miércoles, 6 de octubre de 2010

Homenaxe a Belarmino Tomás nel 60 cabudañu de la so muerte


L’actu, que va tener llugar énte la so tumba nel cimenteriu de Pando (Llangréu) el prósimu martes 12 d’ochobre a les 13’00 hores.

Un añu más, la organización política Andecha Astur entama, coincidiendo col cabudañu de la Revolución d’Ochobre, un actu n’alcordanza de Belarmino Tomás Álvarez, que fora presidente del Tercer Comité Revolucionariu en 1934 y presidente del Conseyu Soberanu d’Asturies y Lleón en 1937. L'Homenaxe va consistir nuna pequeña intervención política acompangada de la ofrenda d’un ramu de lloréu y de la interpretación de delles pieces a la gaita.

Al actu tien confirmada la so asistencia Rafael Fernández Tomás, nietu del homenaxeáu y fundador del Partíu Socialista de los Trabayadores en México, país onde, amás, foi diputáu federal. Belarmino Tomás morrió nel exiliu en 1950, polo qu’esti añu l’actu d’homenaxe tien un calter especial ya que se cumplen 60 años de la muerte del cabezaleru asturianu.

Fonte: Infoasturies

Día de la Mocedá Revolucionario 2010: IX Conciertu " Asturies nun escaez"

El IX Conciertu " Asturies nun escaez" cuntará esti añu colos grupos Gatillazo, KOP, Escuela de Odio y el grupu ganador nel " I Sones de Revolución", conciertu-concursu qu'entama Darréu cola fin de promocionar grupos mozos y da-yos la oportunidá de tocar nesti conciertu, que yá cumple la so novena edición. El conciertu " Asturies nun escaez" va cellebrase esti próximu sábadu 16 d'ochobre nel Pabellón d'Asturies de la Feria de Muestres de Xixón. La hora d'entamu del conciertu sedrán les 21:00 hores.

Nesta edición del conciertu que fai homenaxe a la Revolución Asturiana cuntamos colos vascos Gatillazo, que tienen ente les sos files al yá míticu Evaristo de La Polla Records. Gatillazo tien 3 discos asoleyaos y faen un punk-rock mui característicu. Tamién podremos esfrutar de los catalanes KOP, cola so meza de hardcore, trash y metal, y les sos lletres comprometies, que tan a piques d'asoleyar el so nuevu discu " Acció Directa". Un añu más dende Darréu tenemos el privilexiu de cuntar tamién con Escuela de Odio, grupu hardcore asturianu por excelencia coles sos lletres enllenes de crítica y llucha social, que reflexen perfechamente la realidá d'Asturies.

El cuartu grupu, y segundu asturianu se decidirá esti sábadu 2 d'ochobre nel I Concursu " Sones de Revolución", que consistirá nun conciertu na Sala I-Pop d'Uviéu a partir de les 19:00 hores. N'ellí, grupos mozos del país van participar y un xuráu de músicos van escoyer el grupu que acompañará nel escenariu a Gatillazo, KOP y Escuela de Odio el 16 d'ochobre.

El preciu de les entraes pal IX Conciertu " Asturies nun escaez" ye de 16 euros nos puntos de venta d'entraes anticipaes y de 18 euros en taquilla. Los puntos de venta d'entraes anticipaes son los que vienen darréu:

Mieres: Cafe La Habana;Llaviana: Cervecería Bulldog; Sotrondio: La Chez; L'Entregu: Café La Yenda, Tom Malory; Ciañu: La Folixa; Sama: Imprenta La Fueya, Cervecería Sheffield; La Felguera: Planta 14, Tom Malory, El Bulevar, Vieja Escuela; Noreña: Llar d'Andecha, Los Riegos; Siero: El Diañu, Juda; Villaviciosa: La Bodega II, Uviéu: Llibrería Paraxuga, Cervecería Noise, L'Arcu la Vieya; Xixón: El Baruku, La Nueva Caleya; L.lena: Ca'Toos; Ribeseya: Chigre'l Corquiéu.

Más información sobre'l IX Conciertu " Asturies nun escaez" y el Día de la Mocedá Revolucionario 2010 nos próximos díes en www.darreu.org

Mesa redonda "y depués del 29-S ¿qué?"


Esti xueves 7 d'ochobre cellébrase n'Uviéu la mesa redonda "Y depués del 29-S ¿qué?. Balance y perspectives". Nella representantes de CSI, Suatea, CNT y CGT van valorar y analizar tanto la convocatoria de Fuelga del pasáu 29 setiembre como les perspectives de futuru y posibles escenarios nesta coxuntura.
L'actividá ye nel Conceyu Abiertu (Cai la Gascona, 12, baxu) y en prósimes feches van intentar qu'UGT, CCOO y USO den tamién la so opinión sobre'l mesmu tema.

Fonte: Infoasturies.