La manifestación convocada pol Ensame República Asturiana contra los Premios Príncipe suma nuevos apoyos. Les organizaciones independentistes Fai!, Darréu y Sofitu y el sindicatu CSI van tar presentes.
L’Ensame República Asturiana (ERA) convocó, como nos últimos años, una manifestación contra los Premios Príncipe. La protesta va arrancar el prósimu sábadu 23 d’ochobre, a les 13 hores, de la Estación del norte d’Uviéu.
El colectivu antimonárquicu critica que los Premios Príncipe tán creaos por “vieyos herederos del franquismu nun intentu intentu de llavase la cara y xustificar, y democratizar, una institución como la casa real que ye heredera del franquismu”.
Pal ERA estos premios, a la par que’l “títulu créau pola corona de Castiella pa intentar calmar les continues revueltes n'Asturies”, son una “humildación”. L’Ensame refuga amás, ente otres coses, que los premios se presenten como populares “cuando la presencia a los mesmos ta suxeta a invitación”, y que la Fundación Príncipe “manexe un presupuestu de 20 millones d'euros y se-y dean terrenos publicos n'Avilés”.
Amás de los convocantes, van sumase más organizaciones a la protesta. La Corriente Sindical d’Izquierda yá dixera’l pasáu martes qu’apoya la convocatoria porque “nun tamos pa mantener a families reales”; mientres que Fai!, Sofitu y Darréu tamién confirmaron la so presencia na marcha contra la monarquía.
Fonte: Asturies.com
Señalar que tamién Andecha Astur sofita publicamente la manifestación republicana.
No hay comentarios:
Publicar un comentario