Fai! fala de "violación de l'autonomía universitaria" y pide amparu al Rector.

Fai! fala de "violación de l'autonomía universitaria" na entrada inxustificada y reiterada de la policía nel Campus de Santuyano y pide amparu al Rector
La organización, presente nel Claustru de la Universidá d'Uviéu, fexo públicu un comunicáu nel qu'espresa la so indignación pola violación reiterada del espaciu universitariu per parte d'axentes de la policía, n'actitú despreciatible y humillante pa coles/os presentes, a la gueta d'estupefacientes ente los y les estudiantes.

Sigún se denuncia, el pasáu 22 d'ochobre de 2009 nel campus d'Humanidaes de la Universidá d'Uviéu, un grupu d'axentes entamaron una inxustificada redada a la gueta d'estupefacientes ente les y los estudiantes que s'atopaben nesi intre na terraza de la cafetería del campus, espaciu que ta embaxo de la xurisdicción universitaria pa la que la institución tien contrataos a vixilantes de seguridá privada. La persecución, mesa a mesa, n'actitú de superioridá, dexó ablucaos y ablucaes a les y los presentes, en primer llugar, pola entrada nun recintu universitariu, supuestamente ensin permisu del Rector nin d'otros muérganos universitarios, y en segundu llugar poles maneres de los propios funcionarios, qu'amás abandonaron les dependencies ensin la incautación de sustancies prohibíes.

Nun ta de más recordar que, la constitución española nel so artículu 27.10 recueye'l derechu a l'Autonomía de la Universidá, como garante de les llibertaes y la independencia frente a les presiones esternes qu'impidieren la llibertá de cátedra, la difusión cultural, del saber y l'estudiu y la investigación, en virtú de lo cual la entrada de les fuerces de seguridá del estáu tien que tener el preste del propiu Rector universitariu.

Poro, y como nesti mesmu añu nun ye la primer nin la segunda vegada qu'esta escena se repite: acosu a les y los estudiantes nel campus con perros antidroga, nuna actitú que Fai! cree mui alloñada de toa óptica academicista y de formación cultural, la organización pidi amparu al Rector de la Universidá pa que torgue cualquier tipu de violación y asaltu de los derechos de les y los universitaries y universitarios n'ámbitos académicos y de divulgación científica.

Asinamesmo, Fai! quier dexar afitada la so defensa de la llegalización de les drogues prohibíes anguaño, pa finar cola lacra de la economía somorguiada que xeneren y la hipocresía d’una sociedá que mira pa otru llau mentres narcotraficantes y el propiu sistema saquen tayada. Una llibertá de consumu que nun puede dexar de llau una pernecesaria información a la mocedá y al restu de la sociedá sobre les consecuencies sanitaries del consumu de toles drogues, ensin escepción, dende l’alcohol y el tabacu a les denomaes “drogues dures”, recordando que la mesma Universidá ye ún de los espacios más importantes p'afondar na información y formación de la sociedá y, n'especial, del coleutivu más xuvenil.

N'Uviéu, a 30 d'ochobre de 2009