Fai un tiempu entamó nes cuenques una campaña, entamada por Darréu y xente independiente de la redolada anticapitalista, pa la dignificación ya'l resurdimientu d'esa parte d'Asturies. Dende Andecha Obrera, considerose importante face-yos una entrevista pa da-yos puxu y que s'estendiere'l so mensax tolo posible.
¿Cómo surde esti proyeutu?
La iniciativa surde nun contestu qu'a lo menos ye preocupante. En menos de dos años les cuenques mineres tan superando de lloñe la dinámica de pieslle d'empreses y ataques a los y les trabayadores d'esta zona d'Asturies. Si la crisis permanente que sufren estos conceyos yera un problema palpable y de gran consideración paez ser qu'estos meses atrás los ataques al texíu llaboral de les cuenques tan siendo inda más xabaces y continos. Asina, ente tanta agresión de la patronal y la pasividá de los sindicatos verticales, que munches vegaes combayen cola patronal, munchos mozos y moces dicimos que yá valió. Que yá valió de desmantelar la Cuenca del Nalón y la Cuenca del Caudal hipotecando'l futuru de la mocedá.
Asina dende Darréu entamamos un alderique internu ente la militancia y simpatizantes cola fin de dar rempuesta a esta murnia situación socioeconómica y política que tamos sufriendo. En consensu apaez la idega d'entamar una campaña de denuncia a nivel de Les Cuenques, faciendo ver la situación a la mocedá y tratando de señalar responsables d'esa mesma situación. La denuncia por supuestu faise dende una perspectiva moza y de cara'l futuru, al futuru de nueso, que ye bien intrigante.
Asina, frutu d'esti alderique, el proyeutu entama a salir p'alantre, cola puesta en marcha d'iniciatives como asoleyar 2.000 pegadielles pa los nuesos conceyos refugando y denunciando la llaceriosa situación de les cuenques. Tamién s'asoleyaron numberosos pasquines que se tan distribuyendo en folixes y zones onde s'axunta muncha mocedá col envís de concenxar a la mesma que solo la mocedá pue lluchar pol so futuru y el de les cuenques, y que naide, y menos los políticos y sindicatos traidores van facelo por elles y ellos.
Dempués tamién se ficieron dellos muriales cola mesma temática y s'espresa en numberoses muries les nueses vindicación de futuru y l'esmolecimientu de los xóvenes por ver les cuenques mineres morrer. Como se pue ver, pel momentu'l proyeutu ta cientrándose en desendolcar campañes propagandístiques informatives, pero dexuru que vendrán a enanchar el proyeutu otru tipu de propuestes d'estremada triba.
Ideolóxicamente, ¿cómo vos definís?
La campaña quier abrise a tol espectru ideolóxicu de la izquierda anticapitalista y combativa de les cuenques, que tean Asturies y les cuenques como'l so marcu d'actuación. Nun s'entiende una campaña contra'l desmantelamientu y pol futuru de los nuesos conceyos ensín cuestionar el sistema capitalista impuestu en les cuenques mineres a sangre y fueu demientres munchos años. Tampocu s'entiende esti conflictu baxo una visión que nun seya únicamente asturiana y de les cuenques, pues ye un conflictu con unes peculiaridaes mui llendaes, un conflictu con unos factores qu'inciden n'el mui específicos d'esta zona d'Asturies.
Per otru llau, anque ésta campaña tea abierta a la diversidá política cola fin d'espardir el mesmu mensaxe d'una forma más masiva y popular, hai de solliñar que foi entamada por militantes y simpatizantes de la mocedá soberanista y revolucionario Darréu. Hasta'l momentu los militantes y simpatizantes de Darréu en les Cuenques Mineres tan implicandose abondo cola campaña, anque yá hebo delles collaboraciones desinteresaes d'otres persones que nun pertenecen a esa organización, nin tan siquier a la izquierda nacionaliega.
Dende equí queremos tresmitir que taríemos encantaos de que'l llema "Por unes cuenques pa vivir y trabayar", que ye'l llema cabezaleru d'esti proyeutu, fuere asumíu por tola xente posible como forma de caminar pali que pali haza la unidá popular en les cuenques, en defensa d'un futuru más real ya igualitariu. De toles formes nun se pue escuender la ñaturaleza d'esta campaña, que ta siendo empobinada en mayor midía dende la mocedá de la izquierda nacionaliega d'Asturies y la mocedá del sindicalismu de clas del país.
