Les quinieles sobre coaliciones, xuntances y pactos casi monopolicen d’un tiempu a esta parte los alderiques del mundín nacionaliegu, tantu nes propies organizaciones polítiques del nomáu nacionalismu asturianu como sobre too na rede o na cai, si entendemos por voz de la“cai” lo que sintimos nos requexos nos que somos veceros la xente próxima a parte del asturianismu cultural y mundu nacionaliegu de chigre, qu’a la fin ye en bona midía lo que dende dellos púlpitos vien proclamándose “eleutoráu nacionaliegu”. Ensin dubia, esti clima vien propiciáu pola fartura d’años perdíos en lluches, remociques, refundaciones y creaciones de más y más proyeutos nuevos y ilusionantes, lo qu’acabó xestando y faciendo que termine afitada la sensación xeneral d’estancamientu y ciertu fedor a agua muerto, situación que daría pa otru llargu alderique onde podríemos analizar les responsabilidaes y postures adoptaes por unos y otros a lo llargu d’esti tiempu, pero esi nun ye’l finxu que m’animó a escribayar estes llinies.
Toi seguru qu’hasta equí más o menos podemos tar casi tol mundiu d’alcuerdu, pero a partir d’equí entama’l matu y ye qu’una vegada que foi reconocíu esti climax como daqué real y común entamaron a movese les pieces y delles voces surden equí y allá asoleyando postures y conduciendo la situación, ya digo que polo menos en medios non oficiales, hacia un debate nel que paez qu’además ta prohibíu falar de tolo que nun seyan metes tan grandilocuentes como “salvar la nación”, “recostruyir Asturies”, desterrando del debate tolo demás –que divide, alvierten sabiamente- nel porgüeyu de “la Patria”. Ensin dubia estes son les postures más conservadores qu’habremos de sintir pero nun serán les úniques puestu qu’ellí y aquí serán munches les voces y cantos de sirena que mos llamen a abandonalo too y correr en brazos de nun se sabe quien pa entamar con esta gran xera, la de costruyir el Frente Nacional. Nun ye qu’esto nun fuera esperable, nin lóxico, nin siquiera preocupante, lo que si ye preocupante ye l’ausencia de voces contraries a estes teoríes conservadores y antipopulares, preocupación que tórnase plasmu cuando ún ve que quienes con más fuercia vienen defendiendo estes posiciones fondamente enquivocaes nun son voceros de partíos de la drecha, non. Les cabeces visibles del asturianismu de dreches entá nun apaecieren nel escenariu y son precisamente los qu’hasta agora ficieron de representantes de la izquierda, dalgún inclusu reclamándose marxista quienes machaconamente llamen a dexar de llau al pueblu pa salvar la nación. ¿pero existe una nación al marxe del pueblu? ¿Como pue ser que destacaes persones del mundiu nacionaliegu d’izquierdes ten faciendo de voceros de xente qu’entá sigue na solombra y nun fizo por arrimase a nos? Más bien lo contrario, bien a les clares y de forma pública'l partíu de Marqués desmarcóse totalmente de cualquier averamientu a los separatistes. Pese a too alcontrámonos con que’l discursu del interclasismu sigue sonando con fuercia, pidiendo a la izquierda que seya xenerosa, renuncie a los sos principios y corra a les manes d’UAS p’articular esa nueva organización que solu tien de tener como finxu salvar la patria. A mi prestaríame saber onde tan esos nacionaliegos a seques –o incluso de dreches- que polo vistu tan sin partíu o nos dos anteriores nomaos, yo como munchu conozo rexonalistes y autonomistes y cuidáu yo nun-yos quito nin-yos pongo, ye lo qu’ellos dicen ser. Aún aceptando’l supuestu nacionalismu d’estes persones daquién tendrá que desplicame porque tien que ser siempre la izquierda la qu’arrenuncie a los sos principios pa facer acomodu al centru y la drecha y non al revés y ye que tal paez que la patria ta pidiendo a voces soluciones lliberales eso si, n’asturianu. La única xustificación que me paez alcontrar a estes barbaridaes ye que colos teóricos votos que diba amestar UAS a esa gran xuntanza pola patria díbemos sacar el diputáu: ya tamos col cantar de siempres. Resulta que nun momentu de crisis económica internacional que vien a xuntase cola crisis permanente inducida n’Asturies dende hai más de trenta años, la izquierda nacionaliega tien que xuntase nun solu frente perdiendo tola so razón de ser pa ponese a pregonar pola oficialidá y pola nación, pola patria. Claro ho, ye lo que ta pidiendo a voces esa nación compuesta por más d’ún millón de persones y onde unes cien mil van alcontrase desemplegaes nesti añu 2010 y cientu sesentamil persones viven perbaxu l’umbral de la probeza; y subiendo. Como apunte pa percontiar estes teoríes del frente nacionalista asegúrannos qu’esi diputáu na Xunta Xeneral diba sirvir a tol movimientu pa espoxigar y entrar nos conceyos y más, nes Cases Conceyu. Dicir esto tien tanta lóxica como asegurar que la clave pa llevantar una casa con toles garantíes ye entamar con un bon teyáu que permita facer los cimientos atechaos debaxu y ensin moyase; ye un disparate.
