lunes, 15 de octubre de 2012

Darréu cellebró'l Día de la Mocedá Revolucionario n'Uviéu.

La dignificación de la hestórica Revolución Asturiana de 1934 y la espresión político en clave de mocedá, soberanismu y socialismu tornaron a ser protagonistes.
Pasaes les 13:00 h. de la tardi entamaba una nueva edición del Día de la Mocedá Revolucionario, eventu anual nel que Darréu vindica la memoria d'ochobre'l 34 y asoleya énte la sociedá asturiano les problemátiques de la mocedá d'anguañu. El DMR'12 entamó con un emotivu homenaxe a la figura d'Aida la Fuente y a toos y toes les persones revolucionaries que ficieron posible la Revolución de 1934. Énte'l monolitu n'alcordanza a Aida de la Fuente, una compañera de la organización, pronunció un discursu en clave hestórica pero ensín arrenunciar a coneutar la llucha d'Aida y de la Comuña Asturiana coles lluches de l'Asturies d'anguañu.
 

Tres finar la intervención la compañera, la militancia de Darréu ufrió un ramu de roses roxes nel monolitu d'alcordanza a Aida la Fuente mentantu viviase un aplausu d'homenaxe xunitariu y emotivu dafechu. Tres finar l'actu d'homenaxe hestóricu, un compañeru de Darréu procedió a dar l'actu políticu nel mesmu llugar. Nel actu políticu central d'esti DMR'12 hebo distintes alusiones. Per un llau, el compañeru nun quinxo dexar pasar la necesidá d'honrar a los y les compatriotes de 1934 y depués cientrose na situación de la mocedá asturiano y del país nesti momentu presente.
 
Nel actu políticu fixeronse paralelismos hestóricos, y criticose de forma clara los recortes a les llibertaes y los drechos de toos. Espeyose la visión de Darréu al rodiu la situación de crisis capitalista y miseria que tamos viviendo n'Asturies, recordose que nel nuesu país la crisis bien siendo permanente dende fai décades y que vivimos nuna situación predemocrática dafechu. Asina'l compañeru zarró la intervención llamando a la mocedá a rebelase contra'l capitalismu y l'Estáu Español, tresmitiendo que la movilización caltenía y la llucha popular pola soberanía d'Asturies y pola superación del sistema capitalista son l'únicu garante d'un futuru estable, dignu y llibre pa la mocedá asturiano.
 
Tres finar la intervención d'esti compañeru los y les presentes canciaron l'himnu popular y soberanista “La Flor del Agua” puñu n'altu y minutos depués entamó una xinta popular na cai pa finar cola xornada. Durante la xinta les persones asistentes pudieron esfrutar d'una comida tradicional, con muncha sidra y música'l país amenizando'l DMR'12.

Fonte: www.darreu.org