¿Qué propuestes tenéis pa iguar la situación de Les Cuenques?
Les Cuenques lleven munchos [años] arreconstinando unes problemátiques mui concretes y complexes. La responsabilidá de la murnia situación na que mos atopamos ye tanto de políticos, como de los empresarios pasando polos sindicatos traidores a la clas obrera, ente otros. La situación tien d'entamar por reactivando los sectores productivos industriales que tenemos, invirtiendo n'ellos con responsabilidá y ensín chanchullos. El casu d'Alas Aluminium ye bien sinificativu, d'unos fondos públicos que s'invierten nuna iniciativa de reactivación y que naide nun sabe onde tan. El dineru públicu tien de ser públicu, ello ye, que puea xestionalo'l Pueblu d'alguna forma, nesti casu nes persones de ca conceyu onde reinvierte direutamente una inversión. Si se trata d'una empresa que quiera suplir el papel de los pozos a la hora de dar trabayu, que s'alcuerde colos trabayadores la xestión d'eses perres y el fin últimu de ca inversión. La tresparencia tien de ser una obligación per parte de los poltroneros(políticos y grandes mafies sindicales que sufrimos) pa que llueu nun se dean casos de corrupción.
Otra forma de reactivar les cuenques ye ufrir meyores proyeutos educativos y formartivos a la mocedá, pues nin abunda la salida formativa, nin la educativa nin por supuestu la llaboral. Otru pegollu sedría quitar d'una vegada por toes los millonarios regalos que la FSA y la so redolada ufren a los lliberaos traidores del SOMA. El sindicatu pseudomineru sigui afogando a les cuenques y si investigáremos podríemos ver como la rede de clientelismu que tien afitada en collaboración col so partíu y los que combayen con ésti movería munchisimos millones, por supuesto, públicos. Éstes perres o bien son emplegaes pa pautar la paz social nestos conceyos o bien traten direutamente d'enrriquecer a tola cadarma elitista-sindical qu'axunta esti sindicatu que manexa los nuesos conceyos con criterios que recuerden muncho'l caciquismu.
En resumen, hai d'invertir na reindustrialización d'estes zones, puxando por una industria caltenible, que seya respetuosa cola ñatura y s'adecúe al espaciu y los recursos. Tamién hai que puxar poles zones más rurales, fomentando la economía tradicional, qu'hestoricamente siempres tuvo gran protagonismu en les cuenques, asina como'l ganáu. Dempués ye básicu, como diciemos, desaniciar privilexios, despilfarros y la rede clientelar que sufrimos. Eses sedríen soluciones polítiques y socioeconómiques a curtiu plazu que fadríen de les cuenques una zona onde poder vivir y trabayar. Dempués por supuestu, too tien de dir xuníu a un procesu d'organización popular del Pueblu Trabayador en llucha por unes cuenques onde poder vivir, trabayar y tamién desendolcar un procesu social y políticu onde'l protagonista seya esi Pueblu Trabayador Asturianu y de les cuenques y s'afite la igualdá en toles estayes de la vida social diaria.
¿Teneis dalguna actividá en mente?
La verdá ye que tenemos delles actividaes de mente. Pel momentu vamos a siguir cola campaña a nivel informativu, espardiendo'l mensaxe a nivel de cai y trabayando en propaganda. Tenemos que finar la tirada de 2.000 pegadielles coles qu'entamó la campaña, y se van a facer campañes de cartelos y repartu d'octavilles na cai. La idega agora mesmu ye caltener la dinámica propagandística que siempres ye fundamental ya dir faciendo medrar la campaña y la so sonadía.
Por otru llau ya s'aldericó sobre otru tipu d'actos, más bien en forma de convocatoria y otru tipu de protestes, como la ellaboración de documentos vindicativos pa entregar en asociaciones y cases conceyu, pero entá nun hai daqué definitivu. Esi tipu de convocatories surdirán conforme avance la campaña. Sobre actos conxuntos lo mesmu, ye lo que se tien en mente. Enanchar la campaña y dar rempuestes conxuntes.
Unes últimes pallabres...
Munches gracies al blogue "Andecha Obrera" por ufiertanos esta entrevista ya interesase pola situación de les cuenques con ella. Siguiremos informando al vuestru mediu alredor d'esta campaña contra'l desmantelamientu d'estos conceyos y la falta d'espectatives pa la mocedá. Salú ya dixebra.
FONTE: www.andechaobrera.blogspot.com
No hay comentarios:
Publicar un comentario