viernes, 1 de octubre de 2010

Aición escontra'l sindicalismu mariellu ayeri n'Uviéu.



Ayeri 29 de setiembre, na manifestación de los sidicatos verticales n'Uviéu, un garrapiellu de mozes y mozos salieron a denunciar y desenmascarar la situación sindical.

UGT, CCOO y USO complices.

El sindicalismu alternativu moviliza a 10.000 persones en Xixón

Unes 10.000 persones movilizáronse esti miércoles en Xixón nuna manifestación en contra de la Reforma Llaboral, qu'escurrió tranquila dende la plaza del Humedal hasta El Náutico baxo un ampliu dispositivu policial.

La respuesta ciudadana púnxose de manifiestu cuando la cabeza de la movilización llegó a El Náutico y la cola entá taba pola plaza del Parchís y tenía que llegar hasta'l Ayuntamientu antes de rematar el percorríu.

Una vegada n’El Náutico, el secretariu xeneral del sindicatu CGT, Jorge Muñiz, qu'avanzó que les movilizaciones van siguir más allá d'esti día, amosó la so total disconformidá cola Delegación del Gobiernu, pol numberosu dispositivu policial que los acompañara. "Paez que somos delincuentes", refartó. "Nun nos van amedranar", dexó claro.

"Que sepa l'autoridá y la Policía que cuando facemos manifestaciones son d'ámbitu pacíficu", repostió antes de xustificar que si hai dalgún incidente ye porque daquién quier que nun puedan protestar los trabayadores. Ello ye que la manifestación escurrió ensin problemes.

Coles mesmes, calificó la fuelga xeneral n'Asturies y Xixón de "total ésitu". Sobre lo último, señaló que la villa de Xovellanos quedó paralizada y añadió qu’una vegada más demostrós ser una ciudá “obrera y combativa".

Muñiz tamién aprofió la masiva participación de la manifestación y reprochó a CCOO y UXT que punxeren "pegues" p'actuar n'unidá d'acción. "Ellos si desmovilicen", acusó antes de refarta-yos qu'acepten pactos con Gobiernos d'esquierdes y dereches.

A esti respectu, espresó'l so deséu de que dambos sindicatos camuden, por que si non, "va haber que tomar midíes". Muñiz pidió al Gobiernu que nun siga nesta mesma llínea y adelantó que va haber futures movilizaciones, anque sía namá n'Asturies con fuelga xeneral o parcial.

Amás, criticó que'l Gobiernu "perdiera la vergüenza personal y política", pero non la de tratar a los trabayadores como a neños, na so opinión. Tamién aseguró que'l PSOE nun puede escusase na crisis internacional porque naide obligólos a recortar les pensiones o xornales. Muñiz, coles mesmes, refugó la política tantu del PSOE como del PP y atacó a determinaos medios de comunicación.

Nel actu intervinieron tamién la secretaria xeneral de SUATEA, Beatriz Quirós, y un representante de la CSI que lleó un comunicáu. La primera alvirtió sobre l'esmantelamientu de los servicios públicos y, en concretu, sobre l'empeoramientu de les condiciones de trabayu na enseñanza al haber cada vez menos profesores.

Tamién animó a "nun quedar cruciaos de brazos" y señaló que queda una ruta per delantre "difícil y dura", con nueves movilizaciones. Nesti sentíu, avanzó que probablemente la próxima sía en defensa de les pensiones y por que nun s’allargue la edá de xubilación, amás de recordar que nesta xornada tamién hai movilizaciones en toa Europa contra l'esmantelamientu del Estáu del Bienestar.

Crítiques a la policía
En cuanto al comunicáu de la CSI, tamién hubo crítiques al esplegue policial con. Amás, criticóse a CCOO y UXT por convocar una fuelga "tarde, mal y apautada" y por querer arropase la representación de los trabayadores "col so exércitu de lliberaos".

Per otru llau, la manifestación partió daqué dempués de les 13.00 hores de la plaza del Humedal, formada polos diversos sindicatos convocantes: CGT, CSI, Suatea y SFO. Na cabecera, podía vese un enorme cartelu col lema: 'Asturies nun ye Grecia pero tamos nello. Nun vamos salir de la so crisis si nun salimos a la cai'.

Fueron unes 10.000 persones les qu'escurrieron pel centru de Xixón, acompañaos d'un par de bandes de música y representantes d'otros partíos como Unidá Nacionalista Asturiana, y con múltiples banderes y pancartes, como la que pidía la reapertura de Juliana o la de el trabayadores de Thyssen, con un curtiu 'Espierta yá'. Los cánticos tamién acompañaron la comitiva, con frases como 'Zapatero, amigu del banqueru' o 'El pueblu xuníu, enxamás va ser vencíu'.

Antes del actu na plaza del Náuticu, Jorge Muñiz (CGT) señaló a los periodistes que con esta movilización busquen que CCOO y UXT nun vuelvan apautar col Gobiernu, al qu'encamienta a esaminar el resultáu de la fuelga. Tamién encamentó a dambos sindicatos mayoritarios a que-yos tengan en cuenta na negociación.

Pel so llau, el secretariu xeneral de CSI, Samuel Fernández, apuntó a la prensa que la fuelga foi un ésitu, anque llamentó que nun fuera convocada va tiempu. Tamién el miembru d'esti sindicatu, Cándido González Carnero, indicó que ye necesariu que la movilización social sía siguida y criticó la identificación de munchos piquetes per parte de la policía.

Fonte: Asturies.com

Concentración del Ensame Republica Asturiana esti pasáu martes.


Nota de prensa asoleyada pol ERA nel mesmu día de la convocatoria:


Güei Martes 28 trescurrió la xuntanza convocada pol ERA na puerta mesma de los causantes de la crisis qu'adolez Asturies dende hai mas de 30 años.

Con una bona presencia, siendo un día llaborable, unes 25 persones aconceyaron a les 8 la tarde ante l'atenta mirada d'un furgón de la policía española y de dellos sindicalistes oficiales de molestos porque se-yos apunte col deu como culpables de la crisis. Dalgunu averose a los ellí aconceyaos pa entrugar el porqué se-yos pón a l'altor de la derecha como culpables de la crisis.
"Menos fartures y mas llucha", "Independecia y socialismu" y déllos esloganes mas foron los coreaos polos asistentes mientres los "sindicalistes" entraben y salíen con priesa del sindicatu que por una vegada nel añu presentaba un aspectu de movimientu cola preparación de los piquetes.

La xuntanza desconvocose a les 20:45 ensin altercaos pese a los intentos de provocaciones con glayíos como: "Viva la repubica" y dalgún "rojos de mierda"

Mañana l'ERA tendrá cortexu propiu na manifestación de los sindicatos alternativos en Xixón baxo'l mesmu llema: "PSOE, IU, PP, UXT Y CCOO SON LA CRISIS D'ASTURIES"