domingo, 19 de septiembre de 2010

Darréu sofita a los mineros en griesca pol so salariu y unes mínimes condiciones de futuru


Darréu asoleya esti comunicau na so páxina web:

"Dende la organización política Darréu, en vista de los abusos a los trabayadores de les empreses mineres de El Bierzu y Ḷḷaciana, quier amosar su solidariedá pa con ellos y denunciar les inxusticies tantopor parte de los empresarios, como del gobiernu del estáu español.

D’un tiempo a esta parte, los mineros de les empreses UMINSA,Grupo Villoria, y Coto Minero; ente otres, tan saliendo a la cai pa defender los sos drechos, protestando pola falta de futuru nes cuenques mineres, y sobre too pol impagu de los sueldos.

Ye de sobra conocíu el problema del carbón n’Asturies, tres del ingresu del estáu español na Xunión Europea. Esti problema, agraváu pola situación de crisis d’anguaño, ta llevando a que families enteres lleven ensin cobrar dende fai meses, por mor d’una patronal ensin vergoña, que ñégase a pagar coles escuses mas fates , un gobiernu cómpliz y unos sindicatos apoltronaos.

Les escuses puestes polos empresarios, pa tentar xustificar les sos acciones resúmense en descargar responsabilidaes y altricar falta dineru, cuando nun son presones precisamente conocíes pola so homildá.



Esti nun ye el primer casu en que la minería del sur d’Asturies sal a la cai pa defender dalgo tan básico como ye'l drechu al trabayu, como la marcha a Madrid en Xineru del añu 92. Les fuelgues, cortes de carretera y engarradielles contra les fuercies d’ocupacion lleven dellos díes ocupando los titulares, ainda col pocu sofitu na provincia de Lleón y la censura de los medios. N’Asturies, ye visible l’apoyu de la sociedá colos trabayadores de les mines privaes, llegando a axuntase 1500 presones en Cangas el pasáu día 15.

Poro, queremos amosar el nuesu sofitu pa los compatriotes mineros en llucha en toles partes d'Asturies onde ta españando'l conflictu. Dende Darréu ficimos una aición d'espardimientu de la problemática estos díes y quieremos da-yos a los trabayadores en llucha tola solidaridá de la mocedá independentista revolucionario.

¡ Pol futuru p'Asturies !

¡ Polos mineros en griesca !

¡ Puxa la llucha de la clas obrera !"

No hay comentarios:

Publicar un comentario