N’Asturies necesitamos superar l’atomización del nacionalismu, nun pue ser que pa unos diez mil votos que ye’l tope hasta’l momentu compitamos tres o cuatros opciones bien asemeyaes. De setenta y ocho conceyos que tenemos anguañu nel país el nacionalismu asturianu ta organizáu como muncho nuna docena d’ellos y enriba compitiendo ente si nesos mesmos conceyos. Poro, lo principal tien de ser algamar un alcuerdu que permita facer candidatures de base qu’eliminen esa competencia y permita presentase ellí onde hasta agora nun pudimos presentanos. Toi convencíu que’l modelu a siguir tien de ser el de les CUP catalanes, con dellos matices, pero esi tien que ser el nuesu finxu, la creación de conceyos populares onde involucrar nun solu al piñu de militantes que tengamos nel propiu pueblu, sinon a la xente independiente que pueda comulgar colos nuesos plantegamientos pero qu’enxamás diera’l pasu a militar n’organizaciones, ente otres coses pol cúmulu d’errores que venimos arrastrando. Además dende’l mio puntu vista personal, nun podemos cayer nel planu ideolóxicu y tácticu nel erru d’escaecer la tradición del pueblu asturianu y poro, del propiu nacionalismu n’Asturies. N’Asturies hai una tradición d’izquierdes qu’esixe polítiques socialmente avanzaes. Arrenunciar a esto y más nel contestu socioeconómicu d’anguañu y del que dexé dos pincelaes enriba ye tantu como certificar la defunción del movimientu nacionaliegu asturianu, porque si nun hai militancia nacionaliega, si entá milenta asturianos y asturianes viven inducíos nun mundiu onde siquiera cabe plantegase la contraposición de lo asturianu colo español, si la principal preocupación de la patria, esto ye, del pueblu en forma de cada persona individual nun ye la situación de la cultura o les rellaciones ente l’autonomía y l’estáu sinon alcontrar o caltener un puestu de trabayu que-y garantice’l pan ¿como dexar esto nun segundu planu subordináu a una actitú méramente nacionaliega? Si queremos llegar a la xente y lo que ye más, convencela y gananos la so confianza convirtiéndonos nel partíu del pueblu, nun podemos tracamundiar el deséu de dellos seutores ya convencíos y más o menos averaos a los partíos esistentes que nagüen por un partíu fuerte en clave nacional y que lluche con fuercia básicamente por temes como’l de la oficialidá de la nuesa llingua, colo qu’en realidá ta pidiendo a voces la xente na cai, en cualquier conversación nel supermercáu, nel parque o nun chigre eso si, nel mundiu real. La oficialidá ta claru que ye importante, nel planu cultural ye pa mi’l puntu númberu un ensin discusión y nun ye negociable nin pue camudase por dengún tipu prebenda, pero la llingua asturiana nun da de comer y desgraciadamente anguañu con munches necesidaes básiques insatisfeches, nun pue ser el pegoyu principal nel qu’articular dengún proyectu políticu que pretenda ser popular o cuntar col sofitu de la xente.
Hai que trabayar dende los conceyos, ganar presencia ellí onde entá nun hai dengún partíu nacionaliegu, sacar conceyales y algamar gobiernos llocales. Esto algamarémoslo dende la xunión y col trabayu en comuña, ehí entra la xuntanza de toles fuercies polítiques, con un programa social ellaboráu y qu’atienda a los problemes de la xente y pa ello lo primeru ye saber atender y facer analís de la realidá que tenemos alredior pa non quedar en círculos cerraos sientiendo una y otra vuelta lo que nos queremos oyer. Cuando seamos quien a esto y tengamos unos pegoyos bien afitaos será’l momentu de plantegase l’asaltu a la Xunta Xeneral tal y como ficieron n’otres naciones movimientos políticos del mesmu calter que’l nuestru. Lo contrariu será dir d’error n’error hasta’l batacazu final.
Iván Martínez. Militante d'Andecha Astur y de Darréu.
No hay comentarios:
Publicar un comentario