"Dende Fai! axuntamonos a la defensa de la ruralidá asturiana como elementu tanto tradicional como ecolóxicu como necesariu pal autodesendolcu del País y l'equilibramientu d'una economía popular y asturiana.
Comprendemos tamién que ye importante entamar dando-y d'una vez puxu al movimientu ruralista asturianu, escaecíu tanto polos partíos políticos como pol propiu movimientu d'esquierda asturiana y desorganizáu dafechu pola falsa conceición de que les zones rurales yá nun tienen nin tendrán futuru n'esti mundu globalizáu y capitalista nel que nos tocó vivir.
Por eso ye tiempu de dicir non al escaezu del seutor primariu asturianu, non a la cerrazón tradicional de la esquierda alredor de l'industrialismu y non a la destrucción d'estes zones pa usu y disfrute d'empreses destructores de la natura".
Fonte: www.fai-asturies.org
Les dos frases de la pegatina quiero entender que lleven el verbu n'imperativu, como afalando a la persona llectora a que seme rebeldía y a que, poro, recueya llibertá.
ResponderEliminarSi asina ye, la segunda de les frases tendría que llevar el verbu d'esta forma: RECUEYI, que ye la que correspuende p'animar, rogar, mandar, suxerir....
SEMA REBELDÍA
RECUEYI LLIBERTÁ.
por nun dicir tamién que'l verbu asturianu pa "recolectar frutos" ye simplemente COYER, en francu desusu pola presión diglósica del castellanu, onde Coger/recoger tienen dos campos semánticos bien acutaos.
ResponderEliminarMui bien dicho los dos. Tendría que ser CUEYI LLIBERTÁ.
ResponderEliminarToi d'acuerdu que ye un imperativu y debería ser con i pero'l verbu RECOYER ye tan validu como'l de COYER pal significáu de recolectar.
ResponderEliminarAsina lo afirma l'academia y el diccionariu de Xose Lluis García Arias que creo que ye de quien tenemos que fianos mas que de dos anonimos nun foru.
Per otru lláu, prestosa la pegatina. Bien por Fai!
Home, yo vivo nun puebliquín de 70 persones, y la verdá ye que'l discursu "ruralista" paezme más fricada que sofitada nun discursu real...
ResponderEliminarQuiero dicir... ¿Supuénse que na Asturies rural tenemos que vivir namás que de la llabranza? Na Asturies rural la industria xuega un papel importante. Pensái nes zones rurales de Les Cuenques, pensái nes zones rurales de la redolada d'Avilés, pensái en Navia y redolada... Ye parte esencial de la economía "tradicional" asturiana.
Per otra banda nun podemos escaecer que la defensa del sector agropecuariu tien que pasar pela so modernización (y eso implica mecanización). Nun me presta esa visión que se tien nes ciudaes o nes villes de los pueblos como esa Arcadia onde la xente trabaya como los nuesos güelos, como si fose daqué positivu. Vamos ser francos, ¿quién quier ponese a trabayar na tierra sin segadora o ensiladora?
Ye significativu que les úniques veces que sintí la espresión "ruralismu" foi nes zones urbanes. Lo que hai que facer ye defender, per una banda los pueblos (tamién el trabayu non agropecuariu de los pueblos), y per otra banda la agricultura y la ganadería, pero non dende una perspectiva de l'Arcadia feliz confrontada col mundu urbanu, sinón dende una visión económica y social que parta de les propies necesidaes de los pueblos. Por cierto, que tovía hai pueblos a los que nun llega l'agua corriente...
Moiso, tu sabes cuántes vaques había enantes y cuántes agora? Paezte que'l campu asturianu va empobináu a la desapaición y sostitución pol modelu de parque temáticu o a la modernización? Nun son precisamente eses formes de vida tradicionales les que caltienen l'equilibriu humanidá-mediu ambiente? Nun reconoces na soberanía alimentaria ina componente de superación del capitalismu mui efeutiva?
ResponderEliminarNun sé d'au saques la interpretación bucólica. Yo nun la veo nel testu. Y p'alantre esa xente que ta tirando por ello!
Iyán, la pregunta ta mal formulada. La pregunta nun tien que ser cuántes vaques había enantes y cuántes hai agora. La pregunta ye cuántos llabradores había enantes y cuantos hai agora. Esto me recuerda al chiste de les encuestes, esi que diz que nun pueblu había cien persones probes, menos ún que tenía cien vaques, asina que les encuestes resultaben que nel pueblu había una vaca por persona.
ResponderEliminarInvítote a venir al mio pueblu, podrás ver cómo los praos tán abandonaos, sólo hai media docena de llabradores (nun pueblu de 70 persones y más de 200 vaques).
Por otru llau, nun seré yo el que defienda qu'hai qu'acabar cola ganadería, como dixe hai que defender el sector agropecuariu. Pero quien piense que nos pueblos sólo hai sitiu pa esti sector ta faciendo d'ellos un parque temáticu.
