martes, 23 de marzo de 2010

Vicentín Alvarez Areces- Trolololo

Santu Adrianu y los demás infieles, por Vítor Suárez


Va unos díes apaeció nos medios de comunicación l’anuncia de que’l Conceyu d’Avilés diba tener aprobada la so toponimia en dalgo más d’un mes. Una bona noticia, ensin dulda. El tercer conceyu d’Asturies en población va facer visible, a la fin y a lo menos en teoría, la toponimia real, esa que tantos años foi torgada y tapecida.

Pero dalgo rincha nel trabayu d’oficialización toponímica y ye qu’esta anuncia vien seis meses depués de l’aprobación del últimu espediente, el que regulaba la toponimia de Parres (BOPA del 14-IX-2009). Daquella, nomes como; Les Arriondes, Deu o Cibidiellu pasaron a ser oficiales, y asina, el procesu de normalización toponómica debía siguir espardiéndose nos demás conceyos, como ye’l casu de Santu Adrianu. Esti conceyu, nesi mes de setiembre, tenía cásique peracabáu’l so procesu, cola toponimia yá aprobada en plenu y acabando marzu vemos que non solu nun s’avanzó nesta cuestión sinón qu’un conceyu que taba más atrasáu nesti tema, como ye Avilés, va aprobar primero’l so espediente.

Pal que nun conoza’l trabayu a desendolcar pa facer oficial la toponimia, esplicolu darréu cola información que mos ofrez la Oficina de Política Llingüística nel so web:

1. El conceyu solicita l’entamu del espediente. La Xunta Asesora de Toponimia (XAT) ta emplegando la fórmula de la voluntá del propiu conceyu pa entamalu, magar que pueda anicialu d’oficiu. De si esta ye la forma afayadiza de facelo falaremos depués.

2. La Conseyera de Cultura entama los trámites.

3. Garrando como referencia’l nomenclátor de l’ALLA, la XAT encarga a espertos propios o esternos comprobaciones sobre’l terrén.

4. Celébrense les sesiones oportunes de la XAT con representación de delles estayes.

5. Primer dictame de la XAT que se fai llegar al Ayuntamientu.

6. L’Ayuntamientu fai llegar les observaciones al primer dictame.

7. Dictame definitivu de la XAT que se fai llegar al Ayuntamientu.

8. Aprobación en Plenu del Ayuntamientu de la llista toponímica pautada cola XAT.

9. Conformidá del Ayuntamientu. L’Ayuntamientu fai-y llegar a la XAT copia del acuerdu.

10. La Conseyera de Cultura tramita’l decretu a Conseyu de Gobiernu.

11. El Conseyu de Gobiernu aprueba’l Decretu d’oficialización.

12. Publicación del Decretu nel BOPA. Entrada en vigor al otru día.

Ye dicir, que’l conceyu de Santu Adrianu de los doce pasos que tenía qu’andar, va seis meses, tenía andaos ocho y d’entós p’acó o nun foi quien a dar esos cuatro que-y queden o diolos pero faltanos esa información, que’l Conceyu d’Avilés si asoleyó. Hai que tener en cuenta que ye ún de los conceyos más despoblaos d’Asturies, que quiciás nun tengan muncha actividá política, que puedan tener “problemes más importantes” o que carezan la torga de nun tar inxertos en nengún Serviciu de Normalización Llingüística, pero estes coses nun faen que’l Conceyu seya nin menos asturianu nin ayenu a la normalización del idioma, nesti casu al traviés de la toponimia. Esta tardanza y dexadez merecen esplicaciones.

Amás d’esti datu sobre un conceyu específicu, nun ta de más esplicar la situación na que s’alcuentra anguaño la normalización de la toponimia entamada nel añu 2004:

* · De los 78 conceyos asturianos 63 tán trabayando o trabayaron cola XAT:

40 d’ellos tán yá cola toponimia oficializada, el yá mentáu Santu Adrianu col espediente aprobáu en plenu, 15 conceyos fixeron sesiones de trabayu pa revisar la toponimia y otros 7 alcuéntrense nuna primer fase de revisión de la toponimia (dalgunos como Uviéu lleven años aparaos nesta revisión).

* · Per otru llau, y 6 años depués, 15 de los 78 conceyos asturianos nun solicitaron espediente toponímicu nengún.

Estos son los que vienen darréu, coles responsabilidaes polítiques de caún d’ellos ente paréntesis:

Cabrales (PSOE-URAS), Candamu (PSOE), Cuaña (PP), Cuideiru (PSOE), Eilao (PSOE), Muros (PSOE), Navia (PSOE-IX-LV-BpA), Onís (PSOE), Peñamellera Alta (PP), Peñamellera Baxa (PP), Pravia (PSOE), Les Regueres (PSOE), Santiso d’Abres (PSOE), Sotu’l barcu (PSOE) y Villayón (PP).

Esta ye la normalización del asturianu de PPSOE y la del cumplimientu de pautu de gobiernu afirmáu por IX-LV-BpA en materia de política llingüística. Equí ye onde entra la cuestión de ¿cómo ye posible que la XAT, depués de 6 meses o depués de 6 años, nun tire de les oreyes al conceyu o conceyos en cuestión que nun cumplan cola Llei d’Usu (“constitucional dafechu” como dixo Xurde Blanco y afirmó el TC español), que-yos obliga a “recuperar” los nomes espoliaos?

La problemática y los responsables tán claros. Les soluciones y la fin d’esti procesu -de minimos- paecen que van tardar en llegar, solo mos queda puxar y esixir responsabilidaes. Yo pola mio parte yá lo fici. ¿Súmeste?