martes, 18 de mayo de 2010

Sobre xuntances y el suicidiu coleutivu


Una de les munches conclusiones a les que llegamos munchos va tiempu dende’l nacionalismu d’izquierda foi la de la necesidá de que’l nuesu movimientu políticu rompiera esa imaxe de cara a la sociedá asturiana de que la mayor de les nueses esmoliciones, y dacuando parecía que la única, fuera la cuestión llingüística ya indentitaria. Apegase a la rialidá, plantegando alternatives énte los milenta asuntos a los que s’enfrenta una sociedá y facese como fuercia política seria yera y tovía tien que ser ún de los grandes oxetivos a algamar. Por ello, a grandes rasgos, ye infumable esti alderique abiertu sobre les posibles xuntances de cara a les eleiciones del añu prósimu onde s’entemez derecha ya izquierda, nacionalismu y rexonalismu, talo como’l que quier mecer l’agua col aceite y que d’ehí salga daqué homoxenu.

Yo, pela mio parte, quiero poner equí’l mio granín pa romper esa dinámina que ta creándose na rede y qu’a traviés d’ella parez que lo políticamente correutu ye querer la xuntanza interclasista pa la salvación nacional ¡y probe del que quiera quita-yos la ilusión! Y nun ye que les dinámiques se creen polos posibles bilordios anónimos, que nun dexa de ser lo de siempres, sinon por que xente de renome dientro del mundín asina se posiciona n’artículos y entrevistes.

Desconozo au tan les fontes argumentales de cada cual. Yo, como trabayador con una formación académica media y qu’al igual que la inmensa mayoría afronta hipoteca, creitos y sacar alantre a la familia d’una forma mui llimitada, agüeyo la prensa nacional, estatal ya internacional, y énte los mios güeyos, y énte los de cualquier que lo quiera ver, aparecen situaciones aplastantes. Esta selmana pasada’l presidente del BCE falaba de la peor situación económica dende la Primer Guerra Mundial, nel Estáu español anúnciense los recortes sociales que toos sabemos depués del interminable aumentu del paru d’estos años, en Grecia ta pasando lo que ta pasando. Repítennos na prensa sobre los xabaces ataques al euro y a los mercaos europeos per parte de los grandes especuladores, los mesmos qu’entamaron esta crisis... vamos, lo que puede ver cualquiera.

Y nel asturianismu dellos empálmense cola oficialidá, la identidá y l’autogobiernu, talos como los burros colos güeyos tapaos pol amu de tal manera que namás pueden mirar p’alantre y non pa los llaos. Falen de xuntanos pola salvación de la patria, de facelu pol bien d’Asturies, asina, por un supuestu “bien” que ye abstractu, vacíu, ensin definición dala más alla de la cuestión de la llingua ya identidá.

Tamos énte’l fracasu del sistema capitalista y tamién énte’l fracasu de tol movimientu anticapitalista por nun ser quien a presentar una alternativa política nos países desarrollaos. Tamos énte’l fracasu del PP y del PSOE porque fracasó’l so modelu económicu anque pel momentu y pa llargu esti modelu nun vaiga camudar un res y, por estensión n’Asturies, tamién énte’l fracasu d’IU por ser muleta y tonto útil de la FSA. Y ye asina, falando claro y ensin enguedeyase con términos complexos nin con teoríes económiques que naide ye a pescanciar, como entiende y entendemos les coses la mayoría de la sociedá. Tamos énte una situación na que gran parte de la sociedá asturiana va a tener la esperanza en que daquién presente un cambiu, y na mio opinión ehí debería enfotase l’asturianismu d’izquierda. El nuesu llabor principal debiere de ser el d’intentar humanizar esti capitalismu nesti requexu del mundiu desarrolláu que ye Asturies.

Sobre la mesa tien que ponese un modelu de país y un modelu de sociedá y alrodiu de quien los comparta entamar a facer un camín xunitariu. Les últimes noticies en prensa abren pasu a la esperanza de que dende’l nacionalismu d’izquierda pueda facese daqué seriu y, lo más importante, con posibilidaes. Y ye importante sorrayar que tamos énte la posibilidá de tener posibilidaes, pues seguir dando vueltes nel circulu de la marxinalidá política sabemos toos pa lo que val. Ye hora d’apencar, d’intentar interpretar de la meyor manera en que momentu tamos y posicionase correutamente. Zarrase na oficialidá y la identidá y l’autogobiernu ye dir munchos pasos atrás, ye tornar a una situación que nel so día ya vimos que yera insuficiente pa convencer a la sociedá asturiana.

Per últimu, dicir que como ye un articulu d’opinión personal decidí zarrar el foru del mesmo, invitando a too aquel que lo desee a que nos apurra a info@aruelu.com los sos retruques pa ser espublizaos a mou d’articulu d’opinión firmáu, como ta esti, con nome y apellidos.

Félix Fernández

No hay comentarios:

Publicar un comentario