Conceyu Abiertu por Llangréu solicita un mayor compromisu del conceyu colos paraos y paraes.

Los paraos y paraes de la cuenca’l Nalón organizaos baxo la “Plataforma de paraos” vienen de facer una riestra de propuestes a desendolcar pol Ayuntamientu de Llangréu, énte les qu’atopamos el tresporte público de baldre o’l pagu del mínimu en dalgunes tases municipales pa quienes lleven más de dos... años en paru, como midíes que, dende la Casa Conceyu, ayuden a ameyorar la situación na que s’atopen les miles de persones en situación de desemplegu, nel nuesu conceyu y nos averaos.

Dende CA por Llangréu queremos amosar el nuesu sofitu a los paraos y paraes nes sos vindicaciones que, independientemente de propuestes concretes, son llexítimes y asoleyen la demanda qu’esiste énte la ciudadanía pa que l’Ayuntamientu seya un organismu muncho más enfotáu na situación social de lo que ta anguaño, onde sólo importen los intereses específicos del PSOE y la so rede clientelar texía a lo llargo los años.

Dacuando la Casa Conceyu debería de tar siendo una institución dinamizadora, que xenerare bientar social y movimientu económicu, atopámonos con que la so situación real ye de regresión dafechu nes prestaciones qu’ufierta, amenorgándoles nunos casos, y privatizándoles n’otros, siempres atendiendo a intereses ayenos a les clases populares.
Poro, Conceyu Abiertu por Llangréu desixe a los representantes políticos del conceyu’l desendolcu de midíes decidíes que seyan quién a poner en marcha aniciatives d’ayuda socioeconómica y d’actividá llaboral nuna zona tan deprimía como la de nueso.

Sicasí, tamién consideramos que pa ello ye imprescindible finar cola cadarma clientelar y empresarial del PSOE y el so entornu nel nuesu conceyu, aición que nun tien más camín qu’ún mayor protagonismu de les clases populares nes instituciones municipales, bien al traviés d’una tresformación del modelu políticu del conceyu, o mediante l’entamu d’organismos o comisiones de calter popular que participen na toma de decisiones.