L'Ensame Socialista Astur o la chifladura fecha sigla.

Güei la manifestación pola oficialidá de la llingua del país coincidiendo col Día de les Lletres tuvo'l so turnu añal n'Uviéu. Ente les estremaes organizaciones hebo intercambeu de pasquines, pegadielles, comunicaos y otru tipu d'información impresa. Pero ensín dulda el panfletu y les pegadielles del Ensame Socialista Astur llevaronse'l premiu por ablucantes ya impresentables.

" Non a la inmigración illegal" ye lo qu'entitulaba una pegadiella del Ensame Socialista Astur. Non, nun ye dengún panfletu baratu y populista d'un grupusculu neonazi d'esos que tenien güei a les 19:00 h. un actu nes instalaciones de La Nueva España, non señores. Ye una pegadiella del ESA repartida esta tardi na manifestación del Día de les Lletres. Lo ablucante ye qu'esta chifladura xenofoba nun vino acompangau solu d'esta pegadiella, sinón qu'hebo otra escontra los comercios chinos, un calcu a la mesma Democracia Nacional pero n'asturianu.

Si, la fola racista y xenófoba sigue medrando. Y paez que chisca'l mundu del nacionalismu asturianu. La fola de populismu aporta'l mundín pequeñu nel que movemonos tolxs patriotes. La xente güei ablucada foi a llamai l'atención al mozu que repartió esti insultu a la tolerancia y los valores d'esquierda y la rempuesta foi una sola " nun se, nun digasme, solo sofito, nun teo nada que ver". ¿Que tipu de chifladura dio-y al autor de la famosa pegadiella?. ¿ Nun dicen ser socialistes ? ¿ Que xaciu tien nun supuestu socialista asoleyar campañes xenófobes y racistes ?
¿ Qu'internacionalismu ye esi ? ¿ O tamos ente puru nacionalsocialismu a la asturiana ?.

Podemos pensar qu'esto que faen llamar Ensame Socialista Astur nun ye namai qu'un friki nostalxicu que quier resurdir l'antiguo Ensame. Podemos pensar qu'esto de nomar Ensame a esto ye una perda de tiempu, que d'Ensame tien pocu, ye ciertu, ye una persona namai. Pero tenemos que tar soyertes tamién a estes conductes, faltoses pal movimientu nacionalista/ independentista, carauterizau tradicionalmente pola so participación en movimientos antifacistes/racistes, y peligroses. Peligroses por xugar con un tema mui delicau nesti tiempu, onde la crisis afuega inda más a les families de clas obrera y onde munchos lacayos del sistema traten de tapecer, por un puñau de votos les vergoñes del poder con discursos intolerantes, antisolidarios y racistes dafechu. Peligrosu pola facilidá d'asimilación d'esi discursu nuna sociedá desinformada y despolitizada dafechu.

Otra pegadiella ye una que diz " Droga Solución ", ente los asesinatos de PP y PSOE al Pueblu Asturianu sal nesta mesma. L'autor de la pegadiella debería reflexonar cola so capacidá desplicatoria. Nun hailo por onde garrar. Ta incitando a la droga direutamente o echamos-y imaxinación y creyemos que quier dicir qu'el PSOE y PP introducen drogues y empleguenles pa desactivar al Pueblu Asturianu y asina desanicialu meyor. Tendría que repasar la so capicidá pa tresmitir comunicación l'autor.


Ente estes salides de tonu la rempuesta ta nidia. Da-y la espalda a esta xente( podría dicir a esta persona), inorala y nun tene-yos muncho en cuenta. Estos erros incitando a la xenofobia( si se puen calificar como erros) nun puen ser toleraos. Poro, puntu final. Que nun haya dengún requexu pa esta xente dientru'l movimientu patriota asturianu, menos d'esquierdes. Más cuando tan enllenandose la boca d'esta pallabra: esquierdismu, y escribayando llemes d'ultraderecha. Pidiendo la espulsión d'inmigrantes y falando de socialismu. Que colen cola puxarra racista españolista, que dexuru qu'atopen ellí dalgún que conoza la llingua llariega. Nun hai cabida nel movimientu de reconstrucción nacional y social pa esto que dicen nomar " Ensame " " Socialista " ¿ Astur?.

Nin racismu, nin xenofobia.

ASTURIES ANTIFACISTA.