"Pozo Amago" despide a la totalidá de la so plantilla

44 trabayadores al paru.
La empresa d'amdamiaxes "Pozo Amago", d'orixe avilesín, alcordó colos representantes de los trabayadores el desendolcu d'un Espediente de Regulación d'Emplegu d'Estinción pol que los 44 trabayadores que componen la plantilla de la empresa quedarán desvinculaos d'ésta, tres adeudar a la plantilla ente 2 y 4 nómines, asina como retrasos nos pagos dende va dalgo más d'un añu.

Poro, los trabayadores decidieron aceutar la midida debío a qu'asina podrán reclamar el pagu de los salarios pendientes, nun allargando asina una situación que yá ye difícil pa munchos y munches trabayadores, que lleven meses ensin recibir ingresos pol so trabayu. D'otru lláu, too paez indicar que "Pozo amago" finará asina dafechu cola so actividá.

"Nora Antifa Attack" nel CSOA La Madreña

El prósimu sábadu 2 de Xunu.
La organización antifacista Nora Antifa entamará esti sábadu un nuevu conciertu antirrepresivu en beneficiu de les lluches antifacistes desendolcaes n'Asturies, y que como suel ser vezu son respondíes con casos de represión del estáu. Asina, el llugar escoyíu pal actu ye'l Centru Social Ocupáu Autoxestionáu La Madreña, asitiáu na Cai Xeneral Elorza d'Uviéu.

De magar les 18 hores de la tarde actuará'l grupu lleonés Street Poison xunto a los asturianos Ozono, I.R.A., Alcotan y Adizión Etilika, qu'amosarán la so música nel CSOA al preciu de 4 euros de sofitu, amás del anunciu dende la organización de qu'habrá precios populares.

FONTE: Infoasturies

LA CSI LLAMA A LA MOVILIZACIÓN XENERAL

La Corriente Sindical d’Izquierda quier facer un llamamientu a la movilización xeneral de tolos y toles trabayadores d’Asturies, en sofitu a la fuelga indefinía convocada na minería y en solidaridá colos trabayadores enzarraos n’estremaos pozos y mines.

Pa la CSI, estes movilizaciones son necesaries dafechu pa defender, non sólo la economía de miles de families asturianes, sinon el futuru de les comarques mineres y el del conxuntu la economía asturiana.

Asinamesmo, la CSI espera que los dirixentes de los sindicatos SOMA-UXT Y CCOO, ten al altor de los trabayadores de la minería, defendiendo los drechos reales d’estos trabayadores y abandonando vieyes postures carauterizaes por negociaciones que, nel pasáu, namás supunxeron pieslles de pozos, perda de puestos de trabayu y especulación, cuandu non corruición, na xestión de los fondos mineros.

La CSI va facer cuantu tea nes sos manes pa que les estremaes lluches y fuelgues que tan dándose n’Asturies, comu esta fuelga de la minería, la d’Educación, l’anunciada fuelga indefinía de tresporte y otres que yá tan entamándose, finen xunciéndose nuna única llucha que, amás de les reivindicaciones seutoriales, incorpore nueves movilizaciones xunitaries pa defender los drechos obreros y torgar el futuru de miseria y probitú que los estremaos gobiernos tan planificándonos.

Una Asturies en quiebra y con 100.000 desemplegaos y desemplegaes, nun pue permitise nin un paráu o parada más nin un retayu económicu más. Pa la CSI, estos 100.000 paraos y paraes tienen d’incorporase a esta llucha, xunta’l restu loos y les trabayadores, pa entamar a ganar na cai lo que nos roben nos despachos.

Por otru llau, la CSI quier denunciar la escalada de represión que ta dándose n’Asturies, onde les fuercies de represión del Estáu español tan intentando reprimir les reivindicaciones d’unos y unes trabayadores que salen a la cai en defensa del so trabayu y de la so forma de ganase la vida.

Asinamesmo, la CSI quier denunciar la persecución que carecen los sos afiliaos nes mines de Cangas del Narcea, que costantemente son perseguíos e identificaos pola Guardia Civil, llegando a la situación de tar a puntu de causar un grave acidente, al cruciar los sos coches delantre los vehículos de los sindicalistes, col riesgu de cayer per un barrancu prósimu.

Nesi sen, y comu decíemos el pasáu 1 mayu: nun vamos dexanos llevar pol pesimismu, nun vamos cayer na desesperanza y, sobretou, vamos dexar bien nidio que nun tenemos llerza, que nun nos dan llerza, que somos el pueblo, qu’hai muncha fuercia nel brazu d’esti pueblu y que vamos remanar esta fuercia pa defender Asturies y a la clas obrera.

La xunidá d’aición del nacionalismu asturianu centró’l Díi d’Andecha

“Con Andecha too ye posible, ensin ella too queda en fumu”

El discursu políticu xunitariu centró la intervención política del XV Díi d’Andecha cellebráu, nesta ocasión, en clave más interna de lo avezao y onde, una vuelta más, Andecha Astur sopelexó la necesidá d’avanzar na xunidá d’aición, tantu na cai comu nes istituciones, comu única posibilidá d’articular un movimientu nacionaliegu con capacidá de dar rempuesta a la situación d’opresión social y nacional que carez el Pueblu Asturianu.

Na intervención perafitóse la voluntá d’Andecha Astur de participar en toes y cauna de les propuestes xunitaries que puean dase, valorándose perpositivamente la esperiencia de Conceyu Abiertu, y les posibilidaes de desendolcu d’esti proyeutu xunitariu.

Asina mesmo, remembróse qu’Andecha Astur ye la organización decana del nacionalismu asturianu y que nel trescursu de la so esistencia yá tien visto una montonera de proyeutos pantasmes, cuasique siempres en clave elleutoral, fechos a espaldes cuandu non a la escontra d’Andecha Astur, y cuyos fracasos llegaren al ridículu más absolutu, xenerando una sopa de lletres d’organizaciones polítiques que se xunten, separten, anicien y esanicien que produz una descomanada inseguridá na sociedá asturiana y torgando l’avance de proyeutos coherentes y afitaos.

Nesi sen foi la frase más aplaudía de la intervención “Con Andecha too ye posible, ensin Andecha too queda en fumu”, cola que se resumía la voluntá de la formación política n’algamar alcuerdos xunitarios serios y coherentes, y recordaba que tolos esperimentos fechos nos postreros 20 años qu’intentaron cuayar a espaldes d’Andecha Astur foron esaniciándose implacablemente.

Notru sen, anunciáronse les prósimes actividaes de la organización, el reforciamientu de la cadarma interna p’afayase al actual procesu d’acumulación de fuercies, y pa da-y puxu a la necesaria xunidá d’aición del nacionalismu asturianu.

Pa finar remembróse la proclamación de Soberanía de la Xunta Xeneral en 1.808 faciendo comparanza col “Principado” de 2012 y defendióse la Soberanía comu única alternativa válida p’Asturies, la necesidá de cuntar con un sistema xurídicu-políticu propiu y unes istituciones soberanes qu’únicamente respuendan a les necesidaes ya intereses de la sociedá asturiana y que per ende puean dean soluciones en clave asturiana y non española.

L’actu continuó con una espicha nel Llagar Alonso onde nin faltó la sidre, nin les gaites, nin les ganes de cellebrar esta xornada.

Fonte: Andecha.org