El diputáu d'Izquierda Xunida en Madrí Gaspar Llamazares sorprendió esti vienres a la comunidá asturfalante con unes declaraciones del periódicu selmanal Les Noticies. Nesti mesmu periódicu declaró "voi usar l'asturianu nel Congresu col fin d'ayudar a facelo visible". Una vegada más, una declaración d'un altu cargu d'Izquierda Xunida suena a chancia ente los y les asturfalantes.Hai que dicir, que Llamazares nun ye portavoz del so grupu parlamentariu, polo que les sos intervenciones sedrán escases y menos relevantes que les de por exemplu Cayo Lara. Per otru llau, d'alcuerdu cola llexislación del Estáu Español nun ta permitío falar asturianu nel Congresu, cenciellamente por tratase d'una llingua non oficial. Per otru llau, les pallabres de Llamazares son pocu creibles pol fechu de qu'enxamás se carauterizó esti políticu d'izquierda reformista por emplegar la llingua n'ambientes públicos y/o formales. Poro, ye normal les reticencies que xeneren estes declaraciones ente los asturianos. Hai qu'amestar a too esto la so actual impopularidá y la mala imaxe que tien incluso ente los sos votantes, polo que pue ser una estratexa más de Llamazares y d'Izquierda Xunida pa utilizar la llingua y elementos comunes al asturianismu pa facer llaváu de cara.
Nun podemos escaecer a colación d'estes declaraciones qu'Izquierda Xunida ye un de les responsables de que l'asturianu nun seya llingua oficial y de que'l so diputáu Llamazares nun puea emplegar la llingua. Tenemos que facer memoria y nun escaecer los años d'Izquierda Xunida combayando col PSOE-FSA nel Gobiernu del Principáu d'Asturies faciendo una política etnocida y siendo igual de responsables que la españolista FSA. Tamién dicir que na Xunta Xeneral los diputáos d'Izquierda Xunida enxamás falaren asturianu, polo que una vegada más caen pol so propiu pesu. Demientres toos estos años nel gobiernu asturianu, pesie a les sos promeses eleutorales enxamás ficieron un res pa normalizar la situación del nuesu idioma. Poro, ye una irresponsabilidá qu'esti señor, afincáu en Madrí y totalmente ayenu a la realidá asturianu mos venga con cuentos y cancios de sirena. Meyor dexaben de vender imaxe en Les Noticies y poníense a emplegar l'asturianu na Xunta Xeneral. Eso si que sedría positivu pa la visibilidá social del idioma, y non estes mentires y chancies.
¡Llamazares mentirosu y oportunista! ¡Izquierda Xunida, Izquierda Fundida!
Apaeció en Glayíu.org esta crítica al artículu referente al usu del asturianu por parte de Llamazares en Madrí. Queremos agradecer la crítica, ya que, tando tan avezaos nel nacionalismu asturianu al emporcamientu vía internet crítiques riguroses y ellaboraes son perpositives pa abrir alderique. Amás presta qu'esti modestu mediu dea pie a discutinios d'esti calter. A colación cola crítica fecha, que reproducimos íntegra equí y que ta roblada por Pablo M Testa atalantar delles coses:
ResponderEliminar1. Dende'l blogue nun fiximos denguna crítica xabaz nin de baldre al llabor llingüísticu d'IX nos conceyos d'Asturies. Anque camentamos que trabayen pocu nos conceyos col envís de normalizar l'dioma hai una realidá inegable, y nun ye otra de que les bases d'IX y dalgunos cargos llocales tienen compromisu col idioma. Por supuestu, a nivel nacional, nun podemos matizar les pallabres del artículu ( que ye a onde díbemos con elli) pol simple fechu que pocu bonu podríemos dicir d'IX nesi sen.
2. Por supuestu que'l fechu de que-y prohiban a Gaspar Llamazares emplegar l'asturianu daría muncha visibilidá al asturianu y sedría una bona publicidá pal mesmu y pa espeyar la necesidá d'algamar la cooficialidá. Nun ñegamos esa realidá, pero dende esti blogue nun asperamos que seya Llamazares el políticu qu'en Madrí faiga visible l'idioma, nin que seya esta persona la que tea l'enfretamientu col Estáu por esti drechu fundamental.