Nun creo que'l campu asturianu tea empobináu a la sustitución por parques temáticos, pero si ta empobináu a la modernización (si non probes de nós). La modernización de "per se" nun ye nin "globalizadora", nin antiecolóxica. Ye más, ye la modernización la que pue garantizar la soberanía alimentaria (la non-modernización del sector agropecuariu condénanos a les crisis alimentaries), de fechu, dende la introducción del aráu a la introducción del maíz, el sector agropecuariu foi prosperando pola so modernización.
Lo que defiendo ye que plantegar una economía monolítica nos pueblos ye absurdo. Primero, porque si yo nun me quiero dedicar a la ganadería y nos pueblos ye lo único qu'hai ¿tengo que colar? Eso ye como plantegar que si quies vivir en Mieres tienes que ser mineru. Y segundo, porque una comarca que viva d'un sólu sector (y vuelvo echar mano del exemplu de les Cuenques) tien una economía que depende únicamente d'esi sector, poro, si'l sector entra en crisis tola comarca entra en crisis.
Por otra banda, y por nun estenderme, ser productores d'alimentos nun te convierte nuna sociedá soberana no que na alimentación se refier, puesto que los que producen alimentos nun los producen nin fora del sistema capitalista nin pa ellos, sinon p'alimentanos a toos los que nun producimos alimentos (que somos la mayoría). Nun sólo eso, si non que tamién son consumidores de los bienes de consumu que nun producen (dende la tele o l'ordenador hasta la gasolina del tractor, o'l tractor mesmu). Poro, la soberanía alimentaria ye daqué más complexu que ponenos a semar.
L'aspectu bucólicu véolu na confrontación ente la modernidá y l'Asturies rural, y na vinculación n'esclusiva (y recalco lo de n'esclusiva) de l'Asturies rural al sector agropecuariu (nel que tamos escaeciendo incluyir el sector pesqueru).
Perdonái por estendeme tantísimu y poles faltes d'ortografía :D Güei nun ando mui finu, vaya parrafada enllena de faltes vos punxe :p
ResponderEliminarPor resumir, creo que ye importante cuando se fai un discursu sobre un tema sectorial, arimase primeru al sector y entrugar cuáles son les sos aspiraciones... Y que quede claro que nun ye una crítica destructiva, ye una crítica por pue servir d'ayuda. Norabona por trabayar.
1- Cantidá persones vs. vaques.
ResponderEliminarA mi esto recuérdame a aquella "antoloxía del disparate" d'estudiantes de BUP de los 80 onde un alumnu dicía "N'Holanda, de cada 4 persones una ye vaca". Por supuesto que falamos de lo mesmo -y si quies entendeme tiéneslo fácil-. Falamos de qu'hai 10 años había caseríes pequeñes y familiares per tola redolada d'Uviéu y Xixón y anguaño naide ta garrando'l relevu a los vieyos.
Nun fai falta que m'invites a nengún pueblu (a nun ser que seya pa forrar, qu'entós sí :D). Yá te digo que namás con andar 20 minutos de la Cai Uría vas ver cómo na zona más na redolada de les ciudaes la presencia de ganaderíes familiares y caseríes ta en desaniciu. Caro, igual que'l del pequeñu comerciu de frutería-panadería-pescadería-carnicería. Precisamente nes zones más "vírxenes" ye onde más se caltién un mínimu d'explotaciones intensives y familiares, anque col resultáu que yá se conoz: nun hai relevu xeneracional, porque gánase más siendo tola selmana segurata na Universidá d'Uviéu (y sabes por quién lo digo) que tirar d'un ganáu, unos praos o unes tierres que nun dan rentabilidá per nenyuri. Nin se paga a tiempu l'afección de los llobos, nin la llingua azul, nin la brucelosis, nin se fina con esa mierda d'intermediarios que faen qu'un quilu de pataques que sal a unos pocos céntimos cueste dempués diez vegaes más nel MasyMás.
Y sí, ho. Tamos pasando a Parque Temáticu. Cada vegada hai más muséu etnográficu de garabatos colgaos y menos balagares nos praos. Desgraciadamente, cuando yo yera guah.e tolos nenos de clas tiníemos güelos con vaques, pites, gochos, fabes, arbeyos y berces. Mio güelu tien 88 años y nesa casa yá nun hai vaques nin burres. L'únicu futuru que se ta plantegando pa la xente de la zona rural ye'l de la emigración (unos a estudiar y nun tornar más que los domingos) y pa otros el trabayar en polígonos industriales de chapistes-soldadores porque nun hai continuidá porque nun se promueve dende les instituciones, cosa que, por cierto, sí se fizo de Bustio p'allá.
