Un nuevu ciclu hestóricu

Ye innegable, y yá un tópicu común l’afirmalo, que l’apuesta política de Francisco Álvarez-Cascos nestes elecciones supuso’l piesllu d’un ciclu hestóricu en Asturies y l’apertura d’otru nuevu. Y non menos ciertu ye qu’inda desconocemos la inmensa mayoría de les característiques que van presentar los vinientes escenarios políticos acullá de la presencia d’un partíu asturianu que definíu como rexonalista asítiase nes coordenaes ideolóxiques d’un nacionalismu español autonomista y cuadonguista, al mesmu tiempu que confronta colos partíos sucursalistes denunciando la esistencia d’una incompatibilidá ente les necesidaes de la sociedá asturiana y los proyectos políticos de calter estatalista. ¿En qué pue desaguar l’actual convulsión del panorama políticu asturianu? ¿Y qué factores sociales, económicos, políticos y culturales puen desencadenase nel marcu d’una crisis global tanto n’Asturies como en tolos marcos nos que ta integráu’l nuesu País?

Al igual que pasa col movimientu “¡Democracia real YÁ!/15-M” tamos énte un fenómenu que desborda toles situaciones previstes modificando sustancialmente la realidá de l’arena pública, y que colos datos de los que disponemos agora’l común de los mortales tovía ye bien ceo pa poder analizalo en fondura. Mientres la Hestoria amosa qu’hebo una gran variedá de fenómenos que si bien nun principiu se caracterizaron por un determináu nivel d’ambigüedá tanto nos sos presupuestos ideolóxicos como na so axenda política, tuvieron dempués la capacidá de romper cola inercia de la apatía social ampliando’l marxe estructural d’oportunidá política esistente nesi momentu.

Evidentemente dende una posición maximalista se pue amenorgar la significación de determinaos fenómenos a una simple dinámica de “rexeneración” del marcu estructural vixente, pero cuando un procesu de “rexeneración” del sistema faise necesariu ye porque’l modelu xestionariu hasta entós dominante dientro del “status quo” ta agotáu y la so sustitución resulta vital pa la estabilidá futura del sistema. Poro anque tou proyectu de rexeneración “reformista” implica una mínima reconocencia d’una serie de contradicciones particulares coles mires de garantizar que l’acumuladura xeneral de contradicciones permaneza dientro de les llendes de lo estructuralmente caltenible, esa mínima reconocencia abre la posibilidá de la formación de nuevos actores sociales al traviés d’una quiebra relativa de la hexemonía esistente hasta esi momentu.

Asina anque Il Gattopardo seya una fonte de reflexón bien interesante tamién pue derivar nuna mala escusa pal inmovilismu tácticu. Y de toes formes nun ye ésti’l momentu afayadizu pa dedicase a xugar con boles de cristal, ensin escaecer amás qu’esa práctica nun ye más que’l síntoma de l’ausencia d’una dinámica propia.

Poques coses tán nidies de momentu, pero una d’elles ye la desapaición del “asturianismu políticu” como estratexa vidable dientro del mundiu nacionalista. Si nel tiempu del xacobinismu colonial del PSOE l’ambigüedá conceptual de la etiqueta tenía determinaes virtúes asina como un potencial, nel contestu actual apura una clarificación de les xeres, estremando ente asturianismu cultural y nacionalismu políticu, o ente autonomismu rexonal y soberanismu nacional.

Y de la mesma manera que se pue y se debe afirmar ensin complexos que la reivindicación programática de “la Oficialidá y l’Autogobiernu” nun implica en si mesma nengún proyectu de construcción nacional, tou fenómenu de mases en clave rexonalista tien de valorase como una meyora al respective del escenariu de los caberos trenta años. Reconocer sobre un papel qu’Asturies ye una nacionalidá cultural o una nación hestórica tampoco ye ser nacionalista, anque si quien lo fai tien una determinada audiencia si pue ser beneficiosu pal procesu nacionalitariu nuna determinada fase hestórica. Nel “Principat” el PSC o “Iniciativa per Catalunya Verds” puen tener un perfil más o menos catalanista pero nun son nacionalistes catalanes, y la realidá asturiana ye que güei nesti país tenemos dos fuercies con representación parlamentaria qu’asumen en mayor o menor grau una determinada sensibilidá haza la cultura asturiana y la reivindicación autonómica: Foro Asturias ya IU.

El casu ye que Foro Asturias ya IU tán configurándose como ferramientes cada vuelta más válides (o al menos eso paez) pa determinaos sectores del “asturianismu” que siempres tuvieron como oxetivu prioritariu’l camudar determinaes polítiques culturales que s’aplicaben dende les Alministraciones municipal y autonómica. Ye más, precisamente l’asunción de demandes “asturianistes” por parte d’estos dos organizaciones polítiques permite y fuerza a avanzar haza la mayor concreción y visibilización d’un proyectu nacionalista acullá de reivindicaciones de calter básicu que son comunes a un ampliu abanicu de posiciones ideolóxiques

En definitiva, pasamos d’un escenariu onde la centralidá política taba ocupada pol PSOE y que se caracterizaba pola negación d’Asturies como País, a otru onde la dinámica de cambéu paez que va favorecer una mayor definición de les distintes posiciones alrodiu del oxetu y del suxetu nacionales.

Javier Cubero