Patronal y sindicatos UGT y CC.OO. roblen nuevos recortes

Na tarde d’ayeri 25 de Xineru algamaren el segundu alcuerdu “pal emplegu y la negociación colectiva” que supón nuevos ataques nel ámbitu llaboral.

Les organizaciones patronales CEOE y CEPYME xunto colos dos sindicatos españoles Comisiones Obreras (CC.OO.) y Unión General de Trabajadores (UGT) roblaren n’actu públicu na tarde d’ayeri un nuevu alcuerdu en materia llaboral, que según califiquen dende dellos ámbitos sindicales ayenos a estes organizaciones, ye una “nueva baxada de pantalones” que supón otra vuelta un ataque ensin precedentes a los drechos llaborales de los y les trabayadores nel estáu español y poro, tamién n’Asturies.

Asina destaquen del alcuerdu firmáu la total ausencia de crítica hacia’l papel principal que protagoniza la empresa privada, responsable cimera del esbarrumbe económicu provocáu pola naturaleza especulativa de la so actividá y onde nuevamente la patronal refuga la so culpabilidá, y señalando esplícitamente al pueblu –cola robla de les dos organizaciones sindicales mentaes- al señalar como “dificultaes observaes p’aumentar l’actividá económica y creación d’emplegu” “l’adeudamientu de les families cola so incidencia sobre’l consumu y la inversión agregada” y la “delda pública”, pa rematar a la fin, señalando como elementu determinante na perda de competitividá “el mayor crecimientu de los precios interiores y de los salarios nominales nel estáu español en rellación colos países de la zona euru y del restu de la X.E.”

Nesti sen, el documentu introduz una serie nueva de midíes y afonda n’otres de recién alcuerdu onde vencéyase la recuperación económica n’esclusiva a la “recuperación de los márxenes económicos” esto ye, a les ganancies empresariales, non al traviés de la mayor productividá mediante meyores técniques nel procesu productivu, sinón favoreciendo’l consumu y les aides públiques a la empresa privada. Además demanden más esfuercios por parte de los trabayadores asalariaos afondando na famosa “flexibilidá llaboral” onde la negociación nes empreses primará penriba del conveniu coleutivu, al atalantar a aquella como “l’ámbitu más afayaízu pa configurar estes materies” siendo esta flexibilidá un conteníu mínimu a incorporar polos convenios y onde según despliquen, esta flexibilidá tendrá como consecuencies na materia salarial “qu’un porcentaxe de la cuantía salarial, va facese depender de la situación y resultaos de la empresa”. Del mesmu mou, la revisión salarial ya nun va tar venceyada al IPC como hestóricamente se vien demandando, sinon qu’introducen un porcentaxe máximu anual pa los tres años vinientes de solu un 0’5%, mui perbaxu de la inflación que carecemos y que s’asuca pa esa dómina, lo qu’en términos real supón un descensu nel poder adquisitivu de les families y onde almítise la capacidá del patrón pa revisar incluso esta roína medra nel so porgüeyu. A lo cabero, en cuantes a negociación coleutiva reconozse la “facultá patronal pa inaplicar na empresa les condiciones de trabayu ya pautaes nos convenios sectoriales, concretamente condiciones d’horariu; distribuición de la xornada; réxime del trabayu a turnos; sistema de remuneración; sistema de trabayu y rindimientu; funciones; asina como les causes pa la inaplicación de les condiciones salariales”.

Fonte: Infoasturies.net