2- Futuru del campu asturianu
Nun hai. Anguaño non. A mi paezme que debiere dexase'l campu asturianu como sector estratéxicu en modernización como garante de los métodos de vida tradicionales per un llau, p'asegurar la caltenibilidá ambiental n'equilibriu, tamién y como abellugu escontra la especulación cola tierra. Pero non, los pueblos véndense a les hidrollétriques pa poner los putos molinos nos montes comunales a cambiu de ¡ASFALTAR EL PUEBLU!(y esto ye CIERTO tal cual). Arreyao a los sectores tradicionales hai qu'impulsar custiones de turismu rural de calidá y pequeñes industries que nun estrocen les vegues de los ríos (como se fai agora, por cierto, en cada polígonu industrial).
3- Soberanía alimentaria
Evidentemente, ta claro qu'en viviendo nun sistema d'explotación capitalista les posibilidaes de vivir alternativamente tán siempre condicionaes pola propia condición. Toos y toes tenemos les nuestres postures aparentemente incoherentes (como'l fechu de tar escribiendo dende un ordenador fabricáu vete-tu-saber-ónde)pero eso nun quier dicir que nun heba niveles. Nun ye lo mesmo intentar priorizar -cuando lo permite'l bolsiellu- dir a una tienda pequeña qu'al Metadona anque dambes seyan n'economía capitalista.
Pos con esto pasa igual: que nun ye lo mesmo mercar les llechugues d'Almería que tener un güertucu y pasar a sayalu una vegada a la selmana. Refugar a esi tipu de pequeños "requexos" paezme un error. De xuru que tamos d'alcuerdo.
4- Bucolismu
ResponderEliminarVenga, Moiso. Qu'Asturies y la exa Uviéu-Xixón-Avilés nun son Majadahonda. Nun pues plantegame un escenariu "urbanita vs. aldeanos" real porque nun lu hai más que n'apariencies carapijes -nel xacíu más direutu del términu-. Qué soi yo l'únicu del grupu d'amigos nuestros que sabe -un poco- segar y afilar el gadañu? y poner gamayos a los arbeyos y a les fabes?
L'erru nel que m'abulta que caes ye considerar "urbanita" la defensa de la producción tradicional (+-modernizada) frente a lo que nos pueblos munches veces ye'l "cutrismu". Dígolo porque igual eso nos lleva a defender la conversión horru en garaxe tan típica, los chamizos d'uralita o l'odiu irremediable escontra los "ecoloxistes".
Al fin y al cabu esto ye una pegatina que, con una errata asumible, tampoco tien muncho más enfotu que'l dignificar la vida tradicional rural que nel meyor de los casos "siempre s'escaez". Cuidáu con falar d'interllocutores, que nesi ámbetu nun tenemos a la CSI, sinón a los sindicatos más chungos y filosoziatas qu'hai en tola galaxa. Unos mafiosos de cayer p'atrás, por cierto.
Abúltame que ye de les poques vegaes que nel soberanismu d'izquierda nun se fai tanta apoloxía del modelu de desarrollu dende la revolución industrial p'acó (por cierto, contrariu a tolo que tien que ver colos derechos sociales, la propiedá de los medios de producción y los intereses ambientales n'Asturies). Tampoco sedrá pa tanto chisgar un güeyu al campu anque seya namás por afirmar que dende'l campu asturianu tamién pue enraigonar la semiente de la lliberación social (y nacional), ¿non? ;-)
Un abrazu.
Hahaha, creo que'l primer mensaxe te lu entendí xusto al revés :D Entendite qu'agora hai más esplotaciones ganaderes qu'enantes.
ResponderEliminarToi d'alcuerdo contigo en qu'hai qu'apostar pol sector agropecuariu como un sector estratéxicu. Tamién toi d'alcuerdo no del cutrismu de los pueblos (horros-garaxe, uralita...). Tamién toi d'alcuerdo no que dices de que nun se pue plantear ciudaes vs. pueblos, nin los pueblos son tan "rurales" nin les ciudaes tan "urbanes", polo menos n'Asturies.
Lo que planteo ye que nun pue apostase namás por eso. A veces podremos apostar pel turismu alternativu, pero a veces haberá qu'apostar pola pequeña industria (que tampocu los astilleros de Navia son los de Xixón, claro).
Cuando digo interlocutores nun me refiero tanto a los sindicatos agrarios (o non agrarios, pero con presencia nel mundu rural), como a los propios llabadores/trabayadores.
Pue que les diferencies ente lo que dices tu y lo que digo yo seyan más de matiz que de fondu ;)
Lo de que vengas al mio pueblu de fartura y comedia, queda apuntáu :p Eso sí, con parada tamién en Somiedu :)
Un abrazu, nin.
Moiso, nun acabe siquiera de lleer el debate que vos traeis pero vou decite una cosina bien simplona: tu nun pues saber si la xente de Fai y el so discursu ya esento del mundiu rural, y vou decite más, tas totalmente equibocau. muchu bien por toles parrafaes desautorizando'l discursu de fai pero tas mui equibocau si pensas que val más la to pinión comu mozu fiu de campesín, que la de un mozu cualquiera, inconformista urbanita o nón, y en segundu llugar fai pue decir bien contentu que tien mozos tan ruralinos comu tu y bastante más lúcidos.
ResponderEliminar