lunes, 8 de octubre de 2012

Darréu cellebrará'l 13 d'Ochobre'l Día de la Mocedá Revolucionario '12

La organización de mocedá independentista Darréu anunció la cellebración del DMR 2012, qu'esti añu tará asitiáu n'Uviéu y cuntará con un homenaxe a los y les revolucionaries, asina como un actu políticu y una xinta na cai.
La mocedá independentista y revolucionario representada por Darréu desendolcará'l prósimu sábadu 13 d'Ochobre la so edición del Día de la Mocedá Revolucionario correspondiente al añu 2012, baxo'l nidiu llema "Nin capitalismu, nin estáu español: La mocedá pol socialismu y la soberanía d'Asturies". Asina, los actos centrales van facese nel Parque San Pedro los Arcos d'Uviéu, onde s'asitia'l monolitu n'homenaxe a Aída Lafuente.
Nesi llugar, de magar les 13:00, va a facese un homenaxe a los y les revolucionaries d'Ochobre'l 34, pa dar pasu a un actu políticu dende les 13:30, y posteriormente, a les 14:30, una xinta popular na cai, amás d'un murial conmemorativu y música del país que conformarán los actos programaos por Darréu, carauterizaos pola mestura de conmemoración hestórica y vindicación actual.
Amás, dende Darréu despliquen que "esti añu nun se cellebrará'l Conciertu "Asturies nun escaez", pero la militancia de la mocedá independentista revolucionario sofita públicamente'l conciertu antirrepresivu entamáu pola Corriente Sindical d'Izquierda pal día 20 d'ochobre en Xixón", al tiempu que nun descarten realizar más actos alrodiu del ochobre revolucionariu.
FONTE: Infoasturies.