3. Dende Frayando Cadenes acoyeríemos con gratitú que'l ciudadanu Gaspar Llamazares emplegara l'idioma del país nel Congresu.
4. Pesie a qu'acoyeríemos con bona gana esi fechu, llamentablemente, y na llínia del artículu, hemos de dicir que la confianza alredor de la defensa l'idioma n'IX y nos sos cabezaleros ye mínima dende'l soberanismu d'izquierda y esti blogue nun pue inorar esi fechu, nin abstraese del mesmu. La realidá ye bien murnia y la falta de confianza pergrande. Quiciaves magar d'esto IX entama a involucrase daveres pola oficialidá y hai que camudar enforma esa actitú haza'l so llabor. Pel momentu la realidá ye la qu'hai y nun dexa de poner a IX como un de los responsables de les polítiques etnocides del Estáu y el Gobiernín.
Les llames de Llamazares
ResponderEliminarNun soi yo un defensor de IX. Nin soi yo un defensor de Llamazares. Nin soi votante, yo. Nun me presta.
Lleí, fai unos minutos, un artículu nel blog Frayando Cadenes, blog que me presta lleer de xemes en cuando, y nun me paeció un bon artículu. Nun too lo que se pona nesi blog me va prestar; nun too lo qu'ún escribe ye del gustu del d'al llau.
Sicasí, me paeció pocu rigorosu. Faise un artículu estrapayaor escontra un dirixente políticu, pero bastante vacíu.
Ciertu ye qu'IX en munchos aspeutos foi, digamos, non produtiva en xeneral, non en llingua, sinón en toles fasteres de la vida social asturiano; entá asina, sedría bono ver les coses que tamién se fixeren bien... más que na, pa nun cayer na babaya histeria del "non, porque non y porque non".
La cooficialidá del asturianu, como toos y toes saben, ye materia escaecida y arrequexada pola nuesa clas política, de forma amás evidente y de forma amás inducida; por embargu, esiste, bramente, una cooficialización de la nuesa llingua en dellos conceyos dende l'añu 1997. Bimenes foi esi primer conceyu que la cooficializó, y nesos años yera IX quien tuviere nel gobiernu d'esi ayuntamientu. Foi, too hai de dicilo, un precedente pa qu'otros ayuntamientos siguieren el so exemplu. La so aplicación son coses d'otru alderique (yá sabemos cómo ye la so xestión en Xixón).
L'artículu refuga lo dicho por Llamazares, por ser ésti un diputáu y non el cabezaleru de la organización. Ye obvio qu'elli nun falará tanto como Cayo Lara. Ye diputáu por Asturies, mos preste o non, y falar na so llingua (tamién veremos si lo fai) ye daqué de lo que tendríemos de tar arrechosos. ¿Nun lo faló enantes? Enxamás ye sero si la dicha ye bona...
¿Que nun-y van dexar falar n'asturianu nel Congresu? Nun hai meyor visibilización del inquiz qu'esponiéndolo dafechu a la so prohibición. Elli entamará falando n'asturianu y cada pallabra qu'elli pronuncie n'asturianu sedrá una seña más de que debe ser una llingua llegal como toles demás. Nun me paez mal. ¿A caso'l nuesu collaciu Fer calló y nun faló n'asturianu nel so xuiciu na Audiencia? ¿A caso nun tuviemos falando n'asturianu cola alministración sofriendo les so quexes y la devolución de les nueses fueyes? ¿Nun fuimos multaos por usala? ¿Nun la seguimos usando?
Si ye un pasu p'algamar votos, que los algame si quier. Si IX dixere y fixere que la xornada llaboral camuda a 4 hores, qu'okupar nun fuere delitu... etc. m paecería perfeutu. ¿Votaría-yos? Non, pero nun me quexaría de les coses poles que toi. Y toi porque la mio llingua seya falada por tol que quiera y au quiera, y eso inclúi-y a elli. Toi porque nun se me siga arrequexando por falala y la so posición me gabita....
Veremos aú llega y lo qu'algama. L'artículu pudo ser d'otra miente, una especie de: ¡Curiáu! y non un ¡Non! (direutu).