El Gobiernu d´España mete un retayu a los presupuestos d´Asturies del 8,8%

Los Presupuestos Xenerales del Estáu pal 2012 acuten p’Asturies una inversión de 506,95 millones d’euros, un 8,8% menos que la que recibió l´añu pasáu.

Asturies nun ye´l País onde más se nota la tisoria del Gobiernu d´España a la hora de controlar el déficit públicu, ye´l segundu, per detrás de la comunidá autónoma de Castiella-La Mancha, onde menos cai la inversión, si nun se cuenten los dos únicos países que van recibir más fondos que l’añu pasáu: País Vascu y Galicia.

La infraestructura que va llevar una suma mayor del Estáu ye la Variante de Payares, onde va invertir anguaño 210,58 millones d’euros, 25,38 millones d’euros más que nel 2011. Otra de les más importantes ye la inversión na Autovía del Cantábricu, que pasa de los 94 millones que recibió l’añu pasáu a los 67 millones d’esti añu, repartíos ente los tramos Llanes-Pendueles, Pendueles-Unquera, Navia-Tapia, Outur-Vil.lapedre, Muros-Las Dueñas y l’enllaz de San Roque. Nos presupuestos d’esti añu aparecen partíes nueves en comparanza col añu anterior, como 40,4 millones destinaos a pagar espropiaciones, 34 millones d’un empréstamu por El Musel y 5,8 millones destinaos a l’Autopista del Mar. En materia de comunicaciones ye tamién significativa la medría na inversión nel Aeropuertu d’Asturies, que xube de 4,4 millones a 12,8.

Una partida rellacionada cola financiación territorial que sí sube en comparanza col añu 2011 ye la de les tresferencies a les Comunidaes Autónomes, que medra nun 9,7%, hasta algamar los 27.734 millones d’euros. Sicasí, los Presupuestos Xenerales del Estáu nun recueyen la cesión de tributos estremada por comunidaes, polo que nun ye posible saber en que midida varia esta cantidá en comparanza col añu 2011. Sí se conoz el montante destináu a Asturies con cargu al Fondu de Suficiencia, un mecanismu destináu a cubrir la diferencia ente la necesidá de financiación de cada autonomía y qu’anguaño va tar nos 299 millones d’euros, 10 millones menos que nel 2011. Nel otru mecanismu destináu a iguar los desequilibrios económicos ente comunidaes, los Fondos de Compensación Interterritorial, Asturies ve menguaos los ingresos nun 18%, hasta llegar a los 24.838 euros.

Amás, el ministru de Facienda y Alministraciones Públiques, Cristóbal Montoro, na rueda de prensa depués de la presentación de los presupuestos nel Congresu, mostróse inflexible tocante a los topes de déficit de les Comunidaes Autónomes. En concreto, sobre los pactos pa formar Gobiernu n’Asturies y Andalucía aseguró que los alcuerdos ente los partíos van tener que respetar los compromisos de déficit públicu y alvirtió que, si dalguna fuercia nun ta convencida d’ello, que nun se meta nel Gobiernu, nuna alusión velada a Izquierda Xunida, que yá mostrara la so oposición a los topes de déficit impuestos a les Comunidaes Autónomes, al considerar que respetalos diba obligar a recortar en servicios esenciales, como sanidá, educación y bienestar social.