la suspensión del proyeutu ye dalgo".

Dende la formación llangreana piden "de forma clara la dimisión de la totalidá de los responsables del equipu de gobiernu de Llangréu. Nun solo tamos falando d'una xestión nefasta, nin tampocu de despilfarru de dineru públicu, sinon que tamién el gobiernu llocal trató d'escuender la situación de pre-suspensión demientres dellos meses, llegando inclusu a mentir de forma clara a los llangreanos. Creemos qu'esti equipu de gobiernu yá tuvo'l so tiempu pa revertir la situación, pero'l gran desembolsu de dineru públicu pa proyeutos bien cuestionables, la mentira y la non finalización de dichos proyeutos ye la seña d'identidá del PSOE en Llangréu".

Amás, consideren "qu'esta suspensión ye definitiva, pesie los intentos de mazcaritar la situación como temporal y creemos que la xestión del Ayuntamientu nesti aspectu ye nefasta. Nel so día los vecinos y vecines del Conceyu de Llangréu yá amosaron ciertu descontentu claru col proyeutu inicial pero'l PSOE llocal, llideráu d'aquelles por Esther Diaz, tiró p'alantre con esti proyeutu. Esta iniciativa del gobiernu llangreanu de María Fernández supón hasta anguañu, que sepamos toles llangreanes y llangreanos, una inversión de más 1.800.000 euros, un dineral tiráu polos nuesos gobernantes llocal a la basoria".

Pa finar, planteguen que "Col dineru invertíu nesti fracasu, podríamos tener meyores equipaciones culturales, inversión n'industrialización o facer un desembolsu importante n'ayuda y prestación social, necesidaes que dende Conceyu Abiertu por Llangréu si qu'entendemos que son prioritaries. Poro, como yá diximos, atalantamos necesaria la dimisión del gobiernu llocal y desiximos que pidan disculpes públiques a tola ciudadanía llangreana por esti vergoñosu espectáculu. Pa finar, pidimos que s'investigue tol procesu d'esti proyeutu, yá que podríen dase irregularidaes importantes na xestión d'esti proyeutu, dalgo mui típicu nes iniciatives qu'empobina'l PSOE n'Asturies".

FONTE: Infoasturies

Cursu d'asturianu en Xixón.

La Xunta pola Defensa de la Llingua Asturiana y Sestaferia entamen un cursu de llingua asturiana (nivel anicial) en Xixón de magar el 24 d'Ochobre.
 

El Centru Social Sestaferia, en collaboración cola Xunta Pola Defensa de la Llingua Asturiana -entidá acreditada pola Conseyería d'Educación pa la formación permanente del profesoráu- entamen un cursu de llingua asturiana "nivel anicial", que va a desendolcase nel propiu Centru Social Sestaferia (Cai Joaquín Alonso Bonet 7) dende'l 24 d'Ochobre, día de presentación.

El cursu va a ser impartíu por Iris Díaz Trancho los miércoles de 19 a 21:00 hores, siendo'l coste de la matrícula -incluyendo tol material necesariu- de 30 euros. P'apuntase o pidir más información, faciliten el teléfonu 985 229 553, y los correos info@exunta.org Esta direición elleutrónica ta curiada escontra spam bots. Precisa activase JavaScript para vela y sestaferiaxixon@gmail.com

L'alcalde de Noreña pide a un conceyal que nun use l'asturianu

Que t'arrrreeeeoooo bableru!!!!!

Nel Plenu Municipal de Noreña d'esti 27 de setiembre, l'asturianu, y concretamente la palabra anguaño, foron protagonistes de la sesión. El motivu foi una pregunta del conceyal de Conceyu Abiertu, Pablo Pérez, al Gobiernu municipal sobre una petición fecha pol so partíu de poner una valla nel apeaderu de FEVE en Noreña, «dende'l pasu cebra hasta la qu'hai anguaño». Nesi momentu, Pérez foi interrumpíu por otra conceyala y pol alcalde de Noreña, César Movilla, que dixo qu'había muncha xente que nun lo entendía, «polo que-y pidiría qu'usara'l castellanu», dalgo a lo que se negó'l conceyal asturianista.

Na polémica tamién intervieno'l conceyal de Foru Asturies, Inaciu Iglesias, que-y esplicó al alcalde'l significáu de la palabra y la so equivalencia cola castellana hogaño. Otra manera, rogó-y a Movilla que fixera usu del diccionariu que-y regaló n'agostu del 2011, depués de que l'alcalde de Noreña retirara una moción de Conceyu Abiertu por tar redactada n'asturianu. Un fechu que recibiera les crítiques de l'Academia de la Llingua y que fixo que Movilla fora gallardonáu col madreñazu de los Premios Andrés Solar de la Xunta pola Defensa de la Llingua Asturiana.

Depués de la interrupción, Pablo Pérez siguió cola so intervención traduciendo ironicamente delles palabres del asturianu al castellanu. Al acabar, pidió «qu'al igual que yo intento mantener el respetu hacia'l restu de compañeros y hacia'l publicu, tolos demás faigan lo mesmo».

Les Noticies